1. Yekova mbugene fu ruru airisiko dunduko ni basasa tipa i du wari?

YEKOVA ima mbugene fu ruru airisiko dunduko ni basasa tipa i du rogo gako dungurati. Wa vura duhe nga agu asunge ani amangaha ni bakiakia rogo dungurati, ani dunduko du na nyanyakipa rani na ani naida akuarani aida. Gu mokedi nangia Pauro aima undo rani ani rugutirani na gi nyanyakipa pai re. Ngba gini gene?

2. Ringbisihe kuti AEfeso 4:16, tipagine si aida ani naabi akuarani ti ni na nyanyakipa yo na kini mangisunge wa sa na yo?

² A wa duhe ni kekehe rogo gu veresi yo du mburu gi kekeapai re riihe, Pauro agumba gupai ziazia nga boro ho dagbarani yo rengbe ka bi kura irisi Yekova na ki gumba gupai nga: ‘Zingo ro ti re te’ watadu pai ho mi aidaha bero te te. (1 Kor. 12:21) Ka ani aida zereda du rogo dungurati, si naida ani bi akuarani na nyanyakipa yo na kini mangisunge wa sa na yo. (Oni gedi AEfeso 4:16.) Ho ani dunduko amangasunge ni rogo kodatise, aboro dunduko nadu na gu berãpai nga i nakpinyemu yo akpi na dungurati nadu ni nyanyakihe.

3. Gini apai ani nika sakapai tipaha rogo gi kekeapai re?

³ Gini agene duho rengbe ani ka yugo irisa ngbaha fu akuarani aKristano rogo dungurati? Rogo gi kekeapai re, ani nika sakapai tipa wai rengbe abaakumba ka yugo irisa fu akurayo abaakumba. Fuo gure, ani nika sakapai tipa wai rengbe ani dunduko ka yugo gupai nga ani nabi agu awirina abi ata manganga rogatise ya na nyanyakipa yo. Na ni yangaraha, ani nika wirikapai tipa wai rengbe ani ka yugo irisa fu agu aboro arengbanga ka pe fugorani wenengai ya.

4. Gini ga Pauro rugute du ni kekehe rogo ARomo 12:10 si aida abaakumba pekefuoho?

⁴ Ziazia toro du nasia agu abaakumba dunduko du rogo dungurati. Wa vura duhe wo, i dunduko ni basasa du na agamahe beyo gbiati tandu mangaapai ni bakiakia. (1 Kor. 12:17, 18) Agu akurayo kinaho da ni abaakumba bambeda kusayo, sidu, i na bakere inohe wa kura abaakumba te. Agu akurayo kinaho adunga na rengba ka manga badungu apai ya mbiko gbinza watadu kpotoyo wenengai te. Ono bakumba ho si aida ni berẽ gupai nga sunge ti kura bakumba kura ni te te. Kuba gure, ai bakumba si aida ni pekefuo gu ga Pauro rugute du ni kekehe rogo ARomo 12:10.—Oni gedihe.

5. Waigu abaakumba ayugo gupai nga i nabi akurayo abaakumba na irisa, na tipagine duhe ti ni ni nyanyakipa pai tipa i mangihe wo?

⁵ Abaakumba nayugo gupai nga i nabi akurayo abaakumba na irisa ni dega yo tuyo wenengai fu akurayo. Gipai re na nyanyakipaha gbe ho abaakumba nga ga dungurati adunguratiyo ni ka fura riipa nyanyaki apai. Tipagine? Oni bingo gupai gu Ngbaõbambu Sinziri nangia ga Tanvuo 1, 1988, agumbaha nga: “Si naida abaakumba idi kuti gupai nga Yesu ima rengba ka mangasunge na ziazia toro tipa si undo ai bakumba rogo dungurati ni berẽpa rugute nga ga Ziazia Kekeapai nga gu rengbe ka undo abaakumba i mangipai kuti pai watadu i mangi nyanyakipa diaberã. (Amo. 15:6-15) Ziazia toro naundo abaakumba dunduko rogo dungurati, angianga kina guni sa gbua ya.”

