Ya mo mo gedinga agu aNgbaõbambu Sinziri nga ga gi garã re? Sidu, mo bingoho singia mo rengbe ka karagapai kuti agi asanahe re:

Yakoba 5:11 nafu gini kidohe ho si aya ni wẽ Yekova “na bakere nunga” watadu wesewese nyemuse tiko na “bakere inapai”?

Ani ima ino gupai nga wa du Yekova na bakere inapai, si nasako ko mbupai furani ti gaani aingahe. Yakoba 5:11 nakido rani na gupai nga ko ima ida ka undo rani rogo nyemuse yo. Si naida ani wiriki ko.—w21.01, kpe. 21.

Tipagine Yekova amangi gu mbakadapai ti ni nga ga pagbia?

Nyemuse nasako ko mangihe. Gu mbakadapai re nasa gako aborokporo du ni ruruyo i naamangapai rogo zereda yo, na ngba wene gene. Ai agu aborokporo namangapai kuti gi mbakadapai re ima ino da si aida ni mangi yangada adiaberã na ada si aida i mangipai kutini.—w21.02, kpe. 3.

Tipagine si aida aKristano du ti ni na rubangirise ho i amangasunge ni na agu ambakadapai nga ga erekturoni aboro akeka apai dagbayo rogoho?

Ka si du nga boro sia ka mangasunge na ngbatunga agu ambakadapai nga ga erekturoni re, si naida ni sia agu aboro asia ni akoda tini na yo rogoho. Gupai re ima rengba kadu ni kpakarakpakaraha ka si du nga abadona nga ga aboro du rogo gu mbakadapai re. (1 Tim. 5:13) Kura kereapai kinaho a ti gbataka gu pangbanga adunga arengo tipaha dunduko ya na kaa mangasunge na agu apai nga ga siokrasia tipa sunge bagaahe.—w21.03, kpe. 31.

Gini nduapai Mbori ambu Yesu ti ni i rungosiko na ki imiko?

Ni bambatapai, si aidi gupai nga i hasi Yesu ti ngua tipa ka kusa aYudo kusayo tii motiwa. (Gara. 3:10, 13) Ue ndupai nga, Yekova aaraba Yesu tipa gako bangiriba kumbatayo ni Gbiamotumo. Na biataha nga, padu Yesu ni ruruko dati kpio ayugu gupai nga aboro ima rengba ka nye ni ruruyo fu Yekova i ki vura kaa gbiatiyo vurũ na kere aˈasada. (Eyo. 1:9-11)—w21.04, kpe. 16-17.

Ginipai rengbe mo ka mangaha ka si du nga si ima kpakara ka gbia aboro gene tungusapai yo?

Mo asadi ka ndu fuoyo ti gu regbo si awiraha wa i ima rengba kadu tiikporo. Mo ima rengba a ka asada ka tungusapai rogo kura ba kia. Na mo ima rengba ka asada gu gene tungusapai du kia, wa ngbatunga gu nga keka awaraga.—w21.05, kpe. 15-16.

Ginipai gu mokedi nangia Pauro aaida ka gumbaha ho ko aya ni wẽ: “Mi akpi fu rugute mbiko rugute”? (Gara. 2:19)

Agu andiko Mbori afuhe kube Moize asa ga aboro zangarengba ni yuguyuguhe na ki nungusi aYisaraere koyo du Kristo ni. (Gara. 3:19, 24) Gipai re nasa Pauro ko idipa Yesu. Ni manga Pauro gipai re, ko “akpi . . . mbiko rugute”; ko aadunga berewe kutii rugute te.—w21.06, kpe. 31.

Waigu Yekova nayugu kpiapai furani nga ga hipai?

Yekova ima hi gu gbarasarimo i aye na ni kuti rimoko, gu sogote du kuti gako bakere pagbia, gu samungu nga ga kura awiriko, ga Bakitingbanga aziree, gu rungo nga ga gako amoyambu du na nyanyakipa yo fuko, zingo tipa agu abakureako kpiki, gbegberẽ aboro naimisa kura aboro, na awiri aboro nagbarasa gu kpotosende Mbori ambakadihe.—w21.07, kpe. 9-12.

Gini wene kpiapai Yosefa amoihe nga ga du na zerangbaduse?

Ko ahi gbegberẽ mangaapai be awiribako. Nga gu nasa gupai nga i kitingbanga ko ni ziree na ki bako ku bambukiso yo Ezipeta yo tipa dungu agarã.—w21.08, kpe. 12.

Agai 2:6-9, 20-22 apepa ngbatunga gini zigizohe?

Arikaaboro adianga gu pangbanga nga ga Kindo kugume te, ono badungu aboro ima ye ku rogo rengo yo. Barambeda, i nika zigizo arikaaboro ni yangaraha ho i nika gbarasayo ni.—w21.09, kpe. 15-19.

Tipagine si aidanga omerani bati ti ni rogo gaani tungusapai ya?

Yekova nabi gaani asadatise abi, na ko na ngbarago na ani. Ka omerani aabatanga ya, ani nika gbia nyenye unga.—w21.10, kpe. 25-26.

Waigu rengbe Pa Amotumo kapita 19 ka undo rani ani mangipai kuti gu rugute nga: “Oni dú a wo ni ziazia roni rogo gaoni apai dũ”? (1 Pet. 1:15)

Si nawira gupai nga i adi gu veresi re rogo Pa Amotumo 19:2. Kapita 19 nafu badungu akpiapai tipa wai rengbe ani ka mangapai kuti 1 Petero 1:15 rogo gaani raka yo.—w21.12, kpe. 3-4