1. Gini momu du berani?

NAIRIWO gu pa momu ngaha furani kadu ni papara ga Yekova dungurati! Ani rogo gu paradizo nga ga toro nga gu hi be aboro zereda na ngbarago. Gini sunge du bero rogo dungurati?

2. Gini kpiapai gu mokedi nangia Pauro amangisunge na ni rogo badungu gu gako awaraga yo du rogo Ziazia Kekeapai?

² Ani rengbe ka wirikapai gbe tipa gu sunge du berani rogo dungurati ti gu kpiapai gu mokedi nangia Pauro amangisunge na ni rogo badungu gu gako awaraga du rogo Ziazia Kekeapai yo. Rogo agu awaraga re yo ni basasa, Pauro aringbisi dungurati kuti kpotoboro. Berewe a, ko aringbisi agu aboro dunduko ni basasa du rogo dungurati kuti abarapa boro.—Rom. 12:4-8; 1 Kor. 12:12-27; Ef. 4:16.

3. Gini apai biata ani nika sakapai tipaha rogo gi kekeapai re?

³ Rogo gi kekeapai re, ani nika sakapai tipa nyanyakipa apai biata nga gu rengbe ani ka wirikaha ti gu kpiapai gu mokedi nangia Pauro amangisunge na ni. Ni bambatapai, ani nika wirika gupai nga ani dunduko ni basasa du na sunge be rani * rogo ga Yekova dungurati. Ni uepai, ani nika sakapai tipa gupai rengbe ani ka mangaha ka si du furani ni mbumbuhe ka inopa gu sunge du berani rogo dungurati. Ni biatapai, ani nika sakapai tipa ndu gupai si aida ani nye ti ni kindi kaa manga gu sunge Yekova nafuhe furani wa du ani dunduko ni basasa rogo ga Mbori dungurati.

4. Ginipai ARomo 12:4, 5 ayugoho furani?

⁴ Gu bambatapai rengbe ani ka wirikaha ti gu kpiapai Pauro amangisunge na ni nga ani dunduko ni basasa du na nyanyakipa sunge berani rogo ga Yekova riikporo. Pauro atona gako kpiapai ni gumbako gupai nga: “Wa du aparani ni dungu he ti kina gu boroboro sa, apase dunduko gaha pai sa te: kina wo du ani ngenge, nga kina gu boroboro sa rogo Kristo yo, ani ni ba sa sa nga apa akuarani.” (Rom. 12:4, 5) Ginipai Pauro aaida ka pehe? Gupai ko aaida ka pehe nga, wa du ani dunduko, ani na asunge berani ni bakiakia rogo dungurati, ono ani ni basasa dunduko du na nyanyaki parani.

5. Gini ‘agamahe’ Yekova nafuhe fu dungurati?

⁵ Ho mo aberãpa agu aboro ni du asunge beyo rogo dungurati, berãro rengbe ka ora ni ipo kina kuti agu aboro nangbembatayo. (1 Tesa. 5:12; Eb. 13:17) Rengo ngaha nga vurube Kristo, Yekova ima fu ‘agamahe rogo aboro yo’ fu Gako dungurati. (Ef. 4:8) Agi ‘agamahe rogo aboro yo’ re nakoda agu awirina du rogo Riigbu Bipasunge, agu aboro naundo Riigbu Bipasunge, agu aboro du rogo Rondo Be-basunge, ababi adungurati, agu aboro nayugopai ti regbo agu asukuru du mburuhe rii Ziazia Kekeapai, abaakumba, gbiati amoundo abaakumba. Ziazia toro du nasia agi awirina re dunduko tipa i ngerefuo ga Yekova nyanyakipa akandoro na kini nyakasi dungurati.—1 Pet. 5:2, 3.

