1. Ginipai agu aKristano nga avunguagude aida awiriyo da baha mbata fu i zi bapatiza?

“TIPA adiwi, mi aagumba gupai fu Buba na Nina nga mi naida ka zio bapatiza, na i anaafura fere dedede tipaha. I aaida gupai nga mi inipa wai gimi diaberã adu ni nyanyakihe. Rogo Banduru 31, 1934, uru ada nga gu gi nyanyakipa pai re amangi rogo gimi raka yo.” Wo du Blossom Brandt afura tipa agu apai namangi ti gu regbo ri amangi diaberã ka zio bapatiza. Areme a, agu aKristano nga avunguagude na nyemu ka undo awiriyo i mangi wene adiaberã. Gbisiga pa zio bapatiza kumbatayo watadu keesa ka zioho zanga wene nduhe ti ni ima rengba ka gbarasa padu boro wenengai rogo toro yo. (Yak. 4:​17) Ono tie, agu avunguagude du na tatamana naida gupai nga mbata fu awiriyo zi bapatiza, i du ni agu aboro naima da ba tinda gu tindiro nga ga gu bawiriki nga Kristano.

2. (a) Ginipai kura ababi adungurati nabihe? (b) Ginipai ani nika fura tipaha rogo gi kekeapai re?

² Kura ababi adungurati ima ye ka bi gupai nga dungu paranga aboro duho garã yo natona wa ti 18 ka ndu kuti 23 nga aguyo sono  rogo gu riiakporo nga ga aKristano, ono ka i ata ziongo bapatiza ya. Dedede, gi paranga aboro re naandu tipa agu adunguratise nga ga dungurati na kini kuru gene tungusapai yo. I nabi tiyo nga i nga aDezire Yekova. Ono wa vura duhe wo, tipa kura nduapai, i namanga ndundu amanga ka kpara gayo raka fu Yekova na ki zi bapatiza. Ginipai rengbe kadu ni ndu gipai re? Ti kura aregbo, avunguyo nangarasa yo ka i zingo bapatiza mbata ya. Rogo gi kekeapai re, ani nika fura tipa apai biama nga gu naka na agu aKristano nga avunguagude ti undo yo awiriyo i mangi sonakumbatayo ka zio bapatiza.

3. Ginipai avungu Blossom aabakabangiriyo na ni?

³ Si aruaru avungu Blossom, i nipepa yo rogo bambata genewaraga bakibangiriyo si ngia wiriyo aima nyaka tipa ka rugatiri na pa wai nyakipa bapatiza, na wai duhe ni nyanyakipai. Wai du rengbe avunguagude ka ino singia wiriyo ima rẽ ka manga ndikidi kparatise fu Yekova?

4. Wai rengbe gu ga Yesu rugute du rogo Matayo 28:​19, 20 ka undo avunguagude ho i ayugopai ni fu awiriyo?

⁴ Oni gedi Matayo 28:​19, 20. A wa ani abihe rogo gu kekeapai naadu mbata fu gere, Ziazia Kekeapai apenga pa gu garã si aida boro da mbata na ni ni kini ru ka zio bapatiza te. Ono tie, si ni wenepai fu avunguagude i berẽkurii rogo gupai yo nga ka sa boro ni bawiriki. Gu fugo Giriki i asaha rogo Matayo 28:19 nga ka ‘sa aboro ni abawiriki,’ rogoyo nga ka yugopai fuyo na gu sasa nga i da ni abawiriki. Bawiriki nga gu boro nawirika ga Yesu ayugopai na kini rugutini na ni, na nga guni diberã ka ka kutini. Sidu, si naida agu avunguagude dunduko nga aKristano du na gu sasa nga ga yugopai fu awiriyo mbuyo kindi ni fogo agude tipa ka undo yo i zi bapatiza ni ga Kristo abawiriki. Rengo ngaha nga, fogogude arengbanga ka rẽ tipa zio bapatiza te. Ono tie, Ziazia Kekeapai nayugo gupai nga zavura rukutu agude ima rengba ka rugatiyo na agu arengo nga ga Ziazia Kekeapai na ki dihe kugume.

5, 6. (a) Gu gene Ziazia Kekeapai nasakipai ngbaha tipa Timoteo nasarani ani da kuti gini digisopai tipa gako bapatiza? (b) Wai rengbe agu avunguagude du na tatamana ka undo awiriyo wenengai?

