1. Ginipai Davide agumbaha tipa ga Yekova umbasitise?

YA MO ani rengbe ka gumba gupai nzunzu nga Yekova nga boro umbasitise? Ii ani ima rengba ka gumbaha. Ti kura regbo sa, Davide aya: “Mo fu vurakube ga bata fere a, [ga umbasitise] asa re ni bakere boro.” (2 Sam. 22:36; Tam. 18:35) Si rengbe kadu nga Davide aaberã pa gu uru gu nebi nangia Samuere aye kua ba Davide yo tipa ka mbeda gu boro na nzeme si adu nga ni nika du ni bakindo nga ga aYisaraere. Yekova ayugu umbasitise ho ko azogosi pa tiko ni ka sia Davide nga gu ko nangia kiaro agu akumbagude naadu muambe, tipa ko di ba Bakindo Saura.—1 Sam. 16:1, 10-13.

2. Ginipai ani nika sakapai tipaha rogo gi kekeapai re?

² Davide aima rengba nirengo ka ida kuti gupai bake papara atambuahe agumbaha tipa Yekova ki ya: “Ko naumbasi tiko ka ngana agu ahe du ngbangbaturũ yo na ku auru kpotosende no a, ko natumba rurungbura boro nvutu yo, ki nitumba irazingoahe . . . ki sungusi yo na abarumbatayo.” (Tam. 113:6-8) Rogo gi kekeapai re, gu bambatapai ani nika sakapai tipaha nga nyanyakipa apai nibipa umbasitise, na ani nika manga gipai re ni saka ani pai tipa wai Yekova ayugu gi sino re. Fuo gure, ani nika wisigo gupai rengbe ani ka wirikaha tipa gu sino nga ga umbasitise be Bakindo Saura, gu nebi nangia Daniere, gbiati Yesu.

3. Wai du Yekova amangapai na ani, na ginipai gipai re ayugoho?

³ Yekova nayugo gupai nga ko nga boro umbasitise rogo gu gene yo ko amangapai na agu airisiko nga kpakpa aboro ngbaha. Ko aidanga na kina gaani iriso sa te, ono ko nabi rani abi ni abakureako a. (Tam. 25:14) Tipa ka sa rani ani du na pabakure na Yekova, Yekova adiberã nitiko tipa ka fu Wiriko ni motumo  tipa gaani ingaapai. Nairiwo gu inapai gbiati nunga ko ayuguhe furani re!

4. Ginihe Yekova nafuhe furani, na tipagine?

⁴ Oni berẽnga pa gu kura gene Yekova ayugo gupai ngbaha nga ko nga boro umbasitise. Ni du Yekova ni Bakusiahe, ko aima rengba ka kusa rani ka ani adunga na rengba ka diaberã tipa gupai ani nika mangaha na gaani raka ya. Ono ko aamanganga ha wo te. Ko amangi rani rogo kpiako yo, na ki fu ranirii nga ga siapai furani. Gaani asiapai ima du na nyanyakipaha fu Yekova, wa vura duhe vurũ nga ani na umbapa rani tiko. Ko naida ani mangi siapai ka irisiko kpotoraniyo mbiko gupai nga ani ima kpinyemuko na ani ima inopa agu aundo duti giasangbako. (Pa Rug. 10:12; Yes. 48:17, 18) Nairiwo wai si aida ani du na tambuahe tipa gi ga Yekova mangapai nga ga umbasitise re!

5. Waigu Yekova ayugopai furani ani du na umbasitise? (Oni bi gu sura duti kpotoho.)

⁵ Yekova nayugopai furani tipa ani du na umbasitise rogo gu gene yo ko amangapai na ani ngbaha. Yekova nga Boro tatamana kisusi rogo zegino. Wa vura duhe wo, ko nadia aberãpai adia be kura aboro kugume. Ni kpiapai, Yekova ambugene fu Wiriko tipa ko undo ko i kusi ahe dunduko. (Snz. 8:27-30; Koro. 1:15, 16) Na wa vura duhe nga Yekova du na tanduapai dũ, ko nafu bete asunge afu fu kura aboro. Ni kpiapai, ko amoi Yesu ni Bakindo Gako Kindo, na Ko nika fu bete pagbia afu fu agu aboro du bangeyo nga 144,000 nga aguyo nika zogarago na Yesu. (Rk. 12:32) Si ni rengo nga, Yekova araba Yesu tipa ko du ni Bakindo na ni Gbiamotumo. (Eb. 5:8, 9) Ko naraba agu aboro araba a Yesu nika zogarago na yo, ono ko afunga gi sunge re fuyo kini ru berewe kaa rugapa gu futufutuapai dunduko du tipa gayo sunge te. Ko ima du na gu kido nga i nika manga gupai amanga ko akpinyemuhe.—Yugo. 5:10.

