1. Ginipai rengbe ka manga rani ho du ani ni rogo gberãrago?

ANI NAGBIATIRANI na akpakarapai rogo aˈuru ni basasa na ani kini mangi asadatise ka hihe. Ono si ima du ni mbumbuhe ka mangapai kuti gaani akpakarapai ho du ani ni rogo gberãrago. Sidu, si naida ani naabi gberãrago ni guhe rengbe ka dia gaani kido, wingbaduse, gbiati ngbarago kusayo. Asanza 24:10 naya: “Ka [mo du rogo gberãrago] ti uru gberãngbi, omero adu toni gbua.” Sidu, ho du ani ni rogo gberãrago, ani ima rengba kadu a rurungbura na ti gu regbo re, si ni bambumbuhe ka hi akpakarapai.

2. Gini apai rengbe ka sarani ani du rogo gberãrago, na ginipai ani nika sakapai tipaha rogo gi kekeapai re?

² Ani rengbe kadu na gberãrago mbiko dungu apai—agu akuraha kinaho ka aboro abingo ho ya, na agu akuraha kinaho rengbe aboro ka bihe. Agu apai re nakoda gaani azangarengba, arungbura, gbiati akaza. Berewe a, si ima rengba ka koda pa zanga ani gbia gu sunge du ani na nyemuhe tingba ga Yekova sunge watadu pa tungusa ani pai rogo gu dagbarago badungu aboro adeganga tuyo kuti gaani pangbanga rogoho ya. Rogo gi kekeapai re, ani nika sakapai tipa bete apai nga gu rengbe ani ka mangaha tipa ka diabe gberãrago.

3. Ginipai rengbe ka undo rani ani du na ruru bipai tipa gaani azangarengba?

³ Si ima rengba kadu taata furani ani sonosi iraira bipai tipa gaani azangarengba na arungbura. Sidu, ani ima rengba ka berã gupai nga, mbiko ani namanga aingahe, Yekova aidanga ani raki rogo Paradizo te. Ngbatunga gu berãpai re ima rengba kadu nikerehe. Wai du si aida ani naabi gaani azangarengba? Ziazia Kekeapai nape gupai nga, aboro dunduko “aingi ainga” kparakusayo ti kina Yesu ingaapai aadunga tiko ya. (Rom. 3:23) Ono Yekova amaanga berãko kuti gaani aingahe watadu ka ida ani du ni rengberengbe  rani te. Kuba gure, ko nga gu Barani nga boro nyemuse naida ka undo rani. Ko a na zerangbaduse. Ko nabi gu asadatise abi ani amangaha tipa ka sovura kuti gaani arungbura na ka diabe gu iraira bipai du ani na ni tipa tirani, na ko regerege ka undo rani.—Rom. 7:18, 19.

4-5. Ringbisihe kuti 1 Yoane 3:19, 20, ginipai naundo awirina ue i sovura kuti gberãrago?

⁴ Oni bingo agu akpiapai nga ga Deborah na Maria. * Ho Deborah adu ni ni gude, gari aborokporo anaamanganga pai na ri rogo nyemuse yo te na gi pai re asa ri ri du na gbegberẽ bipai tipa tiri. I anaatambuanga ri dedede te. Si kini sa gupai nga ri sonosi iraira bipai tipa tiri. Ho ri anaamanga tooni aingahe ni, ri anaabi tiri nga ka ri mangingo ai pai ni ruruhe te. Maria adu na kina gu ngbatunga kpakarapai re. Agumeri anaaba zee ti ri. Ni sangbana gipai re, ri aabi tiri nga sunge tiri te. Fuo ri ye ku rogo rengo, ri aabi tiri nga ri arẽnga tipa kadu ni Dezire Yekova te!

⁵ Wa si avura du wo, agi awirina ue re aambunga iriso Yekova te. Tipagine? Mbiko i aba gayo tindiro ku auru Yekova rogo kparakpee yo. (Tam. 55:22) I awiriki gupai nga gu Barani du ngbangbaturũ yo nga boro nyemuse ima ino gupai nga, gu gbegberẽ apai mangi rani ima rengba ka sa gupai nga ani du na gbegberẽ bipai tipa tirani. Ono ko nabi gu weneapai abi a du ngbaduraniyo—nga agu asino ani arengbanga ka bihe kuti tirani ya.—Oni gedi 1 Yoane 3:19, 20.