⁵ Timoteo angia gu mokedi nasa rengo ni gako mbuko kindi tooni. Gu mokedi nangia Pauro ape gupai nga Timoteo awiriki agu arengo nga ga Ziazia Kekeapai mbuko kindi ni fogo gude. Wa si avura du nga Timoteo asono rogo gu kporo naadu na aboro rogoho na gayo apambori ni bakiakia, nako nangia Yudo gbiati titako aima sonosa nyemu Ziazia Kekeapai rogokoyo. Ni sangbana gipai re, ko aye kadu na nyanyaki idapase. (2 Tim. 1:5; 3:​14, 15) Ho garã Timoteo aambeda ni kuti 20 watadu ho ko asusihe ni tooni, ko angia gu Kristano i aima fu kparakpara amomu funi rogo dungurati.​—⁠Amo. 16:​1-3.

⁶ Rengo ngaha nga, agude ni bakiakia; agude anyakanga dunduko kina sa te, watadu ti bangisa regbo sa rogo raka yo a te. Kura agude kinaho berãyo anyaka mbuyo kindi kina tooni, na i kidu na nyemu ka zio bapatiza. Agu akurayo ho arẽnga tipa ka zio bapatiza te, da kinaho ka i sono ni mbata tooni. Sidu, agu avunguagude du na tatamana asosodanga awiriyo i zi bapatiza te. Kuba gure, i naundo agude dunduko ni basasa i sono rogo toro yo ringbisihe kuti wai du yo. Avunguagude ima rengba ka du na ngbarago ho wiriyo awirikapai ni ti gu berãpai du rogo Asanza 27:⁠11. (Oni gedihe) Ono tie, si aidanga bangiriyo go ti gu gayo sasa nga ga undo awiriyo i da ni agu abawiriki nga aKristano te. Na gupai re berãse yo, si naida avungugude sana tiyo na gu sanahe nga, ‘Ya mo wire ima du na wene inohe tipa ka kpara tiru fu Mbori na ki zi bapatiza?’

7. Ya mo si naida gu boro naida ka zio bapatiza ini Ziazia Kekeapai naabaha dunduko sirisiri? Oni sakingo rogoyo.

⁷ Si rẽarẽ nga wa du avunguagude ni ayugupai kporo, i naida gupai nga awiriyo gbia wene inohe nga gu rengbe yo ka maa mburu gayo kparatise riihe. Ono wa vura duhe wo, si aidanga gupai nga gude ini agu ayugopai dunduko nga ga Ziazia Kekeapai sirisiri mbata u kini ru ka manga kparatise fu Mbori na ki zi bapatiza te. Tingbafuo bapatiza, si naida abawiriki dunduko naasona kumbatayo kindi rogo ndikidi inohe yo. (Oni gedi AKorosaio 1:​9, 10.) Sidu, bakio pai wai si aida boro inihe mbata fu ni zi bapatiza?

8, 9. Gini apai rengbe ani ka wirikaha ti gu pangbanga du tipa Pauro gbiati babanda bambukiso?

⁸ Gu pangbanga du tipa riikporo sa nga gu naadu rogo bambata kama agarã ima rengba ka undo avunguagude areme. (Amo. 16:​25-​33) Ho Pauro aandu gako ue nunguro ni bara rogo gu garã nangia 50, ko andu ku Firipoi yo. Ho ko adu ni yo, i akiti ngbanga ko gbiati Sira ni ziree, na i ki ba yo ku bambukiso yo. Rogo gu yuru re, bazigizo awo ti bambukiso na angbadimoho ki zaki dunduko. Babanda bambukiso ki berẽ gupai nga zizi aboro ima zubo dunduko, sidu, ko kini idi ka imo tiko. APauro na Sira amangi wene dezirepai fu gu babanda bambukiso re gbiati gako aborokporo. Gayo tambuahe tipa agu arengo i aawirikaha tipa Yesu asa yo i mangi gini diandue? I azi bapatiza zanga keesa. Ginipai rengbe ani ka wirikaha ti gi pangbanga re?

⁹ Si nawira gupai nga gu babanda bambukiso re angia kuru banzengere. Ko aainongo pai tipa Ziazia Kekeapai te. Sidu, tipa ka ino gu rengo nga ga Ziazia Kekeapai, si aaida ko wiriki gu tonatona arengo nga ga Ziazia Kekeapai, ki rugutiko na rogo gupai yo nga kadu ni ga Mbori moyambu, na ki diberã ka irisa ga Yesu ayugopai. Vuru umba regbo yo, gu tonatona inohe nga ga gu rengo nga ga Ziazia Kekeapai ko agbiaha gbiati gako tambuahe tipaha asako ko zi bapatiza. Zanga kapa, ko aandu kindi kumbatayo kaa gbia inohe fuo zioko bapatiza. Na gi kpiapai re berãse yo, ginipai rengbe mo ka mangaha ka wiro du na tambuahe tipa gu tonatona ayugopai nga ga Ziazia Kekeapai, kodihe na rogo gupai yo nga ga kparatise fu Mbori gbiati bapatiza, na pa wai nyakipaha? Oni, nga agu aKristano nga avunguagude ima rengba ka ya funi ni ndu fuo agu abaakumba nga ga dungurati yo tipa i bihe singia ni ima rẽ ka zio bapatiza. * A wakina kura abawiriki nga aguyo naima zio bapatiza, ni nikaa ndu kindi kumbatayo kaa kiiso gani inohe tipa ga Yekova ringbisapai rogo gani raka yo dunduko, na zavura nyeanye kindi.​​—⁠Rom. 11:​33, 34.

