1-2. Tipagine si aida aKristano dunduko wirikipai ti ni tipa gu zingabekpio nga ga ngbangbaturũ?

BADUNGU agu aboro nairiso Yekova awere namaabangiriyo tipa ka raka nyeanye kindi auru kpotosende ane. Ono gu bete aKristano Yekova nambedi yo na gako toro na gu maabangirise nga ga raka ngbangbaturũ yo fuo zingisayo yo be kpio. Gi mbedimbedi aKristano re na bakere nyemu ka ino wai gayo raka nika du ngbangbaturũ yo, ono tipagine si aida agu aboro du na gu maabangirise nga ga raka auru kpotosende ane wirikipai ti ni tipa gipai re? A wa ani nika bihe, agu aboro nika zinga be kpio ka ga ku ngbangbaturũ yo nika ye aye a na amaku fu agu aboro du na gu maabangirise nga ga raka auru kpotosende. Singia ani na gu maabangirise nga ga raka ngbangbaturũ yo nyeanye kindi watadu auru kpotosende ane, ani dunduko si aida ani wirikipai awirika tipa gu zingabekpio nga ga ngbangbaturũ.

² Mbori arugu gu kura ga Yesu bambata abawiriki naadu rogo bambata kama agarã tipa i kepai tipa gu zingabekpio nga ga ngbangbaturũ. Gu mokedi nangia Yoane aya: “Ani nga awiri Mbori awere, i ata yugo nga wãi ani ka du te. Ani ini aina ya, ho i ka yugo Yesu ni, ani adú wa kina ko.” (1 Yo. 3:2) Sidu, mbedimbedi aKristano ainongo wai i nika du tifuo zingisayo yo ku ngbangbaturũ yo na gu kpotose nga ga toro te. Wa vura duhe wo, i nika bi Yekova abi ni bangiriyo ho i nika gbia gayo mosoro ni. Ziazia Kekeapai agumbanga futufutu apai dunduko tipa gu zingabekpio nga ga ngbangbaturũ te, ono gu mokedi nangia Pauro aima peka bete apai tipaha. Mbedimbedi aKristano nika du wa sa na Yesu ho ko nikaa ‘digisa ga abazogo apai ni dunduko na asia pai dunduko na tandu.’ Na gu ‘yangara vurarani nga kpio’ nika du dagba agu apai yo ko nika nyasariipa ha. Ni yangaraha tie,  Yesu gbiati agu aboro ko nika zogarago na yo kini moi tiyo gbiati ahe dunduko kutii Yekova. (1 Kor. 15:24-28) Nirengo, wene regbo du nika du re! *

3. A wa duhe rogo 1 AKorindo 15:30-32, pa ida Pauro kuti zingabekpio aundo ko ko mangi ginipai?

³ Pa ida Pauro kuti zingabekpio aima undo ko ko hi dungu akpakarapai. (Oni gedi 1 AKorindo 15:30-32.) Ko ape gupai fu aKorindo nga: ‘Mi nakpi na aˈuru’ dũ. Pauro ake gupai a nga: “Mi aso vura na anya Efesa no.” Si ima rengba kadu nga ko aafura tipa ta ko kpata na ndikidi anya rogo bangimbaro Efesa yo. (2 Kor. 1:8; 4:10; 11:23) Watadu si ima rengba kadu nga ko aafura tipa gu sogote nangia ga aYudo gbiati gu kura aboro nga aguyo naadu wakina “anya.” (Amo. 19:26-34; 1 Kor. 16:9) Singia ginigu naadu, Pauro aima gbiatiko na kereapai. Ono wa si avura du wo, ko adu kindi na gu kido nga apai nika duadu ni wenehe tipa ko ku kumbatayo.—2 Kor. 4:16-18.

4. Waigu gu maabangirise nga ga zingabekpio nanyakasi aKristano areme? (Oni bi gu sura duti kpotoho.)

⁴ Ani naraka ti kere aregbo. Kura awirinarani kinaho aboro amanga yo gbegberẽ. Agu akura yo kinaho naraka rogo agu aba du na vura rogoho, na ka i adunga ni bandabanda yo ya. Berewe a, rogo kura aringara, ga Yekova aboro na ranirii ka tungusapai te, na i nairiso Yekova airiso si ki vura du vurũ nga i ima rengba ka maa yo ku bambukiso yo watadu ka imo yo tipa mangayo ho wo. Ono tie, agi awirina re dunduko nandu kindi kumbatayo kaa iriso Yekova, na i nga wene kpiapai furani. I agundenga te, bambiko i ima ino gupai nga ka i vura kpi awere, Yekova na bawenepai berãko yo tipa yo kumbatayo.

