1-2. (a) Waigu Yekova adigi nifura na aboro? (b) Ginipai ani nika wisigoho rogo gi kekeapai re?

YEKOVA ima kpinyemu kaa fura na ani. Bakuru kusayo, ko anaamangasunge na anebi, amaraika, gbiati Wiriko nga, Kristo Yesu, tipa ka sarani ani ini gako aberãpai. (Amosa 3:7; Gara. 3:19; Yugo. 1:1) Areme, ko nafura na ani rogo Fugoko yo nga Ziazia Kekeapai. Ko afuhe furani tipa gupai nga ani rengbe ka ino gako berãpai na ki rugutirani na gako agene.

² Ho Yesu adu ni auru kpotosende, Yekova afura ngbangbaturũ yo aregbo biata. Ani wisigingo agu apai Yekova agumbaha, agu apai rengbe ani ka wirikaha ti gako afugo, gbiati wai rengbe ani ka gbia undo ti agu apai ko agumbaha.

3. A wa ani agedaha rogo Marako 1:9-11, gini afugo Yekova agumbaha ho Yesu azi bapatiza ni, na gini nyanyakipa arengo agu afugo re ayuguhe?

³ Marako 1:9-11 nafura tipa gu bambata regbo Yekova afura ngbangbaturũ yo. (Oni gedihe.) Ko aya: “Mo nga Wire, nyemuro namanga re, ngba mo ti re gbe.” Nairiwo wai gupai azi ngbaduko Yesu yo nga ka gia Fugo Bako ko nipe gupai nga ko ima kpinyemu ko na ki ima du na kido kutiko! Agu afugo Yekova re ayugupa nyanyakipa arengo biata tipa Yesu. Bambataha nga, Yesu nga Wiriko. Uehe nga, Yekova ima kpinyemu wiriko. Na biataha nga, Wiri Yekova ima ngba tiko. Ani wisigingo ho sirisiri.

4. Gini vovo pagume na Mbori Yesu arimi ku rogoho ti gu regbo ko azi bapatiza?

⁴ “Mo nga Wire.” Ho Yekova agumba agi afugo re ni, ko ayugu gupai nga Wiriko ko naima kpinyemuko nga Yesu arimi ku rogo vovo pagume na Ko. Ho Yesu adu ni ngbangbaturũ yo, ko angia wiri Mbori ni toro. Ono tie, ti regbo gako bapatiza, i  ambedi ko na ziazia toro. Ti gu regbo re, Mbori ayugu gupai nga Yesu ima da ni gu Wiriko du ni mbedimbedi ko ima ye awere kidu na gu maabangirise nga ga ga ku ngbangbaturũ yo ka da ni ga Mbori siasia Bakindo gbiati Gbiamotumo. (Rk. 1:31-33; Eb. 1:8, 9; 2:17) Sidu, ti gu regbo Yesu azi bapatiza, Bako aima du na wene ndupai beko ka ya: “Mo nga Wire.”—Rk. 3:22.

5. Waigu rengbe ani ka wirika ga Yekova kpiapai nga ga yugo nyemuse gbiati ngarasaro?

⁵ “Nyemuro namanga re.” Ga Yekova kpiapai nga ga yugo nyemuse gbiati gupai nga boro ima ngbatiko natingida rani na gupai nga si naida ani naagbata amomu tipa kaa ngarasa kura aboro. (Yo. 5:20) Ani nazugo azugo ho gu boro ani aberãpa ni aberã ayugo nyemuse ni furani na kini tambua rani tipa gu weneapai ani amangaha. Wakina gure a, agu awirinarani du rogo dungurati gbiati gaani aborokporo naida gaani nyemuse aida gbiati ngarasaro. Ho ani atambua kura aboro ni, ani nanyakasa gayo idapase na ki undoyo i naairiso Yekova ni ruruyo. Avunguagude nga agu aboro nzunzu gbe si aida i naangarasa awiriyo. Ho avunguagude atambua awiriyo ni na kini yugu nyemuse fuyo, i naundo awiriyo i zugo.

