TIPA dungu agarã, a Yisaraere anaafu marã tipa ka songoda ndikidi irisombori. Ono ti rago Yesu, si anaaida aYudo fu badungu amarã-ngbeti, na gipai re aima sa raka si du ni kpakarakpakaraha fuyo.

Si anaaida agu aYudo naanidu ni ngangarã yo fu bebere sekere sa (adarakuma ue) tipa ka undo irisombori rogo ga Mbori kparakpara ba. Rogo bambata sa kama agarã, i anaamangasunge na gi marã-ngbeti re tipa ka fu amotumo na ka ngerafuo gu yekaru Erode amehe. Kura aYudo asana Petero ka ino singia Yesu nafu gu marã-ngbeti re, na Yesu ape gupai nga si ni gbegberẽpai ka fu marã-ngbeti te. Ko ayugu wari fu Petero rengbe ko ka gbia zau-marã ni tipa ka fu gu marã-ngbeti i aaidaha re.—Mt. 17:24-27.

Ti agu aregbo re, ga Mbori aboro anaafu gu kura ngbatunga marã-ngbeti afu a nga gu i anaayambaha nga sa-dagba-bawe, nga gu naaida gupai nga i fu sa-dagba-bawe nga ga gayo aũ ati watadu gayo amosoro. (Pa Mot. 27:30-32; Geda 18:26-28) Abarumbatayo rogo pambori yo anyakasi pa gupai nga, aboro nifu sa-dagba-bawe nga ga ai kpepasio, zavura nga ga “danda na anisi na kumina.” Yesu aasoganga pa fu sa-dagba-bawe te, ono gupai ko apehe nga, gu gene abakeapai na aFarusi anaamangasunge na gu ndiko naadu tipa fu sa-dagba-bawe ngbaha adu ni kere irairaha.—Mt. 23:23.

Ono tie, ti gu regbo re, si anaaida aYudo naafu badungu amarã-ngbeti fu aRomo nga aguyo nanaazogarago kurii yo. Ni kpiapai, agu aboro naanidu na rago beyo anaafu gayo marã-ngbeti rogo marã yo watadu dagba aũ ati yo. Rogo ringbisapai yo, gu marã-ngbeti i anaafuhe re, bakioho anidu wa 20 kuti 25 rii kama nga ga gayo ahe. Gu kura marã-ngbeti kinaho berewe nga gu si anaaida ai boro dagba aYudo yo naafuhe. Gi marã-ngbeti re du aFarusi asana Yesu nibi paha. Ko ayugu gu ruru bipai si aida ani du na ni tipa fu marã-ngbeti ho ko aya ni wẽ: “Agu ahe nga ga Kaisara tie, oni nifú kina ha fu Kaisara; agu ahe nga ga Mbori oni nifú kina ha fu Mbori.”—Mt. 22:15-22.

Gu kura marã-ngbeti kinaho berewe nga gu i anaafuhe tipa agu ahe i anaangbehe rogo gu kura aringara na agu ahe i anaabagaha ku rogo kura aringara nga gu i anaasusa na ni rogo agu aba nga ga tumo marã-ngbeti. Agu aba re angia aba rugusa kurungba, rii apaga, ngboso agene, watadu ti agu agene nandu ku gbatayo watadu agu nandu ku bangbeahe yo.

Gu marã-ngbeti naabaha nga gu aboro anaatumoho tiibe gu zogarago nga ga aRomo aima kio nikerehe. Ringbisihe kuti gupai gu ga aRomo bakeke kuru apangbanga rimoko angia Tisito agumbaha, ti regbo gu zogarago nga ga gu bazogo nga Tiberia mbu Yesu kindi auru kpotosende ane, “aSurio na aYudo asanahe tipa i umbasi bete agu ahe i anaafuhe tipa ka songoda sunge yekaru na ni, bambiko si aima du ni ba mbumbuhe fuyo gbe.”

Gu gene i anaadungura gu marã-ngbeti re ngbaha aima du ni bakpakarakpakaraha. I anaafu gi sunge re fu kina agu aboro nanaafu bakere marã tipa ka gbiaha. Agu aboro nanaafu bakere marã tipa gi sunge re, nga aguyo naadu na rengba ka gbia bakere marã ti agu awaraga tumo marã aboro anaafuhe re, i anaafu gu sunge nga ga ndikidi dungura marã fu gu kura aboro na kini mangi bakere marã fu tiyo. Si nangera wa Zakayo aduadu na gi ngbatunga arogo marã-ngbeti re kutii beko. (Rk. 19:1, 2) A wa du sino aboro, aboro aima soga gipai re na ki sogo agu aboro nanaaroga marã-ngbeti beyo.