6. Waigu rengbe boro kadu ka si du nga ni mangi kina gu bangisa ingahe ni aima mangaha mbata?

⁶ Boro ima rengba kaa manga nyanyaki asadatise tipa ka mbu manga gupai du ni gbegberẽhe. Ono ni ima rengba ka manga kina gu bangisa ingahe re berewe na ni kini du na gberãrago. Rengo ngaha nga, gbegberẽpai ho ti du boro na gberãrago ho ni namangi ingaapai ni te. (2 Kor. 7:10) Ono si aidanga ani naaberã gbe kurii gu ingahe ani namangihe si ki sa gupai nga ani naaberã gupai nga, ‘Sunge tirani te te. Na ka Yekova mbunga pai furani berewe te te.’ Ngbatunga gi iraira bipai re, mburuhe rii rengo te na si ima rengba ka sa rani ani mbu iriso Yekova. Oni tingidi gupai ani agedaha rogo Asanza 24:10 nga—ome rani nidu tooni gbua ho du ani ni na gberãrago. Sidu, si naida ani “saki pai” watadu ani mbakadi pai dagbarani na Yekova nindu ani fuoko rogo kparakpee yo na ki sana ko ko mbupai furani. (Yes. 1:18) Ho Yekova nika bi gupai ni nga rago ima gberã tiro nzunzu na gupai mo namangihe re na mo naˈasada nyanyaki ka manga ariapai, ko nika mbupai ambu foro. Kurigure, si naida mo ndu fuo abaakumba. I nika du na zerangbaduse ka undo ro mo du wenengai rogo toro yo berewe.—Yak. 5:14, 15.

7. Tipagine si aidanga ani du ti ni na gberãrago ya ka si du nga ani nasota ka manga gupai du ni ruruhe?

⁷ Bakumba du rimoko nga Jean-Luc du France yo ape gupai fu agu aboro nasota na gayo arungbura nga: “Anga ruru boro bangiri Yekova nga gu boro naamanganga ingahe ya te, ono gu  boro du na gberãrago tipa gani ingahe na ki asadi ka manga ariapai.” (Rom. 7:21-25) Sidu, ka mo aasota na arungbura, ka mo bingo tiro nga sunge tiro ya te. Mbiko gupai nga ani dunduko namanga aingahe amanga, ani dunduko naida na ga Mbori weneringise arẽnga aboro tipaha ya nga gu ko afuhe vurube motumo tumorii.—Ef. 1:7; 1 Yo. 4:10.

8. Ho du ani ni na gberãrago, da si aida ani ndu fuo ni tipa undo?

⁸ Awirinarani rogo dungurati nika fu ngarasaro furani! I ima rengba ka degatuyo furani ho ani aida ni ka fura, na i ima rengba ka ngarasa rani. (Snz. 12:25; 1 Tesa. 5:14) Joy, nga wirina Nigeria yo nasota na gberãrago aya: “Wari ka mi nidu ni areme zanga gu undo nga ga awirina? Awirina nga gu gopai nayugo gupai nga Yekova nakaragapai akaraga kuti gimi akparakpee. Mi ima wirika wai beyo rengbe mi ka ngarasa kura aboro du na gberãrago.” Ono si naida ani moi gupai ku berãrani yo nga dedede, awirinarani arengbanga ka ino pa gu regbo ani aida ngarasaro ti ni te. Sidu, si ima rengba ka ida gupai nga ani nduandu fuo gu wirina du na bakere inohe na ki pe gupai funi nga ani naida na undo.

9. Waigu Atambuahe 41:3 na 94:19 angarasa rani?

⁹ Ani ndu fuo Yekova tipa undo. Ka si du nga ani aima digo ni kaza tipa ngbanga regbo, si ima rengba kadu ni kpakarakpakaraha furani ani du na ruru berãpai. Wa vura duhe nga Yekova ahusanga rani ngba iiriwo gene awere te, ko nafu wasa afu furani na ko ima rengba ka fu gu ome furani ani aidaha tipa ka hipai. (Oni gedi Atambuahe 41:3; 94:19.) Ni kpiapai, ko ima rengba ka sa wirinarani Kristano ni ye ka undo rani na asunge kporo watadu ka ngbe ahe furani. Ko ima rengba ka sa awirinarani i mangi kparakpee na ani. Watadu ko ima rengba ka undo rani ani tingidi agu afugo wasa du rogo Fugoko yo, wa gu nga, gu wene maabangirise du kumbatayo nga ka raka ni rengberengbe rani zanga akaza na aigirã rogo gu vovo zegino naye kumbatayo.—Rom. 15:4.

