1, 2. Tipagine Mbori abi Daniere ti ni nga “gu kumba Mbori nakpi nyemu ko gbe,” na wai du rengbe ani ka giasangba wakina Daniere?

HO Agu aYudo i azi yo adani Babera yo, i abi gu gbata naahi be akpiahe na ki bi aboro nangia akanga fu gbegberẽ atoro. Wa si avura duwo, gu ruru aYudo naadu wa Daniere na agu abakureako naadu biata, i aka ka rimiso tiyo ku rogo gu mangapai naadu Bebera yo. (Dan. 1:6, 8, 12; 3:16-18) Daniere na abakureako aima diaberã tipa ka iriso kina Yekova sa ni Bameyo. Na i aima du na diabese! Daniere arakaki nibakerehe kina ku Babera yo; ono wa si avura duwo, ga Mbori maraika aya fuko ko nga “gu kumba Mbori nakpi nyemu ko gbe.”​—Dan. 10:11, 19.

² Bamepere namaa gani pere ku rogo karã na ki tona ka me gu ngbatunga pere ni aidaha. Ndikidi airisimbori areme nabi Yekova ni Bakindo Zegino dunduko, nga ko du du na pagbia beko tipa ka me aboro na angbatunga arikayo dunduko. (Oni gedi Yeremaya 18:6.) Mbori a na kina pagbia beko tipa ka merani ni basasa. Ono tie, ko ima rugatiko na pa gaani ranirii na ko naida ani ra fuko ni tirani. Ani gbenga berãrani awere kuti wai rengbe ani ka nye ni rurungbura pere kube Yekova yo, niwisigo ani agi apai du biata re: (1) Wai du rengbe ani ka ne agu asino rengbe ka  sarani wa ugu pere fu ga Yekova arugute? (2) Wai du rengbe ani ka sonosa agu asino rengbe ka undo rani ani du rurungbura bee Yekova yo? (3) Wai du rengbe agu avunguagude nga aKristano ka ra nigoyo fu Mbori ho i ame awiriyo ni?

3. Gini ngbatunga asino rengbe ka nyakasa kpotoraniyo? Oni funga kpiapai.

³ Asanza 4:23 naya: “Mo nibánda kpotoro yo ngangarã; bambiko yo unga naye ni.” Gini ngbatunga asino du nanyakasa kpoto boro yo re si aida ani nehe? Agi asino re nakoda rukö, manga ingapai, na zanga idapase. Agi asino re rengbe ka kusa zanga giasangba, gbiati gu toro nga ga samungu. (Dan. 5:1, 20; Eb. 3:13, 18, 19) Bakindo Uziya naadu Yuda yo aima du na rukö. (Oni gedi 2 Pekapai 26:3-5, 16-21.) Ti tonatonaha, Uziya amangi “gu pai naru aru bangiri Yekova,” na “ko ki fu tiko ka gbata Mbori.” Ono “ho ko adu ni nyanyaki kpotoko yo ki du na abiatise” wa si avura du nga gu ome ko adu na ni aye be Mbori! Ko aasadi ka fu zozo fuõngua bamotumo yo yekaru yo nga gu momu naadu sa fu kina agu aboromotumo nangia angbatunga Arona. Fuani, ho aboromotumo ayeni fuoko, gu irarukö nangia Uziya re azingi azinga kutiyo! Sangbanaha angia gine? Mbori ‘agbarasi’ pako ko ki kpi ni boro ngbataka.​—Snz. 16:18.

4, 5. Ginipai rengbe ka manga ka si du nga ani abandanga tirani ti rukö te? Oni funga kpiapai.

⁴ Ka ani abandanga tirani ti rukö ya, ani ima rengba ka tona ‘ka berãpa tirani susi gu pai ka ani aberãha,’ isoke ki da ti gu bangiriba nga ka ka agu arugute nga ga Ziazia Kekeapai. (Rom. 12:3; Snz. 29:1) Ani bingo gupai naadu tipa gu Kristano ni bakumba nga Jim naadunga na giatise dagbatiko na akurako abaakumba riipa gupai nga ga dungurati ya. Jim aya: “Mi aya fu awirina wẽ i na nyemuse te, na mi ki mbu gu dunguratise ani aamangaha re.” Fuo adiwi sita kusa, ko aguari rogo gu dungurati re ki ga ku rogo gu kuraha naadu ho barambeda ono ka i amaanga ko ni bakumba yo ya. Ko aya: “Mi adu na gberãrago. Padu mi niruru re bangire asare mi mbu rengo.” Jim azere rogo toro yo tipa agarã bawe. Ko ape kurapai nga: “Gimi rukö agbarasipa re, na mi ki tona kaa bira Yekova tipa gupai naamanga. Fuo bete agarã, awirina aye fuo re ono mi ki ima ka gayo undo.”