6. Waigu rengbe abaakumba ka mangasunge wa sa rogo kodatise yo, na waigu dungurati agbia undo ho i amangaha ni wo?

⁶ Gu bakumba nairisa akurani abaakumba adianga fugo ngbayo ti regbo gu dunguratise nga ga abaakumba te, na ni aberãnga gupai nga kina gani aberãpai du ni wenehe ti aregbo dunduko te. Kuba gure, ni nagumba gani berãpai ni umbasitise. Ni nadega tuni wenengai kuti agu apai gu kura abaakumba apehe. Gu nyakipaha gbe nga, ni regerege ka sakapai tipa agu arugute du rogo Ziazia Kekeapai yo na ka pekafuo gu rugapai naye be “kangara moyambu.” (Mt. 24:45-47) Ho abaakumba ayugo nyemuse ni na irisa fu akurayo ho i asakapai ni, ga Mbori ziazia toro nadu na yo, na si naundo yo i mangi agu adiaberã nika nyakasa dungurati.—Yak. 3:17, 18.

7. Waigu Yesu aabi agu aboro ata manganga rogatise ya?

⁷ Adungurati areme na arogotise gbiati ariikporo rogoho. Kurigure, agu awirina ata manganga rogatise ya kina rogoho a. Waigu si aida ani bi agu aboro ata manganga rogatise ya? Si naida ani wiriki wai Yesu aabi agu aboro ata manganga rogatise ya. Ti regbo ga Yesu tungusapai auru kpotosende, ko aamanganga rogatise te. Ko anye ni bakuparanga na kini moiberã ko tipa gu sunge i afuhe fuko. Yesu aaberãnga gupai nga Kristano du wa ka ni mangi rogatise watadu ka nye zanga manga rogatise te. Ono tie, ko aima gumba gupai nga kura aKristano ima rengba ka sia ka zanga manga rogatise. (Mt. 19:11, 12) Yesu aduadu na irisa koyo du agu aboro ni naamanganga rogatise ya. Ko anaabingo agu aboro amanganga rogatise ya nga payo kusende watadu kaa bihe nga gu kuraapai naakpa akpa rogo gayo raka yo mbiko gupai nga i amanganga rogatise ya te.

8. Ringbisihe kuti 1 AKorindo 7:7-9, ginipai Pauro angarasi aKristano tipa i berẽpaha?

⁸ Wakina Yesu, gu mokedi nangia Pauro anye ni bakuparanga ti regbo gako tungusapai. Pauro aayugongo gupai nga gbegberẽpai du ngaha fu Kristano ka manga rogatise te. Ko aima rugatiko na gupai nga gipai re nga ga boro diaberã ni tini. Wa si avura du wo, Pauro aima ngarasa aKristano tipa i bihe singia i rengbe ka mangasunge fu Yekova ni abakuparanga watadu ni anakuparanga. (Oni gedi 1 AKorindo 7:7-9.) Nirengo, Pauro aabingo ho nga agu aboro ata manganga rogatise ya na payo kusende te. Ko asia gu paranga kumba nangia Timoteo nga gu ko naadu ni bakuparanga tipa ko mangi nyanyakipa apai rogo ga Yekova sunge yo. * (Frp. 2:19-22) Si tie ziazia nga, si ni irairapai ka berã gupai nga pa rẽ wirina gbe tipa sunge watadu pa zanga rẽ ni gbe tipa sunge naruriipa singia ni mangi rogatise watadu ni amanganga rogatise te.—1 Kor. 7:32-35, 38.

9. Ginipai rengbe ani ka gumbaha tipa rogatise na zanga manga rogatise?

⁹ Singia Yesu watadu Pauro, boro ho dagbayo yo nayugu gupai fu aKristano nga i du wa ka i mangi rogatise watadu i nye zanga manga rogatise te te. Ginipai tie rengbe ani ka gumbaha tipa manga rogatise gbiati nye zanga manga rogatise? Gu Ngbaõbambu Sinziri nangia ga Tanvuo 1, 2012, afu wene karagapai kuti gi sanahe re. Si aya: “Nirengo, singia [rogatise na zanga manga rogatise] si dunduko rengbe yo ka ya tipaha wẽ si nga gamahe be Mbori. . . . Yekova aberãnga gupai nga si naida agu aboro ata manganga rogatise ya du na zee watadu na gberãrago  mbiko gupai nga i ata manganga rogatise te te.” Na gipai re berãrani yo, si naida ani yugu irisa fu agu abakuparanga na anakuparanga du rogo dungurati.

