1. Tipagine Yekova akusi aboro ti ni?

REGBO adu kinaho Yekova adu nisako. Ono gipai re aasanga ko ko du na gberãrago te. Yekova aidanga boro duadu ho mbata, ko kini ru kadu na ngbarago te. Ono wa vura duhe wo, Mbori aaida gupai nga kura aboro duadu ho naraka na kidu na ngbarago a. Nyemuse afõngbadu Yekova yo, ko kini tona kusa aboro.—Tam. 36:9; 1 Yo. 4:19.

2. Waigu aYesu na amaraika adu ho Yekova akusi kura ahe ni?

² Ni bambataha, Yekova akusi gako badiasunge. Sidu, vurube gi gako badiasunge nangia bambata Wiriko re, “i afu ahe dũ rogo ko yo,” kodihe na amirioni amaraika. (Koro. 1:16) Yesu aima du na bakere ngbarago ka mangasunge sa na Bako. (Snz. 8:30) Na amaraika aima du a na bakere ngbarago. I aima bi aYekova na gako badiasunge nangia Yesu, i nimbakadi ngbangbaturũ na kpotosende. Waigu agu amaraika re ayugu gayo ngbarago? I atona ka ‘ngbiko ni ngbarago’ ho i akusi kpotosende ni, na zanga kapa, i aandu kindi kumbatayo kaa tambua Yekova ho i abi agu akura ahe ni dunduko ko akusihe, gbe aboro. (Eyo. 38:7; Snz. 8:31) Gi kusikusi ahe re dunduko aayugopa ga Yekova nyemuse gbiati tatamana.—Tam. 104:24; Rom. 1:20.

3. A wa duhe rogo 1 AKorindo 15:21, 22, ga Yesu motumo tumorii nasa ginipai si mangi?

³ Yekova aaida gupai nga aboro raki nyeanye kindi rogo gu bawene kpotosende ko ambakadihe. Ono aAdamu na Eva aingipai kuti Yekova, sidu, i aadunga berewe na rengba ka raka nyeanye kindi te. I na awiriyo dunduko kini tona kaa kpiko. (Rom. 5:12) Ginipai Yekova amangihe? Ko agumbapa wai nibasa ko nika batasa ngbatunga aboro dunduko. (Bam. P. 3:15) Yekova adiberã ka fu motumo tumorii nga gu narengbe ka sa gupai nga awiri Adamu na Eva gbia ranirii be ingapai na kpio. Ko ambu aboro dunduko nibasasa i mangi siapai ka irisoko na ki gbia nyenye  unga.—Yo. 3:16; Rom. 6:23; oni gedi 1 AKorindo 15:21, 22.

4. Gini asanahe ani nika sakapai tipaha rogo gi kekeapai re?

⁴ Badungu asanahe duho rengbe ani ka sanaha nibipa gu ga Mbori kidohe du tipa zingisa kpikpi aboro be kpio. Gini gene si awira gupai nga zingabekpio nika manga ngbaha? Ya mo ani adu na rengba ka ino gaani aboro ho i nika zingisa yo ni be kpio? Rogo gini agene zingabekpio nika ye na ngbarago furani? Na waigu rengbe berãkuriipa zingabekpio ka sonosa gaani tambuahe tipa ga Yekova nyemuse, tatamana, gbiati zerangbaduse? Ani sakingo pai tipa agu asanahe re ni basasa.

5. Tipagine rengbe ani ti ni ka ya i azingisanga aboro dunduko be kpio ti kina bangisa regbo te?

⁵ Ho Yekova nika zingisa badungu amirioni aboro ni be kpio vurube Wiriko, ani ima rengba ka berã gupai nga i azingisanga yo dunduko ti bangisa regbo te. Tipagine rengbe ani kadu ti ni na gu berãpai re? Bambiko ka badungu aboro kuru ku auru kpotosende ni kina boro ipo ti bangisa regbo sa, si ima rengba ka ye na baguzoro. Na Yekova ninaamanganga pai ruguzuruguzu te. Ko ima ino gupai nga si naida apai du ti genehe tipa gupai nga aboro raki rogo zereda. (1 Kor. 14:33) Yekova Mbori angia boro tatamana na kidu na hipai ho ko aamangasunge ni na Yesu ka mbakada kpotosende tipa aboro raki rogoho. Yesu nika yugo agu asino re a ti regbo Zogarago Tipa Agarã Kutu ho ko nikaa mangasunge ni na agu aboro nika bata ti regbo Aramegido ka mbakada kpotosende tipa ka dia agu aboro kugume nakpiki.

