1. Ringbisihe kuti Matayo 24:9, tipagine si aidanga si iriwo ti ni tirani ho zegino asoga rani ni ya?

YEKOVA akusi rani tipa ani kpinyemu aboro na i kini kpinyemu rani a. Sidu, ho boro asoga rani ni, rago nagberã tirani nikerehe na isoke ani kidu na gunde. Ni kpiapai, wirina du rimori nga Georgina naraka Putu yo aya: “Ho garãre adu ni nga 14, nina asogo re nikerehe tipa iriso Yekova. Rago agberẽ tire nikerehe na mi kidu ni sare, na mi atona ka berã gupai nga, si wa ka i ya wene boro nga mi te.” * Wirina du rimoko nga Danylo akepai ki ya: “Ho abanzengere anari re ni, ki senge re, na ki serekpo re mbiko gupai nga mi angia Dezire Yekova, mi agunde nikerehe na zee ki zi re.” Rago nagberã tirani nikerehe ho aboro asogorani ni, ono si airiwongo tirani te. Yesu aima pe gupai kumbatayo nga, i nika soga rani asoga.—Oni gedi Matayo 24:9.

2-3. Tipagine i asoga apefuo Yesu ti ni?

² Zegino nasoga apefuo Yesu asoga. Tipagine i asoga yo ti ni? Bambiko wakina Yesu, ani nga “aboro zegino” te. (Yo. 15:17-19) Wa vura duhe nga ani nayugo irisa ayugo fu agu azogarago nga ga awiri aboro, ani airisongo ho watadu ka iriso agu ahe narukubaha te. Kina Yekova sa ani airisoko. Ani nasongoda gu rengo du Mbori na ni tipa ka zoga wiri aboro—ono Satana na ‘atitako’ naká gupai aká nga Mbori na gu rengo re beko. (Bam. P. 3:1-5, 15) Ani natungusa gupai nga kina ga Mbori Kindo sa nika mbakada gu kpakaraapai nga ga aboro na si nika gbarasa agu aboro dunduko nasogaha. (Dan. 2:44; Yugo. 19:19-21) Gu pangbanga re nga wene pangbanga fu bayee aboro ono ki ngia  gbegberẽ pangbanga fu gbegberẽ aboro.—Tam. 37:10, 11.

³ I nasoga rani a mbiko gupai nga ani naraka kuti gu ga Mbori arugute du tipa ruru mangaapai. Gupai Mbori aya tipaha si ni ruruhe na gu ko aya tipaha si ni irairaha, si kia ti gupai zegino aya tipaha si ni ruruhe na si ni irairaha. Ni kpiapai, badungu aboro aberãnga gupai nga si ni irairapai ka manga gu wasiwasi kodaba Mbori agberesi Sodomo na Amora tipaha te! (Yuda 7) Mbiko gupai nga ani nagiasangba gu ga Ziazia Kekeapai arugute du tipa ngbatunga mangaapai wa gure, badungu aboro nasawia rani na kini pe gupai nga ani nga agu aboro aidanga ka manga gupai aboro amangaha ya.—1 Pet. 4:3, 4.

4. Gini asino nanyakasa rani ho aboro asoga rani ni?

⁴ Ginipai rengbe ka undo rani ani hipai ho aboro asoga rani ni na kini sesenga rani? Si naida ani du na nyanyaki idapase nga Yekova nika undo rani aundo. Wakina vurakube, gaani idapase “rengbe ka bisa gu siida we nga ga gbegberẽ ko.” (Ef. 6:16) Ono si naida ani duadu na gu kura sino kupati du na idapase. Na si naida ani du a na nyemuse. Tipagine? Bambiko nyemuse “aerã nga te.” Si nambu pa apai dunduko, na si nahi pa agu apai dunduko naye na imisiri. (1 Kor. 13:4-7, 13) Ani bingo wai awere padu ani na nyemuse tipa Yekova, nyemuse tipa agu akuarani ani airisombori na yo, na zavura nyemuse tipa agu aboro nasoga rani narengbe ka undo rani ani hi asogote.