10, 11. (a) Gini digisopai kura avunguagude nada kutini? (b) Ginihe nzunzu rengbe ka banda gude?

¹⁰ Kura avunguagude dakuti gupai nga si ni wenepai wiriyo wirikipai ni bakerehe mbata na ki gbia wene sunge, u kini ru ka zio bapatiza. Agi avunguagude re ima rengba kadu na wene ndupai berãyo yo ho i aberã ni wa gure, ono ya mo gupai re aundo wiriyo u gbia ndikidi diabese? Gu nyakipaha anyaka gbe nga, ya mo ngbanya dagbaha na Ziazia Kekeapai? Ginipai Fugo Yekova angarasa boro nimangihe?​—⁠Oni gedi Batungusipai 12:⁠1.

¹¹ Si ni nyanyakipa pai ka tingida gupai nga gi zegino re na agu ahe dunduko du rogoho na ngbanya dagbaha na gupai Yekova aidaha na kini berẽhe te. (Yak. 4:​7, 8; 1 Yo. 2:​15-​17; 5:​19) Dawedawe pagume na Yekova nga gu yangara wenehe rengbe ka banda gude be Satana, gako zegino gbiati gaha gbegberẽ berã.  Ka vungugude aamaa pa wirikapai gbiati pa wene sunge mbatayo rogo raka, si ima rengba ka sa gude u berẽ gupai nga agu ahe du rogo zegino nyakipaha kisusi gau pagume na Yekova. Ya mo agu avunguagude nga Kristano du na nyemuse rengbe nzunzu ka ida gupai nga gi zegino re yugu gupai fu wiriyo nga gaha berãpai nika sa ru u du na diabese? Gu rengo duho nga, ani nagbia ndikidi ngbarago gbiati diabese kinaho ani amaa Yekova ni rogo bambata bangiriba rogo gaani raka yo.​—⁠Oni gedi Atambuahe 1:​2, 3.

12. Tipagine kura avunguagude naaida gupai ti ni nga wiriyo gbisigi pa zio bapatiza kumbatayo?

¹² Ho kura nagude ni Kristano aapeka pa gu nduapai ni ri aaidanga ti ni wiiri ni degude zi bapatiza ya, ri aya, “Kina zee nazio re ka pe gupai nga gimi bangua ndupai angia pa gu mbakadapai nga ga kusa boro kusayo rogo dungurati.” Wakina gu wirina re, kura avunguagude naberã gupai nga gupai ngba nga wiriyo gbisigi pa zio bapatiza kumbatayo da kinaho u nika mbu gu sino agude ni nga ga manga mumungo aingahe. (Bam. P. 8:​21; Snz. 22:15) I rengbe kada kuti gu digisopai nga, ‘Ka wire aziongo bapatiza ya, ka i kusinga ru kusayo rogo dungurati te.’ Tipagine du gi berãpai re ti ni ni iraira ha?​—⁠Yak. 1:​22.

13. Ya mo gbisiga pa zio bapatiza kumbatayo nasa boro ka ni karaganga pai tipa tiní fu Yekova ya? Oni sakingo rogoyo.

¹³ Si nirengo nga, agu avunguagude nga aKristano aidanga gupai nga wiriyo zi bapatiza mbata fu u nyaki wenengai ka manga ndikidi kparatise fu Yekova te. Ono tie, si ni irairapai ka dakuti gu digisopai nga ka gude aziongo bapatiza ya, ka u karaganga pai tipa tiru fu Yekova te. Tipagine duhe ti ni wo? Karagapai tipa tise fu Yekova arunga riipa zio bapatiza te. Kuba gure, gude nakaragapai tipa tiru fu Mbori ho u naini gupai ni du ni ruruhe na gu du ni gbegberẽhe bangiri Yekova. (Oni gedi Yakoba 4:​17.) Sidu tie, kuba gupai nga ka ya ka gude zingo bapatiza ya, agu avunguagude du na tatamana namanga bakere asadatise ka maa wene kpiapai. I nasonosa nyemu agu arugute nga ga Yekova kpoto wiriyo yo mburu kindi ni kina fogo ru. (Rk. 6:​40) Gu ngbatunga nyemuse tipa Yekova re du nga gu bawenehe kisusi rengbe ka banda wironi, bambiko si nika fõngbaduruyo u kakuti ga Yekova ruru gene mangaapai.​—⁠Yes. 35:⁠8.

