Ani Bi Bamerani Nga Yekova na Kikiipa Ko
“Ako Yekova, . . . mo du wa bamerani; ani dunduko nga gu sunge nga ga bero.”—YES. 64:8.
ABIA: 11, 26
1. Tipagine du du Yekova ti ni ni bakere Bamepere?
ROGO Ngbangba 2010 ringara aNgirisi yo rogo gu gbata nga London, i akusi pere aboro China amehe 18 kama agarã kusayo na kini idi boro ngbehe na amirioni adorari wa 70. Si tie ziazia nga, bamepere ima rengba ka sa guhe duwa pere ku rogo gu bawene he rengbe kadu na kikii genoho. Ono tie, bamepere ho rengbeyo ka ringbisa ni na Yekova te. Kusa, rogo agu aˈuru Mbori amangisunge rogoho, ko akusi kumba “rogo nvutu sende” yo naadu ni rengberengbe ko na kidu na tandu beko tipa ka yugo asino Bakusiko. (Bam. P. 2:7) Gi kumba Mbori akusiko rogo nvutu sendeyo re angia Adamu, i aayambako nga “wiri Mbori.”—Rk. 3:38.
2, 3. Wai du rengbe ani ka wirika gu bipai naadu ti agu aYisaraere naasaberã yo?
2 Ono tie, ho Adamu asamungu ni kuti Bakusiko, ko aadunga berewe ni wiriko te. Wa si avura duwo, dungu atita Adamu ni “ngenge yo wa ndurõ” asia ka songoda ga Mbori bakere pagbia. (Eb. 12:1) I aumbasi patiyo fu Bakusiyo na ki yugu na ni nga i naida ko du ni Bayo gbiati Bameyo angianga Satana ya. (Yo. 8:44) Padu yo niruru yo fu Mbori natingida rani na afugo Yesaya naadu tipa agu aYisaraere naasa gayo berã nga: “Ako Yekova, ono mo nga Barani; ani du wa pere, mo du wa bamerani; ani dunduko nga gu sunge nga ga bero.”—Yes. 64:8.
3 Areme, agu aboro dunduko nairiso Yekova ni toro na rengo na asadatiyo ka yugo kina gu bangisa umbasitise re gbiati ra nigose. I nabihe ni bakere momu tipa ka yamba Yekova nga Bayo na ka ra nigoyo fuko wa Bameyo. Ya mo mo nabi tiro wa pere kubee Mbori yo na kidu na nyemu ko me ro ku rogo gu ngbatunga pere ngba bangiriko? Ya mo mo nabi awirina rogo toro yo nga akumba na adee wa gu pere Mbori amehe kindi? Tipa ka undo rani rogo gi bangiriba re, ani bingo agu apai biata Yekova amangaha wa ngia ko Bamerani nga: Wai ko asia agu aboro ko aida ka meyo, ndu gupai ko ameyo ti ni, na wai ko amangaha.
YEKOVA NASIA AGU ABORO KO AIDA KA MEYO
4. Wai du Yekova asia agu aboro ko agbeyo koyo du ko ni? Oni funga kpiapai.
4 Ho Yekova awisigo aboro ni, ko amaanga berãko fuo tama yo te. Kuba gure, ko nawisigo kpotoyo yo nga gu boroyo du ku dimoyo. (Oni gedi 1 Samuere 16:7b.) Gipai re adu ni yuguyuguhe ti gu regbo Mbori akusi gu dungurati nga ga aKristano. Ko agbe aboro fuoko na Wiriko nga agu aboro aboro anaabiyo wa sunge tiyo te. (Yo. 6:44) Boro sa dagba gu ngbatunga aboro re angia gu Farusi nangia Saura nangia “iragberangba yo ni irarungosi boro, ni iragbarasapai.” (1 Tim. 1:13) Ono tie, guko “nawisiga kpoto yo” ko aabingo Saura wa sunge tiko te te. (Snz. 17:3) Kubagure, Mbori abihe nga ko rengbe arengba ka me ko ku rogo wene pere yo, na nirengo, i ‘akpara ko’ ko mangi dezirepai “ku barangba aGendiria na abakindo, na awiri aYisaraere.” (Amo. 9:15) Gu kura aboro Mbori aabiyo wa gu pere nika ngba angba “sa irisa” angia kuru akpibuda, amangi meteka, na airadĩ. (Rom. 9:21; 1 Kor. 6:9-11) Ho i aagbia ndikidi inohe ni nga ga Fugo Mbori na kidu na idapase, i ambugene fu Yekova ko meyo.
