1. Ginipai ga Yesu abawiriki apehe fu bakere rimbasa aboro rogo bambata sa kama agarã i mangihe?

BAKERE rimbasa aboro nga akumba na adee andu nunguro ku Yerusarema yo. I aye rogo dungu aringara ni bakiakia na kini pe dungu afugo ni bakiakia. Bakerepai amangi ni gu uru re. Kura aYudo aima du na rengba nibasa ka fura rogo afugo agu aboro naye! Gipai re aima zeresa ngba gu rimbasa aboro re ni kerehe, ono gupai agu aYudo re apehe fuyo na gupai gu mokedi nangia Petero apehe fuyo dunduko aima du ni nyanyakipa pai gbe na si ki zeresi ngbayo ni bakerehe gbe. Si aakoda gu pangbanga nga, i ima rengba ka gbia bata nimaa yo idapase kuti Yesu Kristo. Gu pangbanga re aima du na bakere maapai kurii gu rimbasa aboro re. Si afõngbadu aboro yo ni bakerehe gbe i ki sanahe ki ya: “Ani amánga wãi?” Petero akaragapai fuyo ki ya: “I . . . bapatizi roni dunduko.”—Amo. 2:37, 38.

2. Ginipai ani nika wisigoho rogo gi kekeapai re? (Oni bi gu sura duti kpotoho.)

² Gu pai namangi tingbafuo gure aima du ni ba iiriwoho. Aboro wa 3,000 azi bapatiza ni gu uru re na ki da ni ga Kristo abawiriki. Gere nangia tonatona bakere sunge sa aboro ni abawiriki Yesu arugu apefuoko i niimangihe. Apefuoko namanga gu sunge re kindi areme. Areme, ani afuranga fu boro tipa bete asaa na si ki da nga ni ima rẽ ka zio bapatiza te. Si ima rengba ka dia adiwi watadu garã watadu susi gure tipa bawiriki Ziazia Kekeapai da ti gu sasa re. Nyanyaki sunge du nga ni ka undo boro ni da ni ga Kristo bawiriki, a wa mo naima inoho wenengai ka si du nga mo nawirika Baibiri awere na boro. Rogo gi kekeapai re, ani nika wisigopai tipa gupai mo narengbe ka mangaha ka undo gamo bawiriki Ziazia Kekeapai ni da ni gu bawiriki naima zio bapatiza.

3. A wa pe yo ho rogo Matayo 28:19, 20, ginipai si aida bawiriki Ziazia Kekeapai mangihe tipa ka manga sonakumbatayo ki zi bapatiza?

³ Mbata fu bawiriki Ziazia Kekeapai zi bapatiza, si naida ni moi agu apai Ziazia Kekeapai ayugoho ku rogo mangaapai yo. (Oni gedi  Matayo 28:19, 20.) Ho bawiriki Ziazia Kekeapai amangapai ni kuti gupai ni awirikaha, ni nada wa gu “boro tatamana” du rogo ga Yesu kpiapai nga gu ni nage due dudunguro ku sende yo tipa ka me gani bambu rii nyanyaki mbia. (Mt. 7:24, 25; Rk. 6:47, 48) Waigu rengbe ani ka undo bawiriki Ziazia Kekeapai ni mangipai kuti agu apai ni awirikaha? Ani sakingo pai tipa apai biata nga gu rengbe ani ka mangaha.

4. Waigu rengbe ani ka undo bawiriki Ziazia Kekeapai ni naandu kindi kumbatayo kaa manga agu apai rengbe ka undo ni ni rẽ tipa ka zio bapatiza? (Oni bi gu sanduki nga, “ Mo Undo Gamo Bawiriki Ziazia Kekeapai Ni Moi Asasa na ki Da Ti Ni.”)