5. Gini kere bipai rengbe ka rungburasi gu idapase du ani na ni kuti zingabekpio?

⁵ Pauro ape gupai fu awirinako nga i ne gu kere bipai kura aboro adu na ni nga: “Ka i azingisa nga kangba aboro ya, ‘Ani rí he ki nimbiri he, bambiko gba ani akpí akpi.’” Kura aboro aima du na gu bipai re zavura mbata fu rago Pauro. Si ima rengba kadu nga ko aape gupai du rogo Yesaya 22:13, nga gu nafura tipa gu bipai aYisaraere adu na ni. Kuba gupai nga i mbedi na Mbori, gupai i adu na nyemuhe gbe nga ka fu ngbarago fu tiyo. Gu bipai agu aYisaraere re adu na ni angia si naida i gbia ngbarago ti raka awere bambiko gayo raka rengbe ka digo ti ai regbo, na gure nga kina gu bangisa bipai moipai areme. Ono tie, Ziazia Kekeapai nafura tipa gu gbegberẽ sangbanapai naadu mbiko gu bipai re.—2 Peka 36:15-20.

6. Waigu si aida gu gaani maabangirise du ani na ni tipa zingabekpio du na maapai kuriipa agu aboro ani asiayo ni abakurearani?

⁶ Ani ima ino gupai nga Yekova nika zingisa kpikpi aboro azingisa be kpio, sidu, si naida pa ino ani gipai re du na maapai kurii agu aboro ani asia yo ni abakurearani. Si aaida agu awirina naadu Korinda yo banda tiyo ti dia regbo na agu aboro naaidanga kuti zingabekpio ya. Pai kinaho ani awirikaha ti gipai re areme: Ka ani adia regbo na agu abakurearani aberãnga tipa gupai nika manga kumbatayo ya ono nga aguyo naberã kina pa gbia ngbarago, agi aboro re ima rengba kadu na gbegberẽ maapai kurii rani. Ka ndikidi Kristano aadia gani regbo na gi ngbatunga aboro re, ni ima rengba ka zanga kadu na wene bipai. Na gipai re ima rengba ka sa ni a ni tona manga gupai Mbori asogaha. Sidu tie, Pauro afu gu zinahe nga: “Oni zíngisi gaoni berã, ka oni íngi nga ya.”—1 Kor. 15:33, 34.

7. Gini sanahe tipa zingabekpio si awiraha wa kura aboro aima rengba ka sanaha, a wa i nayuguhe rogo 1 AKorindo 15:35-38?

⁷ Oni gedi 1 AKorindo 15:35-38. Gu boro naniidi ka sa kura aboro i du na kapa kuti zingabekpio aima rengba ka sanahe nga: ‘Wai du i nika zingisa kangba aboro?’ Si ni wenepai furani tipa ani fura tipa ga Pauro karagapai kuti gi sanahe re bambiko dungu aboro areme na gayo abipai ni bakiakia tipa gupai namanga tifuo kpio. Ono ginipai Baibiri ayugoho?

8. Gini kpiapai rengbe ka undo rani tipa ani rugutirani na wai aboro azinga be kpio kaa ga ku ngbangbaturũ yo?

⁸ Ho boro akpi ni, kpotoni nazirã. Ono gu Ko nakusi haurago ima rengba ka zingisa gu boro re na ki fu gu ngbatunga kpoto fu ni rẽ tipa ni. (Bam. P. 1:1; 2:7) Pauro amangisunge na kpiapai tipa ka yugo gupai nga Mbori ima rengba ka zanga karaga kina gu bangisa kpotoboro re berewe. Oni berẽnga pa “nganu, watadu kura ngbatunga zendehe.” Ho i arũ tunga nganu ni ku sende yo, si natona ka sona. Ho si akura ni ni vovoho si nadu kia ti gu tooni zendehe i arũhe. Pauro amangisunge na gi kpiapai re tipa ka yugo gupai nga Bakusiahe ima rengba ‘ka fu kpoto kina wa ko akpi nyemu he.’