6-7. Waigu rengbe abariikporo, abaakumba, gbiati avunguagude ka wirika Yekova?

⁶ Ka si du nga gu Barani du ngbangbaturũ yo nga guko aidanga undo be ai boro ya  nafu pagbia afu fu kura aboro, nairiwo wai si aida ani mangi kina gu bangisapai re bakere gbe! Ni kpiapai, ya mo bariikporo nga mo watadu bakumba rogo dungurati? Mo pekefuo ga Yekova kpiapai ni fu mo asunge fu kura aboro na ki zanga asada kaa rugapa ai gu wiripai du tipa wai i amanga gu sunge re. Ho mo awirika ga Yekova kpiapai ni, mo amanganga kina mangimangi ga Yekova sunge sa te, ono mo naraba kura aboro a na kini kiisi gu kido du yo na ni. (Yes. 41:10) Gini kurapai rengbe agu aboro du na bete pagbia beyo ka wirikaha be Yekova?

⁷ Baibiri nayugo gupai nga Yekova gu duadu na nyemu ka gia agu aberãpai nga ga agu awiriko nga amaraika. (1 Aba. 22:19-22) Avunguagude, waigu rengbe oni ka wirika ga Yekova kpiapai? Ho da ha ada ni, oni sasana awironi tipa i fu gayo aberãpai tipa wai rengbe oni ka manga kura sunge. Na ka si rẽarẽ, oni ki mangipai kuti gayo aberãpai.

8. Waigu Yekova amangipai ni zerangbaduse na Abarayama gbiati Sara?

⁸ Gu kura gene Yekova ayugo gupai ngbaha nga ko nga boro umbasitise nga nidu ko na zerangbaduse. Ni kpiapai, Yekova na zerangbaduse ho airisiko ayugo gayo kapa ni tipa gako adiaberã rogo irisa yo. Yekova adegetuko wa Abarayama aagumba gupai nga ko aabingo ho nga si aruaru tipa Yekova gbarasi Sodomo na Amora te. (Bam. P. 18:22-33) Na oni tingidipa wai Yekova amangipai na dia Abarayama nangia Sara. Ko aadunga na gberãrago watadu zinga ti gu regbo ri ati ni mongo tipa gu gako kidohe naadu nga ri nika du na mobara ngba gbinza ri te. (Bam. P. 18:10-14) Kuba gure, ko amangipai na Sara rogo irisa.

9. Ginipai rengbe avunguagude gbiati abaakumba ka wirikaha ti ga Yekova kpiapai?

⁹ Avunguagude gbiati abaakumba, ginipai rengbe oni ka wirikaha ti ga Yekova kpiapai? Oni berẽnga pa wai oni naamangapai ho gu boro du tii gaoni pagbia nidu ni na kapa tipa agu adiaberã oni amangaha. Ya mo sino roni ningia ka guari nibasa ka songodapai kubara gaoni diaberã yo? Watadu oni ninaasada ka rugatironi na gu bipai du yo na ni tipa gupai re? Nirengo, aborokporo gbiati adungurati nagbia undo agbia ho agu aboro du na pagbia beyo awirika Yekova ni. Ka da ku herẽ, ani ima sakapai tipa gupai rengbe ani ka wirikaha tipa umbasitise ti ga Yekova kpiapai. Ani wirikinga apai awere tipa gupai rengbe ani ka wirikaha tipa umbasitise ti agu akpiapai du ni kekehe rogo Fugo Mbori yo.

10. Waigu Yekova amangasunge na gu kpiapai nga ga kura aboro tipa ka yugopai furani?

¹⁰ Wa du Yekova ni gaani bakere “Bayugupai,” ko ima fu akpiapai furani rogo Fugoko yo tipa ka yugopai furani. (Yes. 30:20, 21) Ani nawirikapai ho ani aberãkurii agu apangbanga ni du rogo Ziazia Kekeapai tipa agu aboro naadu na agu asino nafu ngbarago fu Mbori, kodihe na gu sino nga ga umbasitise. Ani nawirikapai a ho ani awisigo gupai ni naamangi fu agu aboro naayugonga gi wene asino re ya.—Tam. 37:37; 1 Kor. 10:11.