6. Ringbisihe kuti 1 ATesaroniko 2:6-8, ginipai agu awirina ziazia toro asia yo amanga nyanyaki asadatise ka mangaha?

⁶ Ziazia toro nasia agu awirina nga akumba tipa i ngerefuo dungu ngbatunga asunge. Kina wai abarapa boro ni basasa wa gu nga abese na andue ninaamangasunge tipa ka fu undo fu kpotoboro naabaha, kinawo a agu awirina ziazia toro asia yo amangasunge nyanyaki tipa ka fu undo fu dungurati naabaha. I agbatanga taarimo tipa tiyo te. Kuba gure, i namanga nyanyaki asadatise tipa ka nyakasa awirinayo. (Oni gedi 1 ATesaroniko 2:6-8.) Ani nafu tambuahe fu Yekova tipa agi awirina namaa agu azingo nga ga kura aboro mbatayo fu gayo azingo re!

7. Gini amaku agu aboro duti ngba sunge tungusapai ti aregbo dũ agbiaha?

⁷ I ima rengba ka sia kura aboro rogo dungurati i mangisunge ni amokedi, kparakpara abazakigene, watadu abazakigene. Na kura awirina areme rogo zegino dunduko ima sa gu sunge nga ga tungusapai na sa aboro ni abawiriki ni gu sunge i amangaha ti aregbo dũ. Ni mangayo ho wo, i ima undo badungu aboro i da ni ga Kristo abawiriki. Wa vura duhe nga agi abatungusipai natungusapai ti aregbo dũ re nidu na ahe beyo ni betehe, Yekova ima fu badungu wene ahe fuyo. (Mk. 10:29, 30) Ani ima kpinyemu gi wene awirina re, na ani na tambuahe nga i nga papara dungurati!

8. Tipagine du ai batungusi wene pangbanga ti ni na nyanyakipa ni fu Yekova?

⁸ Ya mo kina agu aboro sa i asiayo i naangbembatayo gbiati agu aboro namangasunge tungusapai ti aregbo dũ nga gu yangara aboro du na asunge beyo rogo dungurati? Wagusa te! Ai batungusi wene pangbanga du na nyanyakipa ni fu Mbori na fu dungurati. (Rom. 10:15; 1 Kor. 3:6-9) Gipai re wo mbiko gupai nga, sasa sa dagba gu nyanyakipa asasa yo kisusi nga ga dungurati nga ka sa aboro ni ga Yesu Kristo abawiriki, nga gaani Gbia. (Mt. 28:19, 20; 1 Tim. 2:4) Agu aboro dunduko natungusapai, singia agu abatungusipai naima zio bapatiza watadu aguyo ata ziongo ho ya, naˈasada ka sa gi sunge re si du ni gupai nyakipaha kisusi rogo gayo raka yo.—Mt. 24:14.

9. Tipagine ani abi agu aKristano nga adee ti ni na nyanyakipa yo?

⁹ Yekova nayugo irisa koyo du agu awirina  ni nga adee ni fuko nyanyakipa sunge fuyo. Agi adee du nga dereakumba, naagude, adekurugbo, gbiati anakuparanga nga agu yo namangasunge fuko ni ruruyo re, ko nabiyo na nyanyakipa yo. Ziazia Kekeapai ima fura tipa badungu adee nga aguyo naasa ngbarago ti Mbori. I nafura tipa yo ni gu wene akpiapai nga ga tatamana, idapase, kakaka nyemuse, ngarã, gamahe, gbiati wene asunge. (Rk. 8:2, 3; Amo. 16:14, 15; Rom. 16:3, 6; Frp. 4:3; Eb. 11:11, 31, 35) Nairiwo gu tambuahe du ani na ni fu Yekova tipa agu adee nga aKristano du rogo gaani adungurati, nga agu yo du na kina ngbatunga gi wene asino re tiyo!

