Gu Sinombori Nyakipaha Kisusi Ambia Fongo
Aboro aima digo nibi ambia fongo na nyanyakipaha. Agu akuraha kinaho genoho naima da ti amirioni adorari. Ono tie, ya mo si rengbe kadu nga kura ahe kinaho nyakipaha bangiri Mbori kisusi ambia fongo?
Haykanush, nga gu natungusipai ata ziongo bapatiza ya naraka Armenia yo abi pasipoti pati kpuri. Gu pasipoti re adu na gu karte nga ga beenge gbiati bakere marã vuruhe yo. Ri agumba paha fu kumbari nga guko nangia kina gu batungusipai ataziongo bapatiza ya.
Agi arogotise re adu na kere zingo marã na i adu na bape kuriiyo; ono wa si avura duwo, i adiberã ka ndu na gu marã re ku rogo gu adresi naadu ti gu pasipoti re. Ngba gu kumba si aingi beko gbiati gako aborokporo aima zera. Haykanush na kumbari asaki gupai fuyo nga pa peyo rengo aye mbiko gupai i aawirikaha rogo Ziazia Kekeapai. I abi gupai nga si aaida aida i pe rengo, na i amangisunge na gi momu re tipa ka fura tipa aDezire Yekova na ki fu gaani awaraga fu agu aborokporo re.
Agu aborokporo re aaida ka fu marã fu Haykanush ni mosoro, ono ri ki ima ka. Rogo gu uru naangbe fuoho, dia gu kumba re aye fuo agu arogotise re ku kpuyo na ri ki fu gu tongo nga ga mbia fongo fu Haykanush tipa ka yugo gayo tambuahe.
Wakina agu aborokporo re, ngba dungu aboro ima rengba ka zera mbiko wai Haykanush na kumbari amangipai kuti rengo. Ono ya mo ngba Yekova rengbe ka zera? Wai du ko arengbe ka bi gayo mangapai nga ga rengo? Ya mo gu ome i amangihe ka mangapai kuti rengo re adu na wene sangbanaha ti ni?
AGU ASINO NYAKIPAHA KISUSI AHE
Nyakingo gu karagapai du kuti agu asanahe re te. Gu ndupai re nga, ga Yekova amoyambu idi kuti gupai nga yugo ga Yekova asino nyakipaha bangiriko kisusi mbia fongo, daabu, watadu gu kura ahe. Nirengo, ga Yekova bipai tipa guhe du na nyanyakipaha watadu gu anyakanga paha ya kia ti gu nga ga dungu aboro. (Yes. 55:8, 9) Na tipa gako amoyambu, yugo gako asino ngba wene gene nga nyanyakipa pai fuyo.
Ani naino gipai re ti gupai Ziazia Kekeapai agumbaha tipa rugatinapai gbiati tatamana. Asanza 3:13-15 naya: “Boro ngbarago nga gu ni ini tatamana, na gu boro du na rugatinapai, bambiko mokiisa ha ngba ki susi mokiisa baga feda, gu mokiisa du ti ni si ki susi ga dahabu. Si ngba ki susi ti ngungungu ambia fongahe, he ho mo akpi nyemu he, ka rengbe na ni te.” Si tie ziazia nga, Yekova nabi agu asino re nanyanyakipaha kisusi aũkumuko.
Na ginipai tie du tipa pe rengo?
Nirengo, Yekova nitiko nape kina rengo; ko “arengba nga na re zire” te. (Tito 1:2) Na gako toro adu kugii gu mokedi nangia Pauro ko ke gupai fu agu aKristano nga aEbere naadu rogo bambata sa kama agarã nga: “Oni kpári tipa rani, bambiko ya ani tigaani ani na wene sangba kpoto yo, nikpi nyemu ka sunga na rurupai rogo apai dunduko.”—Eb. 13:18.
Yesu Kristo amoi wene kpiapai nga ga gumba rengo. Ni kpiapai, mo tingidi gupai nga, ho gu Gbiamotumo nangia Kayafa apoi ni kuari nga: “Mi nazungadi ro ni rimo Mbori du ni ungako, mo yúgu he fu rani si ngia Kristo nga mo, nga Wiri Mbori?” Yesu agumba kina rengo ki yugu tiko nga Masiya nga ko, wa vura duhe nga pa ida ko ho wo arengbe arengba ka sa ga ga aYudo Aboro Rondo i kitingbanga ko nga ko nagberã ngbakoyo na si ki sa gupai nga i imiko.—Mt. 26:63-67.
Ginipai tigaha du tipa rani? Ya mo ani agumba rengo ho duhe ni nga pa oka ani rengo watadu ka aria fugo rengbe ka ye na aũkumuko?