⁴ Mo undo gamo bawiriki Ziazia Kekeapai ni moi asasa. Ginipai si aida mo mangi gupai re ti ni? Mo bingo gi kpiapai re: Ka si du nga mo nandu nunguro ku rogo tuturũ ba, mo ima rengba ka diaberã kaa runda rogo agu aba du ni bawenehe gene. Ka mo mangihe wo, mo adunga na gberãrago nga gu ba mo andu ku rogoho re ima turo nikerehe te. Wakina gure a, ho bawiriki Ziazia Kekeapai amaa agu asasa ni rengbe ni ka da ti ni vuru umba regbo yo, ni nika bihe nga niima rengba ka da ti gu sasa nga ga bapatiza. Mo mangisunge na gu papara pai nga “Sásá” du rogo gu buku nga Mo Raki Nyeanye Kindi na Ngbarago! ka undo gamo bawiriki Ziazia Kekeapai ni mangi sonakumbatayo. Ti digido ai gaoni wirikapai, mo sakipa wai gu sasa re nika undo gamo bawiriki Ziazia Kekeapai ni mangipai kuti gupai ni nawirikihe. Ka si du nga mo na kura sasa kia berãro yo tipa gamo bawiriki Ziazia Kekeapai, mo kehe rogo gu ba du tii gu riipai nga, “Gu kura sásá.” Dedede, mo naamangasunge na gi papara wirikapai re tipa ka fugo agu asasa rengbe gamo bawiriki Ziazia Kekeapai kada ti ni vuru umba regbo yo na agu si narengbe ka dia gbanga regbo adia ni da ti ni.

5. A wa duhe ni kekehe rogo Marako 10:17-22, ginipai Yesu aya fu kumukokumuko kumba ko mangihe na tipagine?

⁵ Mo undo gamo bawiriki Ziazia Kekeapai ni mangi aʹariapai rogo gani raka yo. (Oni gedi Marako 10:17-22.) Yesu aima ino gupai nga, si ima rengba kadu ni mbumbuhe fu irakumuko tipa ni bagi gani ahe dunduko. (Mk. 10:23) Ono tie, Yesu ape gupai fu gu kumba re nga, si naida ko mangi gu bakere ariapai rogo gako raka yo. Tipagine? Bambiko  Yesu aima kpinyemu ko. Ti kura aregbo, ani ima rengba ka zanga ngarasa bawiriki Ziazia Kekeapai tipa ni mangipai kuti gupai ni awirikaha bambiko ani nabihe nga ni ata danga ba gu ariapai si aida ni mangihe te. Si ima rengba ka dia regbo na aboro tipa i mangi aˈariapai rogo gayo raka yo na ki ukadi vovo borose. (Koro. 3:9, 10) Ono ho mo afura ni na ni niipo tipa ariapai nga gu si aida ni mangihe, ni natona ka manga gu ariapai re niipo. Ni manga oni gu fugodagbase re, mo nayugo gupai nga, mo naberãpa ni aberã.—Tam. 141:5; Snz. 27:17.

6. Tipagine si aida ani naamanga sunge ti ni na agu asanahe du tipa ino ga boro bipai?

⁶ Si ni nyanyakipa pai ani sana gaani bawiriki Ziazia Kekeapai tipa ka ino gu berãpai du ni na ni tipa pai. Gere nika yugopa gupai gamo bawiriki Ziazia Kekeapai narugu tini na ni na ki idi kutini. Ka mo amanga gipai re dedede, si nika du foro taata mo fura na ni tipa agu apai rengbe kadu ni mbumbuhe fu ni ni idi kutini. Gu buku nga, Mo Raki Nyeanye Kindi na Ngbarago! na dungu asanahe rogoho nga gu du tipa ka ino ga boro bipai. Ni kpiapai, gu wirikapai nga ga 04 na sanahe rogoho nga: “Mo nabihe nga wai gu du Yekova ho mo amangasunge ni na rimoko?” Gu wirikapai nga ga 09 na sanahe rogoho nga: “Gini bete apai mo narengbe ka kpara tipaha?” Ti tonatonaha, si ima rengba kadu ni kpakarakpakaraha fu gamo bawiriki Ziazia Kekeapai ni karagapai kuti agi asanahe re. Mo rengbe ka undo ni ni raba mo ni ni naaberã kurii agu averesi na asura du rogo gu buku re.

