Kura aKristano namangasunge na agu ambakadapai du awere nga ga erekturoni tipa kaa fura na gayo aborokporo gbiati akurayo aKristano. Ono gu Kristano naima nyaka rogo toro yo nabanda gu rugute ku berãni yo nga: “Ngangarã boro nabi kere pai ki gbu; ono zangainahe nandu andu kindi, ki bi mbusa tipa ha.”—Snz. 27:12.

Ani ima ino gupai nga Yekova naida ka banda rani. Ono tie, ani akodanga tirani na agu aboro nakusa kparakaro gbiati aguyo i naima kusayo kusa yo rogo dungurati watadu gu boro nasonosa iraira yugopai te. (Rom. 16:17; 1 Kor. 5:11; 2 Yo. 10, 11) Gu kura aboro kinaho rengbe kaa kodatiyo akoda na dungurati, ono ka i amanganga pai kuti gu rugute du rogo Ziazia Kekeapai yo ya. (2 Tim. 2:20, 21) Si naida ani moi agi apai re ku berãraniyo ho ani asia aboro ni i du ni abakurearani. Ono si ima rengba kadu ni mbumbuhe furani tipa ani sia gaani abakure na tatamana ka ani afura na yo rogo agu ambakadapai nga ga erekturoni aboro akeka apai dagbayo rogoho.

Si ni nyanyakipa pai gbe tipa ani du na rubangirise ho ani asia abakure ni, gu susi gbe nga ho du aboro ni ni dunguyo rogo agu abadona aboro akusaha rogo agu ambakadapai nga ga erekturoni aboro akeka apai dagbayo rogoho. Gu kura aKristano ima rimo gu kura abadona du na dungu aboro rogoho na ki gbia gbegberẽ sangbanaha. Waigu rengbe wirina kadu na rubangirise ho duhe ni nga badona na dungu akama watadu akutu aboro rogoho? Boro arengbanga ka ino ada du nzunzu nga agu aboro dunduko du rogo gu badona re te, na ka ino wai du yo rogo toro yo a te. Atambuahe 26:4 naya: “Mi asunga nga na aboro sawia te, mi arima nga fuo airabiriki a te.” Gere nayugo gupai nga, si ni patatamana tipa ani naakeka apai sa fu kina agu aboro ani naima inoyo.

Zavura rogo gu mbakadapai nga ga erekturoni aboro akeka apai dagbayo rogoho nga gu angenga aboro rogoho yo, si naida Kristano wisigi gu bakio regbo ni adiaha kuti kekapai rogoho na si naida ni wisigi agu apai agu aboro du rogoho afura tipaha. Anga si nga si naida ani naakaragapai kuti ai kekeapai ka si vura du nga si nafura tipa kini gini ngbatungapai watadu si nadia bakio regbo wai vurũ te. Pauro arugu Timoteo tipa agu aboro du ‘ni aboro menemene na ni adingbitipai.’ (1 Tim. 5:13) Areme, ani ima rengba ka mangapai wakina gure rogo agu ambakadapai nga ga erekturoni.

Gu Kristano naima nyaka agumbanga watadu ka degatuni kuti gu bisirahe watadu gu gbugbupai i agumbaha tipa akurani aidipase te. (Tam. 15:3; Snz. 20:19) Ni adeganga tuni kuti agu apangbanga aboro aba tikpo ti ni watadu adunga arengo ho dunduko tipaha ya te. (Ef. 4:25) Ani nagbia dungu apai nga ga toro gbiati gu vovo apai namanga rogo gaani bangiriba nga ga Internet nga jw.org na rogo agu ambakadapai nga ga JW Broadcasting^® naye rogo adiwi dunduko.

Gu kura aDezire Yekova namangasunge na agi ambakadapai nga ga erekturoni re tipa kaa ngbeahe, kaa yugo pa agu ahe i abagaha watadu kaa fu sunge marã fu aboro. Gere nga agu apai aboro amangaha tipa marã, gipai re abingo pa gaani iriso fu Yekova te. Agu awirina nabanda tiyo ti du ni “akanga fu nyemu marã” amanganga sunge na awirina yo tipa ka manga marã riyo te.—Eb. 13:5.

Na ginipai tigaha du tipa mangasunge na agu ambakadapai nga ga erekturoni tipa ka dungura marã fu gu idipase du rogo zingo watadu gberãngo nati kuri ni? Ani ima kpinyemu awirinarani na ani nidu dedede na nyemu ka undo agu aboro du rogo zingo na ka ngarasa yo. (Yak. 2:15, 16) Ono ka ani asadi ka manga gipai re ni manga ani sunge na agu ambakadapai nga ga erekturoni du na gu badona du na dungu aboro rogoho, si ima rengba ka tagbagatihe na gu wene mbakadapai gu be-basunge du rogo gu dagbarago re amangaha watadu gu abaakumba nga ga dungurati yo amangaha. (1 Tim. 5:3, 4, 9, 10, 16) Na boro ho si aida ni sa kura aboro i naaberã gupai tipa ni nga i sia ni ni du na gu kparakpara sunge nga ga ngerafuo awirinarani te.

Ani na nyemu ka manga gupai nika fu taarimo fu Mbori. (1 Kor. 10:31) Sidu, ho ani amanga diaberã ni singia si naida ani mangisunge na agu ambakadapai nga ga erekturoni watadu agu ahe aboro birĩ-ino-mangaahe akusaha, si naida ani berẽpa gu kere asangbanapai rengbehe kadu na ni na ani ki mangipai na tatamana.