5. Waigu ga Yesu nyemuse tipa Bako anyakasi ko?

⁵ Rogo gu yuru naadu mbata fu kpio Yesu, ko ape gupai fu ruru apefuoko nga: “Mi nakpi nyemu Buba, wa Buba afu rugute fere, kina wo mi amanga.” (Yo. 14:31) Ga Yesu nyemuse tipa Yekova anyakasi ko tipa agu aˈasada nadu fuko kumbatayo. Gaani nyemuse tipa Yekova ima rengba ka manga kina gu bangisapai re furani.

6. Ringbisihe kuti ARomo 5:3-5, waigu ga Yekova amoyambu abi pa hi agu asogote nga ga zegino?

⁶ Nyemuse tipa Mbori aima digo ni undo ga Yekova amoyambu i hi arungosiro. Ni kpiapai, ho gu bakere bambu gumba ngbanga nangia ga aYudo agumba gupai ni fu amokedi nga i mbu tungusapai, gayo nyemuse tipa Mbori afõngbaduyo yo tipa i ‘gi sangba Mbori susi ga aboro.’ (Amo. 5:29; 1 Yo. 5:3) Gi nyanyaki nyemuse re naundo awirinarani a tipa i nye ni ruruyo ho gu kere abazogo du na bakere ome tiyo arungosi yo ni. Ho zegino asoga rani ni, ani na gberãrago te, ono ani na ngbarago.—Amo. 5:41; oni gedi ARomo 5:3-5.

7. Waigu si aida ani mangipai ho gaani aborokporo arungosi rani ni?

⁷ Isoke si rengbe kadu nga, ani nagbia tirani na sogote be kina gaani aborokporo. Ho kura gaani aborokporo abi gupai ni nga ani naida ka wirikapai tipa Yekova, i ima rengba ka berã gupai nga i ima nanga rani. Kura aboro ima rengba ka berã gupai nga rirani yo ima vundo. (Oni ringbisinga ha na Marako 3:21.) I ima rengba kaa fura furani watadu kaa manga furani gbegberẽ. Si aidanga ngbarani zere mbiko gi rungosiro re te. Yesu aya: “Avura boro angia kina gani aborokporo.” (Mt. 10:36) Gu rengo duho nga, ka agumerani vura du na kina gini bipai tipa rani, ani asoganga yo te. Ono tie, ho gaani nyemuse tipa Yekova asona ni, gaani nyemuse tipa aboro nasona a. (Mt. 22:37-39) Ono ani ambunga giasangba agu andiko na arugute du rogo Baibiri yo tipa ka sa ngbarago ti boro te.

8-9. Ginipai naundo kura wirina sa tipa ri ru nyanyaki ri ki vura kaa gbia tiri na arungosiro vurũ?

⁸ Georgina i nifura tipa ri kusayo adu na rengba ka ru nyanyaki wa ri avura kaa gbia tiri na asogote be nari vurũ. Georgina aya: “Mi na nina atona wisigo Ziazia Kekeapai na aDezire  Yekova. Ono tifuo adiwi sita ho mi aaida ka tona nduge ni tipa adunguratise, nina atona ka soga re, mi aye ka ino gupai nga, ri anaafura na abasamungu kuti ndikidi pambori na ri anaamangasunge na gayo afugo ho ri anaafura ni na mi. Ri anaasenga re, kini gbe mange rire, kini piri gorẽyo na kini bafu gimi awaraga kusayo. Ho garãre ada ni ti 15, mi azi bapatiza. Nina aˈasadi ka sa re mi mbu iriso Yekova ni koda ri re na gu kura agude nga agu yo naadia kere angua na kini mangi gbegberẽ apai. Si ima du ni ba mbumbuhe tipa ka hi asogote gbe ho duhe ni nga gu boro si aida ni naakpinyemu ro na kini ngerefuo ro du nasoga ro.”