14. Wai rengbe abaakumba ka songoda gu ome avunguagude amangaha ka undo awiriyo i mangi sonakumbatayo ka zio bapatiza?

¹⁴ Nidu agu abaakumba nga ga dunguratiyo ni ababanda avusende rogo toro yo, i ima rengba ka songoda gu ome avunguagude amangaha ni furayo wenengai tipa agu asasa nga ga toro. Wirina sa nga guri namangisunge ni nazakigene tipa agarã naima susa 70 atingidipa gu wenepai gari fugodagbase na Wiriba Charles T. Russell amangihe na ri ho garãri adu ni gbua nga sita. Ri ape gupai nga, “Ko adi aminiti 15 na mi ani fura tipa gimi asasa nga ga toro.” Nirengo, wene afugo gbiati ngarasaro ima rengba kadu na wene maapai kurii boro rogo gani raka yo naabaha. (Snz. 25:11) Abaakumba ima rengba a ka yamba avunguagude gbiati awiriyo tipa i undo na sunge meka aBambu Kindo, na kini fu agu asunge fu agude rẽ na garã yo na rengbe na ome yo.

15. Gini kura agene rengbe aboro rogo dungurati ka ngarasa rukutu agude ngbaha?

¹⁵ Agu aboro du rogo dungurati ima rengba ka undo ni yugoyo gupai fu rukutu agude nga i ima du na nyemuyo tiyo. Gipai re rengbe ka koda ngera yo tipa agu apai nayugo gupai nga agu agude re nasona rogo toro yo. Ya mo gude fu wene karagapai watadu mangi papara gu dunguratise nga ga bebere poso? Ya mo gude mangi rurupai ti gu regbo  u nagbia tiru na asada watadu ya mo u mangisunge na gu momu u nagbiaha ka manga dezirepai sukuru yo? Mo fu ndikidi tambuahe furu ni ipo. Na gu nga ka maa ha ni gamo sasa ka fura na tooni gude mbata fu dunguratise watadu tingbafuo dunguratise, tipa ka yugo gupai nga mo ima du na nyemu ru tiro? Rogo agi agene re, na agu akuraha, ani ima rengba ka sa agude i ini gupai nga i nga papara “bakere rimbasa” watadu dungurati.​​—⁠Tam. 35:⁠18.

16, 17. (a) Wai du du bapatiza na ngbaya dagbaha na ga boro raka kumbatayo? (b) Gini ngbarago agu avunguagude dunduko nga aKristano aida kadu na ni? (Oni bi gu sura duti tonatonaha.)

¹⁶ Sonosa gude ni “ga Gbia rabahe na rugahe” nga momu sa dagba gu bakerepa amomu yo rengbe gu vungugude nga Kristano kadu na ni beni. (Ef. 6:4; Tam. 127:⁠3) Rogo gu ringara aYisaraere naadu mbata, agude aanidu ni kparakpara ra fu Yekova kinaho i anaavunga ra avunga ni, ono anga wodu he tipa agu agude aKristano avunga ra te. Kurigure, i avunganga boro na nyemu Mbori gbiati nyemu rengo te. Kina rogo gu uru i avunga gude, si naida avunguru du na gu sasa nga ga sa ru ni bawiriki, kini undo ru u da ni kparakpara ru fu Yekova na ki zi bapatiza. Gini kurapai rengbe paha ka nyaka berewe kisusi? Ga boro kparatise fu Yekova na gani bapatiza gbiati gani ruru sunge fu Yekova du nika sa gupai nga ni bati ti regbo gu bakere gberãngbi naye kumbatayo.​—⁠Mt. 24:⁠13.

¹⁷ Ho Blossom Brandt adiberã ni nga ri naida ka zio bapatiza, avunguri nga aguyo naagunde ti Mbori aaida ka bi gupai mbata nga ri ima rẽ, ri kini ru ka manga gu diaberã paha naima nyaka kisusi rogo gari raka yo. I asongodi gari diaberã ho i abihe ni nga ri ima rẽ. Rogo gu yuru naadu mbata fu ri zi bapatiza, bari amangi bawenepai. Blossom aya: “Ko aya furani dunduko wẽ ani kuku ngba rukusirani, na fuani, ko ki mangi kparakpee. Ko aya fu Yekova ko na bakere ngbarago tipa gu diaberã tooni wiriko namangihe ka kpara gari raka fu Ko.” Fuo agarã naima susa 60 kusa, Blossom aya: “Mo ima rengba kadu na gu kido nga bangire agonga ti gu yuru re te nyeanye kindi!” Oni avunguagude, oni gbianga gu ngbarago agbia naye ti bi awironi i nikpara gayo raka fu Yekova na kini zi bapatiza.