1. Gini ngbatunga akpakarapai rengbe ga Yekova aboro ka gbiatiyo na ni?

YA MO mo nagbia tiro na kere kpakarapai? Isoke boro rogo dungurati imisi ro. (Yak. 3:2) Watadu si rengbe kadu nga gamo abadiasunge watadu agu aboro du mo na yo sukuru yo nasawia ro tipa iriso mo Yekova. (1 Pet. 4:3, 4) Watadu gamo aborokporo naˈasada ka rugusa ro ti ndu mo tipa adunguratise watadu ti fura mo na kura aboro tipa gamo idapase. (Mt. 10:35, 36) Ka kpakarapai du ni kerehe gbe, si ima rengba ka saro mo bihe nga mo mbu iriso Yekova. Ono mo ima rengba kadu na gu kido nga ka mo vura ka gbiatiro na kina gini kpakarapai, Yekova nika fu tatamana afu foro mo mangipai kutini na ki fu ome foro mo hi he.

2. Ringbisihe kuti ARomo 15:4, gini sangbanapai rengbe geda Fugo Mbori kadu na ni kurii rani?

² Yekova asa gupai nga i keke akpiapai rogo Ziazia Kekeapai yo nga gu nayugo wai kpakpa aboro ahi akpakarapai. Tipagine? Tipa gupai nga ani wirikipai ti ni. Si nga gupai Yekova amangisunge na gu mokedi nangia Pauro ko kehe. (Oni gedi ARomo 15:4.) Ho ani ageda agi apangbanga re ni, si rengbe ka ngarasa rani na ki fu maabangirise furani. Ono tie, tipa ka gbia undo, si naida ani mangi kurapai amanga kisusi gu gbua nga ka geda Ziazia Kekeapai. Si naida ani mbu Ziazia Kekeapai si du na maapai kurii berãrani na ki zi ngbaduraniyo. Ni kpiapai, ginipai rengbe ani ka mangaha ka si du nga ani naida rugute nibipa gu kpakarapai ani agbia tirani na ni? Ani rengbe ka manga agi apai du biama re: (1) Ka manga kparakpee, (2) Ka makiapa pai, (3) Ka berãkuriipai, na (4) Ka mangapai. Ani sakingo pai tipa wai ka manga agi apai re dunduko ni basasa. * Fuo gure, ani ki mangisunge na gi gene wisigopai re tipa ka wirikapai ti agu apai namangi rogo gu raka yo  nga ga Bakindo Davide gbiati gu mokedi nangia Pauro.

3. Mbata fu mo tona geda Ziazia Kekeapai, ginipai si aida mo mangihe na tipagine?

³ (1) Mo mangi kparakpee. Mbata fu mo tona geda Ziazia Kekeapai, mo sana Yekova ko undo ro mo bi wai rengbe mo ka gbia undo ti gupai mo agedaha. Ni kpiapai, ka mo agbata rugute nibipa wai ka mangapai kuti kpakarapai, mo sana Yekova ko undo ro mo bi abangua arengo rogo Baibiri yo nga gu rengbe ka undo ro mo mangi diaberã tipa gupai rengbe mo ka mangaha.—Frp. 4:6, 7; Yak. 1:5.

4. Ginipai rengbe ka undo ro mo sa pangbanga nga ga Ziazia Kekeapai ni unga berãro yo?

⁴ (2) Mo makiapai. Yekova fu bawene tandu furani nga ga makiapai. Tipa ka sa pangbanga nga ga Ziazia Kekeapai ni unga berãro yo, mo asadi ka makiapa gupai naamanga, na ki moi tiro kuba gu boro mo agedapai tipa ni. Mo asadi ka bi agu apai ni abihe, na ki berẽpa agu apai ni arengbe ka berãha.

