1. Tipagine rengbe ga Yekova amoyambu kaa bi tiyo ti ni ti kura aregbo nga i nisayo?

TI KURA aregbo, badungu rani ninaabihe nga ani nisarani. Tipa kura aboro, gi bipai re ninaandunga kumbatayo tipa gbanga regbo te. Tipa agu akurayo, i ima rengba kadu na gi bipai nga ga du nisase re tipa gbanga regbo. Ani ima rengba kaa bihe nga ani nisarani zavura ho du ani ni na badungu aboro. Si ima du ni mbumbuhe fu kura aboro i mangi abakure rogo gu vovo dungurati i naga ku rogoho. Agu akurayo kinaho naadu ni papara gu riikporo nanaamanga badungu apai kina sa, ono i nabi tiyo nga i nisayo ho i aga ni ku rogo gu ba du tuturũ ti agumeyo. Berewe a, agu akurayo nazingo tipa dia regbo na gu gayo boro i nazanga ni rogo kpio yo. Na gu kura aKristano, gbe, aguyo wiriki rengo barambeda nabi tiyo nga i nisayo ho gu gayo aborokporo gbiati abakureayo angianga airisi Yekova ya asoga yo ni watadu kini rungosiyo.

2. Gini asanahe ani nika karagapai kutini?

² Yekova ima ino agu apai dunduko du tipa rani na ki ima rugatiko na ni. Ho ani abihe ni nga ani nisarani, ko ima inoho, na ko naida ka undo rani ani dibe gu bipai re. Waigu Yekova aundo rani? Ginipai rengbe ani ka mangaha tipa ka undo tirani? Na waigu rengbe ani ka undo kura aboro rogo gaani dungurati nga aguyo nabi tiyo nga i nisayo? Ani sakingo pai tipa akaragapai kuti agi asanahe re.

3. Waigu Yekova ayuguhe nga ko aaberãpa Eriya aberã?

³ Yekova naida gupai nga airisiko dunduko du na ngbarago. Ko mbembedi na ani wa du ani nibasasa dunduko, na ho du ani ni rogo bakere gberãrago, ko nainoho aino. (Tam. 145:18, 19) Oni berẽngapa  wai Yekova aabakabangiriko tipa gu nebi nangia Eriya, na wai ko aundo ko. Gu ruru kumba re araki ti kpakarakpakara regbo Yisaraere yo. Agu aboro naadu Yisaraere yo na ome beyo, nga aguyo naakpingo nyemu Yekova ya, aarungosi airisi Yekova, na gbe, i aaida ka imo Eriya. (1 Aba. 19:1, 2) Berewe a, Eriya aberẽ gupai nga, kina ko sa nangia gu yangada nebi nanye naairiso Yekova, na gipai re aima rengba ka sa ko ko du na bakere gberãrago. (1 Aba. 19:10) Mbori amangipai niipo tipa ka undo Eriya. Yekova akedi maraika tipa ko kido Gako nebi na gupai nga ko aadunga nisako te, na gu kura badungu aYisaraere adu kindi ho naagunde ti Mbori!—1 Aba. 19:5, 18.

4. Waigu Marako 10:29, 30 ayugo pa bakio wai Yekova aberãpa agu aboro gayo aborokporo watadu abakureayo aundongo yo berewe ya?

⁴ Yekova ima rugatiko na gupai nga, ho ani amanga siapai ni ka irisoko, agu akura rani kinaho nambupa bakere apai. Pai sa dagba agu apai yo rengbe ani ka mbupaha watadu ka zangaha nga, gu undo nga ga gaani aborokporo gbiati abakurearani, nga aguyo airisongo Yekova ya. Isoke, mbiko gupai nga gu mokedi nangia Petero adu rogo bakere bakabangirise, ko asana Yesu ti kura regbo sa nga: “Wa ani ambu ahe dunduko, ki nipeke ro; ani adía gine?” (Mt. 19:27) Yesu ape gupai ngba wene gene fu gako abawiriki nga, agu aboro du rogo dungurati nika du wakina aborokporo fuyo. (Oni gedi Marako 10:29, 30.) Na Yekova, nga gu Barani du ngbangbaturũ yo kidohe nga, ko nika songoda agu aboro asongoda naida ka irisoko. (Tam. 9:10) Mo berẽngapa bete agu apai rengbe mo ka mangaha tipa ka gbia ga Yekova undo ho mo asovura ni kuti gupai nga ga du nisase.