6. Ringbisihe kuti Amokedi 24:15, ada nika du dagba agu aboro yo Yekova nika zingisa yo be kpio?

⁶ Gu nyanyakipa gene agu aboro nika bata ti regbo Aramegido nika undo ngbaha nga, i nika yugopai fu agu aboro nika zingabekpio tipa ga  Mbori Kindo gbiati agu apai Yekova aidaha. Tipagine? Bambiko badungu agu aboro i nika zingisa yo be kpio nika ngia “iraira” aboro. (Oni gedi Amokedi 24:15.) Si nika ida i mangi aˈariapai tipa gupai nga ka gbia undo ti ga Kristo motumo tumorii. Oni berẽnga pa gu bakere sunge nika du nga ka yugopai fu amirioni aboro nga aguyo ainongo pai tipa Yekova ya. Ya mo ai boro nika du na gani bayugupai ti ni, kina wai ani naawirikapai na aboro areme? Ya mo i nika fu gi vovo aboro re ku rogo adungurati na ki rabayo tipa i yugupai fu agu aboro i nika zingisa yo tingbafuo yo? Ani sungu ka bi kina gupai nika manga. Ono tie, ani ima ino gupai nga ti digido Zogarago Tipa Agarã Kutu, “kpotosende ahí be ina pa Yekova.” (Yes. 11:9) Nairiwo gu bakere sunge ani nikaa gbia ngbarago ti mangaha re ti regbo agarã kutu!

7. Tipagine ga Mbori aboro nika du ti ni na nunga ho i nikaa yugopai ni fu agu aboro i nika zingisa yo be kpio?

⁷ Ti regbo ga Kristo Zogarago Tipa Agarã Kutu, si nika ida agu awiri Yekova du auru kpotosende naandu kindi kumbatayo kaa manga aˈariapai tipa ka fu ngbarago fuko. Sidu, i dunduko nika du na ndikidi nunga wa i nikaa undo agu aboro i nika zingisa yo be kpio tipa i mangi aˈariapai tipa ka diabe iraira aberãpai na nyemuapai na kini raki ringbisihe kuti ga Yekova arugute. (1 Pet. 3:8) Zanga kapa, agu aboro i nika zingisa yo be kpio nika duadu mbembedi na ga Yekova aboro du nga aboro umbasitise, nga aguyo nikaa ‘manga pa gayo bata a’ tigayo.—Frp. 2:12.

8. Tipagine ruhe aru ti ni kadu na gu berãpai nga ani nika duadu na rengba ka ino gaani aborokporo gbiati abakurearani ho i nika zingisa yo ni be kpio?

⁸ Dungu nduapai duho rengbe ani kadu ti ni na gu berãpai nga agu aboro nikaa fu sene fu agu aboro i nika zingisa yo be kpio, i nika duadu na rengba ka ino gu gayo aboro i nika zingisa yo be kpio. Ni kpiapai, nibipa wai azingabekpio amangi mbata kusayo, si nawira gupai nga ho Yekova nika zingisa aboro ni, i nikaa ngera, kini fura na kini berẽ kina wai i adu ngbutuko mbata fu kpiyo. Oni tingidi gupai nga Yesu aringbisi kpio kuti rame na ki ringbisi zingabekpio kuti zingisa boro rogo rame. (Mt. 9:18, 24; Yo. 11:11-13) Ho boro ninaazinga ni rame yo, ninaangera kini fura kina wai ni nidu mbata fu ni ra, na berã ni ninaarianga tihe te. Oni bingo gu kpiapai nangia ga Razaro. Ko aima kpi tipa arame biama, na kpotoko aima tona kaa zirã. Ono tie, ho Yesu azingisi Razaro ni be kpio, adawiriko aima inoko nibasa, na si ziazia nga Razaro aima ino yo a.—Yo. 11:38-44; 12:1, 2.