10. Waigu rengbe ani ka yugo irisa fu agu awirinarani ata manganga rogatise ya?

¹⁰ Waigu rengbe ani ka yugo irisa tipa agu abipai na agu apai du tipa agu awirina ata manganga rogatise ya? Si naida ani tingidi gupai nga kura aKristano kinaho naima diaberã ka nye zanga manga rogatise. Gu kura aKristano naida aida ka manga rogatise, ono i ata gbianga gu boro nzunzu ka i mangi rogatise na ni te. Berewe a, si rengbe kadu nga agu akurayo kinaho zanga gayo abadiarogatise rogo kpio yo. Ka si vura ngia kina ginipai vurũ, ya mo si rẽarẽ fu agu aboro du rogo dungurati tipa i sana agu aKristano ata manganga rogatise ya tipa ndu gupai i amanganga rogatise ti ni ya watadu ka asada ka undo yo i gbia badiarogatise? Kina rengo du ngaha nga kura agu aKristano ata manganga rogatise ya ima rengba ka sanahe tipa ngbatunga gu undo re. Ono ka i asananga he tipa undo ya, waigu pa asada ani ka undo yo narengbe ka sa yo i du? (1 Tim. 5:13) Ani bingo agu apai gu kura awirina ata manganga rogatise ya agumbaha.

11-12. Waigu rengbe ani ka ba gberãrago ti agu aboro ata manganga rogatise ya?

¹¹ Kura babi adungurati sa ni bakuparanga nga gu ko namanga gako sunge wenengai nabihe nga badungu aundo duho ti du ni bakuparanga. Ono ko agumba gupai nga si ima rengba kadu ni pa gberãrago ho awirina asanako ni nga: “Tipagine mo ata manganga rogatise ti ni ya?” Gu kura bakuparanga sa namanga sunge rogo be-basunge aya: “Ti kura aregbo, mi naabi gupai nga kura awirina naberã gupai nga si naida rungo agu aboro ata manganga rogatise ya naamanga yo amanga. Gipai re rengbe ka sa gupai nga pa zanga manga rogatise naangera wa tindiro du ngaha, angianga gamahe ya.”

¹² Kura wirina ni nakuparanga namangasunge Betere yo aya: “Gu kura awirina ninaaberã gupai nga agu aboro dunduko ata manganga rogatise ya nagbata badiarogatise watadu ai gu regbo agu aboro ata manganga rogatise ya adu dagba badona aboro, i nabihe nipa momu ka gbata badiarogatise. Ti kura regbo sa mi andu na sunge nga ga Betere ku rogo kura papara ringara, mi ada rogo gu uru nga ga dunguratise. Gu wirina mi aasungo fuo ri agumba gupai fere nga rogo gari dungurati, awirina kina yo ue nga akumba du garã rani sa na yo. Ri akido re na gupai nga ri aˈasadanga aˈasada ka undo re mi gbia badiarogatise te. Ono nibasa fuo da ani Bambu Kindo yo, ri andu na mi fuo agu awirina re tipa mi bi yo. Si tie ziazia nga, zee aima zio re gbiati agu awirina ue re.”

13. Gini akpiapai nangarasi kura wirina sa ni nakuparanga?

¹³ Gu kura wirina sa ni nakuparanga namangasunge Betere yo aya: “Mi ima ino abazakigene nga aguyo ata manganga rogatise ya du na ruru bipai, kidu na ziazia asasa beyo, kini futiyo kaa undo aboro, na kidu na ngbarago. I naundo dungurati ni bakerehe. I na ruru bipai tipa zanga manga rogatise. I aberãnga gupai nga i nyakipa yo ti kura aboro mbiko gupai nga i ata manganga rogatise te te watadu ka berã gupai nga ka i dunga na ngbarago mbiko gupai nga badiarogatise beyo gbiati agude te te.” Si nga gupai ngba du ti ni rogo dungurati mbiko aboro dunduko nayugo irisa fu akurayo na kini bi yo na nyanyakipa yo. Mo naino gupai nga rago agberãnga ti awirinamo mbiko gupai nga mo mangi rogatise watadu mo ata manganga rogatise te te, na i akpingo ro tipa gipai re te, na berewe a, i ambunga kodatiyo na mo te, na i aberãnga ha nga mo nyakipa ro kisusi yo te. Mo ima ino gupai nga i ima kpinyemu ro.

