TIPAGINE rengbe mo kadu ti ni na kido nga agu afugo nga Yekova naberãpa roni aberã nga rengo nzunzu? Ndupai sa nga kina boro Ziazia Kekeapai nagumbaha wo. Bambata Petero 5:7 naya: ‘Oni bá agu apai nafuda roni ku auru ko yo; mbiko ko naberã pa roni.’ Gini gopai du mo na ni nayugoho nga Yekova Mbori nakpinyemuro akpi?

Bambatapai nga, Mbori na agu asino tiko si awira wa mo rengbe ka ida wene bakureamo du na ni. Agu aboro dedede namangapai fu akurayo wenengai na kini gamuhe dagbatiyo nada ni wene abakure. A wa mo abihe, Yekova ni wenesino ko na ko nagama ahe fu aboro na aˈuru dũ. Mo bingo kpiapai sa nga: “Ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.” (Mt. 5:45) Ginipai uru na mai naamangaha? Dagba gu kura apai si amangaha nga, Mbori namangasunge na ni ka ‘hihiso kpoto aboro yo ni riahe na ngbarago.’ (Amo. 14:17) Nirengo, Yekova nasa kpotosende si kusi bakere riahe na ngenga agu ahe nasa ngbarago tirani wa wene riahe te.

Tipagine du tie dungu aboro ara na gomoro ti ni? Mbiko gupai nga abazogo naberã kina padu na bakere ome rogo birĩ zogarago na ka gbia bakere marã kuba gupai nga i mbakadi ga aboro gene raka. Bara mbeda, Yekova nika nyasariipa gu sino nga ga ngbaduse na ki aria agi azogarago du awere re na gako Kindo nga ga ngbangbaturũ ki dibaha, na Wiriko kingia Bakindo ho. Ti gu regbo re, boro ho nikaa  ra na gomoro te. Ono wa du rago re, Mbori nangera angera fuo gako ruru amoyambu. (Tam. 37:25) Ya mo gure ayugongo gupai nga ko nangera angera fuo rani te?

Wene bakureamo nadia gani regbo na mo. Ni ima rengba ka dia asa ka fura tipa agu apai nangba tironi. Na wene bakure nadega tuni foro wenengai ho mo apepa gamo akpakarapai na abakabangirise ni funi. Ya mo Yekova nadegatuko wa gure? Nirengo, kina boro wo ko amangaha! Ko nadegatuko kuti gaani akparakpee. Sidu, Ziazia Kekeapai angarasa rani ti ni nga ani “kpatagara kuti kpe,” na ki zanga ‘pirigo ti kparakpee.’​—Rom. 12:12; 1 Tesa. 5:17.

Yekova na nyemu ka dia bagizo regbo wai ka degatuko kuti gamo akparakpee? Gu kpiapai du rogo Ziazia Kekeapai nakaragapai kuti gu sanahe re. Mbata fu Yesu sia gako amokedi, ko ‘akpari akpara fu Mbori yuru sasasa.’ (Rk. 6:12) Rogo gu kparakpee yo re, si nawira wa ko ayambuyo ti kina arimoyo ki wisigipai tipa asinoyo na gayo arungbura, na kini sana Bako tipa ko undoko ko siayo. Ho rago agiri ni, Yesu aima ino gupai nga ko ima sia aguyo narẽ ka mangasunge ni amokedi. Wa du Yekova “ninagia kpetambuahe,” ko na nyemu ka degatuko kuti ruru akparakpee dunduko. (Tam. 65:2) Ka si vura du nga boro nadia dungu asa kaa kpara tipa agu apai nafuda ni, Yekova agedanga agu aregbo re te.

Zavura wene abakure, si nidu adu ni kpakarapai tipa i mbupai dagbatiyo. Ti kura aregbo, aboro nagbarasa pa gu pakure agbarasa niima dia regbo mbiko gupai nga i aidanga ka mbupai te. Yekova wo tigako te. Ziazia Kekeapai nangarasa gu boro du na ruru ngbaduni yo ni sanahe tipa gako mbupai, “mbiko ko avú ni avu kpaima.” (Yes. 55:6, 7) Ginihe nafõ Mbori ko vú aboro kpaima?

Gu ndupai re nga ga Mbori bakere nyemuse. Ko akpinyemu aboro zegino dũ wa ko afu Wiriko nga Yesu tipa ka batasa aboro be ingapai na gu kerepai si aye na ni kurii aboro. (Yo.  3:16) Nirengo, ga Yesu motumo ima manga bakere apai kisusi. Vurube ga Kristo motumo, Mbori nambupai kpaima fu agu aboro ko akpinyemuyo. Gu mokedi nangia Yoane akepai nga: “Ka ani kusi gaani ingaapai, ko nga irarengo, du na rurupai, ko vu rani avu ti gaani ingaapai, ki girisi rani agirisa be irairaapai dũ.” (1 Yo. 1:9) Mbiko ga Yekova mbupai, aboro rengbe arengba kaa gbia ngbarago ti wene pabakure na ko na pa ino ani gipai re nazio ngbaduroyo ni bakerehe.

Ndikidi bakure naundo akurani ho i aida ni na undo. Ya mo Yekova namanga gu ngisapai re? Fugoko naya: “Ka [ga Mbori moyambu] vura ti, ni atí nga kindi te; bambiko Yekova nasongoda ni ni beko.” (Tam. 37:24) Yekova ‘nasongoda gako amoyambu’ ngba dungu agene. Mo bingo gupai namangi rogo gu kisanga nga ga Caribbean nga St. Croix.

Paranga degude sa adu ni fudifudi ri be akurari sukuruyo mbikopa zanga ri fu iriso fu bendeere mbikopa gari ida. Tingbafuo ri kpari fu Yekova tipa undo, ri adiberã ka mangapai kuti ni. Ho regbo adani ri fura fu akuari tipa agu apai i aapekaha, ri asia ka fura tipa bendeere tigari. Ri amangisunge na gu buku nga Gimi Kitabu Apangbanga Nga ga Ziazia Kekeapai tipa ka sakapai tipa wai gu pangbanga du tipa Sadaraka, Mesaka, na Abedenego adu na maapai kurii gari diaberã. Ri aya: “Yekova abanda agu aEbere biata re mbiko i aka ka iriso kpiahe.” Fuani ri ki fu gu buku re fu agu aboro naadu ho. Akurari bawe na sa ki idi i fu gu buku re fuyo. Gu degude re aima du na ngbarago mbiko ri abi gupai nga Yekova du nafu ome na tatamana furi tipa ri mangi dezirepai nibipa gupai re.

Ka si du nga mo tona ka kapa nga Yekova aberãnga paro te, mo berẽkurii agu afugo Ziazia Kekeapai duwa gu du rogo Atambuahe 34:17-19; 55:22; na 145:18, 19. Mo sana agu aDezire Yekova naima ima ku rogo rengo tipa wai Yekova nangerẽfuo yo. Na ho mo aida Mbori undo ro ni, mo kpari fuko tipa gupai mo aidaha re. Si aima nga te mo ki bi wai Yekova ‘aberã pa ro.’