Ka pe rengo, boro ho ini wai Pauro adu nzunzu te. Agu asura Pauro du rogo gaani awaraga, i nakeka ha akeka, angianga gu ndikidi asura abageteke kuruahe sende yo nainipaha nga ndikidi asura ko du ya.

Wa vura duhe wo, kura ahe kinaho nayugopa wai tama Pauro adu. Ni kpiapai, Zion’s Watch Tower nga ga Marungu 1, 1902, apepa gu sa, ki ya: “Nibipa wai tama Pauro adu: . . . Rogo gu buku du rimoho nga ‘Acts of Paul and Thecla’ . . . nga gu i akehe rogo gu garã nangia 150 Fuo Batikayo Kristo, i sakipai yo tipa pa wai tama Pauro adu, na si nawira gupai gbe nga gu sakapai re du nasakapai wenengai tipa wai ko adu, na si nga gupai dungu aboro naima ida kuti ni. Rogo gu sakaapai re, i fura tipa ko nga ko adu na ‘umba kpotoko, na katakpa riikoyo, na anduko ni nugonugoho, na wene kpotoko ti ni, na gbiagbia puku bangiriko; na wiri gbanga hõko tooni.’ ”

Gu buku sakarogo afugo yo i ayambaha nga The Oxford Dictionary of the Christian Church nga gu i akusihe rogo 1997 fura tipa gu kuru kekeapai re ki ya: “Si ima rengba ka du ni rengo nga gu buku nga ‘Acts of Paul and Thecla’ na kina apangbanga rogoho nga gu naaima manga nirengo.” Gu buku nga The Acts of Paul and Thecla re adu na nyanyakipaha gbe bangiri aboro rogo bambata sa kama agarã, gupai nayugo gipai re nirengo nga kekeapai 80 nga gaha rogo pa-Giriki kinaho awere, na angbatungaha kinaho a rogo gu kura afugo. Sidu, gu kekekeke asura Pauro du rogo gaani awaraga, ani nakeka ha ringbisihe kuti gu kuru kekeapai nga gu nasakapai tipa pa wai gu mokedi re adu.

Ono tie, oni mai gupai ku berãroni yo nga, gu kura apai kinaho tipa Pauro nyakipaha kisusi pa tama ko. Zavura ho Pauro aamanga gako sunge tungusapai ni, gu kura ababisirapa apai akitingbanga ko nga ‘ngbanyako adu rurungbura, na fugoko adu nga ni he te.’ (2 Kor. 10:10) Ono si aidanga bangirani go ti gupai nga ko ada ni Kristano mbiko gu iiriwo gene Yesu afura fuko ngbaha ya. Ani ima rengba a ka berãpa agu apai nga gu Pauro amangihe wa i ‘akpara ko, ko ndu na rimo Yesu ku barangba aGendiria.’ (Amo 9:​3-5, 15; 22:​6-8) Na mo makianga pa wai rengbe ani ka gbia undo rogo agu abuku nga ga Ziazia Kekeapai nga gu ga Yekova toro adu kugii Pauro ko kekehe.

Pauro aadunga na rukö mbiko agu apai ko amangihe mbata fu ko da ni Kristano te; ko aapekanga pa wai a tama ko adu te. (Amo. 26:​4, 5; Frp. 3:​4-6) Ko aya: “Mi nga gu umba ni dagba amokedi yo dunduko, arengba nga na gu rimo nga mokedi ya.” (1 Kor. 15:⁠9) Ko ake kura pai kusa nga: “Pa re umba aumba susi kura ga Mbori aboro dũ, ono Mbori afu gi undahe fere re, mi tungusi pa gu gasigasi ũkumuko nga ga Kristo fu aGendiria.” (Ef. 3:⁠8) Gu pangbanga re nirengo na nyanyakipaha kisusi ai gupai du tipa pa wai tama Pauro adu.