6. Tipagine rengbe ani kadu na kido ti ni kuti Yesu Kristo?

⁶ “Ngba mo ti re gbe.” Ho Yekova aya ni Yesu ima ngba tiko gbe, gure nga ko aape gupai nga ko ima ida na Yesu, na gere nayugo gupai nga Yekova aima du na gu kido nga Yesu nika manga gupai amanga dunduko Ko akpinyemuhe. Wa duhe nga Yekova ima du na gu ngbatunga kido re kuti Wiriko, si naida ani duadu a na gu kido nga Yesu nika manga agu apai amanga dunduko Yekova nakidopaha. (2 Kor. 1:20) Ho ani aberã ni kurii ga Yesu kpiapai, si nasarani ani nyakasi gu diaberã ani  namangihe ka wirikapai beko na kini pekefuo gako kpiapai. A kina wai Yekova adu na kido kuti Yesu, kinawo a du ko na kido kuti gako amoyambu nga i nikaa ndu kindi kumbatayo kaa wirikapai be Wiriko wa du yo ni badona.—1 Pet. 2:21.

7. Ringbisihe kuti Matayo 17:1-5, ti gini regbo Yekova afura ngbangbaturũ yo, na ginipai ko agumbaha?

⁷ Oni gedi Matayo 17:1-5. Gu ue regbo Yekova afura ngbangbaturũ yo angia ti gu regbo ‘kpoto’ Yesu asatihe. Yesu ayambu Petero, Yakoba, gbiati Yoane tipa i gasi ko kurii bagangara yo. Ho i adu ni yo, i abi iiriwo yuguyugupai. Kpakpu Yesu atona kaa kiko kurẽkurẽ gbiati gako aroko. Aboro ue nga aguyo naarukuba aMoize na Eriya, ki tona fura fu Yesu tipa gu kpio ko aandu ka kpihe gbiati gako zingabekpio. Wa si avura du nga agu amokedi biata naandu na Yesu re ‘aayukura be rame,’ i aima bi gi iiriwo yuguyugupai re ho i azingi ni rame yo wenengai. (Rk. 9:29-32) Fuo gure, rungbutorungbuto mai na imarago rogoho aye ki ukadi yo, na i ki gi fugo rogo gu rungbutorungbuto mai re nga gu nangia fugo Mbori! A kina wai si adu ti gu regbo Yesu azi bapatiza, Yekova ayugu gupai nga ko aima ida na wiriko na ki yugu gako nyemuse tipa ko, ni ya ko wẽ: “Wire du re, nyemuko ti re gbe.” Ono bara gere, Yekova agbia gupai kutini nga: “Oni gi pako.”

8. Gini maapai kurii gu yuguyugupai naadu rii bagangara yo adu na ni kurii Yesu gbiati gako abawiriki?

⁸ Gu yuguyugupai re ayugupa ga Yesu taarimo gbiati pagbia kumbatayo ni Bakindo ga Mbori Kindo. Zanga kapa, si aima ngarasa Kristo na ki nyakasiko tipa agu arungo gbiati iigirã kpio ko aandu ka hihe. Gi yuguyugupai re aima nyakasa ga abawiriki idapase a na ki nyakasi yo tipa agu aˈasada nga ga padu ni ruruse gbiati agu agarã nga ga nyanyaki sunge naadu kumbatayo fuyo. Agarã wa 30 kusa, gu mokedi nangia Petero agumbapa gu yuguyugupai naadu ti gu regbo kpoto Yesu asatihe, na gere ayugu gupai nga gu yuguyugupai re adu kindi berãko yo ziazia.—2 Pet. 1:16-18.

9. Gini wene arugute Yesu afuhe fu gako abawiriki?

⁹ “Oni gí pa ko.” Yekova aima yugo gupai ziazia nga ko naida gupai nga ani naadega turani kuti afugo Wiriko na kini gisangbako. Gini apai Yesu apekehe ho ko adu ni auru kpotosende? Ko aima gumba badungu apai nga gu naadu na nyanyakipaha gbe tipa ka giaha! Ni kpiapai, ko ayugupai fu apefuoko ni nyemuse nibipa wai ka tungusa wene pangbanga, na ko anaatingida yo dedede na gupai nga si naida i naangera angera kindi. (Mt. 24:42; 28:19, 20) Ko angarasiyo a nga i mangi asadatise nyanyaki, na ki ngarasiyo nga ka omeyo batingo ya. (Rk. 13:24) Yesu anyakasi gupai nga si naida apefuoko naakpinyemu tiyo, kidu na kodatise, na kini irisi gako arugute. (Yo. 15:10, 12, 13) Nairiwo gu wene arugute Yesu afuhe fu gako abawiriki re! Agu arugute re kindi areme na nyanyakipaha kina wai si adu ti gu regbo Yesu afuhe.