5, 6. Wai du du gu kido du ani na ni kuti Yekova ni Bamerani amangapai na gu bipai du ani na ni tipa (a) agu aboro du rogo gaani dagbarago? (b) awirinarani nga akumba na adee?
5 Wai du rengbe ani ka gbia undo ti gu pangbanga du tipa agi aboro re? Si naida gaani idapase kuti gu tandu du Yekova na ni ka ino gupai du kpoto boro yo gbiati ka gbe agu aboro fuoko ko asia yo sarani ani mbu sapangbanga kura aboro, wa aguyo du rogo gaani dagbarago gbiati dungurati. Ani bingo gu kpiapai du tipa gu kumba nga Michael. Ko aya, “Ho aDezire Yekova atungusipai ni fere, mi aaidanga ka gia gupai i agumbaha te na si anidu wa i ti ni a te. Sino re adu ni gbegberẽhe fuyo! Kusa, mi agbia gu kura aborokporo nga aguyo naima ngba tire mbiko gayo wene sino mangaapai. Rogo kura uru sa ngbare azere ka ino gupai nga i angia aDezire Yekova! Mi aye ka ino gupai nga gimi mangapai aaruriipa gu zanga inohe mi adu na ni tipa yo gbiati agu apai mi anaagiaha naangianga rengo ya.” Tipa ka ino rengo nzunzu, Michael aidi ka wirika Ziazia Kekeapai. Kusa, ko aye ku rogo rengo na ki tona mangasunge tungusapai ti aregbo dunduko.
6 Ka ani idi Yekova du ni Bamerani, si rengbe arengba ka aria gu bipai du ani na ni tipa akuarani aidipase a. Ya mo mo nabi awirina nga akumba na adee wa gu Mbori abiyo, angianga wa gu pere memehe naima nyasa ya, ono wa gu sungehe andu kindi? Ko rengbe arengba ka ngera ku kpotoboro yo kodihe na ka ino gu ngbatunga boro ni nika du nga ni beko yo. Sidu, Yekova na wene bipai tipa aboro na ko amaanga berãko sa agu azangarengba du tiyo tipa bete regbo te. (Tam. 130:3) Ani rengbe ka wirika ko ni du ani na wene bipai tipa gako amoyambu. Nirengo, ani ima rengba ka mangasunge wa sa na Bamerani ni undo ani awirinarani wa i amanga ome ka sona rogo toro yo. (1 Tesa. 5:14, 15) Si naida abaakumba ngbembatayo rogo gipai re mbiko i nga ‘agamahe fu aboro.’—Ef. 4:8, 11-13.
TIPAGINE YEKOVA AMERANI TI NI?
7. Tipagine du du mo ti ni na tambuahe tipa ga Yekova arugute?
7 Si nawira wa oni aima giapai ku ngba boro ni ni pepai wa gere nga: ‘Mi anaabingo gu rugute avungure anaafuhe na kikiipaha te da kinaho mi atona ka vunga agude ni.’ Ho ani adani na bakere inohe rogo raka yo, ani rengbe ka bi rugute ngba kura gene na ki tona kadu na kina gu bipai du Yekova na ni nga si nayugo gako nyemuse. (Oni gedi AEbere 12:5, 6, 11.) Nirengo, Yekova namerani mbiko gu nyemuse du ko na ni koyo du awiriko ni. Ko naida ani du na tatamana gbiati ngbarago na kini kpinyemuko a wa ko akpinyemu rani. (Snz. 23:15) Rago angbanga tiko na gaani arungo te, na ko aidanga ani kpiki wa “awiri zinga,” nga gu maabangirise ani adihe ti Adamu a te.—Ef. 2:2, 3.