14. Waigu rengbe ani ka yugo gupai nga ani na irisa tipa agu aboro ata manganga rogatise ya?

¹⁴ Agu awirinarani ata manganga rogatise ya nika duadu na ngbarago ka ani abiyo na nyanyakipa yo mbiko gu wene asino du tiyo angianga  mbikopa zanga yo manga rogatise ya. Kuba gupai nga ani du na rungo nga i ata manganga rogatise te, si naida ani bi gayo padu ni ruruse na nyanyakipaha. Ni sangbana gipai re, agu awirinarani ata manganga rogatise ya abingo ho nga ani nape gupai fuyo nga: ‘Zingo roni ti rani te’ te watadu pai ho ani aidaha beroni te te. (1 Kor. 12:21) Kuba gure, i naino gupai nga ani nairisa yo airisa na ani na ngbarago tipa padu yo rogo dungurati.

15. Gini aˈariapai kura awirina namangihe tipa ka kiiso gayo sunge tungusapai?

¹⁵ Vuru agu agarã yo susi bambeda kusayo, badungu abatungusipai ima maaha ni gayo sasa ka wirika kura afugo tipa wa ka i kiisi gayo sunge tungusapai. Tipa ka manga gipai re, si naaida i mangi ariapai amanga rogo gayo raka yo. Agi awirina re ima mbu gu dungurati namangasunge na gu fugo i apehe tipa ka mangasunge rogo gu dungurati nape kura fugo kia ono nga gu du na bakere zingo rogoho tipa abatungusipa Kindo. (Amo. 16:9) Gere nga gu diaberã kina agi aKristano re amangaha ni tiyo tipa ka mangasunge Kindo ni bakerehe. Wa vura duhe nga si ima rengba ka dia dungu agarã tipa i ini gu vovo fugo re wenengai, i naundo dungurati ngba dungu agene. Gayo wene asino gbiati gu inohe du yo na ni nanyakasa awirina rogo dungurati. Ani nabi agi awirina fu tiyo nitiyo ka undo re na nyanyakipa yo!

16. Pa rẽ wirina kada ni bakumba watadu moundo abaakumba narurii ginipai?

¹⁶ Si aidanga abaakumba diberã nga ka wirina danga ni bakumba watadu moundo abaakumba mbiko gupai gbua nga ni ainongo gu fugo wenengai i apehe rogo dungurati te te. Abaakumba nawisigo wirina riimburu gupai Ziazia Kekeapai agumbaha tipa wai si aida abaakumba na amoundo abaakumba du, angianga ringbisihe kuti wai ni naini gu fugo i apehe rogo dungurati ya.—1 Tim. 3:1-10, 12, 13; Tito 1:5-9.

17. Gini asanahe si aida kura ariikporo berẽkuriihe ho i aga ni ku rogo kura ringara?

¹⁷ Gu kura riiakporo nga ga aKristano ima ga ku rogo kura ringara tipa ka gbata bagbuko watadu ka gbata sunge marã. Ni sangbana gipai re, awiriyo ima rengba kaa ndu ku rogo gu sukuru i ayugopai rogoho rogo gu fugo yo i apehe rogo gu ringara re. Si ima rengba ka ida gupai a nga avungu agu agude re wiriki gu fugo i apehe rogo gu ringara re tipa ka gbia sunge. Ono na ka si du nga dungurati watadu badona kinaho rogo gu ringara re nga gu namanga adunguratise rogo fugoyo yo? Gini dungurati si aida gu riikporo re ndu ku rogoho? Ya mo si naida si du nga gu dungurati nga ga gu fugo i apehe rogo gu ringara re watadu gu dungurati i amanga adunguratise rogoho rogo gayo fugo?