5. Ginihe nga berãkuriipai, na waigu rengbe mo ka mangaha?

⁵ (3) Mo berẽkuriipai. Berãkuriipai nga ka berã wenengai tipa gupai mo agedaha, na tipa wai gupai re abiro. Si naundo ro mo bi agu apai mo nawirikihe awere gbiati gu mo aima inoho mbata kusayo na gipai re na undoro mo du na dudunguro giarogopaiyo tipa gupai mo agedaha. Mbaro gu duho i naangihe nga ga ingida abarapa sura ti genehe. Sidu, geda Ziazia Kekeapai zanga berãkuriipai wakina bi agu abarapa sura re zanga ingidaha ti genehe. Ono berãkuriipai wakina ingida agu abarapa sura re ti genehe. Tipa ka undo ro mo berẽkuriipai, si naida mo sana agi asanahe re na ki karagapai kutini: ‘Ginipai gu boro du pani rogo gi pangbanga re amangihe tipa ka mbakada gani kpakarapai? Waigu Yekova aundo ni? Waigu rengbe mi ka mangasunge na agu apai mi nawirikihe tipa si undo re mi hi akpakarapai?’

6. Tipagine si aida ani naamanga pai ti ni kuti gupai ani awirikaha?

⁶ (4) Mo mangipai. Yesu ape gupai nga ka ani amanganga pai kuti gupai ani awirikaha ya, ani du wakina gu kumba name bambu rii ngume. Gu kumba re namangasunge nyanyaki, ono ko nagberesa omeko gbua. Tipagine? Bambiko ka bavugumo mangi na bakere nana mai, gu bambu re nati kindi. (Mt. 7:24-27) Wakina gure a, ka ani amanga kparakpee, kini makiapai, na kini berẽkuriipai ono zanga mangapai kuti gupai ani awirikaha, gure nga ani nagberesa omerani gbua. Sidu, ho ka ani gbiatirani ni na akpakarapai watadu arungosiro, gaani idapase dunga nyanyaki gbe te. Ono ho ani amanga wisigopai ni na kini mangipai kuti gupai ani awirikaha, ani namanga wene adiaberã, kidu na bakere zereda, na ki sonosi nyanyaki idapase. (Yes. 48:17, 18) Ni manga ani sunge na agu adiandue biama ani nasakipai tipaha re, ani bingo gupai rengbe ani ka wirikaha ti kurapai nga gu namangi rogo gu raka yo nga ga Bakindo Davide.

7. Gini pangbanga nga ga Ziazia Kekeapai ani nika sakapai awere tipaha?

⁷ Ya mo bakureamo watadu gamo borokporo imisinga ro? Kangia wo duhe, gupai rengbe ka undo ro nga wisigopai tipa gupai Bakindo Davide amangihe ho wiriko nangia Abisaroma aimisi ko ni na ki asadi ka da ni bakindo kubako.—2 Sam. 15:5-14, 31; 18:6-14.

8. Ginipai rengbe mo ka mangaha tipa ka gbia ga Yekova undo?

⁸ (1) Mo mangi kparakpee. Na gu pangbanga re berãro yo, mo pepa wai du mo fu Yekova mbiko gu gene i namangi foro gbegberẽ ngbaha. (Tam. 6:6-9) Mo pe kina boro gupai nzunzu namanga ro. Fuo gure, mo ki sana Yekova tipa ko undoro mo bi abangua arengo nga ga Ziazia Kekeapai nga gu rengbe ka undo ro mo ini gupai rengbe mo ka mangaha.

9. Ginipai namangi bangbanda Davide na Abisaroma?

⁹ (2) Mo makiapai. Mo berẽnga pa agu apai  namangi du paha rogo gi pangbanga re, na ki makianga pa wai Bakindo Davide adu na gberãrago. Wiri Davide nangia Abisaroma amangi ome tipa dungu agarã tipa ka sa aboro i kpinyemuko. (2 Sam. 15:7) Ho Abisaroma abihe ni nga regbo ima da fuko, ko akedi abamoi ku rogo ringara aYisaraere naabaha dunduko tipa i mbakadi aboro i idi ko ni gayo bazogo. Zavura ko asa Aitofere nangia boro sa dagba mbembedi abakurea Davide yo na dagba gako abafu rugute yo tipa ko kodi tiko na ko rogo gi samungu re. Abisaroma amoi tiko ni bakindo, na fuo gure, ko ki asadi ka zio Davide na ka imo ko, nga guko si awira gupai nga ko aawoka ni kerehe ti gu regbo re. (Tam. 41:1-9) Davide aini pa gu buro re na ki oro kusayo Yerusarema yo. Ni yangaraha tie, ga Abisaroma riivura kini tona sovura na gu riivura nga ga Davide. Gu riivura nangia ga abasamungu re aadunga na diabese te, na i ki imi wiri Davide nangia Abisaroma.