7. Wai du rengbe ani ka mangasunge na gu pangbanga nga ga kura aboro ngba wene gene?

⁷ Ho gamo bawiriki Ziazia Kekeapai aruga tini ni na gupai si aida ni mangihe, mo mangisunge na pangbanga agu apai naaima manga tipa ka ngarasa ni ni mangihe. Ni kpiapai, ka gamo bawiriki Ziazia Kekeapai andunga tipa adunguratise dedede ya, mo ima rengba ka yugo gu vidio fu ni du riihe nga, Yekova Angerefuo Re nga gu du rogo gu kekeapai yo nga, “Mo Weteke gu Kura Apai” rogo gu wirikapai nga ga 14. Rogo badungu agu awirikapai yo du rogo gu buku nga, Mo Raki Nyeanye Kindi na Ngbarago! mo nika bi ngbatunga agu akpiapai re rogo gu paparaha nga, “Mo Wiriki Kura Dungu Apai” watadu rogo “Mo Weteke gu Kura Apai.” * Mo du na rubangirise ka zanga ka ringbisa gamo bawiriki Ziazia Kekeapai na kura boro ni ya mo wẽ, “Ka si du nga ni namangaha amanga, mo ima rengba ka mangaha a.” Si naida bawiriki Ziazia Kekeapai ye kuti gu digisopai re nisani. Mo fura tipa gu memeapai naaundo gu boro du rogo gu vidio re tipa ni mangipai kuti meme ayugopai nga ga Baibiri. Isoke, mo rengbe ka pe pa nyanyakipa veresi fu ni watadu pai nga gu gu boro re amangihe. Ho du rengba ni, mo nyakasipa wai Yekova aundo gu boro re.

8. Waigu rengbe ani ka undo gaani bawiriki Ziazia Kekeapai ni ye ka kpinyemu Yekova?

⁸ Mo undo gamo bawiriki Ziazia Kekeapai ni kpinyemu Yekova. Ngba gini gene? Mo gbata amomu tipa ka gbeberã ni kuti ga Yekova asino. Mo undo gamo bawiriki Ziazia Kekeapai ni bi Yekova ni Mbori ngbarago nga gu ko nasongoda agu aboro kpinyemuko. (1 Tim. 1:11; Eb. 11:6) Mo yugu gupai fu gamo bawiriki Ziazia Kekeapai nga, ni nika gbia undo ni manga ni pai kuti agu apai ni awirikaha, na mo ki saki gu pai fu ni nga agu aundo re nayugo gupai nga Yekova ima kpinyemu ni. (Yes. 48:17, 18) Ka gamo bawiriki Ziazia Kekeapai anyakasa gani nyemuse tipa Yekova ni bakerehe, kinawo a ni nika du na bakere nyemu ka manga agu aˈariapai si aidaha.—1 Yo. 5:3.

9. Ringbisihe kuti Marako 10:29, 30, ginipai rengbe ka undo boro ni mbupa kuraapai tipa kada ni gu bawiriki naima zio bapatiza?