⁹ Ginipai naaundo Georgina ri hipai? Ri aya: “Gu uru nina asa tiri kuti re angia gu uru mi anyasi geda Ziazia Kekeapai dunduko. Mi aima du na gu kido nga mi ima bi rengo, na mi abi tire nga mi mbembedi na Yekova. Mi anaakpara fuko dedede na ko anaagia re agia. Ho mi aaraka ni rogo gu kporo re, wirina ni dee ayambu re ku kpuri yo na ani awisigi Ziazia Kekeapai wa sa. Ti agu aregbo re dunduko, mi agbia ngarasaro be awirina Bambu Kindo yo. I asa re ni papara gayo aborokporo. Mi abi wai du Yekova ni nyanyaki ko kisusi asogorani ka i vura ngia kina gini ngbatunga aboro vurũ.”

10. Gini kido rengbe ani kadu na ni kuti Yekova gaani Mbori?

¹⁰ Gu mokedi nangia Pauro ake gupai nga pai ho rengbe ka ‘kpara rani ti ga Mbori nyemuse du rogo Kristo Yesu yo nga gaani Gbia te.’ (Rom. 8:38, 39) Ka ani vura rungo tipa bete regbo, Yekova nika du na ani ti aregbo dũ kini fu wasa furani na kini ngarasi rani. Na a wa gu kpiapai du tipa Georgina ayugoho, Yekova naundo rani vurube agu awirinarani du rogo dungurati.

11. Waigu gu nyemuse Yesu afura tipaha rogo Yoane 15:12, 13 aundo gako abawiriki? Oni funga kpiapai.

¹¹ Rogo gu yuru naadu mbata fu kpio Yesu, ko atingidi gako abawiriki na gupai nga i nikpinyemu tiyo dagba tiyo. (Oni gedi Yoane 15:12, 13.) Ko aima ino gupai nga, gu nyemuse nasa boro ni niberẽpa kura aboro nika undoyo i nye ni kodikodi yo na ki hi agu asogote nga ga zegino. Oni bingo gu kpiapai nga ga gu dungurati naadu Tesaronike yo. Kina ti gu regbo i akusi gu dungurati re, i aima gbiatiyo na asogote. Ono tie, agu awirina naadu yo adu ni wene kpiapai nga ga nye ni ruruse na nyemuse. (1 Tesa. 1:3, 6, 7) Pauro angarasi yo tipa i ‘susi  asusa kindi’ na yugo nyemuse. (1 Tesa. 4:9, 10) Nyemuse arengbe ka fõngbaduyo yo tipa i fu wasa fu agu aboro naadu na gberãrago na ki songodi aguyo narungbura. (1 Tesa. 5:14) I apekefuo ga Pauro arugapai mbiko rogo ga Pauro ue waraga nga gu ko akehe tifuo garã sa kusa, Pauro ape gupai yo nga: “Gu nyemuse du dagba roni yo dunduko ni basasa tipa akuaroni si kii gbe.” (2 Tesa. 1:3-5) Gayo nyemuse aundo yo tipa i hi akpakarapai na arungosiro.

12. Waigu awirina rogo gu kura ringara sa ayugu nyemuse fu awirinayo ti regbo vura?

¹² Ani bingo gu kpiapai nga ga Danylo i nifura tipa ko kusayo, gbiati diako. Ho vura agbataka ni kurogo gayo gbata, i aandu kindi kumbatayo kaa ndu tipa adunguratise, kini mangisunge tungusapai wa omeyo arengbe na ni, na kini fuku agu ariahe naadu beyo fu awirinayo. Rogo gu kura uru sa, abanzengere naadu na abundu beyo aye kua Danylo yo. Danylo aya. “I agumba gupai fere nga mi gumba gupai nga mi berewe nga Dezire Yekova te. Ho mi aká ni, i ata re, na ki mangi tiyo nga i naida ka no re na i aba bundu rii re. Mbata fu i guari, i agundesi rani nipe yo gupai nga i nika karagatiyo ka ye ka kodaba na diare ngbaome. Ono tie, awirinarani amoi rani ku gatara yo na ki kedi rani ku rogo gu kura gbata. Bangire agonga ti gu nyemuse nga ga agu awirina re te. Ho ani ada ni rogo gu vovo gbata re, agu awirina naadu yo afu ariahe furani na ki undo rani ani gbia sunge na kporo! Ni sangbana gipai re, ani adu na rengba ka fu ba fu agu aboro naaora rogo agu aba naadu na vura rogoho.” Ngbatunga agi akpiapai re nayugo gupai nga, gu nyemuse nga ga aKristano rengbe ka undo rani ani hi sogote.