9. Tipagine agu aboro i nika zingisa yo bekpio nikaa zinganga ti ni na rengberengbe berãyo gbiati kpoto yo ya?

⁹ Yekova kidohe nga tii ga Kristo zogarago, boro ho nika ya: “Mi nawoka” te. (Yes. 33:24; Rom. 6:7) Sidu, agu aboro i nika zingisa yo be kpio, i nika du na wene kpotoyo. Ono tie, i adanga nibasa ni rengberengbe yo te. Ka i da nibasa ni rengberengbe yo, gayo aboro ima rengba ka zanga ino yo. Si nawira gupai nga aboro nikaa da ni rengberengbe yo yeeye ti regbo ga Kristo Zogarago Tipa Agarã Kutu. Yesu nika gasa Kindo fu Bako kina ti digido agarã kutu. Sidu, ti gu regbo re, Kindo nikaa ima manga agu apai dunduko Yekova aidaha, kodihe na sa aboro ni rengberengbe yo.—1 Kor. 15:24-28; Yugo. 20:1-3.

10. Zingabekpio nika saro mo du wai?

¹⁰ Mo berẽnga pa wai mo nika du ho mo nikaa fu sene ni fu gu gamo aboro i nika zingisa yo be kpio. Ya mo gu ngbarago mo nika du na ni nika sa ro mo momu watadu mo kpari? Ya mo mo adu na bakere ngbarago si ki sa gupai nga mo tona bi abia tambuahe fu Yekova? Ani rengbe  kadu na gu kido nga ani nika du na bakere nyemuse tipa gu wenesino Barani nga Yekova gbiati Wiriko, nga aguyo nika sa zingabekpio si mangi.

11. Ringbisihe kuti agu afugo Yesu du ni kekehe rogo Yoane 5:28, 29, ginipai nika manga fu agu aboro nikaa giasangba Mbori?

¹¹ Oni berẽnga pa gu bakere ngbarago agu aboro i nika zingisa yo be kpio nika du na ni wa i nikaa mbu kuru borose kusayo na kini raki ringbisihe kuti ga Mbori arugute. Agu aboro nika manga agu aˈariapai re nika raka nyeanye kindi rogo Paradizo. Ono Mbori ambunga agu aboro nika samungu kutiko i raki rogo Paradizo ka gberesapa gu zereda nika du yo te.—Yes. 65:20; oni gedi Yoane 5:28, 29.

12. Rogo gini gene Yekova nika fu maku fu agu aboro dunduko nika du auru kpotosende?

¹² Tii gu zogarago nga ga Kindo, ga Mbori aboro dunduko nika bi rengo gupai du rogo Asanza 10:22, nga gu naya: “Gu maku nga ga Yekova nakumukosi boro, ko nagbia nga rungo kuti ni te.” Na gu undo nga ga ga Yekova ziazia toro, ga Mbori aboro nika du ni kumukokumuko yo rogo toro yo, naida ka ya, i nikaa ndu kindi kumbatayo kaa wirika Yesu wenengai na kini ndu kumbatayo a kaa da ni rengberengbe yo. (Yo. 13:15-17; Ef. 4:23, 24) Berewe a, aˈuru dunduko kpotoyo nikaa da ni wenehe, na i kidu ni wene aboro gbe. Nairiwo gu raka nga ga ngbarago nika du re! (Eyo. 33:25) Ono tie, waigu rengbe pa berã mo kuriipa zingabekpio ka undo ro awere?

13. Ginipai Atambuahe 139:1-4 ayugoho tipa wai Yekova naini rani wenengai, na waigu zingabekpio nika yugo gipai re ni rengo?

¹³ A wa ani nisakipai tipaha kusayo, ho Yekova nika zingisa aboro ni, i nika du na kina gu bangisa berã i adu na ni na i nika du ni kina gu ngbatunga aboro i angia yo. Mo berẽnga pa gupai gipai re ayugoho. Yekova ima kpinyemu ro ni bakerehe gbe, ko ima ino agu apai dunduko mo aberãha, agu apai dunduko mo agumbaha, na agu apai dunduko mo amangaha, na ko natingidaha dunduko. Sidu, ka i ya ko nika zingisa ro be kpio, si nika du fuko taata ko gasi gamo aberã, abipai, gbiati asino kubaha. Bakindo Davide aima ino gupai nga Yekova ima ino rani wenengai wa du ani dunduko ni basasa. (Oni gedi Atambuahe 139:1-4.) Wai du du ani ho ani arugatirani ni na pa wai Yekova naini rani wenengai?

