ANI DUNDUKO naida gupai nga kura aboro berẽ gupai nga ani nga wene aboro. Ono tie, si ima du ni mbumbuhe ka yugo weneringise watadu wenesino rogo gi zegino re. Ndupai sa nga, badungu aboro “akpi nga nyemu wene pai” te. (2 Tim. 3:3) I amanganga pai kuti ga Yekova arugute te. Gupai ko aya si nga wenepai, i naya si nga “gbigbitapai,” na gupai ko aya si nga gbigbitapai, i naya si nga “wenepai.” (Yes. 5:20) Berewe a, si ni mbumbuhe ka yugo weneringise watadu wenesino mbikopa wai i asonosi rani gbiati gaani zangarengba. Sidu, ani ima rengba kadu wa Anne, * nga guri naima iriso Yekova awere tipa dungu agarã, ri aya, “Si ima du ni mbumbuhe fere gbe mi idi kuti gupai nga mi rengbe kadu ni wene boro.”

Si nipa ngbarago nga, ani dunduko rengbe ka sonosa weneringise! Si naye be ga Mbori ziazia toro, na gako toro ima du na ome ti ni kisusi ai guhe rengbe ka saha furani ni mbumbuhe ani du ni wene aboro. Ani sakingo pai tipa guhe nga weneringise na ki bi wai rengbe ani ka yugoho bakere gbe.

Weneringise watadu wenesino nakoda zanga du na gbegberẽpai. Gu boro du na weneringise watadu wenesino tini, ni niruru ni na ni namanga gupai du ni ruruhe ti aregbo dũ. Weneringise ni yuguyuguhe ho kura aboro agbia undo ni ti ni. Si nga gu wenesino boro ayugoho ni undo ni aboro rogo mangimangipai yo.

Si nawira gupai nga mo aima bi gupai nga kura aboro kinaho du na nyemu kaa manga weneapai fu gayo aborokporo gbiati abakureayo, ono ya mo gure nga gu yangara gene si aida boro naayugo wenesino ngbaha? Rengo ngaha nga, boro ho dagbarani yo rengbe kadu nzunzu ni wene boro ti aregbo dunduko te, bambiko Ziazia Kekeapai nape gupai nga ‘a nga ruru boro auru kpotosende no namanga wenepai ti aregbo dũ, zanga manga ingaapai te.’ (Batu. 7:20) Gu mokedi nangia Pauro ape gupai ni rengo nga: “Mi ini ya rogo re yo nga borose ka wene he nye nga yo te.” (Rom. 7:18) Sidu, si tie ziazia nga ka ani aida ka sonosa gu sino nga ga weneringise, si naida ani wirikipai be Baengehe.

Yekova Mbori nga gu boro ini gupai duni wenehe. Ani nageda gupai tipa ko nga: “Mo du ni wene ro, mo namanga wenepai; mo rába re na gamo rugaapai.” (Tam. 119:68) Ani wisigingo pai tipa agu apai ue i napehe tipa ga Yekova weneringise rogo gu veresi re.

Yekova du ni wene ko. Yekova ni wene ko, na ka ko zanganga du ni wene ko te. Oni bingo gupai namangi ho Yekova ape gupai ni fu Moize nga: “Mi amánga pai gi weneringise súsi barangba ro dunduko.” Ho ga Yekova taarimo kodihe na gako weneringise aasusa ni barangba Moize, Moize agi agu afugo nga: ‘Yekova, Yekova, nga Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo, naka kuti inapai tipa aboro ni dungu akutu yo, navu aboro ti irairapai na ti samungu na ti ingapai, nga gu ko ka henga sara ngbanga fu aboro ingapai ya.’ (Gate 33:19; 34:6, 7) Gipai re nayugo gupai ziazia nga Yekova ni wene ko rogo apai yo dunduko. Wa si avura du vurũ nga Yesu angia bawene kpiapai kisusi nga ga du boro ni wene ni auru kpotosende, ko aya: “A nga boro sa du ni wene ni te, kina Mbori sa.”—Rk. 18:19.

Yekova amanga wenepai. Weneringise ni yuguyuguhe rogo agu apai yo dunduko Mbori amangaha. “Yekova du ni wene ko fu aboro dũ, gako wene nunga aboro du ku ri agu ahe dunduko ko amangi he.” (Tam.  145:9) Mbiko gupai nga Yekova ni wene ko na ko akparanga aboro te, ko nafu unga fu aboro dunduko, gbiati agu ahe i aidaha tipa kaa raka. (Amo. 14:17) Gako weneringise watadu wenesino ima du ni yuguyuguhe a ho ko ambupai ni furani. Bake papara Atambuahe aya: “Ako Gbia, bambiko mo du ni wene ro, ki du zaza tipa vu aboro.” (Tam. 86:5) Ani ima rengba kadu na gu kido nga ‘anga wene he sa ka Yekova ka na ni be agu yo nata nzunzu te.’—Tam. 84:11.