10. Tipagine ani abi gaani sosono aboro ti ni na nyanyakipa yo?

¹⁰ Ani na ngbarago a nga dungu sosono awirina kinaho rogo dungurati. Gu kura adungurati kinaho du na gu sosono awirina rogoho naima fu raka yo naabaha tipa iriso Yekova. Gu kura sosono aboro kinaho wiriki rengo barambeda. Si ngia ginigu nga ginigu, badungu gi sosono awirina re nagbiatiyo na dungu awokote mbiko gbinza. Agi akpakarapai re ima rengba ka sa gupai nga ka i naamanganga bakere apai rogo dungurati na tingba sunge tungusapai ya. Ono wa vura duhe wo, gi sosono awirina re natungusapai wa rengbe omeyo na ni, na i namangasunge na gu ome dunduko du yo na ni tipa ka ngarasa kura aboro na ka raba yo! Na ani nagbia undo agbia ti gu inohe du yo na ni. I nzunzu na nyanyakipa yo fu Yekova na furani a.—Snz. 16:31.

11-12. Waigu mo naagbia ngarasaro be gu paranga aboro du rogo gamo dungurati?

¹¹ Oni berẽnga pa gaani paranga aboro a. I nagbiatiyo na dungu akpakarapai mbiko i nasona rogo gi zegino Satana bakitingbanga azogaha re nga gu hii be gako gbegberẽ aberãpai. (1 Yo. 5:19) Wa vura duhe wo, ani dunduko nagbia ngarasaro ho ani abi gaani paranga aboro ni i nifu akaragapai pati adunguratise, i nimangi sunge tungusapai na i nisongodi pai kubara gayo idapase yo ni wingbaduse. Nirengo, paranga aboro na kina nyanyaki payo rogo ga Yekova dungurati!—Tam. 8:2.

¹² Ono tie, gu kura awirinarani kinaho duhe fuyo ni kpakarakpakaraha tipa i idi kuti gupai nga i na nyanyakipa yo rogo dungurati. Ginipai rengbe ka undo rani wa du ani dunduko ni basasa  tipa ani naabi tirani nga ani na nyanyakipa rani rogo dungurati? Ani bingoho.

13-14. Tipagine rengbe kura aboro ka bihe ti ni nga i na nyanyakipa yo rogo dungurati te?

¹³ Oni bingo gu uepai rengbe ani ka wirikaha ti gu kpiapai Pauro amangisunge na ni. Ko afura tipa gu kpakarapai du badungu aboro na ni areme; si ima kpakara fuyo tipa ka ida kuti gupai nga i na nyanyakipa yo rogo dungurati. Pauro akepai ki ya: “Ka ndue ya, “Mbiko wa adu nga mi ni be ya, a nga mi ni pa kpotoboro te;” si he nga du ni pa kpotoboro mbiko gure te. Na ka tue ya, “Mbiko wa adu nga mi ni bangirise ya, a nga mi ni pa kpotoboro te;” si he nga du ni pa kpotoboro mbiko gure te.” (1 Kor. 12:15, 16) Ginipai Pauro aayugoho furani?

¹⁴ Ka mo aringbisa tiro na kura aboro rogo dungurati, mo ima rengba ka tona kaa berã gupai nga nyakingo paro fu dungurati te. Kura aboro rogo dungurati ima rengba kadu ni wene abayugupai, wene abambakadi apai, watadu wene ababanda akandoro. Isoke mo nabihe nga mo arengbanga kadu wa yo te. Gere nayugo gupai nga mo nga boro umbasitise. (Frp. 2:3) Ono tie, si naida mo du na rubangirise. Ka mo aringbisa tiro dedede na agu aboro du na bakere tandu mangaapai tiyo, mo nika du rogo gberãrago. Mo ima rengba kadu na gu berãpai Pauro afura tipaha nga, sunge tiro rogo dungurati te. Ginipai rengbe ka undo ro ka mo dunga na gu berãpai re ya?

15. Ringbisihe kuti 1 AKorindo 12:4-11, ginipai si aida ani rugutirani na ni nibipa ai gu tandu mangaapai rengbe ani kadu na ni?