8, 9. Wai du Yekova ayugopai furani areme, na wai du gi yugopai re nika ndu kumbatayo?
8 Wa ani angia “awiri zinga,” ani aima du na agu asino naaba kina gberãrago ti Mbori, isoke ngbatunga agu asino duwa ga anyarinde! Ono tie, mbiko ga Yekova mehe, ani ima aria asino rani; ani ima da wakina akandoro. (Yes. 11:6-8; Koro. 3:9, 10) Sidu tie, gu ba Yekova amerani rogoho awere ani nabihe wakina gu paradizo nga ga toro nga gu nasona kina kumbatayo. Ani nabihe nga baa rani gu ngbaangba wa vura duhe nga ani naraka rogo gbegberẽ zegino vurũ. Kurigure, agurani kinaho naasono rogo gu ngbadimokporo adunga nyemuse rogoho ya ima ye ka gbia ndikidi nyemuse areme. (Yo. 13:35) Ani ima wirika wai ka yugo nyemuse a fu kura aboro. Bambatapai nga, ani ima ye ki ini Yekova na ki ini gu nyemuse du ko na ni awere furani wa Barani.—Yak. 4:8.
9 Rogo vovo zegino, ani nika gbia ngbarago ni bakerehe gbe be gu paradizo nga ga toro. Ani nika gbia ngbarago a be gu ndikidi paradizo ga Mbori Kindo nika zogarago kuriihe. Vuru agu aregbo nga gu Yekova nikaa karaga aboro berewe i da ni rengberengbe yo rogo zegino dunduko, ko nikaa ndu kindi kumbatayo kaa me agu aboro nika du auru kpotosende ane, kaa yugopai fuyo dakuti gu bangiriba ani arengbanga ka giarogoyo awere ya. (Yes. 11:9) Kurigure, Mbori nika sa berãrani gbiati kpotorani ni rengberengbehe, si nika sarani ani rengbe ka dia gako yugopai kugume gbiati manga gupai ko akpinyemuhe zanga wiri kpakarapai. Sidu, ani dinga berã adia tipa kaa ra ara nigorani fu Yekova kindi, na kini yuguhe fuko nga ani nabi gako mehe wa gako nyemuse tipa rani.—Snz. 3:11, 12.
GU GENE YEKOVA AMERANI NGBAHA
10. Wai du Yesu ayugu gu bakere zerangbaduse gbiati birĩ du ti Bakere Bamepere?
10 Wakina gu bamepere du na bakere inohe, Yekova ima ino gu ngbatunga “pere” du barabangiriko, na ko namehe kina wai ko aidaha. (Oni gedi Atambuahe 103:10-14.) Nirengo, ko namangapai na ani ni basasa ringbisihe kuti gaani arungbura, adingisoro, na gaani sona rogo toro yo. Wiriko aima yugo gako bipai tipa gu gako amoyambu du ni kpakpa yo. Ani bingo gu gene Yesu amangipai ngbaha na agu aingahe nangia ga gako amokedi, gbe gu sino naadu tiyo nga kaa sovura tipa pagbia. Ka si adu nga mo abi wai amokedi aapaa dagbatiyo, ya mo ka mo abi agi akumba re ni bayee aboro na du ni rurungbura yo tipa i meyo? Ono wa si avura duwo, Yesu aadunga na gbegberẽ bipai tipa yo te. Ko aima inoho nga gi gako ruru amokedi re i rengbe ka meyo na wene arugute gbiati zerangbaduse na pa biyo gu gako kpiapai nga ga umbasitise. (Mk. 9:33-37; 10:37, 41-45; Rk. 22:24-27) Fuo zinga Yesu be kpio na ziazia toro ki zoro kurii gako amokedi, i agbeberã yo angianga kuti pagbia ya ono kurii gu sunge i afuhe fuyo i mangihe.—Amo. 5:42.