18. Ringbisihe kuti AGaratio 6:5, waigu rengbe ani ka yugo irisa tipa gu diaberã nga ga bariikporo?

¹⁸ Si naida bariikporo mangi diaberã tipa gini dungurati gako riikporo nikaa ndu ku rogoho. Si naida ko mangi diaberã tipa gupai ngba gbe tipa gako riikporo. (Oni gedi AGaratio 6:5.) Si naida ani yugu irisa tipa gu diaberã nga ga bariikporo mbiko gipai re nga ga boro diaberã ni tini. Ai gupai ko nika diaberã tipaha, si naida  ani idi na gako diaberã na ki yugu nyemuse fu gu riikporo re.—Rom. 15:7.

19. Ginipai si aida abariikporo berẽkuriihe wenengai na ki mangi kparakpee tipaha?

¹⁹ Ti kura aregbo, gu kura ariikporo kinaho naima rengba kadu rogo gu dungurati i amanga adunguratise rogoho rogo gu fugo yo avunguagude apehe, ono ka agude ainongo gu fugo re wenengai ya. Ka si du nga gu dungurati du gu riikporo re rogoho rogo gu dagbarago i ape gu fugo rogoho du rogo gu ringara re, si ima rengba ka kpakara fu agude tipa i rugutiyo na agu apai duti regbo adunguratise na i arengbanga ka mbeda na Yekova te. Tipagine? Bambiko agude ima rengba kaa ndu ku rogo gu sukuru i ape gu fugo rogoho nga ga gu ringara re angianga gu fugo nga ga avunguyo ya. Ho du pai ni wa gure, si naida abariikporo berẽ wenengai na ki mangi kparakpee tipa tatamana tipa si undo yo i mangi gupai si aida i mangihe tipa ka undo awiriyo i mbedi na Yekova gbiati gako aboro. Si ima rengba ka ida gupai nga avunguagude undo awiriyo tipa awiriyo ini fugoyo wenengai watadu i ima rengba ka berãpa ga na yo ku rogo gu dungurati nga gu namanga adunguratise rogo gu fugo awiriyo agiaha wenengai. Singia gini diaberã bariikporo nika mangaha, si naida agu aboro du rogo gu dungurati ko nika sia kaa ndu ku rogoho na gako aborokporo yugu irisa fuko gbiati gako aborokporo na kini biyo na nyanyakipa yo.

20. Waigu rengbe ani ka yugo gupai nga ani nairisa agu awirinarani na wirika vovo fugo?

²⁰ Nibi gu nduapai dunduko ani nasakipai tipaha, rogo dungu adungurati, awirina gu duadu yo namanga asadatise nyanyaki ka wirika vovo fugo. Si ima rengba ka kpakara fuyo tipa i gumba agu apai du berãyo yo. Ono ka si du nga ani aberãnga kina pa wai sa i afura rogo gu vovo fugo i awirikaha te, ani nika bi gayo nyemuse tipa Yekova na gu nyemupai du yo na ni tipa ka irisoko. Ka ani bi gi wene asino re, ani nika bi agi awirina re na nyanyakipa yo na kini yugu irisa fuyo. Ani agumbanga gupai nga ‘zingo yo ti rani te’ watadu pai ho ani aidaha beyo te mbiko gupai gbua nga i apenga gaani fugo wenengai te te.

21-22. Gini bawene momu du berani?

²¹ Ani na bakere tambuahe fu Yekova mbiko ko ima fu nyanyakipa sunge furani wa du ani dunduko ni basasa ani mangihe rogo gako dungurati. Singia ani nga akumba watadu adee, agu aboro mangi rogatise watadu agu aboro ata manganga rogatise ya, paranga aboro watadu sosono aboro, na singia ani nape kura fugo wenengai watadu ani apenga ha wenengai te, ani na nyanyakipa rani fu Yekova na fu akuarani a.—Rom. 12:4, 5; Koro. 3:10, 11.

²² Ani ndunga andu kindi kumbatayo kaa mangapai kuti gu badungu weneapai ani nawirikihe ti gu kpiapai Pauro amangisunge na ni du tipa kpotoboro. Gipai re nika undo rani ani ini agu apai rengbe ani ka mangaha tipa ka ngarasa awirinarani. Si nika undo rani a ani naakpinyemu yo ti aregbo dũ na kini yugu irisa fuyo.