11. Ginipai rengbe ani ka wirikaha ti ga Saura gbegberẽ kpiapai?

¹¹ Mo berẽnga kurii gupai namangi tipa Bakindo Saura. Ko angia boro umbasitise ho ko adu ni ni paranga ko. Ko aima rugatiko na gako azangarengba na ko adu dindikodindiko tipa ka dia badungu asunge kubeko. (1 Sam. 9:21; 10:20-22) Ono tie, tifuo bete regbo, Saura ada ni irarukö na ki tona ka manga agu apai ko aadunga na rengo beko tipa ka mangaha ya. Ko atona ka mangapai wa gere ngbutuko fuo ko da ni bakindo. Ti kura regbo sa, ko azanga kadu na zerangbaduse ho ko aapido gu nebi ni nangia Samuere. Kuba gupai nga Saura kido kuti Yekova tipa Ko mangipai tipa aboro,  ko azo motumo wa si avura du nga ko adunga na rengo beko tipa ka zoho te. Ni sangbana gipai re, Yekova aká ga Saura pai na ni yangaraha ko ki zanga gako padu ni bakindo. (1 Sam. 13:8-14) Si nipa tatamana furani ka ani wirikipai ti gi kpiapai nga ga zahe re na ki ne manga agu apai adunga ani na rengo tipa ka mangaha ya.

12. Waigu Daniere ayugu umbasitise?

¹² Oni bingo gupai naadu tipa gu nebi nangia Daniere, nga guko naadunga wa Saura ya ki moi wene kpiapai. Rogo ga Daniere raka yo naabaha, ko anye ni gu ga Mbori moyambu naadu ni boro umbasitise nga guko naasana Yekova ti aregbo dunduko tipa arugapai. Ni kpiapai, ho Yekova amangisunge ni na ko tipa ko sakirogo ga Nebukadenesara musumo yo, Daniere aagumbanga gupai nga ko asaki rogoyo mbiko gako inohe ni tiko te. Kuba gure, ko amangipai ni umbasitise ki fu taarimo dunduko fu Yekova. (Dan. 2:26-28) Ginipai rengbe ani ka wirikaha? Ka si du nga awirina nagbia ngbarago ti gaani agumbapai watadu ka ani du na diabese rogo sunge tungusapai, si naida ani naafu taarimo dunduko fu Yekova. Si naida ani rugutirani na gupai nga, ani arengbanga ka manga agi apai re zanga na ga Yekova undo te. (Frp. 4:13) Ho du ani ni na gi bipai re, ani nawirika gu wene kpiapai a nga ga Yesu. Wai du duhe wo?

13. Ginipai ani awirikaha tipa du na umbasitise ti agu afugo Yesu du rogo Yoane 5:19, 30?

¹³ Wa vura duhe nga Yesu adu ni rengberengbe Wiri Mbori, ko aakido kina kuti Yekova. (Oni gedi Yoane 5:19, 30.) Ko aasadanga ka dia pagbia be gu bako du ngbangbaturũ yo te. AFiripoio 2:6 nagumba gupai furani tipa Yesu nga, “rengba ko na Mbori adu nga bangiriko ni mosoro te.” Nidu Yesu ni gu Wiri naadu na giasangba, ko aima rugatiko na pa agu apai ko aadunga na rengba ka mangaha ya na ko ki yugu irisa tipa ga Bako pagbia.

14. Wai du Yesu amangipai ho i asana ko ni tipa ko mangi gupai ko aadunga na pagbia tipa ka mangaha ya?

¹⁴ Oni bingo gupai Yesu akaragaha ho agu amokedi nangia aYoane na Yakoba gbiati nayo aye ni fuo ko ki sana ko tipa gu momu ko aadunga na pagbia beko tipa ka fuhe ya. Yesu ape gupai nibasa nga kina bako sa rengbe ka manga diaberã tipa gu boro rengbe ka sungo ku kumbabee Yesu yo na ku garebee ko yo rogo gako Kindo. (Mt. 20:20-23) Yesu ayugu gupai nga ko aima rugatiko na pa agu apai ko aarengbanga ka mangaha ya. Ko adu ni boro umbasitise. Ko aagunga rii gupai Yekova aruguko  tipa ko mangihe te. (Yo. 12:49) Waigu rengbe ani ka wirika gi ga Yesu bawene kpiapai re?

15-16. Waigu rengbe ani ka mangapai kuti gu rugute nga ga Ziazia Kekeapai du rogo 1 AKorindo 4:6?