9. Ginipai 1 AKorindo 15:39-41 agumbaha tipa angbatunga akpoto ni bakiakia?

⁹ Oni gedi 1 AKorindo 15:39-41. Pauro agumba gupai nga Mbori aamanganga kpoto kusikusiahe dunduko kina sa te. Ni kpiapai, dungu kusikusiahe du na kpotoho ni bakiakia, wa agu nga abagara, azire, gbiati atĩo. Ko agumba gupai nga ho ani angera ni ku ariyo, ani nabi kparakparapai dagba uru na diwi. Ko ape gupai a nga, ‘imarago nga ga gu kerekuru a kia ti gu kura ha.’ Gi pai re nga rengo ka si vura du vurũ nga ani abingo ho na bangirani te. Aboro-birĩ-inohe nagumba gupai furani nga angbatunga akerekuru ho ni bakiakia, agura ni kikindigi ra, agura ni umba ra, agura ni zambara, agura ni pisi ra,  na agu ra kidu na rangi ra wa ga ndavu. Pauro agumba gupai a nga, “aũ ngbangbaturũ du ho a na aũ kpotosende.” Rogo gupai re yo nga gine? Auru kpotosende, ani na gu kpotose tirani nga ga borose, ono ngbangbaturũ yo, aboro yo na gu kpoto nga ga toro, wa gu du amaraika na ni.

10. Gini ngbatunga kpotose i nika zingisa agu aboro na ni naga ku ngbangbaturũ yo?

¹⁰ Oni bingo gupai Pauro agumbaha berewe: “A wo du pa zinga kangba aboro be kpio. I narũ he ni zirã; i nazingisa ha zanga zirã.” Ani ima ino gupai nga ho boro akpi ni, kpotoni nazirõ si ki satihe ni nvutu sende. (Bam. P. 3:19) Waigu rengbehe kadu nga “i nazingisa ha zanga zirã”? Anga Pauro aafura herẽ tipa agu aboro i azingisa yo i raki auru kpotosende te, wa aguyo Eriya, Erisa, na Yesu, azingisi yo te. Pauro aafura tipa gu boro i azingisa ni na gu kpotose rengbe ka raka ngbangbaturũ yo, nga gu kpotose nga ga “toro.”—1 Kor. 15:42-44.

11-12. Gini ariapai namangi tipa Yesu ho i azingisiko ni be kpio, na waigu kina gu bangisapai re amanga tipa mbedimbedi aKristano?

¹¹ Ho Yesu adu ni auru kpotosende, ko adu na gu kpotose nga ga borose. Ono ho i azingisiko ni be kpio, ko ada “ni gu toro nafu unga” na ki karaga tiko ku ngbangbaturũ yo. Wakina gure a, i nika zingisa mbedimbedi aKristano na gu kpotose rengbe ka raka ngbangbaturũ yo. Pauro asaki rogo yo nga: “Na wa ani adu na kpia gu ko nga ga sende ko, ani nikadu na kpia gu ko nga ga ngbangbaturũ ko a wo.”—1 Kor. 15:45-49.

¹² Si ni nyanyakipa pai ka rugatise na gupai nga, i aazingisanga Yesu na gu kpotose nga ga borose te. Ho Pauro aambeda ka digiso gako sakapai ni, ko asaki gu ndupai duhe ti ni wo ho ko aya ni wẽ: “Ka pasio na kure di nga kumbo ga Mbori ngbi” ngbangbaturũ yo te. (1 Kor. 15:50) I azingisanga amokedi gbiati gu kura mbedimbedi aKristano na gu kpotose du na pasio na kure nga gu rengbe ka zirã te. Gini regbo i nika zingisa yo? Pauro agumba  gupai nga i nika zingisayo azingisa kumbatayo, angianga nibasa tifuo kpio yo ya. Ti gu regbo Pauro aake gu kitabu nga ga 1 AKorindo, gu kura abawiriki aima “ti ni rame” rogo kpio yo, na kpiapai sa dagba agu abawiriki yo naakpi angia gu mokedi nangia Yakoba. (Amo. 12:1, 2) Gu kura amokedi na mbedimbedi aKristano atona ka “ti ni rame” kusa.—1 Kor. 15:6.