10. Tipagine Isang aanyenga ti ni kindi na bakere gberãrago ya?

¹⁰ Isang nga guko naraka Nigeria yo agbiatiko na béno nga gu nasa gupai nga ko yosora kuba ko. Gako munganga agumba gupai fuko nga ko andunga ngba nduko berewe te. Isang aya, “Rago aima gberã nikerehe tire na mi kidu ni rungorungo re kpotoreyo.” Ya mo ko anye kindi na bakere gberãrago? Oó! Ginipai naundo ko? Isang aya, “Mi gbiati diare aambunga kparakpee fu Yekova na kini wisigi Fugoko te. Ani aima diaberã kadu na tambuahe tipa gu weneapai naadu berani, kodihe na gu gaani maabangirise nga ga raka rogo ga Mbori vovo zegino.”

11. Waigu Cindy agbia ngbarago ho ri aawoka ni nikerehe?

¹¹ Munganga ape gupai fu Cindy nga guri naraka Mexico yo nga, kere kaza gu du tiri nga gu naima rengba ka imo ri. Ginipai ri amangihe tipa ka hipai? Ho ri aagbia husa ni, ri amoihe ni gari sasa kaa manga dezirepai na aˈuru dũ. Ri akepai ki ya: “Gipai re naundo re mi namaaberã re kuti kura aboro angianga kaa maaberã re kina kuti wai i agba re, wai mi aaigirã, watadu wai mi aawoka ya. Gupai mi anaamangaha nga: Ti gu regbo mi anaafura na amunganga watadu agu aboro nangerafuo aborokaza, mi anaasanahe tipa gayo aborokporo. Na mi ki sanayo tipa ndu gupai i adiberã ti ni ka manga gi ngbatunga kpakarakpakara sunge re. Fuo gure, si anidu taata ka ino gupai rengbe ka zio ngbaduyo yo. Badunguyo ape gupai nga aborokaza ninaasananga yo dedede na gu sanahe nga, ‘Oni wai?’ te. Na badunguyo anaafu tambuahe fere tipa berã mi payo. Na agu akurayo anaafu gayo adresi afu fere watadu gayo namba terefuni. Sidu, ti gi kere regbo rogo gimi raka yo re, Yekova afu bakere ngbarago ku kpotore yo nga gu iriwo aima ti tire!”—Snz. 15:15.

12-13. Waigu rengbe agu aboro du na kaza watadu sosono aboro ka tungusapai, na sangbanaha rengbe ka ngia gine?

 ¹² Agu aboro nawoka watadu agu aboro naima nye kuba yo ima rengba kadu na gberãrago mbiko i arengbanga ka tungusapai kuti wai i akpinyemuhe te. Wa vura duhe wo, badungu aboro ima bi agu agene i atungusapai ngbaha. Wirina du rimori nga Laurel Amerika yo, api tipa agarã 37 rogo gu makana nga gu naaundo ri ri naonga! Kansa aduadu a tiri, na i ki ima gbari ni dunguhe, na ri kidu berewe na kura kaza kpotose tiri. Ono gi kere akpakarapai re aarugusanga ri ti tungusapai te. Ri anaamanga dezirepai fu agu aboro nangera fuo aborokaza gbiati agu aboro nanaaye ku kpuri yo. Sangbanaha angia gine? Ri aundo aboro nga 17 i wirikipai tipa Yekova! *

¹³ Richard nga bakumba France yo na wene aberãpai fu agu aboro naima nye kuba yo ku kporo watadu du rogo agu aba i angerafuo sosono aboro watadu aborokaza rogoho. Ko aya, “Mi nafu gu berãpai nga i namaa bete abuku na amagazini rogo gu ba aboro narengbe ka bihe rogoho. Ho aboro nikaa susa ni, i nikaa bihe na kini sanahe tipaha, na gipai re rengbe ka sa yo i sakipai na agu aboro re. Gi sakapai re rengbe ka ngarasa agu awirinarani arengbanga berewe ka tungusapai kporo na kporo ya.” Agu aboro arengbanga ka guari kporo berewe ka mera ya, ima rengba ka mangasunge tungusapai a ni keka yo awaraga watadu ni mangayo dezirepai rogo terefuni.