⁹ Tipa bawiriki Ziazia Kekeapai mangi sonakumbatayo ki zi bapatiza, apai kinaho si aida ni mbu paha. Wa gu kumukokumuko kumba i nifura tipa ko  kusayo, kura abawiriki Ziazia Kekeapai kinaho rengbehe ka ida i mbupa aũzegino. Ka si du nga gayo sunge na ngbanya dagbaha na agu abangua rengo nga ga Baibiri te, si ima rengba ka ida i gbata kura sunge kia. Agu akurayo kinaho si naima rengba ka ida gupai nga, i mbu agu abakure kusayo akpingo nyemu Yekova ya. Agu akurayo kinaho gu gayo aborokporo aidanga na aDezire Yekova ya ambu yo. Yesu ape gupai nga, si ima rengba kadu ni mbumbuhe fu kura aboro tipa ka mbupa ngbatunga agi apai re. Ono ko akidohe nga, rago agberãnga ti agu aboro napekafuo ko te. Yekova nika fu bakere mosoro fuyo ni fuko bawene aborokporo fuyo dagba gako aboro yo. (Oni gedi Marako 10:29, 30.) Waigu rengbe mo ka undo gamo bawiriki Ziazia Kekeapai ni gbia undo ti gi bawene gamahe re?

10. Ginipai mo awirikaha ti gupai Manuel agumbaha?

¹⁰ Mo sonosi pabakure na gamo bawiriki Ziazia Kekeapai. Si ni nyanyakipa pai ka yugo gupai fu gamo bawiriki Ziazia Kekeapai nga mo naberãpa ni aberã. Tipagine? Oni bingo gupai kura wirina sa nga Manuel apehe nga guko naraka Mekisiko yo. Ko asakipai tipa wai gako bayugu Ziazia Kekeapai aundo ko ho ko adu ni ni bawiriki Ziazia Kekeapai, ko aya: “Mbata fu ai wirikapai, gimi bayugu Ziazia Kekeapai anaasana re tipa wai du mi. Ko anaaundo re mi du zezeredi na kini mbure mi naafura fuko gbaiga tipa kura apai. Mi anaabihe abi nzunzu nga, ko anaaberãpa re aberã.”

11. Waigu rengbe gaani abawiriki Ziazia Kekeapai ka gbia undo ti dia yo regbo na ani?

¹¹ Mo naadia regbo na gamo abawiriki Ziazia Kekeapai a wa Yesu anadia regbo na apefuoko. (Yo. 3:22) Ka si du nga gamo bawiriki Ziazia Kekeapai namanga aˈariapai rogo gani raka yo, mo ima rengba ka yamba ni ku kpuro yo tipa fofoi ime watadu riahe watadu ka bi gaani mbakadapai na ni nga ga JW Terevizioni. Gamo bawiriki Ziazia Kekeapai ima rengba kadu gbe na tambuahe ka mo yambu ni ho abakureani na gaani akporo amanga agu apumbo nga ga aˈuru ongoda ni nga gu regbo ni narengbe ka bihe nga ni nisani. Kazibwe nga kura wirina sa naraka Uganda yo aya, “Mi nabihe nga mi aima wirika badungu apai tipa Yekova ti dia mi regbo na gimi bayugu Ziazia Kekeapai wakina gu mi aawirikaha ti regbo gaani wisigopai. Mi aima bi bakio wai Yekova aberãpa gako aboro na wai du yo na ngbarago. Gure nga gupai mi aaidaha rogo gimi raka.”

12. Tipagine si aida ani naandu ti ni na abatungusipai ni bakiakia tipa ka wirika Ziazia Kekeapai na boro?

 ¹² Mo naandu na abatungusipai ni bakiakia tipa ka wisigopai na boro. Ti kura aregbo, ani ima rengba ka bihe nga si ni taataha gbe kaa ndu nisarani watadu kaa ndu na kina bangisa batungusipai sa. Wa vura duhe nga si rengbe kadu taata gbe furani tipa kaa manga gipai re, gaani bawirikipai nika gbia undo ni bakerehe ka ani andu na abatungusipai ni bakiakia tipa kaa wirikapai na ni. Kura wirina sa nga Dmitrii nga gu ko naraka Moldova yo aya, “Agu abatungusipai nga aguyo nanaaye kupati gimi wirikapai anaasakapai ngba gayo agene ni bakiakia. Si aundo re mi bi kura agene nga gu rengbe mi ka mangapai ngbaha kuti gupai mi awirikaha. Mi aadunga na bakere zee ho mi andu ni tipa gimi bambata adunguratise te, bambiko mi aima gbia badungu awirina mbata.”