11. Ngba gini agene du Davide adu wa rurungbura pere, na wai du rengbe ani ka wirika ko?
11 Yekova name gako amoyambu areme vurube Fugoko, gako ziazia toro, gbiati gu dungurati nga ga aKristano. Fugo Mbori rengbe ka merani wa ani kaa gedaha, kini berẽkuriihe, na kini sana Yekova ko undo rani ani mangihe. Davide aya: ‘Mi natingida pa ro auru gi barame, ki nimakia pa ro ti arago maarago yuru.’ (Tam. 63:6) Ko ape kurapai nga: “Mi sambua Yekova nayugo pa apai fere; kpotore yo naruga re na yuru.” (Tam. 16:7) Nirengo, Davide ambu ga Mbori arugute si rimi dudunguro ku kpotokoyo, tipa ka me gako aberãpai zavura ho agu arugute re anidu ni ninyanyakihe fuko. (2 Sam. 12:1-13) Nairiwo gu wene kpiapai nga ga umbasitise gbiati ranigose Davide amoihe furani re! Ya mo mo naaberãkurii Fugo Mbori a kini mbuhe si rimi ku kpotoroyo? Ya mo si naida mo mangihe nibakerehe kisusi?—Tam. 1:2, 3.
12, 13. Wai du Yekova amerani vurube ziazia toro gbiati gu dungurati nga ga aKristano?
12 Ziazia toro rengbe arengba ka me rani ngba dungu agene. Ni kpiapai, si rengbe ka undo rani ani sonosi agu asino duwa ga Kristo, nga gu nakoda gu zuzu toro nga ga Mbori. (Gara. 5:22, 23) Papara gu zuzu toro re nga nyemuse. Ani nakpinyemu Mbori na kini idi ka giasangbako ko me rani, ki idi kuti gupai nga gako arugute asusanga omerani te. Ziazia toro rengbe arengba ka undo rani a tipa ani ka gu mehe nga ga zegino na gaha gbegberẽ toro. (Ef. 2:2) Gu toro nga ga rukö naadu ti ga aYudo abangbembatayo nga ga pambori yo aima du na ome kurii gu mokedi nangia Pauro mbuko kindi ni wiri paranga, ko akepai kusa nga: “Mi rengbe na manga apai dunduko rogo gu ko nanyakasa re.” (Frp. 4:13) Wakina Pauro, ani nisananga he asana kindi tipa ziazia toro. Yekova azanganga karagapai kuti gu kparakpee nga ga aboro umbasitise te.—Tam. 10:17.
Yekova namangasunge na agu abaakumba nga aKristano tipa i me rani, ono si naida ani mangi ome amanga (Oni bi genewaraga 12, 13)
13 Yekova namangasunge na gu dungurati nga ga aKristano gbiati gaha ababiapai tipa ka me rani nibasasa. Ni kpiapai, ka abaakumba bihe nga ani na kpakarapai rogo toro yo, i naasada ka undo rani ono angianga na gu tatamana nga ga aboro ya. (Gara. 6:1) Kuba gure, i naumbasitiyo kini sana Mbori tipa ko fu dudungurobipai na tatamana fuyo. Fuani, i ki tona ka mangapai kuti gayo kparakpee niweteka yo pai rogo Fugo Mbori yo gbiati gaani awaraga nga ga aKristano tipa ka undo rani. Gipai re rengbe ka undoyo i fu gu undo du tipa gaani azingo. Ka si du nga i ye fuo ro tipa ka fu undo nga ga nyemuse, wa gu undo du tipa gamo voroko, ya mo mo adia gayo arugute kugume na ki bihe wa gu gopai nayugo ga Mbori nyemuse foro? Ka mo mangihe wo, gure nga mo wakina rurungbura pere kpabe Yekova yo niima ida tipa ko me ro wa ka mo gbia undo.