13. Gini apai si adu nga si nikaa manga ti regbo ye Yesu?

¹³ Yesu gbiati Pauro afura kumbatayo tipa nyanyakipa regbo nga gu nika ye. Gu regbo re nga gu nikaa yugo paye Kristo. Si adu nga ti regbo ye Kristo, agu apai nikaa manga nga, avura, abazigizo, riri akaza, gbiati gu kura gbegberẽ apai rogo zegino dunduko. Naatona rogo 1914, ani ima bi gi sangbanebi re si nidigisi tihe. Gu kura nyanyakipa pai kinaho berewe si adu nga si nikaa yugopa ye Kristo. Yesu agumba gupai nga, gu wene pangbanga du tipa ga Mbori Kindo, nga gu nazogorago azoga awere, nika du ni tungusi tungusihe “rogo zegino dunduko mbiko ndika fu arikaaboro dũ; ragoho ki digi adiga.” (Mt. 24:3, 7-14) Pauro ayugu gupai nga “rago ye [Gbia]” nika ngia regbo zingabekpio a fu gu mbedimbedi aKristano nga “agu yo ti ni rame” rogo kpio yo.—1 Tesa. 4:14-16; 1 Kor. 15:23.

14. Ginipai namanga tipa gu mbedimbedi aKristano nakpi ti gi regbo re?

¹⁴ Gu mbedimbedi aKristano nakpi areme, i nazingisa yo nibasa ku ngbangbaturũ yo. Ani naino gupai re rogo agu afugo Pauro yo du ni kekehe rogo 1 AKorindo 15:51, 52 nga gu naya: “Ani ará nga dunduko te, ono i asá rani akia dunduko, ni ipo, wa pira bangirise, ti woro yangara kpangi.” Agi afugo Pauro re nadigiso tihe awere! Ho i azingisa agi awirina  Kristo re ni be kpio, i nadu na bakere ngbarago; na i nika “du na Gbia tie nye anye kindi.”—1 Tesa. 4:17.

15. Gini sunge napido agu aboro i nika aria yo “wa pira bangirise”?

¹⁵ Baibiri nagumbapa gu sunge agu aboro i aˈaria yo “wa pira bangirise” nika mangaha ngbangbaturũ yo. Yesu aya fuyo: “Gu ni ka di be pai, ki ka kuti gi mangaapai ki da ti digida ha, mi aásia pa rika aboro fu ni, ni ki zogo yo ni ngbondo marã a wa ka i kuadi agu aakoro nga ga bamekehe rukutu, a wa mi adi he be Buba.” (Yugo. 2:26, 27) I nika pekafuo Yesu na ki nizogo aboro ni ngbondo marã.—Yugo. 19:11-15.

16. Waigu dungu aboro nika diabe kpio?

¹⁶ Si tie ziazia nga, mbedimbedi aKristano nika dia adia be kpio. (1 Kor. 15:54-57) Gayo zingabekpio nika mbugene fuyo tipa i undo na dia gbegberẽ apai dunduko kusayo ti regbo gu vura nga ga Aramegido. Amirioni kura aKristano nga akumba na adee nika kura “rogo bakere gberãngbi” na ki bati ku rogo vovo zegino. (Yugo. 7:14) Agu aboro nika du ni ungayo auru kpotosende nika bi gu kura diabese be kpio berewe ho agu abirioni aboro naaima kpiko kusayo nika zinga ni be kpio. Mo berẽnga pa wai ani nika du na ngbarago ho gi iiriwopai re nika manga ni! (Amo. 24:15) Na agu aboro dunduko du ni ruruyo fu Yekova nika du na diabese be gu kpio i adihe ti Adamu. I nika du na rengba ka raka nyeanye kindi.

17. Ginipai 1 AKorindo 15:58 angarasa rani ani mangihe awere?

¹⁷ Si naida agu aKristano dunduko du awere ni ungayo du na tambuahe tipa agu afugo wasa Pauro akehe fu aKorindo tipa zingabekpio. Ani na wene nduapai berani ka mangapai kuti gu ga Pauro rugute du tipa mangapai na omerani dunduko ti ngba “ga Gbia sunge.” (Oni gedi 1 AKorindo 15:58.) Ka ani aˈasada tirani ti aregbo dũ kaa manga gupai kakaka rengbe na omerani rogo gi sunge re, ani ima rengba ka ngera kumbatayo tipa gu raka nika du na bakere ngbarago rogoho. Gu raka re nika ngba kisusi ai gupai rengbe ani ka berãpaha. Gipai re nika yugo gupai gbaiga nga, gaani sunge fu Gbia aadunga gbua te.