5. Tipagine duhe ti ni ni wenepai kaa berãpa wai Yekova aundo ro?

⁵ Mo berẽpa wai Yekova aundo ro. (Tam. 55:22) Si nika undo ro mo bihe nga mo nisaro te. Kura wirina sa ni nakuparanga du rimori nga Carol, * nga guri adunga gari aborokporo rogo rengo yo ya aya: “Ho mi aberãpa wai ni Yekova naundo re mi hi akpakarapai, si naundo re mi bihe nga mi nisare te. Na si nafu gu kido fere nga Yekova nikaa undo re aundo ti aregbo dunduko.”

6. Waigu rengbe 1 Petero 5:9, 10 ka ngarasa agu aboro nabihe nga i nisayo?

⁶ Mo naaberãpa wai Yekova aundo agu awirina  nabihe nga i nisayo. (Oni gedi 1 Petero 5:9, 10.) Hiroshi, nga gu wirina du kina ko sa ni Dezire Yekova dagba gako aborokporo yo tipa dungu agarã awere aya: “Rogo dungurati, si taata ka bi gupai nga aboro dunduko du na akpakarapai tiyo. Ino gupai nga ani dunduko namanga gupai rengbe omerani na ni ka iriso Yekova rengbe ka ngarasa agurani adunga gaani aborokporo rogo rengo yo ya.”

7. Waigu kparakpee aundo ro?

⁷ Mo naamanga agu apai nga ga toro dedede. Gere nakoda pe mo pa gupai nzunzu namanga ro fu Yekova. (1 Pet. 5:7) Massiel aya, “Pai sa dagba gu nyanyakipa apai yo naaundo re mi dibe gupai nga ga du nisase angia manga kparakpee kakaka fu Yekova.” Ho gi paranga wirina re adiberã ni ka iriso Yekova, ri aabihe nga ri nisari bambiko gari aborokporo aadunga ni airisi Yekova te. “Ko adu ni ndikidi Ba fere, na mi anaamanga kparakpee fuko bara dunguhe na aˈuru dunduko, na kini pepa gupai fuko naamanga re.”

8. Waigu geda Fugo Mbori na kini berẽkuriihe aundo ro?

⁸ Mo naageda Fugo Mbori dedede, na mo naaberã kuriipa agu apangbanga du rogoho nga gu nayugo gupai nga Yekova ima kpinyemu ro. Wirina du rimori nga Bianca, nga guri gari aborokporo apeka gbegberẽ afugo furi aya: “Gedapai tipa agu apangbanga nga ga Ziazia Kekeapai na agu apangbanga du tipa ga Yekova amoyambu nga aguyo naagbiatiyo na akpakarapai wakina gure na kini berẽkuriihe naundo re aundo nzunzu.” Kura aKristano nazio agu averesi kuriyo yo nafu bakere wasa na kini tingidihe, wa agu nga Atambuahe 27:10 na Yesaya 41:10. Kura aboro nadega tuyo kuti dede afugo agu apai du tipa adunguratise, ho i ambakada gayo adunguratise ni watadu ho i amanga gayo geda Ziazia Kekeapai ni. I nape gupai nga si naundo yo ka i naabingo ho nga i nisayo gbe ya.