14. Wa vura duhe nga Yekova na pagbia kurii pere, wai du ko ayugo irisa tipa gu ranirii du ani na ni?
14 Pa ruga ani tirani na wai Mbori amerani rengbe ka undo rani na gu pagume du dagbarani na akuarani aidipase na gu bipai du ani na ni tipa aboro rogo gaani dagbarago, kodihe na agu aboro ani ayugo Ziazia Kekeapai fuyo. Anga bamepere nandu ki ge pere na ki tona ka mehe te. Ni nambakada gu pere re mbata, ka rogoda ambia rogoho kusayo gbiati gu kura gbegberẽ ahe. Mbori naundo ka me kina agu aboro naida ko meyo rogo toro yo. Ko amanganga yo ngbaome tipa i mangi aˈariapai te, ono ko nayugo gako ruru arugute tipa wa ka i girisi gayo raka watadu ka manga aˈariapai nitiyo.
15, 16. Wai du agu aboro nawirika Ziazia Kekeapai ayugo gupai nga i naida Yekova meyo? Oni funga kpiapai.
15 Ani bingo gu kpiapai nga ga gu wirinarani nga Tessie naraka Australia yo. Gu wirina naawirikipai na ri aya, “Tessie aadianga gu inohe nga ga Ziazia Kekeapai be agumeri na nyanyakipaha te. Sidu, ri aamanganga kandara wiri sona kumbatayo rogo toro yo te, kandara ka ye tipa agu adunguratise nga ga aKristano a te! Fuani, iiriwopai amangi. Rogo gu uru mi aaberãha nga gere nga gaani yangara wirika Ziazia Kekeapai na ri, ri azaki ngbaduri yo fere. Ri aya ri nabi tiri wakina boro biriki mbiko ba-aké ima ngba tiri. Ono awere, ri ima diaberã tipa ka mbu gu mangapai re.”
16 Ngbutuko fuo gure, Tessie atona ka ye tipa adunguratise nga ga aKristano na ki tona kadu na agu asino nga ga aKristano zavura ho akurari anaasawia ri ni. Gu wirina re agbia kurapai kutini nga: “Kusa, Tessie azi bapatiza na ki mangisunge ni nazakigene kusa, zavura ho ri adu ni na rukutu agude beri.” Nirengo, ho agu aboro nawirika Ziazia Kekeapai atona ka giriso gayo raka ni tipa ka fu ngbarago fu Mbori, ko nambeda na yo na ki meyo ni gu pere ko aida i du ngaha.
17. (a) Ginipai ngba tiro tipa kadu na Yekova ni Bame ro? (b) Gini ngbatunga mehe ani nika sakapai tipaha rogo gu kekeapai naye?
17 Da ku areme, aboro name pere kindi na beyo, na kini mangisunge wenengai na gayo pere. Wakina gure a, Bamerani namangasunge na ani wenengai na kidu na zerangbaduse na ani, ko namerani na gako arugute na kini bi gaani karagapai kutini. (Oni gedi Atambuahe 32:8.) Ya mo mo bingo gupai nayugoho nga Yekova na nyemu ro? Ya mo mo nabi tiro wa ko amero beko yo? Kangia wo duhe, gini kura asino rengbe ka undo ro mo nye wa rurungbura pere bangiri Yekova? Gini asino si aida mo nehe tipa ka zanga du wa ugu pere? Na wai du rengbe avunguagude ka kodabeyo na Yekova tipa ka me awiriyo? Gu kekeapai ngbefuo gere nika sakapai tipa agi apai re.