¹⁵ Oni berẽnga kurii gi rengo re: Yekova afu agamahe nga ga ziazia toro fu bete agu aKristano naadu rogo bambata sa kama agarã nga gu naasa yo i mangi iiriwoapai, ono anga aboro dunduko nagbia bangisa agamahe te. (Oni gedi 1 AKorindo 12:4-11.) Yekova afu agamahe gbiati tandu mangaapai fuyo ni bakiakia, ono ai Kristano naadu na nyanyakipa ni. Areme, ani na agu agamahe nga ga ziazia toro nga gu rengbe ka sarani ani mangi iiriwoapai te. Ono pai kinaho ani narengbe ka wirikaha ti gupai re. Ani arengbanga dunduko kadu na bangisa tandu mangaapai te, ono ani dunduko du na nyanyakipa rani fu Yekova.

16. Gini rugute gu mokedi nangia Pauro afuhe si aida ani mangipai kutini?

 ¹⁶ Kuba gupai nga kaa ringbisa tirani na kura aKristano, si naida ani mangipai kuti gu rugute ga Mbori toro adu kugii gu mokedi nangia Pauro ko kehe nga: “Boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.”—Gara. 6:4.

17. Waigu ani nika gbia undo ka ani pekefuo ga Pauro rugute?

¹⁷ Ka ani apekafuo gu rugute Pauro afuhe na kini wisigi gaani mangaapai, ani ima rengba ka tona ka bi gupai nga tandu mangaapai kina tirani nga gu adunga ti kura aboro ya. Ni kpiapai, bakumba ima rengba ka zanga du na tandu yugopai ho du ni ni rii tambara yo, ono ni ima rengba kadu ni gu boro du na bakere diabese rogo sunge sa boro ni abawiriki. Watadu ni ima rengba kadu ni gu boro amanganga apai ti genehe wenengai wa kura abaakumba ya, ono ni ima rengba kadu ni gu bakumba du na bakere wenesino gbiati nyemuse tini, na kidu ni gu boro duhe fu awirina taata gbe i sana ni tipa gu rugute du mburuhe rii Ziazia Kekeapai. Watadu ni ima rengba kadu ni gu bakumba a nadia aboro wenengai gbe kugume. (Eb. 13:2, 16) Ho ani abi gu tandu mangaapai ni ziazia du tirani, ani naduadu na ngbarago tipa agu apai rengbe ani ka mangaha fu dungurati. Na si nasa rani ka ani naakpingo agu aboro du na gu tandu mangaapai du kia ti gaani ya.

18. Waigu rengbe ani ka sonakumbatayo rogo gaani tandu mangaapai yo?

¹⁸ Ka ani vura kaa manga kina gini ngbatunga sunge rogo dungurati, ani dunduko si aida ani du na nyemu ka mbakada gaani gene sunge na kini sono kumbatayo rogo gaani tandu mangaapai yo. Tipa ka undo rani ani mbakadi gaani gene sunge, Yekova nafu wene rabahe furani vurube gako riigbu. Ni kpiapai, ti regbo gu gaani dunguratise nga ga bebere poso, ani ninaagbia rabahe nibipa wai rengbe ani kadu na bakere diabese rogo gaani sunge tungusapai. Ya mo mo namanga asadatise ka mangasunge na gu rabahe mo agbiaha ti regbo gu dunguratise re?

19. Waigu rengbe mo kada ti gu sasa nga ga ndu tipa Gu Sukuru Du Tipa Abatungusipa Kindo?

¹⁹ Kura bawene mbakadapai nga ga rabahe nga Gu Sukuru Du Tipa Abatungusipa Kindo. Agu aboro rengbe ka ndu tipa gi sukuru re nga agu awirina duti ngba mangasunge Kindo ti aregbo dũ na nga aguyo garã yo natona ti 23 kuti 65. Mo ima rengba ka berãha nga ka mo danga ti gi sasa re te. Ono kuba gupai nga ka tangara gu nduapai rengbe ka saro ka mo ndunga tipa gu sukuru re ya, mo tangaranga gu nduapai mo aida ka ndu ti ni tipaha. Mo sogimapai nga gu nika undo ro mo mangi gupai si aidaha tipa ka rẽ ka ndu tipa gu sukuru re. Na ga Yekova undo gbiati manga nyanyaki asadatise, mo ima rengba ka manga gupai mo aberẽhe nga ka mo mangingo ho te.