I akusi rani rogo kpia Mbori yo, sidu, ani ima rengba kadu ni wene aboro na ka manga weneapai. (Bam. P. 1:27) Ono wa vura duhe wo, Fugo Mbori nangarasa gako amoyambu nga i “wíriki pa manga wenepai.” (Yes. 1:17) Ono wai du rengbe ani ka wirika pa manga wenepai? Oni bingo agene biata nga gu rengbe ani ka manga gipai re ngbaha.

Bambatapai nga, si naida ani mangi kparakpee tipa ziazia toro, nga gu rengbe ka undo aKristano i sonosi ndikidi weneringise watadu wenesino. (Gara. 5:22) Nirengo, ga Mbori ziazia toro rengbe ka undo rani ani kpinyemu gupai du ni wenehe na ki sogo gupai du ni gbegberẽhe. (Rom. 12:9) Ziazia Kekeapai nayugo gupai nga Yekova ima rengba ka nyakasa rani “rogo wene mangaapai na wene apai dunduko.”—2 Tesa. 2:16, 17.

Uepai nga, si naida ani naageda Fugo Mbori nga gu gako toro adu kugiipa kehe. Wa ani nikaa mangaha wo, Yekova nika ruga rani rogo “wene agene dunduko” na ki sarani ani du na ‘aũ manga wene apai dunduko be rani.’ (Snz. 2:9; 2 Tim. 3:17) Ngbaduraniyo wakina ba igo aũkumuko. Ho ani ageda Ziazia Kekeapai ni na kini berẽkurii gupai ani agedaha, ani namaa wene ahe ku ngbaduraniyo, nga gu du wakina hiiso gaani ba aũkumuko na nyanyakipa ahe nga gu nika undo rani kusa.—Rk. 6:45; Ef. 5:9.

Biatapai nga, si naida ani mangi bakere asadatise ka ‘wirika gupai ngba angba.’ (3 Yo. 11) Ani nabi akpiapai rogo Ziazia Kekeapai yo nga gu si aida ani wirikihe. Rengo ngaha nga, agu akpiapai nga ga Yekova na Yesu nga bawene akpiapai kisusi si aida ani wirikihe. Ono ani ima rengba a ka wirika akpiapai nga ga kura aboro nga aguyo i aima inoyo ti gayo wenesino. Aboro ue rengbe ka ye ku berãse yo nga Tabita gbiati Barunaba. (Amo. 9:36; 11:22-24) Mo ima rengba ka gbia undo ti gayo bawene kpiapai ka mo aawisigo gupai Ziazia Kekeapai apehe tipa yo. Ti regbo gamo wisigopai, mo bi gupai i amangihe tipa ka undo kura aboro. Mo berẽpa gupai rengbe mo ka mangaha tipa ka undo kura aboro rogo gamo riikporo watadu rogo dungurati. Berewe a, mo bi gu weneapai namangi fu aTabita na Barunaba mbiko gupai nga i anaamanga weneapai fu aboro. Mo ima rengba ka gbia undo wakina gure a.

Ani ima rengba a ka berãpa agu aboro namanga weneapai areme. Ni kpiapai, oni berẽnga pa abaakumba rogo dungurati nga aguyo namanga nyanyaki sunge, ki ‘nikpi nyemu agu apai ngba angba.’ Na  berewe a, oni berẽnga pa gu ruru awirina nga adee nga aguyo nga “ayugu gu pai ngba angba” rogo fugoyo na rogo mangapai yo. (Tito 1:8; 2:3) Gu kura wirina du rimori nga Roslyn aya: “Nakureami ninaamanga kparakpara asadatise tipa ka undo kura aboro rogo dungurati na ka ngarasa yo. ri naaberã tipa agu apai du yo rogoho na kini fu rukutu agamahe fuyo dedede watadu kini undo yo rogo kura agene yo rogo mangimangipai yo. Mi nabi ri nga ri nga wene boro nzunzu.”

Yekova nangarasa gako aboro nga i “gbáta wenepai.” (Amosa 5:14) Ka ani aamangaha wo, ani nika ye ka kpinyemu gako arugute na si nika undo rani ani du na bakere nyemu ka manga gupai du ni wenehe.