10-11. Waigu rengbe ani ka yugo gupai nga ani nadegaturani fu Yesu?

¹⁰ Yesu aya: “Agu yo nga ga rengo yo i nagia fugore.” (Yo. 18:37) Ani nayugo gupai nga ani nadega turani kuti fugoko ho ani ‘ahi pai ni fu akuarani, na kini vu akuarani.’ (Koro. 3:13; Rk. 17:3, 4) Kurigure, ani nayugo gupai nga ani nadega turani kuti fugoko ni tungusa ani wene pangbanga zaaza “ho du ragoho ni na ho adu nga ragoho ni ya.”—2 Tim. 4:2.

¹¹ Yesu aya: “Gimi akandoro nagia fugore.” (Yo. 10:27) Apefuo Kristo ayugongo gupai nga i nadegatuyo fu Yesu ni giayo kina afugoko sa te, ono ni maa yo gupai a i agiaha ku  rogo mangapai yo. I ambunga “berã pa gi unga re” si gbeberã yo kusayo te. (Rk. 21:34) Kuba gure, i namaa pa irisa ga Yesu arugute ni bambatapai rogo gayo raka yo, zavura ho i agbiatiyo ni na akpakarapai. Badungu awirinarani duho nahi kere aˈasada, kodihe na azubohe be asogorani, kere rungo, gbiati agu agberãngo naye be gu mangaapai nga ga ome zegino. Ono i nanye ni ruruyo fu Yekova rogo agi apai re yo dũ, i ki vura kaa gbiatiyo na kina gini akpakarapai vurũ. Yesu nafu gu kidohe fuyo nga: “Gu ni du gi rugute be ni ni ki ka kuti ni, kina ni nakpi nyemu re; gu ni du nyemu re ti ni Buba akpi nyemu ni akpi.”—Yo. 14:21.

12. Gini kura gene rengbe ani ka yugo gupai ngbaha nga ani nadegaturani fu Yesu?

¹² Gu kura gene rengbe ani ka yugo gupai ngbaha nga ani nadegaturani fu Yesu nga: ni manga ani pai sa na agu aboro ko namoi yo i naangbembatayo furani. (Eb. 13:7, 17) Ga Mbori riigbu ima manga dungu aˈariapai vuru agu agarã yo susi barambeda kusayo, kodihe na pa mangasunge na vovo aũsunge nga ga tungusapai gbiati vovo agene tungusapai, gu gene ani amanga gu dunguratise nga ga bebere poso ngbaha, gbiati gu gene ani adua gaani aBambu Kindo ngbaha, kini mbakadihe na kini bandaha. Nairiwo wai du ani na tambuahe tipa gu wene arugapai i aberã aberã wenengai kuriihe i kini ru ka kusaha re! Ani ima rengba kadu na gu kido nga Yekova nika fu maku afu kurii gu ome ani amangaha kaa pekafuo agu arugapai riigbu akusaha ti regboho.

13. Gini aundo duti degatue fu Yesu?

¹³ Ani nagbia undo ti dega ani turani kuti agu apai dunduko Yesu ayuguhe. Yesu akido gako abawiriki nga gako ayugopai nikaa fu wasa afu fuyo. Ko aya, ‘Oni abi ongoda tipa mbisimoroni. Bambiko kii nga gi gonga te, na gi tindiro ni aakpura ha.’ (Mt. 11:28-30) Fugo Mbori, nga gu nakoda agu aKitabu Wene Pangbanga biama du na agu apangbanga rogoho du tipa ga Yesu raka gbiati gako sunge tungusapai, nafu wasa furani na kini sarani ni aboro tatamana. (Tam. 19:7; 23:3) Yesu aya: “Aboro [ngbarago] nga agu yo ti gure, nagia ga Mbori pai, ki nika kuti ni!”—Rk. 11:28.

14-15. (a) Gini biata regbo i nape paha rogo Yoane 12:27, 28, nga gu Yekova afura ti ni ngbangbaturũ yo? (b) Tipagine afugo Yekova arengbe ka fu wasa ti ni fu Yesu na ki nyakasiko?

¹⁴ Oni gedi Yoane 12:27, 28. Gu Kitabu Wene Pangbanga nga ga Yoane na pa gu biata  regbo rogoho Yekova afura ngbangbaturũ yo. Bete auru mbata fu kpi Yesu, ko adu Yerusarema yo tipa ka manga yangara Pumbo Susiri. Ko aya, “Mbisimore narungo arungo.” Fuo gure, ko ki mangi kparakpee ki ya: “Buba, mo táasi rimoro.” Bako afura ngbangbaturũ yo ki ya: “Mi taasi he, mi atáasa ha ataasa berewe a.”