13. Tipagine si aida ani undo gaani bawiriki Ziazia Kekeapai ti ni ni naandu tipa adunguratise?

¹³ Mo undo gamo bawiriki Ziazia Kekeapai ni naandu tipa agu adunguratise nga ga dungurati. Tipagine? Yekova nazinahe fu airisiko nga i naadungura tiyo ku rogo ba sa; si nga papara gaani irisombori. (Eb. 10:24, 25) Kurigure, awirinarani rogo dungurati nada wakina gaani aborokporo. Ho du ani ni ba adunguratise yo na yo, si nadu wa ka i ya ani kina kporo sa nari wene riahe na yo. Ho mo aundo gamo bawiriki Ziazia Kekeapai ni ni naandu tipa adunguratise, mo naundo ni ni mangi diandue sa dagba gu nyanyakipa adiandue yo si aida ni mangihe tipa ka zio bapatiza. Ono si ima rengba kadu ni mbumbuhe fu ni tipa ni tona kaa ndu tipa adunguratise. Waigu rengbe gu buku nga, Mo Raki Nyeanye Kindi na Ngbarago! ka undo gamo bawiriki Ziazia Kekeapai ni dibe agu aˈasada dunduko rengbe ni ka gbia tini na ni?

14. Waigu rengbe ani ka fõngbadu gaani bawiriki Ziazia Kekeapai yo ni tona nduge tipa adunguratise?

¹⁴ Mo mangisunge na wirikapai 10 nga ga gu buku nga, Mo Raki Nyeanye Kindi na Ngbarago! tipa si undo ro mo fõngbadu gamo bawiriki Ziazia Kekeapai yo. Mbata fu sunge gu buku re nyasi, i asana kura abatungusipai tipa i mangisunge na gi wirikapai re tipa ka undo gayo abawiriki Ziazia Kekeapai. I ape gupai nga, si aima du na wene sangbanaha gbe na si aima undo gayo abawiriki Ziazia Kekeapai tipa i naandu tipa adunguratise. Ono ka mo pidingo oni da mbata na gamo bawiriki Ziazia Kekeapai ti wirikapai nga ga 10 mo kini ru ka yamba ni tipa adunguratise ya. Mo yambu ni nibasa tipa adunguratise ka rengba du na kini ndu kindi kumbatayo kaa mangaha wo dedede. Abawiriki Ziazia Kekeapai nagbiatiyo na akpakarapai ni bakiakia. Sidu, mo moiberãro tipa agu azingo nga ga gamo bawiriki Ziazia Kekeapai na ki bihe singia mo rengbe ka undo rogo mangimangipai yo. Ka rago gberẽnga tiro ka si aadia regbo adia tipa ni tona nduge tipa adunguratise ya. Mo du na zerangbaduse ono kini ndu kindi kumbatayo kaa yamba ni tipa adunguratise.

15. Gini agunde rengbe gaani bawiriki Ziazia Kekeapai kadu na ni?

¹⁵ Ya mo mo natingida gupai nga mo anidu adu na gunde tooni tipa kada ni Dezire Yekova? Isoke, mo anaaberãha nga mo arengbanga ka tungusapai gbaiga te. Watadu mo adu na gu gunde nga, gamo aborokporo watadu abakureamo ima rengba ka soga ro. Ka singia wo si adu, mo ima rengba ka rugatiro na gupai du tipa gamo bawiriki Ziazia Kekeapai. Yesu ape gupai nga kura aboro ima rengba kadu na gi ngbatunga gunde re. Ono tie, ko angarasi apefuoko tipa ka i mbunga gunde si rugusi yo ti iriso Yekova ya. (Mt. 10:16, 17, 27, 28) Waigu Yesu aundo apefuoko i dibe agu agunde i adu na ni? Na waigu rengbe mo ka pekafuo gako kpiapai?