KA PE RENGO IMA KPAKARA
Nirengo, si ima kpakara ka gumba rengo rogo gi yangara arame dungu “aboro akpi 2 Tim. 3:2) Zingo marã watadu zanga sunge marã nasaha ni mbumbupai fu aboro i pe rengo. Dungu aboro naberãha nga si ruaru fuyo i dĩhe, ka nangahe, watadu ka gumba ziree. Gi bipai re ima kpatafuro si ki da nga dungu aboro niberẽhe nga ho daha ni nibipa gbia aũkumuko, si aidanga boro pe rengo te. Na zavura kura aKristano ima manga iraira diaberã nibipa gipai re na mbiko ‘aura tipa marã’ i ki zanga gayo du gigiri rogo dungurati.—1 Tim. 3:8; Tito 1:7.
kina nyemu tiyo, ki du ni airakpinyemumarã” rogoho re. (Ono tie, tipa dungu aKristano, i nawirika Yesu. I ima inoho nga sinombori nyakipaha kisusi aũkumuko dunduko. Rogo gi gene re, agu agude nga aKristano adĩngopai sukuru yo tipa ka manga asada wenengai te. (Snz. 20:23) Rengo ngaha nga, pa pe rengo arengbanga ka ye aye kindi na mosoro wagu naadu tipa Haykanush te. Ono wa vura duhe wo, ka pe rengo nga gupai ru bangiri Mbori, na si nasa rani ani du na gigiri sangbakpotoseyo nga gu du na nyanyakipaha.
Gu kpiapai nga ga Gagik nayugo gipai re wenengai. Ko aya: “Mbata fu mi da ni Kristano, mi aamangasunge rogo gu bakere basunge nga gu airaha anaaka kaa tumo marã-ngbeti nipeyo ziree nibipa gu marã i aagbiaha. Wa mi angia barugupasunge, si anaaida mi mangi giatise na gu boro naaroga marã-ngbeti tipa ka tumo marã mobirimo funi wa ka ni zanga kusa gaani mangaapai nga ga biriki kuyangura. Nisangbanaha, rimore awo ni kere ira ziree. Ho mi awiriki rengo ni, mi ambu manga gupai re, wa vura duhe nga mi aazio wene marã ti gu sunge re. Kubagure, mi atona gimi sunge bagaahe. Na nikina gu bambata uru mi atonaha, mi ake rimo gimi sirika na agbiangbii na kini tumo gimi amarã-ngbeti dunduko.”—2 Kor. 8:21.
Gagik aya: “Gu marã mi aagbiaha aye ka umba nikerehe, sidu, si ki du ni mbumbuhe fere mi ngere fuo gimi aborokporo. Ono wa si avura duwo, mi awere nangbarago. Mi na gigiri sangbakpotoreyo bangiri Yekova. Mi nga wene kpiapai fu awire ue nga akumbagude, na mi ima rẽ awere tipa amomu rogo dungurati. Abarogo marã-ngbeti gbiati agu aboro mi amangasunge bagaahe na yo nabire awere ni gu kumba na gumba kina rengo.”
YEKOVA NIKA UNDO RONI AUNDO
Yekova nakpinyemu agu aboro nasa gako yugopai bibihe du wenengai niyugoyo gako wene asino kodihe na gumba rengo. (Tito 2:10) Gako ziazia toro adu kugii Davide ko fu gi kidohe re: “Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te.”—Tam. 37:25.
Gu kpiapai nga ga gu ruru dee nangia Ruta nayugo gupai re. Ri akakuti na-kumbari nangia Naomi kuba gupai nga ka mburi wa ri aima gbinza. Ruta aga ku Yisaraere yo, yo ri arengbe ka iriso ndikidi Mbori ni. (Ruta 1:16, 17) Ho Ruta adu ni Yisaraere yo, ri aamangapai na rengo na kini mangisunge nyanyaki, kini dungura futu zende ahe a wa si adu rogo Ndiko. Wakina gupai Davide agbiatiko na ni kusa, Yekova aambunga Ruta na Naomi ku rogo zingo te. (Ruta 2:2-18) Gu nyakipaha anyaka gbe nga, Yekova amangi bakere apai fu Ruta susi gu gbua nga ka ngera fuo gari azingo ũborose. Ko asia ri ri du ni tita Davide na zavura gu Masiya i akidopako!—Ruta 4:13-17; Mt. 1:5, 16.
Kura ga Yekova amoyambu rengbe ka gbiatiyo rogo gu kpakaraapai duhe rogo nimbumbuhe fuyo i gbia agu ahe i aida tipa raka yo. Kuba gupai nga i gbata gu gene du taata ono ki pe ziree, i namanga bakere ome Snz. 12:24; Ef. 4:28.
ka mangasunge nyanyaki. Rogo gi gene re, i kini yuguhe nga i nabi ga Mbori wene asino, kodihe na gumba rengo na nyanyakipaha kisusi ahe dũ.—Wakina Ruta naadu bakuru kusayo, aKristano rogo zegino dunduko ima du na idapase kuti ga Yekova ome ka undoyo. I na bakere kido kuti gu Ko naasa gupai nga i ke gi kidohe re rogo Fugoko yo, nga gu naya: “Mi ahe nga unda ro wa sa te, mi ambú nga ro a wa sa te.” (Eb. 13:5) Yekova aima digo niyuguhe nga ko rengbe arengba na ko nika undo gu rungorungo aboro aundo nape rengo ti aregbo dũ. Ko aima digo nimangipai a kuti gako akidohe nga ko nika fu agu ahe afu ani aida tipa raka rani.—Mt. 6:33.
Nirengo, aboro rengbe kaa bi mbia fongo na gu kura ahe na nyanyakipaha. Ono ani ima rengba kadu na kido nga, pa gumba ani rengo na kini yugu agu akura asino du ti gu Barani du ngbangbaturũ yo, si nyakipaha fuko kisusi kikiipa geno ambia dũ!
Pa gumba rengo nasa rani ani banda sangbakpotorani yo gigiri na kadu na ranirii nga ga fugo gene tungusapai yo