¹⁵ Yesu aarungo arungo bambiko gu bakerepai naadu riko nga ga nye ni ruruko fu Yekova. Yesu aima ino gupai nga ko aandu ka gbiatiko na kere rungosiro gbiati kpio. (Mt. 26:38) Gupai paha anyaki kisusi gbe fu Yesu angia ka taasa rimo Bako. I akitingbanga Yesu ki ya ko angia boro gberãngbayo, na ko aabaka kina bangiriko nga kpioko ima rengba ka gbarasarimo Mbori. Nirengo, afugo Yekova aima fu bakere kido fu Yesu! Ko aima du na kido nga rimo Yekova nika duadu ni taasi taasihe. Afugo Yekova aima fu wasa fu Yesu na ki nyakasi ko tipa agu apai naaye kumbatayo. Wa vura duhe nga si nawira gupai nirengo nga kina Yesu sa nangia gu boro nagi rogo gupai yo Bako agumbaha ti gu regbo re, Yekova aima sa gupai nga i ke Afugoko tipa rani dunduko.—Yo. 12:29, 30.

16. Tipagine rengbe ani kaa baka bangirani ti ni ti kura aregbo tipa gu gbarasa rimo naye kuti rimo Mbori?

¹⁶ Wakina Yesu, ani ima rengba kaa bakabangirani tipa gu gbarasarimo naye kuti rimo Yekova. Isoke si ima rengba kadu nga aboro namanga rani gbegberẽ kina wai i aamanga Yesu.  Watadu si ima rengba kadu nga rago nagberã tirani mbikopa agu aziree asogorani arẽhe ti rimorani. Ani ima rengba kaa berãpa gu gbarasarimo agu aziree re aye na ni kuti rimo Yekova gbiati gako riigbu. Ti agu aregbo re, afugo Yekova rengbe ka fu bakere wasa furani. Si aidanga ani naabaka bangirani ni kerehe te. Ani ima rengba kadu na gu kido nga “gu zereda nga ga Mbori nagasi rugatinapai dunduko, si abánda [kpotorani] yo na [gaani] berã rogo Kristo Yesu yo.” (Frp. 4:6, 7) Yekova azanganga taasa rimoko te. Vurube Kindo, ko nika dia gu gbegberẽ apai dunduko kusayo Satana gbiati gako zegino naye na ni kuti Gako ruru amoyambu.—Tam. 94:22, 23; Yes. 65:17.

17. Ringbisihe kuti Yesaya 30:21, wai du Yekova afura furani areme?

¹⁷ Yekova nafura kindi furani areme. (Oni gedi Yesaya 30:21.) Rengo ngaha nga, ani agianga fugo Mbori ko nifura furani ngbangbaturũ yo te. Ono tie, ko ima fu keke Fugoko furani nga Ziazia Kekeapai, nga gu ko afu arugute furani rogoho. Kurigure, ga Yekova toro nasa ‘ruru buruku’ tipa i naandu kindi kumbatayo kaa fu riahe nga ga toro fu Gako amoyambu. (Rk. 12:42) Nairiwo gu bakere riahe nga ga toro ani agbiaha rogo awaraga na rogo Internet gbiati avidio na dedede fugo awaraga!

18. Wai du afugo Yekova asonosa gamo idapase na kini fu wingbaduse foro?

¹⁸ Ani banda agu afugo ku berãrani yo Yekova agumbaha ho Wiriko adu ni auru kpotosende! Afugo Mbori nga gu du ni kekehe rogo Ziazia Kekeapai yo, funga gu kido afu furani nga apai dunduko kina ku be Yekova, na ko nika dia ai gu gbegberẽpai kusayo Satana na gako gbegberẽ zegino naye na ni kuti rani. Na ani dinga berã adia kaa degaturani kuti fugo Yekova wenengai. Ka ani mangihe wo, ani nika duadu na rengba ka hi agu akpakarapai dunduko ani agbiatirani na ni awere, gbiati agu du kindi kumbatayo. Ziazia Kekeapai natingida rani na gupai nga: “Si rengbe oni du na hipai, ya, fuo manga oni sangba Mbori, oni ki di gu mosoro i akido roni tipa ha.”—Eb. 10:36.