¹⁵ Ani nawirika ga Yesu kpiapai nga ga umbasitise ni manga ani pai kuti gu rugute nga ga Ziazia Kekeapai du rogo 1 AKorindo 4:6. I nagumba gupai furani yo nga: “Ka oni susi nga ri agu apai du ni keke he ya.” Sidu, ho aboro asana rani ni tipa rugute, si aidanga ani naanyakasa kina pa gaani aberãpai watadu kaa fura zanga berãkuriipai mbata wenengai te. Kuba gure, si naida ani gbeberã aboro kuti agu arugute du rogo Fugo Mbori yo na rogo gu gaani awaraga du mburuhe rii Ziazia Kekeapai. Rogo gi gene re, ani nika yugo na ni nga ani ainongo apai dunduko te. Na ho ani amangaha ni wo, ani nayugoho nga ani nga aboro umbasitise bambiko ani nayugo gupai nga ani ima rugatirani na gupai nga ga Yekova arugute ti aregbo dunduko ni wenehe kisusi gaani.—Yugo. 15:3, 4.

¹⁶ Kura nduapai kina berani tipa kadu na umbasitise kupati gu nga ga taasarimo Yekova. Waigu padu ani na umbasitise narengbe ka ye na ngbarago furani na ani kidu na wene pagume na kura aboro? Si nga gupai ani nika sakapai tipaha awere.

17. Tipagine du aboro umbasitise ti ni na bakere ngbarago?

¹⁷ Ho du ani ni na umbasitise, si nawira gupai gbe nga ani nadu na bakere ngbarago. Tipagine duhe ti ni wo? Ho ani aino gupai ni nga kura apai kinaho ka ani amanganga ha ya, ani nadu na tambuahe gbiati ngbarago tipa ai gu undo ani agbiaha be kura aboro. Ni kpiapai, oni berẽnga pa gu regbo Yesu ahusi aboro ngbataka bawe. Kina guni sa dagbayo yo nakaraga tini tipa ka fu tambuahe fu Yesu tipa husa ko ni be gu kere kaza re—nga gupai ka gu kumba re aamanganga ha ni tiko ya. Gi kumba nangia boro umbasitise re adu na tambuahe tipa gu undo ko  agbiaha, na ko ki fu taarimo fu Mbori tipaha.—Rk 17:11-19.

18. Waigu padu ani na umbasitise aundo rani ani du na wene pagume na kura aboro? (ARomo 12:10)

¹⁸ Aboro umbasitise nidu na wene pagume na kura aboro na i nidu gbe na rengba kadu na mbembedi abakure beyo. Tipagine? I na ngbarago ka ino gupai nga kura aboro na wene asino tiyo na i nakido akido kuti agu aboro re. Agu aboro du na umbasitise na ngbarago ho du kura aboro ni na diabese rogo agu asunge i agbiaha na i regerege tipa ka fu tambuahe fuyo na kini yugu irisa fuyo.—Oni gedi ARomo 12:10.

19. Gini nduapai si aida gupai ti ni nga ani ne gu sino nga ga rukö?

¹⁹ Ono tipa aboro rukö tigayo, si ni mbumbuhe fuyo tipa i fu tambuahe fu kura aboro, i nakpinyemu gupai nga kina kura aboro naatambua yo. Si nawira gupai gbe nga, i naasada ka ringbisa tiyo na kura aboro na kini asadi kadu ni wene aboro kisusi kura aboro. Boro rukö dedede naberã gupai nga si naida ni mangipai ni kina tini bambiko ni naberã gupai nga ka kura aboro mangingo pai ngba wene gene te. Gu boro du na rukö naida gupai dedede nga kina pani du ni nyanyakihe kisusi kura aboro, na ni nakpi agu aboro akpi namanga apai ni wenehe kisusi ni. (Gara. 5:26) Gu pabakure nga ga agi aboro re ninaaimanga te. Ka ani bi gupai nga ani na gu sino nga ga rukö tirani, si naida ani mangi kakaka kparakpee fu Yekova tipa ko undo rani ani ‘mbakadi berãrani berewe’ tipa gupai nga ka gi gbegberẽ sino re zingo baha tirani ya.—Rom. 12:2.

20. Tipagine si aida ani du ti ni ni aboro umbasitise ti aregbo dunduko?

²⁰ Nairiwo gu tambuahe du ani na ni tipa ga Yekova kpiapai! Ani nabi gako umbasitise rogo gu gene yo ko amangapai ngbaha na gako amoyambu, na si naida ani wiriki ko. Kurigure, si naida ani pekefuo gu wene akpiapai du rogo Baibiri yo nga ga agu aboro naadu na umbasitise tiyo nga aguyo naadu na momu kaa ta na Mbori. Ani naafunga gu iriso afu na taarimo ti aregbo dũ fu Yekova rẽ tipa ko. (Yugo. 4:11) Ka ani mangihe wo, ani nika rẽ kaa ta na gu Barani du ngbangbaturũ yo nga guko nakpinyemu agu aboro du na umbasitise.