14. Waigu si aida ani du ho ani aberãpa wai ni Yekova naini rani wenengai?

¹⁴ Ho ani aberã ni kuriipa wai Yekova naini rani wenengai, si aidanga ani bakibangirani te. Tipagine? Oni tingidi gupai nga Yekova naberãpa rani aberã gbe. Ko nabi rani dunduko ni basasa na nyanyakipa rani fuko. Ko namaa berãko sa agu apai dunduko mangi rani rogo raka yo nga gu nasa rani ani du ni gu ngbatunga aboro du ani nga yo. Gipai re ima du ni pa wasa! Si aidanga ani berẽ gupai nga ani nisarani te. Yekova na ani ti aregbo dunduko, na ko na nyemu ka undo rani.—2 Peka 16:9.

15. Waigu gu maabangirise du tipa zingabekpio ayugo gupai nga Yekova nga iratatamana?

¹⁵ Ho aboro agunde ni be kpio, avurayo ima rengba ka manga yo ngbaome i mangi agu apai ka i naarengbanga ka mangaha ya ni serekpo yo yo nga i nika imo yo. Agu aboro du Satana na maapai kuriyo namangasunge na gi ngbatunga gunde re ka manga aboro ngbaome i biriki abakureayo watadu i mangi gupai i naima inoho nga si arunga te. Ono ka i mangingo rani ngbaome ani mangi gupai re te. Ani ima ino gupai nga ka avurarani vura imo rani, Yekova nika zingisa rani azingisa be kpio. (Yugo. 2:10) Ani ima ida kuti gupai nga pai ho rengbe yo ka  mangaha tipa ka rugusa rani ti du ni abakurea Yekova te. (Rom. 8:35-39) Nairiwo gu bakere tatamana Yekova nayuguhe ni fuko gu maabangirise furani du tipa zingabekpio re! Mbiko gu maabangirise re, ani agundenga ho asongodi Satana aserekpo rani ni nga i nika imo rani ka ani amanganga gupai i aidaha ya te. Berewe a, si nafu nyanyaki wingbaduse furani tipa ani nye ni rururani fu Yekova.

16. Gini asanahe si aida mo sana tiro na ni, na waigu rengbe akaragapai kutini ka undo ro mo ini bakio wai mo nakido kuti Yekova?

¹⁶ Ka avura Yekova serekpo ro nga i nika imo ro, ya mo mo adu na gu kido nga Yekova nika zingisa ro azingisa be kpio? Waigu rengbe mo ka inoho singia mo adu na kido kuti Yekova ti gu regbo re? Gene sa nga ka sana tiro nga, ‘Ya mo gu rukutu adiaberã mi amangaha na aˈuru dũ nayugo gupai nga mi ima du na kido kuti Yekova?’ (Rk. 16:10) Gu kura sanahe rengbe mo ka sana tiro na ni nga, ‘Ya mo gimi gene raka nayugo gupai nga mi ima kido kuti gu ga Yekova kidohe du tipa ngera ko fuo gimi azingo ka mi amaa pa gako Kindo mbatayo rogo gimi raka?’ (Mt. 6:31-33) Ka si du nga akaragapai kuti agu asanahe re nga ii, gure nga mo nayugo gupai nga mo ima kido kuti Yekova, na mo nika du regerege tipa ai gu asada rengbe ka ye sa ro.—Snz. 3:5, 6.

17. (a) Waigu zingabekpio ayugopa ga Yekova zerangbaduse? (b) Waigu rengbe ani ka yugo gaani tambuahe tipa ga Yekova zerangbaduse?