⁵ Ga Jim kpiapai nayugo wai rengbe rukö ka sarani ani asadi ka ruga apai ku bara rani yo, na ki sarani ka ani dunga ni rurungbura rani ya. (Yere. 17:9) Jim aya: “Mi aarengbanga ka mbu berãpa wai si aangera wa kura aboro angia ingahe te.” Ya mo kura Kristano aimisinga ro watadu pa zanga mo kura momu sa? Kangia wo duhe, gamo mangapai angia gine? Ya mo mo adu na rukö? Watadu gupai paha anyaki bangiro angia ka sa zereda si du dagbaro na wirinamo na mo ki nye ni rururo fu Yekova?​—Oni gedi Atambuahe 119:165; AKorosaio 3:13.

6. Ginipai rengbe ka manga ka si du nga ani tona ka manga ingapai?

⁶ Manga ingapai, watadu kaa mangaha nigbuko ima rengba ka sa gupai nga ka boro mangingopai kuti ga Mbori arugute ya. Na si rengbe ka sa manga ingapai si du taata. Kura wirina sa ape gupai nga fuo bete regbo, gako gbegberẽ mangaapai aafudanga ko berewe te. (Batu. 8:11) Gu kurako naatona kaabi agu ahe naba nyemu kodaba ti aboro aya: “Mi atona kadu na gbegberẽ bipai kuti abaakumba.” Gu gako mangapai re aagbarasapa ko rogo toro yo. Niyangaraha, i ainipai tipa gi gako mangapai re na ko ki gbia undo. Kina rengo du ngaha nga, ani dunduko nga kpakpa aboro. Ono tie, ka ani tona kadu na gbegberẽ bipai watadu kaa bi gbegberẽ mangapai taata kuba gupai nga ani gbata ga  Mbori mbupai gbiati undo, gure nga kpotoraniyo ima tona ka nyaka.

7, 8. (a) Wai du agu aYisaraere naadu mbata ayugu gayo pa zanga idapase? (b) Ginipai ani awirikaha ti ni areme?

⁷ Ani nabi kpia wai zanga idapase narengbe ka nyakasa kpotoboroyo nibi gupai naadu tipa agu aYisaraere Yekova akusiyo Ezipeta yo. Gu rikaaboro re aima bi wai Mbori amangi dungu iʹiriwopai tipa yo, agu akuraha aaba kina gunde! Ono wa si avura duwo, ho i aambeda ni ku Ringara Mokido yo, i azanga idapase. Kuba gupai nga i kido kuti Yekova, i ada na gunde na ki tona ka kpakana Moize. I aima ida ka karagatiyo ku Ezipeta yo nga gu ba i adu rogoho ni akanga! Rago aima gbera ti Yekova ni bakerehe. Ko aya: “Rago adu wai agi aboro re ki nipayasi re?” (Geda 14:1-4, 11; Tam. 78:40, 41) Mbikopa nyaka kpotoyo yo na pa zanga yo idapase, gu rikaaboro naakuru Ezipeta yo re akpiki dunduko kpakungbo yo.

⁸ Areme, wa ani ambeda kuti vovo zegino, gaani idapase ni asadi asadihe. Si naida ani ini gu ngbatunga idapase du ani na ni. Ni kpiapai, ani rengbe ka wisigo gaani bipai kuti agu afugo Yesu du rogo Matayo 6:33. Mo sananga tiro nga: ‘Ya mo agu apai mi aperesa paha gbiati gimi adiaberã nayugoho nga mi ima ida kuti agu afugo Yesu re? Ya mo mi nadiaberã tipa ka kpa ti adunguratise watadu tungusapai tipa ka kiiso gu marã mi agbiaha? Ginipai rengbe mi ka mangaha ka si du nga si naida mi di bakere regbo kuti sunge? Ya mo mi ambu zegino si me re isoke ki sa re ka mi dunga rogo rengo yo berewe ya?’

9. Tipagine si aida ani “wísigi” singia ani rogo idapase yo ti ni, na wai du rengbe ani ka mangaha?

⁹ Gu kura kpiapai berewe nga, oni berẽnga tipa ga Yekova amoyambu nga aguyo aidanga ka pekafuo agu arugute nga ga Ziazia Kekeapai ya nibipa zio bakure, agu aboro i nakusiyo rogo rengo, watadu aumbaro. Mo sananga tiro nga, ‘Ya mo si rengbe kadu nga gipai re nga rengo tipa re?’ Ka ani bi gupai nga gu ngbatunga bipai re tona ka sona rogo rani yo, si naida ani wisigi gaani idapase ni ipiipihe! Ziazia Kekeapai naruga rani nga: “Oni wísigi tironi si ngia oni rogo idapase yo; oni ásadi tironi.” (2 Kor. 13:5) Wisigo tirani ringbisihe kuti Fugo Mbori nga gupai si aida ani berẽpaha dedede.