14. Gini bawene kpiapai Bakindo Davide amoihe?

¹⁴ Dungu nduapai duho nga gu rengbe ka sa gupai nga ka ani gbianga kura sunge nga gu ani aidaha rogo ga Yekova sunge yo ya. Ni kpiapai, ani ima rengba ka gbinza nikerehe watadu kadu na agu akpakarapai nga ga kaza, watadu si ima rengba kadu nga kuraapai kinaho. Ka ani du rogo ngbatunga apai wa gure, ani ima rengba ka wirikapai ti gu kpiapai nangia ga Bakindo Davide. Davide aima du na bakere nyemu ka me ga Mbori yekaru, ono Yekova asia kura boro kia tipa ni mehe. Davide aima songoda gu boro i asia ni ni mangi gu sunge re na ngbadukoyo dunduko, ni fuko bakere dahabu na feda tipa gu sunge re. Ni rengo, Davide nga bawene kpipai furani!—2 Sam. 7:12, 13; 1 Peka 29:1, 3-5.

15. Waigu Hugues adibe gberãrago?

¹⁵ Mbiko agu akpakarapai nga ga kaza kpotose, Hugues nga wirina France yo, ambu mangasunge ni bakumba, na ko aarengbanga ka manga wiripai kporo te. Ko akepai ki ya: “Ti tonatonaha, mi aabi tire nga sunge tire te na rago aima gberã tire nikerehe. Ono tifuo bete regbo kusa, mi abi gupai nga si ni nyanyakipa pai fere tipa mi mbu du na gberãrago tipa agu apai mi arengbanga ka mangaha berewe ya. Sidu, mi aye kadu na ngbarago tipa agu apai mi aamangaha  kindi rogo ga Yekova sunge yo. Mi ima diaberã tipa kaa ndu kina kumbatayo kindi. Wakina Gidiona na gako akumba naadu biata kama, i dunduko naadu na mbugo—mi nikaa sovura kindi!”—Abasa. 8:4.

16. Ginipai rengbe ani ka wirikaha ti gu kpiapai nga ga amaraika?

¹⁶ Ruru amaraika nga bawene kpiapai. Ti regbo gu zogarago nangia ga Bakindo Aba, Yekova asana amaraika tipa i peke gayo aberãpai tipa wai ka nanga gu gbegberẽ bakindo re. Gu kura amaraika afu gu kura aberãpai. Ono Mbori asia maraika sa na ki gumba gupai fuko nga gako berãpai nika duadu na diabese. (1 Aba. 22:19-22) Ya mo gu kura ruru amaraika adu na gberãrago isoke kini berẽ gupai nga, ‘Tipagine mi ni gbarasi gimi regbo ti ni ka fu berãpai?’ Ni rengo, i aadunga na gberãrago te. Amaraika nzunzu na umbasitise na i naida taarimo dunduko ndu fu Yekova.—Abasa. 13:16-18; Yugo. 19:10.

17. Ginipai si aida ani mangihe ka si du nga ani na gberãrago mbiko ani agbianga kura amomu sunge te?

¹⁷ Ani tingidi gupai nga, gu bakere pa momu du berani nga kadu ni aDezire Yekova na kini tungusipa Kindo. Ani ima rengba ka gbia sunge watadu ani ima rengba ka zangaha, ono anga agi asunge re du nasarani ani du na nyanyakipa rani bangiri Yekova te. Ka ani du na umbasitise, ani nika du na nyanyakipa rani fu Yekova na fu awirinarani. Sidu, mo zungodi Yekova ko undo ro mo nye ni boro umbasitise. Mo berẽkurii gu wene akpiapai dunduko nga ga ga Yekova amoyambu naadu na umbasitise nga gu du rogo Ziazia Kekeapai yo. Mo fu tiro na kpotoroyo dũ ka mangasunge fu awirinamo ngba ai gu gene rengbe mo ka mangaha ngbaha.—Tam. 138:6; 1 Pet. 5:5.

