Yekova aya fu aYisaraere wẽ i du ni ziazia aboro. Tipa ka undo yo i du ziazia, ko aya fuyo wẽ: “Ka oni nindú nga ku bani na ku bani wa abagbarasirimo dagba gaoni aboro ya, ka oni nikúru nga ka kita ngbanga akua roni ni zire sa kpio a ya: Mi nga Yekova.”—Pa Mot. 19:2, 16.

Gu fugo nga ‘nikúru ka kita ngbanga’ ima sakarogo gu papara Ziazia Kekeapai i ake bambata fugoho rogo Pa-Ebere yo wenengai, ono ginipai si ayugoho? Gu ga aYudo buku du tipa Pa Amotumo naya: “Gi papara veresi re . . . ima kpakara tipa ka sakarogoyo bambiko si ima nyaka ka ino ginipai pa-Ebere aaida ka sakarogoyo, na gupai na yugopa, ‘zanga ru rii, watadu, mbembedi.’”

Kura wene abawirikipai naberã gupai nga gu fugo re na wiratise dagbaha na veresi 15, nga gu naya: “Ka oni niírasi nga sarangbanga ya, ka oni nibérẽ nga padu boro ni rungorungo ni ya, watadu gunde ti gu ni du ni bakere ni a ya, ono oni ka sara ngbanga ni ruru he fu akuaroni.” (Pa Mot. 19:15) Sidu tie, gu ndiko du rogo veresi 16, nga ka zanga ‘kúra ka kita ngbanga’ kura boro ima rengba kadu nga, si aaidanga aYisaraere mangi iraira sarangbanga ngbangayo, babagaahe yo, watadu rogo ngbadimokporo te. Na si aaidanga Yisaraere mangi gupai narengbe kadu na biriki rogoyo tipa ka gbia undo tipa tini a te. Kina rengo ngaha nga, si aidanga ani mangi agu apai re te, ono kura gene kinaho berewe gbe rengbe ani ka giarogo gu fugoyo ngbaha du rogo veresi 16.

Oni makianga gupai du ti tonatona veresi 16. Mbori naruga gako aboro nga ka i naagbandaka nga ziree ya. Rengo ngaha nga, ho boro ape rimo kura aboro ni, si ima rengba ka ye na akpakarapai, ono ho boro agumba kere ziree ni tipa kura boro, gure nagberã nikerehe. (Snz. 10:19; Batu. 10:12-14; 1 Tim. 5:11-15; Yak. 3:6) Boro ziree dedede nita ino aino kini gumba ziree tipa si gbarasi rimo kura boro. Boro ziree ima rengba ka gumba ziree ni dezire kuti kura boro, ka si vura dunga gipai re ima rengba ka kusa kpio vurũ. Oni tingidi gupai nga airaziree nakitingbanga Nabota, mbiko gupai re i asaringbanga ko ni irairaha na ki sopo ko na mbia. (1 Aba. 21:8-13) Sidu, a wa i nigumbaha rogo ue papara Pa Amotumo 19:16, boro ziree ima rengba ka kitangbanga kura boro si ki sa gupai nga i imi ni.

Na berewe, boro ima rengba ka pe kere ziree tipa kura boro bambiko gupai nga ni nasoga gu boro re asoga. Rogo 1 Yoane 3:15, ani nageda gupai yo nga: “Gu ni ka asoga wirinani ni nga imiboro. Oni ki ini ya a nga imiboro sa ka nyenye unga nye rogo ni yo te.” Na berewe, fuo Mbori gumba gupai nga, ‘ka oni nikúru nga ka kita ngbanga akua roni ni zire sa kpio a ya,’ ko agbia kurapai kutini nga: “Ka oni nisógo nga wirinaroni ku kpotoroni yo ya.”—Pa Mot. 19:17.

Rogo gi gene re, gu nyanyakipa afugo du ni kekehe rogo Pa Amotumo 19:16, nafu nyanyakipa zahe fu aKristano. Ani du wa ka ani ká gbegberẽ aberã dunduko na ka ani yaa penga ziree tipa kura boro ya. Ka pepai ngba taata gene, ka ani mbu sogote watadu kpihe si sa rani ani gumba kere ziree tipa boro, si rengbe kadu ni gu gopai nayugoho nga ani nasoga ni asoga. AKristano du wa ka i ne gupai re.—Mt. 12:36, 37.