10. Ginihe rengbe ka undo rani ani duwa rurungbura pere bee Yekova yo?

¹⁰ Agu ahe Mbori nafuhe tipa si undo rani ani nye wa rurungbura pere nga Fugoko, gu dungurati nga ga aKristano, na tungusapai. A wa ime naarungburasi pere, geda Ziazia Kekeapai na aʹuru dunduko na kini berẽkuriihe rengbe ka undo rani ani du rurungbura bee Yekova yo. Yekova aaida agu abakindo nangia ga Yisaraere yo keke gako Ndiko na kini gedihe na aʹuru dunduko. (Pa Rug. 17:18, 19) Amokedi abi gupai nga geda Ziazia Kekeapai na kini berẽkuriihe adu na nyanyakipaha tipa gayo tungusapai. I adi apai rogo Kuru Ndika bara dunguhe na ki kekehe ku rogo agu awaraga i aakekaha tipa ka ngarasa agu aboro i atungusipai fuyo i mangi wakina yo. (Amo. 17:11) Areme, ani ima bi wai nyakipa geda Fugo Mbori na aʹuru dunduko na kini berẽkuriihe. (1 Tim. 4:15) Manga ani he nasa gupai nga ani du na umbasitise kubangiri Yekova na kidu ni rurungbura rani beko yo.

11, 12. Wai du rengbe Yekova ka mangasunge na gu dungurati nga ga aKristano tipa ka me rani ringbisihe kina kuti gaani azingo? Oni funga kpiapai.

¹¹ Vurube gu dungurati nga ga aKristano, Yekova rengbe arengba ka me rani ringbisihe kina kuti gaani azingo. Jim, ani nifura tipa ko mbata kusayo atona ka rungburasi gako bipai ho bakumba sa adu ni na nyemuko. Jim aya: “Regbo aadunga ho sa ko abira re tipa gupai naadu  tipa re watadu ka bisirapa re te. Kuba gure, ko adu na wene bipai na ki ya ko naida ka undo re.” Fuo adiwi biata, gu bakumba re ayambu Jim tipa dunguratise. Jim aya: “Dungurati adire kugume esuesu, na gu gayo nyemuse re nangia gupai namangi ariapai rogo gimi raka yo. Mi atona ka bihe nga anga gimi bipai nyakipaha te. Gu undo awirina afuhe fere gbiati diare nga gu boro naazeranga rogo toro yo ya, asare mi tona ka nyaka rogo toro yo yeeye. Mi agbia ngarasaro a ni bakerehe be gu kekeapai naadu rogo gu Ngbaõbambu Sinziri nga ga Ngbangba 15, 1992 rogo pa-Ingirisi naaya, Ka mo Biranga Yekova Ya na Mo Mangisunge fu Yekova Niruru Ro.”​—Jehovah Is Not to Blame and Serve Jehovah Loyally.

¹² Fuo bete regbo kusa, Jim ada berewe ni bakumba. Naatona ti gu regbo re, ko ima undo kura awirina tipa i dibe gu ngbatunga asada re na ki da wenengai berewe rogo toro yo. Ko adigisihe na gupai nga: “Mi aaberẽhe tigimi nga mi nawene pagume na Yekova baraho si aadunga ni wo ya! Mi na bira kina tire nga mi ambu rukö si kisi bangire ti gupai naadu ni nyanyakihe na ki sare mi tona ka berã nyanyaki kurii ga kura aboro aingahe.”​—1 Kor. 10:12.

13. Tungusapai rengbe ka undo rani ani sonosi gini ngbatunga asino, na gini undo ani agbiaha ti ni?

¹³ Wai du rengbe tungusapai ka me rani ani du wenengai? Tungusapai fu kura aboro rengbe ka undo rani ani du na umbasitise gbiati gu kura apapara zuzu toro. (Gara. 5:22, 23) Mo berẽnga tipa gu wene asino mo nasonosihe gene tungusapai yo. Kurigure, wa ani kaa yugo agu asino nga ga aKristano, si nambakada gaani pangbanga, nga gu rengbe ka manga ariapai na gu bipai nga ga irakporo. Ni kpiapai, aDezire Yekova ue Australia yo adegetuyo wenengai fu irakporo sa naafura fuyo gbegberẽ. Ono tie, kusa,  rago agbere tiri na gupai ri amangihe re na ri ki ke waraga fu gaani be-basunge. Ri aya: “Mi naida ka ho mbupai tipa wai mi adu na rukö fu agu aboro umbasitise na zerangbaduse naadu ue. Iramungo nga mi naaru barabangiri aboro ue naagbandaka Fugo Mbori na ki do yo zanga gia gupai i agumbaha.” Ya mo ka gu irakporo re ake agu afuro re ka si adu nga agu abatungusipai re aasadi ka zinga kuti ri? Wagusa te. Nirengo, nairiwo gu undo du ti gaani tungusapai re, nga si naundo rani na gaani amurakporo!