13. Waigu ziazia toro aundo rani ani hipai ti ngba gaani sunge fu Yekova zavura ho aboro asoga rani ni?

¹³ Yesu agumba gupai fu apefuoko nga i kpinyemu avurayo. (Mt. 5:44, 45) Ya mo taatapai du nga gipai re? Wagusa te! Ono gipai re ima rengba kadu mbiko gu undo nga ga ga Mbori ziazia toro. Gu zuzu toro nga ga Mbori nakoda nyemuse, wa sa na hipai, mangapase, weneringise, na rugatise. (Gara. 5:22, 23) Agi asino re naundo rani ani hi sogote. Dungu aboro ima mbu soga rani mbiko gupai nga, kumba yo watadu dia yo, awiriyo watadu gayo amurakporo ayugu agi asino re. Na badunguyo ima da ni awirinarani. Sidu, ka si du foro ni mbumbuhe tipa mo kpinyemu agu aboro nasoga ro mbiko gupai nga mo nairiso Yekova, mo kpari tipa ziazia toro. (Rk. 11:13) Na mo du na kido kuti  gupai nga giasangba Mbori ti aregbo dunduko nga gu wenepai ngba ka mangaha.—Snz. 3:5-7.

14-15. Waigu ARomo 12:17-21 aundo Yasmeen tipa ri yugu nyemuse koyo du kumbari ni wa ko avura kaa rungosi ri vurũ?

¹⁴ Oni bingo gu kpiapai nga ga Yasmeen nga gu ri naraka Middle East yo. Ho ri ada ni ni Dezire Yekova, kumbari aberẽ gupai nga i ima nanga ri, na ko aˈasadi ka rugusa ri ti mangasunge fu Mbori. Ko asenge ri na ki gumba gupai fu agume na abarumbatayo rogo pambori gbiati aborongua nga, i gundesi ri na ki kitingbanga ri nga ri nagbarasa gari kporo. Kumbari anaapeka afugo sengahe kuari fu awirina ti regbo gu dunguratise nga ga dungurati! Yasmeen anaakpara dedede mbiko wai ko aamanga ri gbegberẽ.

¹⁵ Ho Yasmeen anidu ni Bambu Kindo yo, agu awirina naadu yo anaafu wasa fu ri na kini ngarasi ri. Abaakumba angarasi ri tipa ri mangipai kuti gupai du rogo ARomo 12:17-21. (Oni gedihe.) Yasmeen aya, “Gipai re aima nyaka, ono mi asana Yekova ko undo re, na mi amangipai na omere dunduko tipa ka manga gupai Baibiri apehe. Ho kumbami anaabafa biriko ni niwia ba manga riahe yo, mi anaagiriso ho. Ho ko anaasenga re ni, mi anaakaragapai rogo zereda. Ho ko anidu ni na kaza, mi anaangerafuo ko.”

16-17. Ginipai mo nawirikihe ti gu kpiapai nga ga Yasmeen?

¹⁶ Yasmeen aima gbia maku mbikopa yugo ri nyemuse fu kumbari. Ri aya: “Kumbami atona kadu na kido kuti re mbiko ko aima ino gupai nga mi anaagumba rengo fuko ti aregbo dũ. Ko atona kaa degatuko fere wenengai ho mi anaafura ni fuko tipa gimi pambori, na ko aidi ka manga zereda kporo. Awere, ko naape gupai fere ho mi andu ni tipa adunguratise nga, wene dunguratise foro. Awere, mi gbiati kumbami ima du na wene pagume dagbarani na gaani kporo na zereda rogoho. Mi na gu maabangirise nga kumbami nika ida aida na rengo na ki idi ka kodatiko na mi rogo iriso Yekova yo.”