9. Waigu du pati adunguratise aundo ro?

⁹ Mo naamanga nyanyaki asadatise kaa du pati adunguratise dedede. Gi mbakadapai nga ga adunguratise re nika ngarasaro na ki saro a mo ini awirinamo. (Eb. 10:24, 25) Massiel, i nifura tipa ri kusayo aya: “Wa si avura du nga mi adu na bakere zee, mi adiberã tipa kaa ndu tipa adunguratise nga ga dungurati dunduko na kini fu karagapai. Gipai re asa re mi bihe nga mi mbembedi na agu awirina du rogo dungurati.”

10. Tipagine duhe ti ni ni nyanyakipa pai ka manga bakure na ruru aKristano?

¹⁰ Mo zi bakure na akuaro aidipase. Mo mangi bakure na agu aboro du rogo dungurati nga aguyo mo narengbe ka wirikapai beyo. I ima rengba kadu ni unvuru foro watadu mo ima rengba kadu ni unvuru fuyo, na watadu gayo sino mangaapai ima rengba kadu kia ti gamo. Ziazia Kekeapai natingida rani na gupai nga, “tatamana du ti gbinza aboro.” (Eyo. 12:12) Sosono aboro ima rengba ka wirika bakere apai be paranga aboro rogo dungurati. Davide aima du ni paranga ko gbe ti Yonatana,  ono gipai re aakanga na yo ti du ni mbembedi abakure te. (1 Sam. 18:1) ADavide na Yonatona aaundo tiyo dagbatiyo tipa ka iriso Yekova, si ki vura du vurũ nga i aagbia tiyo na kere akpakarapai. (1 Sam. 23:16-18) Kura wirina sa du rimori nga Irina nga guri du kina ri sa ni Dezire Yekova dagba gari aborokporo yo awere aya, “Agu awirinarani du rogo dungurati ima rengba kada nzunzu ni abarani, anarani, watadu awirinarani nga ga toro yo. Yekova ima rengba ka mangasunge na yo i du ni agu aborokporo ani aida yo.”

11. Ginipai si aida mo mangihe tipa ka manga gu pabakure du ni nyanyakihe?

¹¹ Si ima rengba kadu ni mbumbuhe ka zio vovo abakure, gbe ka si du nga mo nga boro zee. Gu kura wirina sa du rimori nga Ratna, nga guri naadu ni boro zee na nawiriki rengo si ki vura du vurũ nga ri agbia tiri na sogote aya, “Mi aye ka ida gu rengo nga mi aaida gu undo nga ga awirinami rogo dungurati.” Si ima rengba kadu ni mbumbuhe mo pepa gupai namanga ro fu kura boro, ono ho mo amangaha ni wo, gu boro re naye kada ni mbembedi bakureamo. Abakureamo naida aida ka ngarasaro na ka songoda ro, ono tie, i naida gupai nga mo pepa gu gene fuyo rengbe yo ka manga gipai re ngbaha.

12. Waigu rengbe sunge tungusapai ka undo ro mo mangi wene abakure?

¹² Gene sa dagba gu bawene agene yo rengbe ani ka zio abakure ngbaha nga ni kura ani gene tungusapai yo na akuarani aKristano. Carol, nga guri i nifura tipa ri kusayo aya: “Mi ima manga badungu wene abakure ni dia mi regbo na agu awirina nga adee gene tungusapai yo na rogo kura asunge yo nga ga siokrasia. Yekova ima undo re vuru agu agarã yo ninaasusa vurube agi abakure re.” Si ni wenepai furani ti aregbo dunduko ho ani amanga pabakure ni na ruru aKristano. Yekova namangasunge na agi abakure re tipa i ngarasi ro ho du mo ni rogo gberãrago, ni kpiapai, ti gu regbo du mo nisaro.—Snz. 17:17.