Tipa kadu ni wene aboro, anga gupai si aidaha nga ka manga bakereapai fu aboro watadu ka fu kikii geno ahe fuyo te. Ni kpiapai, bakeke asura naakendeganga sura ni maa ni bangisa kiki rangi watadu kikindigi arangi ue ti ni te. Kuba gure, ni naakendegaha ni maa ni dungu rukutu arangi ti ni. Wakina gure a, ka ani aamanga dungu rukutu apai tipa ka undo aboro, si nika yugo gupai nga ani nga wene aboro.

Ni kpiapai Ziazia Kekeapai nangarasa rani nga ani du ni ‘mbakadimbakadi’ rani watadu ‘regerege’ ka manga gupai du ni wenehe. (2 Tim. 2:21; Tito 3:1) Ka ani aamaa berãrani tipa gupai aboro andu rogoho, ani ima rengba ka bi agene nga gu rengbe ani ka fu ngbarago fu akuarani ngbaha ‘sa wenepai, na sa pa nyakasa he.’ (Rom. 15:2) Gupai re ima rengba ka koda fu guhe fuyo du berani. (Snz. 3:27) Ani ima rengba ka yamba boro tipa riahe watadu tipa sungo nga ga ngarasaro. Ka ani ini gupai nga boro nawoka, ani ima rengba ka keda waraga funi, ka ndu ka bi ni, watadu ka yamba ni rogo terefuni. Nirengo, ani ima rengba ka gbia badungu amomu tipa ka gumba “ngbatunga gu pai ngba angba sa nyakasa ho zingoho nidu ni, si fu undahe fu agu yo nagia ha.”—Ef. 4:29.

Si naida ani gbata pa manga weneapai fu aboro dunduko wakina Yekova. Sidu, si naida ani naamangapai na aboro zanga kparakaro. Gene sa dagba gu bawene agene yo rengbe ani ka mangapai na aboro ngbaha zanga kparakaro nga ni tungusa ani gu wene pangbanga nga ga Kindo fu aboro dunduko. A wa Yesu arugu rani, si naida ani gbata pa manga weneapai zavura fu agu aboro duhe wa ka i ya i nasoga rani asoga. (Rk. 6:27) Gbegberẽpai ngaha ka yugo wenesino na ka manga gupai du ni wenehe fu aboro te, bambiko “rugute ho tipa gere wa sa te.” (Gara. 5:22, 23) Ho ani amanga weneapai ni zavura ho aboro asoga rani ni watadu ho ani agbiatirani ni na aˈasada, ani ima rengba ka gbe kura aboro ku rogo rengo yo na ki fu taarimo fu Mbori.—1 Pet. 3:16, 17.

“Wene boro [agbia mosoro] be kina agu apai nikaye vuru beni.” (Snz. 14:14) Bete agu amosoro re nga gine? Ho ani amanga weneapai ni fu aboro, si nawira gupai gbe nga kinawo a i nika mangaha furani. (Snz. 14:22) Zavura ka aboro amanganga furani wenengai ya, si naida ani naandu kindi kumbatayo kaa manga weneapai fuyo. Ni sangbana gipai re, i ima rengba ka aria gayo bipai, na ki tona manga furani wenengai.—Rom. 12:20.

Badungu aboro ima bi gupai nga i ima gbia undo ti manga weneapai na ti ne gbegberẽ apai. Oni bingo gupai naadu tipa Nancy. Ri aya, “Ho mi anaasona ni, mi anidu nzengerenzengere, kini raki gbegberẽ raka, na kidu ni gu boro adunga na irisa ti ni ya. Ono tie, ho mi awirikipai ni tipa gupai Yekova aya si nga wenepai na ki tona giasangbako, mi atona kadu na bakere ngbarago. Mi awere ni iriiri re.”

Gu bakerepa ndupai kisusi si aida ani sonosi weneringise ti ni nga manga ani he wo nafu ngbarago fu Yekova. Zavura ka badungu aboro abingo gupai ani amangaha ya, Yekova nabihe abi. Ko ima inopa gaani wene mangaapai gbiati gaani wene aberãpai dunduko. (Ef. 6:7, 8) Waigu ko afu mosoro furani? “Wene boro abi wenepai be Yekova.” (Snz. 12:2) Sidu, ani naandu kindi kumbatayo kaa sonosa weneringise. Yekova kidopa “taarimo na irisa na zereda fu agu yo dũ namanga wenengaĩ.”—Rom. 2:10.