¹⁷ Ga Yasmeen kpiapai nayugo gupai nga “nyemuse nahi pai ni gbanga ha, . . . si nambu pa apai dunduko, na gaha maabangirise na gaha hi pa apai anyasa nga te.” (1 Kor. 13:4, 7) Sogote ima rengba kadu na bakere ome ti ni na kini ye na bakere imisiri. Ono nyemuse na ome ti ni kisusi. Ka ani yugu nyemuse fu kura aboro, i ima rengba ka aria gayo bipai tipa rani na tipa Yekova. Na ho ani ayugo nyemuse ni kindi fu aboro, si nafu ngbarago ku kpoto Yekova yo. Ono ka asogorani vura ndu kindi kumbatayo kaa soga rani, ani ima rengba kadu na ngbarago. Waigu duhe wo?

18. Waigu rengbe ani kadu na ngbarago ho i asoga rani ni?

¹⁸ Yesu aya: “Aboro [ngbarago] nga oni, ho aboro ka soga roni ni, na ho i ka kpara roni ni ti yo, ki nisenge roni.” (Rk. 6:22) Anga ani du nasia gupai nga i naasoga rani te. Ani na ngbarago ho i arungosi rani ni tipa gaani idapase te. Sidu, waigu rengbe ani kadu na ngbarago ho i asoga rani ni? Oni bingo andu apai biata. Bambataha nga, ho ani ahipai ni, Mbori nadu na ngbarago na ani. (1 Pet. 4:13, 14) Uepai nga, gaani idapase nada ni wenehe na ni nyanyakihe. (1 Pet. 1:7) Na biatapai nga, ani nika gbia gu bawene mosoro nga ga nyenye unga.—Rom. 2:6, 7.

19. Tipagine amokedi adu ti ni na ngbarago tifuo i taki yo?

¹⁹ Ngbutuko tifuo zinga Yesu be kpio, amokedi agbia gu ngbarago ko afura tipaha. Fuo i ta yo na ki gumba gupai fuyo nga i mbu tungusapai, i aangi angi. Tipagine? “Mbiko wa ya yo i re are nahi wasiro tipa [rimo Yesu].” (Amo. 5:40-42) Gu nyemuse i adu na ni tipa Baira yo aima kio kisusi gu sogote nangia ga asogo yo. I ayugu gayo nyemuse ni tungusa yo wene pangbanga zanga ‘piriga.’ Dungu awirinarani areme nandu kindi kumbatayo kaa iriso Yekova ni ruruyo i ki vura kaa gbiatiyo na akpakarapai vurũ. I ima ino gupai nga, bangiri Yekova agonga ti gayo sunge na nyemuse tipa rimoko te.—Eb. 6:10.

20. Ginipai ani nika sakapai tipaha rogo gu kekepai ngbefuo gere?

²⁰ Gi zegino re nikaa soga rani kindi da kuho si ka digo ni. (Yo. 15:19) Ono si aidanga ani gunde te. A wa ani nika bihe rogo gu kekeapai ngbefuo gere, Yekova nika “nyakasa” gako ruru aboro na ki ‘banda’ yo. (2 Tesa. 3:3) Sidu, ani ndu kindi kumbatayo kaa kpinyemu Yekova, kaa kpinyemu awirinarani, na kini kpinyemu agu aboro nasoga rani. Ka ani mangipai kuti gi rugute re, ani nika nye ni kodikodi rani na gaani idapase kidu ni nyanyakihe, ani nika ye na taarimo fu Yekova, na ani nika yugo gupai nga, nyemuse ima du na ome ti ni gbe kisusi sogote.