13. Agu aboro dunduko du rogo dungurati na gini tindiro beyo?

¹³ Agu aboro dunduko du rogo dungurati na gu tindiro beyo nga ga saha si du ni zezeredi ba na ka yugo nyemuse fu aboro dunduko tipa gupai nga ka boro bingoho nga ni nisani ngiringiri ya. (Yo. 13:35) Gupai ani amangaha na kini gumbaha ima rengba ka ngarasa kura aboro ni bakerehe gbe! Kura wirina sa ni dee aya: “Ho mi awiriki rengo ni, agu aboro du rogo dungurati ada ni gimi aborokporo. Ka mi adanga ni Dezire Yekova zanga gayo undo te.” Ginipai rengbe mo ka mangaha tipa ka undo agu aboro adunga gayo aborokporo rogo rengo yo ya tipa i naabihe nga agu awirina du rogo dungurati ima kpinyemu yo?

14. Ginipai rengbe mo ka mangaha tipa ka manga bakure na vovo aboro?

¹⁴ Mo asadi ka manga bakure na vovo aboro. Ani rengbe ka tonaha ni dia ani vovo aboro kugume ku rogo gaani dungurati esuesu. (Rom. 15:7) Ono tie, si naida ani mangi gu kurapai amanga kisusi gu gbua nga ka fu sene fuyo. Si naida ani sonosi nyanyaki pabakure na yo wa regbo nikaa susa. Sidu, mo yugu wene sino fu vovo aboro na ki yugu gupai nga mo naberã payo aberã nzunzu. Mo asadi ka rugatiro na agu akpakarapai du yo rogoho, ono zanga sanayo na agu asanahe nika bazee tiyo. Si ima rengba kadu ni mbumbuhe fu kura aboro i pepa gupai foro namanga yo, sidu, mo du na rubangirise ka zanga sosoda yo i fura. Kuba gure, mo asadi ka ino agu apai namanga yo nisana mo agu asanahe nga ga tatamana, na ki degeturo ni zerangbaduse kuti gayo akaragapai. Ni kpiapai, mo ima rengba ka sana yo tipa wai i aye ka ino rengo.

15. Waigu rengbe agu aKristano naima nyaka rogo toro yo ka undo kura aboro rogo dungurati?

¹⁵ Gu idapase nga ga ai gu boro du rogo dungurati nanyaka ho ani ayugo gupai ni nga ani naberãpa akuarani aberã dagba tirani. Gipai re ima  du na nyanyakipaha gbe ho abaakumba gbiati kura aboro du na nyanyaki idapase amangaha ni. Melissa, nga guri nari asonosi ri kina rogo rengo yo aya: “Mi na bakere tambuahe fu agu awirina nidu fere wakina base, nga aguyo ninaadia regbo na mi na kini berẽpa re vuru agu agarã yo ninaasusa. Ai gu regbo mi naaida ka fura, boro nidu kinaho nga guni nika degatuni fere.” Kura paranga wirina sa du rimoko nga Mauricio, adu na gberãrago na ki bi tiko nga ko nisako ho gu wirina nawiriki Ziazia Kekeapai na ko azere ni rogo toro yo. Mauricio aya: Abaakumba ayugu gupai nga i naberãpa re aberã na gupai re aima undo re ni bakerehe gbe. I anaafura na mi dedede. I anaakura na mi gene tungusapai yo, kini pekepa gu nyanyakipa apai fere i anaawirikaha rogo gayo wisigo Ziazia Kekeapai yo nisase na zavura kini ngi mangonvo na mi.” Melissa na Mauricio nandu kindi kumbatayo kaa mangasunge Kindo ti aregbo dũ.

16-17. Gini agene rengbe ani ka undo kura aboro ngbaha rogo mangimangipai yo?

¹⁶ Mo undo rogo mangimangiapai yo. (Gara. 6:10) Leo, nga guko namangasunge ni mokedi rogo gu ringara du ni tuturũhe ti gako aborokporo ape gupai nga: “Dedede, gupai gbua si aidaha nga taata mangapai nga ga weneringise ti kina boro wene regbo. Mi natingidapa kura uru sa mi agbia tire na béno nga ga tarambiri. Niyangaraha tie, ti gu regbo mi ada kporo yo, mi adu ni fudifudi re bakere gbe berãre yo. Ono fuo gure tie, kura arogotise ayambu re ku kpuyo yo tipa taata riahe. Mi atingidanga pa gu he ani arihe te, ono mi natingidapa wai atingida i adegetuyo fere ni nyemuse. Na ti digidoho, mi ki bi tire nga mi wenengai gbe!”