20. Ginipai rengbe ani ka wirikaha rogo ARomo 12:6-8?

²⁰ Gu biatapai rengbe ani ka wirikaha ti gu kpiapai Pauro amangisunge na ni gu du rogo ARomo 12:6-8. (Oni gedihe.) Pauro ayugu gupai berewe rogo agi averesi re nga agu aboro du rogo dungurati na tandu mangaapai tiyo ni bakiakia. Ono bara gere, ko anyakasi gupai nga si naida ani mangisunge na ai gu tandu mangaapai du tirani tipa ka nyakasa dungurati.

21-22. Ginipai rengbe ani ka wirikaha be aRobert na Felice?

²¹ Oni berẽnga pa gu kpiapai nga ga kura wirina sa nga guko ani nika yamba ko nga Robert. Tingbafuo manga ko sunge fu Yekova rogo gu kura ringara kia, i akedi ko na sunge ku rogo gu Betere du rogo gako ringara. Wa si avura du nga awirina akido ko na gupai nga i aarianga  gako sunge mbiko gupai nga gbegberẽpai du ko amangihe te, ko aya: “Tipa dungu adiwi, mi adu na bakere gberãrago bambiko mi aberẽ gupai nga mi aadunga na diabese rogo gimi sunge yo te. Aregbo anidu kinaho mi anaaberãpa mbu mangasunge Betere yo.” Waigu ko agbia gako ngbarago berewe? Kura bakumba kurako sa atingidi ko na gupai nga, Yekova araba rani tingba agu asunge naadu berani mbata tipa gupai nga ani du na bakere diabese rogo agu asunge yo du berani awere. Robert aye ka rugatiko na gupai nga si aaida ko mbu berã kusayo ki tona maaberãko kuti gupai ko narengbe ka mangaha awere.

²² Wiriba Felice Episcopo agbiatiko na kina gu bangisa kpakarapai re. Ko na diako andu tipa gu sukuru nga ga Girada rogo 1956 na i ki mangisunge ta kaa bi adungurati Bolivia yo. Rogo gu garã nangia 1964, i kini batika kumbagude. Felice aya: “Si aima du ni ba mbumbuhe furani ka mbu gu gaani sunge ani aima kpinyemuhe. Mi adu rogo gberãrago tipa garã sa. Ono mbiko ga Yekova undo, mi aˈaria gimi bipai na ki moiberã re kuti gimi vovo sunge nga ga du ni bagude.” Ya mo mo nabi tiro wa Robert watadu Felice? Ya mo mo na gberãrago mbiko gupai nga mo na agu amomu nga ga sunge bero mo adu na ni mbata kusayo te? Kangia wo duhe, mo nika du na bakere ngbarago ka mo moiberã ro kuti gupai rengbe mo ka mangaha awere tipa ka mangasunge fu Yekova gbiati awirinamo. Mo naamangasunge na gamo agamahe gbiati tandu mangaapai tipa ka undo kura aboro, na mo nika gbia bakere ngbarago wa mo nikaa nyakasa dungurati.

23. Ginipai si aida ani di regbo ka mangaha, na ginipai ani nika sakapai tipaha rogo gu kekeapai ngbefuo gere?

²³ Ani dunduko ni basasa du na nyanyakipa rani fu Yekova. Ko naida gupai nga ani du ni papara gako riikporo. Ka ani di regbo kaa berãkurii gupai rengbe ani ka mangaha tipa ka nyakasa awirinarani na kini mangi bakere asadatise tipa ka manga gupai re, si nawira gupai gbe nga ani aberãnga gupai nga ani nga papara dungurati te te! Ono na ginipai tigaha du tipa gu gene ani abi kura aboro ngbaha rogo dungurati? Waigu rengbe ani ka yugo gupai nga ani ima kpinyemu yo na ani nabi yo na irisa? Rogo gu kekeapai ngbefuo gere, ani nika sakapai tipa gu nyanyakipa pai re.