16. Waigu rengbe ani ka raba gaani bawiriki Ziazia Kekeapai ni naafura tipa agu apai ni awirikaha fu kura aboro?

¹⁶ Yeeye, mo raba gamo bawiriki Ziazia Kekeapai ni naafura tipa gani idapase. Si ima rengba kadu nga ga Yesu abawiriki aima gunde ho ko akedi yo ni tipa i ndu ka tungusapai. Ono Yesu aundo yo nipe ko pa wari fuyo i nika tungusapai ni na gu pangbanga i nika tungusaha. (Mt. 10:5-7) Waigu rengbe  mo ka wirika Yesu? Mo undo gamo bawiriki Ziazia Kekeapai ni ini wari rengbe ni ka tungusapai ni. Ni kpiapai, mo sana ni singia ni ini boro nga gu ni rengbe ka gbia undo ti wirika ni kura rengo sa nga ga Ziazia Kekeapai. Fuoho, mo undo ni ni mbakadi gupai nga gu ni nika pehe ni yugo mo gu taata gene fu ni nga gu rengbe ni ka fura ngbaha tipa rengo fu kura aboro. Ka si rẽarẽ, oni ima rengba ka mangasunge na ni na gupai du tii gu riiapai nga “Gu Kura Aboro Nape Gupai Nga” na “Kura Boro Rengbe ka Sanahe Nga,” nga gu du rogo gu buku nga, Mo Raki Nyeanye Kindi na Ngbarago! Ho mo amanga gipai re ni, mo moiberãro tipa raba gamo bawiriki Ziazia Kekeapai ni mangisunge na Baibiri tipa ka fu agu akaragapai du taata na rogo birĩ yo.

17. Waigu rengbe ani ka mangasunge na Matayo 10:19, 20, 29-31 ka undo gaani bawiriki Ziazia Kekeapai ni kido kuti Yekova?

¹⁷ Mo undo gamo bawiriki Ziazia Kekeapai ni naakido kuti Yekova. Yesu ape gupai fu gako abawiriki nga Yekova nika undo yo aundo mbiko Ko ima kpinyemu yo. (Oni gedi Matayo 10:19, 20, 29-31.) Mo tingidi gamo bawiriki Ziazia Kekeapai na gupai nga Yekova nika undo ni aundo a. Mo ima rengba ka undo ni ni naakido kuti Yekova ni manga mo kparakpee wa sa na ni tipa gani asasa. Wirina nga Franciszek naraka Poland yo aya, “Gimi bayugu Ziazia Kekeapai anaagumba pa gimi asasa dedede rogo gako akparakpee yo. Mi atona manga kparakpee niipo ho mi abi wai ni Yekova akaragapai kuti agu akparakpee nangia ga gimi bayugu Ziazia Kekeapai. Mi aima bihe nga Yekova ima undo re ho mi anaasanahe ni ba gimi vovo sunge yo tipa i fu regbo fere mi ndu tipa adunguratise gbiati bakere dunguratise.”

18. Waigu Yekova abi gu sunge agu abayugu Ziazia Kekeapai nga aKristano amangaha?

¹⁸ Yekova naberãpa gaani abawiriki Ziazia Kekeapai aberã ni bakerehe gbe. Ko ima inopa wai agu aKristano nga abayugu Ziazia Kekeapai amangasunge nyanyaki gbe tipa ka undo aboro i mbedi na ko, na ko ima kpinyemu yo tipa gipai re. (Yes. 52:7) Ka si vura du nga mo awirikanga Ziazia Kekeapai na boro awere te, mo ima rengba ka undo abawiriki Ziazia Kekeapai i mangi sonakumbatayo ki zi bapatiza nindu mo na kura abatungusipai fuo gayo abawiriki Ziazia Kekeapai.