¹⁷ Ani dunduko ninaagbia ngbarago agbia ho du ani ni na agu awirinarani nga aDezire Yekova, na kini pekepa agu agumbapai ani nagihe, wa gu nga ti regbo gaani bakere adunguratise. Ono tie, Carol i nifura tipa ri kusayo aya, “Mi naabi tire gbe nga mi nisare ti regbo bakere adunguratise.” Tipagine? Ri aya: “Wa vura duhe nga badungu akama watadu zavura akutu awirina nidu pati re, dedede, i naadia regbo na kini sungu na gayo aborokporo. Ho mi naabi yo ni wa gure, mi naabi tire gbe nga mi nisare.” Si ima mbu fu kura aboro i du pati gu bakere dunguratise namanga ni bambataha tingbafuo i zanga gayo badiarogatise rogo kpio yo. Ya mo mo iningo pa boro nga guni nagbia tini na ngbatunga agu akpakarapai re? Si angba gbe ka mo yambu ni oni gbia ngbarago na ni wa sa na gamo aborokporo ti regbo  gu mbakadapai nga ga siokrasia nika du berewe.

18. Waigu rengbe ani ka mangapai kuti 2 AKorindo 6:11-13 ho ani ayugo gu sino ni nga ga dia aboro kugume?

¹⁸ Oni naadia regbo na awirina. Mo asadi kaa dia regbo na awirina ni bakiakia, gbe, aguyo rengbe kaa bi tiyo nga i nisayo. Si naida ani du ni agu aboro ‘naza ngbaduraniyo,’ gbe, fu ngbatunga agi aboro re. (Oni gedi 2 AKorindo 6:11-13.) Melissa, i nifura tipa ri kusayo aya: “Ani anidu na bakere ngbarago ti aregbo dunduko ho awirina anaayamba rani ni ku rogo akpuyo tipa ani naadia regbo na yo gbiati gayo aborokporo watadu kaa ndu anunguro na yo.” Ya mo boro ho rogo gamo dungurati rengbe mo ka yamba ni ku kpuro yo?

19. Dia regbo na akuarani aKristano rengbe kadu nipa undo gbe ti gini regbo?

¹⁹ Aregbo kinaho rengbe akuarani aKristano kadu na bakere ngbarago ka ani di regbo na yo. Si ima rengba kadu ni mbumbuhe fu kura aboro i du na gu gayo aborokporo angianga aDezire Yekova ya ho i amanga gayo apumbo ni. Gu kura aboro rengbe kadu na bakere gberãrago ti kura aramediwi, wa gu nga gu ramediwi gayo boro akpi ti ni. Ho ani afu tirani ni ka dia regbo na agu awirina nagbiatiyo na agi akpakarapai re, ani nayugo gupai fuyo nga, ani ‘naberãpa’ yo aberã.—Frp. 2:20.

20. Waigu rengbe agu afugo Yesu du ni kekehe rogo Matayo 12:48-50 ka undo rani ho ani abi tirani ni nga ani nisarani?

²⁰ Badungu nduapai duho rengbe Kristano kaa bihe ti kura regbo ti ni nga ni nisani. Ono tie, si aidanga bangirani go ti gupai nga Yekova ima inopa agu apai re wenengai te. Dedede, ko namangasunge na awirinarani tipa i naafu guhe furani ani aidaha. (Oni gedi Matayo 12:48-50.) Ani nayugo gupai fu Yekova nga ani na tambuahe tipa gako bawene mbakadapai ho ani amanga gupai ni rengbe na omerani ka songoda gaani aborokporo nga ga toro yo. Ka ani vura kaa bi tirani kina wai vurũ ti kura aregbo, ani nisarani te, bambiko Yekova ti aregbo dunduko kina pati rani!