18-19. Waigu rengbe mo ka gbia ngbarago ka si vura kaa ngera vurũ wa agu aboro du rogo gamo dagbarago aidanga ka gia wene pangbanga te?

¹⁸ Ya mo rago ninaagbera tiro ti kura aregbo mbiko gupai nga aboro aidanga ka gia wene pangbanga rogo gamo dagbarago te watadu mbiko kina bete aboro gbua mo agbiayo tiikporo? Rogo ngbatungapai wa gure, ginipai rengbe mo ka mangaha ka banda gamo ngbarago watadu ka kiisoho? Gu kura aberãpai gu du rogo gu sanduki nga, “Agu Agene Rengbe Mo ka Kiiso Gamo Ngbarago Ngbaha Gene Tungusapai Yo.” Si ni nyanyakipa pai a ani du na ruru bipai tipa sunge tungusapai. Ginipai gipai re ayugoho?

 ¹⁹ Ani tingidi gupai nga, gu bangua ndupai ani atungusapai ti ni nga tipa aboro ini rimo Mbori gbiati gako Kindo. Yesu aima yugoho ziazia nga, kina bete aboro gbua nika bi gu gene nandu sa unga. (Mt. 7:13, 14) Ho du ani ni gene sunge tungusapai yo, ani na gu momu nga ga mangasunge na Yekova, Yesu, gbiati amaraika. (Mt. 28:19, 20; 1 Kor. 3:9; Yugo. 14:6, 7) Yekova nangera tipa agu aboro naida ka irisoko. (Yo. 6:44) Sidu, ka boro aaidanga ka degatuni kuti gaani wene pangbanga ti gi regbo re ya, ni ima rengba ka degatuni ti kura regbo ka ani fura na ni berewe.

20. Ginipai rengbe Yeremaya 20:8, 9 ka yugoho furani nibipa sovura kuti gberãrago?

²⁰ Ani ima rengba ka wirika badungu apai be gu nebi nangia Yeremaya. I afu gu dagbarago fuko nga ga tungusapai nga gu naadu ni kere kpakarakpakaraha. Aboro aagbarasa rimoko na kini ũmo ko “na uru pitipiti kindi.” (Oni gedi Yeremaya 20:8, 9.) Ti kura regbo sa, ko adu na bakere gberãrago na ko ki idi ka mbu tungusapai. Ono ko aambunga ha te. Tipagine? Mbiko “sangba Yekova” adu wakina we rogo Yeremaya yo, na ko aarengbanga ka kisoho koyo te! Kina gu bangisapai re rengbe kadu tipa rani ka ani hiisi berãraniyo na ngbaduraniyo na Fugo Mbori. Si nga kura ndupai si aida ani naawisigo Ziazia Kekeapai ti ni naˈauru dũ na kini berẽkuriihe. Ni sangbana gipai re, ani nika du na bakere ngbarago gene tungusapai yo na badungu aboro ki degetuyo furani.—Yere. 15:16.

21. Waigu rengbe ani kadu na diabese rogo gu vurayo ani asoho kuti gberãrago, ka si vura du nga kina ginipai naye na ni vurũ?

²¹ Deborah i nifura tipa ri kusayo aya, “Satana namangasunge na gu ũvura du na bakere ome ti ni nga gberãrago kuti rani.” Ono Yekova du na bakere ome tiko kisusi Satana gbiati gako aũvura dunduko. Sidu, ka mo du na gberãrago mbiko ai ndupai, mo zungodi Yekova tipa gako undo. Ko nika undo ro mo mangipai kuti gamo azangarengba na arungbura. Ko nika undo ro aundo ho du mo ni na kaza. Ko nika undo ro mo du na ruru bipai tipa agu amomu nga ga sunge du rogo ga Yekova riigbu. Na ko nika undo ro mo du na wene bipai tipa gamo sunge tungusapai. Kurigure, mo kpari fu gu Bamo nga boro nyemuse na ki pepa gamo apai dunduko fuko. Na gako undo, mo ima rengba kadu na diabese rogo gu vurayo mo asoho kuti gberãrago.