¹⁷ Yekova ima diaberã tipa gu regbo ko nika gbarasa gi gbegberẽ zegino re ti ni. (Mt. 24:36) Ko azanganga gako zerangbaduse ki mangipai mbata fu gu regbo re te. Ko na bakere nyemu ka zingisa kpikpi aboro be kpio, ono tie, ko na zerangbaduse. (Eyo. 14:14, 15) Ko nasungudo gupai nga gu regbo rẽarẽ da mbata, ko kini ru ka zingisa yo be kpio. (Yo. 5:28) Ani na wene nduapai berani kadu na tambuahe tipa ga Yekova zerangbaduse. Oni berẽnga kurii gipai re: Mbiko gupai nga Yekova na zerangbaduse, badungu aboro, kodihe na ani, na regbo berani ka ‘da ti zungadi tirani’ watadu ka manga saberã. (2 Pet. 3:9) Yekova naida gupai nga badungu aboro gbia gu momu nga ga raka nyeanye kindi. Sidu, si naida ani yugu gupai nga ani na tambuahe tipa gako zerangbaduse. Rogo gini gene? Ni manga ani ai gupai rengbe ani ka mangaha tipa ka gbia agu aboro “du na nyemu ka gbia nyenye unga” na ki undo yo i kpinyemu Yekova na kini irisiko. (Amo. 13:48, NW) Ka ani mangihe wo, i nika gbia undo ti ga Yekova zerangbaduse, kina wai a ani nagbia undo ti ni.

18. Tipagine si aida ani naamangapai ti ni na kura aboro ni zerangbaduse?

 ¹⁸ Yekova nika sungo na zerangbaduse da kuti digido agarã kutu ko kini ru ka bi gupai nga ani du ni rengberengbe rani. Da kuti gu regbo re, Yekova na nyemu ka mbupai furani ti gaani aingapai. Sidu, si naida ani wiriki gako kpiapai kini ngere tipa gu weneapai du rogo kura aboro yo na kini mangipai na yo na zerangbaduse. Oni berẽnga pa gu kpiapai nga ga kura wirina sa nga guri kumbari atona kaa gbiatiko na bakere bakabangirise na ko kini mbu nduge tipa adunguratise. Ri aya, “Gipai re aima du ni kere kpakarakpakaraha fere. Raka rani aˈariatihe ni kina boro ipo, na ka ani adunga na rengba ka manga agu apai dunduko ani aaida ka mangaha ya.” Ono tie, rogo agi apai re dunduko, gi wirina naadu ni wene diakumba re aamangapai kindi ni zerangbaduse na kumba ri. Ri adu na kido kuti Yekova, na ka omeri abatanga ya. Wakina Yekova, ri aagbeberã ri kuti gu weneapai kumba ri aamangaha. Ri aya, “Kumbami na wene asino tiko, na ko namanga ome yeeye ka diabe gako bakabangirise.” Nairiwo wai duhe ni nyanyakipa pai ka mangapai ni zerangbaduse na agu aboro du rogo gaani ngbadimokporo watadu dungurati nga aguyo namanga asadatise ka diabe akpakarapai!

19. Ginipai si aida ani diberã ka mangaha?

¹⁹ Yesu gbiati amaraika adu na bakere ngbarago ho Mbori akusi kpotosende ni. Ono oni berẽnga pa wai i nika du na bakere ngbarago ka bi kpotosende si nahi be rengberengbe aboro, nga aguyo naima kpinyemu Yekova na kini irisoko. Oni berẽnga pa gu bakere ngbarago agu aboro nika ndu ku ngbangbaturũ yo nika du na ni ho i nikaa bi ngbatunga aboro ni dunduko i nigbia undo ti gayo sunge. (Yugo. 4:4, 9-11; 5:9, 10) Na oni berẽnga pa gu regbo aume nga ga ngbarago nika diaba agu aume nga ga imisiri ra, na pa gu regbo kaza, rungo, gbiati kpio nika go kusayo nyeanye kindi. (Yugo. 21:4) Da kina kuti gu regbo re, oni diberã ka wirika gu Baroni nga boro nyemuse, tatamana gbiati zerangbaduse. Ka oni mangihe wo, oni nika banda gaoni ngbarago, ka oni vura kaa gbiatironi na kina gini aˈasada vurũ. (Yak. 1:2-4) Nairiwo gu tambuahe rengbe ani kadu na ni tipa gu ga Yekova kidohe nga, “aboro azinga be kpio”!—Amo. 24:15.