14. Ginipai si aida avunguagude mangihe ka si du nga i naida ka me awiriyo wenengai?

¹⁴ Dungu rukutu agude nidu na nyemu ka wirikapai, na i naasada kadu na umbasitise. (Mt. 18:1-4) Nibi gipai re, agu avunguagude du na tatamana namanga ome ka rimiso gu inohe nga ga rengo na nyemuhe ku berã awiriyo yo na ku ngbaduyó yo mbu yo kindi rukutu. (2 Tim. 3:14, 15) Rengo ngaha nga, tipa kadu na diabese, si naida avunguagude rimisi rengo mbata ku ngbaduyo yo na ki saha ni gayo. Ho avunguagude amanga gipai re ni, anga awiriyo nika gia rengo sa te ono i nadiaha kugume. Kurigure, i nawirika ka bi gu rugute nga ga avunguyo ni gu gopai nayugo ga avunguyo nyemuse gbiati ga Yekova.

15, 16. Wai du rengbe avunguagude ka yugo gayo kido kuti Mbori ka si du nga i kusi wiriyo kusayo rogo rengo yo?

¹⁵ Ono tie, wa vura duhe nga kura agude nasona rogo gu ngbadimokporo nga ga aKristano, kura agude nambu rengo watadu i nakusa yo rogo dungurati kusayo na si kini ye na gberãrago fu avunguyo. Wirinarani sa ni Kristano South Afrika yo, aya: “Ho i akusi kawire ni kusayo rogo dungurati, si adu wa ka i ya ko ima kpi. Rago aima gberã tire ni kerehe!” Ginipai ri na avunguri amangihe? I apekefuo agu arugapai du rogo Fugo Mbori yo. (Oni gedi 1 AKorindo 5:11, 13.) Avunguri aya: “Ani adiberã ka manga gupai Ziazia Kekeapai apehe, na ki bi gupai nga mangapai ringbisihe kuti ga Mbori agene rengbe ka ye na wene sangbanaha. Ani abipa kusayo ko kusayo wa Mbori du nafu rugute fuko na ki idi kuti gupai nga Yekova naruga boro rogo nyemuse yo na ngba wene gene. Ani anaakoda tirani na wirani sa kina tipa agu apai nga ga aborokporo rẽarẽ.”

¹⁶ Ga wiriyo bipai angia gine? Ko aya: “Mi aima inoho nga gimi aborokporo aasoganga re te, ono i aagiasangba Yekova na gako riigbu.” Ko ape kurapai nga: “Ho apai amanga ro ni ngbaome tipa mo sana Yekova tipa undo na mbupai, mo nainoho aino nga mo arengbanga ka raka zanga ko te.” Oni berẽnga kina pa gu ngbarago agi aborokporo re adu na ni ho ko akaraga tiko ni fuo Yekova! Nirengo, ho ani adegaturani ni fu Yekova ngba gaani agene dunduko, sangbanaha nadu ni bawenehe.​—Snz. 3:5, 6; 28:26.

17. Tipagine si aida ani sa ra nigorani fu Yekova ni sinorani ti ni, na wai du rengbehe ka undo rani?

¹⁷ Gu nebi nangia Yesaya afura kumbatayo tipa gu digido regbo si adu nga agu aYudo naadu ni zizi yo nika saberã yo ki ya: “Ako Yekova, ono mo nga Barani; ani du wa pere, mo du wa bamerani; ani dunduko nga gu sunge nga ga bero.” Fuani, i azungodi he ki ya: “Ka mo nitíngidi nga pa irairapai nye anye kindi ya. Mo ngére, ka bi nga, ani dunduko nga gamo aboro nazungadi ro.” (Yes. 64:8, 9) Ka ani ra nigorani fu Yekova na ki sa giasangbako ni sino rani, ko nika bi rani na nyanyaki parani kina wai ko aabi gu nebi nangia Daniere. Kurigure, Yekova nikaa ndu kumbatayo kindi ka me rani vurube Fugoko, gako ziazia toro, gbiati gako riigbu tipa wa ka ani rengbe ka ru barabangiriko rogo gu kura uru ni rengberengbe “awiri Mbori.”​—Rom. 8:21.