10. Gini apai Bakindo Davide aima rengba ka mangaha?

¹⁰ Oni berẽnga pa wai Davide adu ho agi apai re dunduko aamanga ko ni. Ko aima kpinyemu Abisaroma na ki ima du na kido kuti Aitofere. Ono wa si avura duwo, i dunduko ue asamungu kutiko. I asa Davide ko du na bakere gberãrago, na zavura ki asadi ka imo ko. Davide aima rengba ka zanga du na kido kuti gu kura abakureako, kini berẽ gupai nga i ima kodatiyo a na Abisaroma. Ko aima rengba kaa berã kina patiko sa na ki asadi ka zubo kusayo rogo gu ringara re ni sako. Watadu ko aima rengba kadu na bakere gberãrago. Ono pai ho Davide amangihe dagba agu apai re te. Kuba gure, ko adi be gi kere asada re. Tipagine ko adu na rengba ti ni ka mangaha wo?

11. Ginipai Davide amangihe ho ko adu ni rogo kere kpakarapai?

¹¹ (3) Mo berẽkuriipai. Gini apai rengbe mo ka wirikaha ti gi pangbanga re? Mo karaganga pai kuti gu sanahe nga, “Ginipai Davide amangihe tipa ka mbakada gako kpakarapai?” Davide aagundenga na ki mangi iraira adiaberã ni ipo te. Ko aadunga a rogo bakere bakabangirise, si ki sako ka ko mangingo diaberã tipa gupai ko nika mangaha ya te. Kuba gure, ko amangi kparakpee fu Yekova tipa undo. Ko asana abakureako a tipa i undo ko. Na ko amangi gupai ni ipo ko adiberã tipa ka mangaha. Wa si avura du nga Davide adu rogo bakere gberãrago, ko aambunga kido kuti kura aboro te, na ko aayengo kadu a na bakere sogote ti ko te. Ko aandu kindi kumbatayo kaa kido kuti Yekova na kuti abakureako.

12. Ginipai Yekova amangihe tipa ka undo Davide?

¹² Waigu Yekova aundo Davide? Ka mo mangi wetekapai, mo nika ino gupai nga Yekova afu gu ome fu Davide ko aaidaha tipa ka hi gi kpakarapai re. (Tam. 3:1-8) Yekova aima fu maku kurii agu adiaberã Davide amangihe. Na ko asongodi ruru abakurea Davide ho i aasovura ni tipa ka banda gayo bakindo.

13. Waigu rengbe mo ka wirika gu kpiapai nga ga Davide ka boro ba kere gberãrago tiro? (Matayo 18:15-17)

¹³ (4) Mo mangipai. Mo sana tiro nga, ‘Waigu rengbe mi ka wirika Davide?’ Si naida mo mangipai ni ipo tipa ka mbakada kpakarapai. Nibipa agu apai du tipa ro, mo ima rengba ka mangapai kuti gu ga Yesu rugute du rogo Matayo kapita 18. (Oni gedi Matayo 18:15-17.) Ono si aidanga mo mangi adiaberã ni ipiipihe ho du mo ni na zinga te. Si naida mo mangi kparakpee fu Yekova tipa ko fu gu zereda foro gbiati tatamana mo aidaha tipa ka mangapai kuti gupai re. Ka mo mbunga kido kuti abakureamo ya. Kuba gure, mo du na nyemu ka dia gu undo kugume i afuhe foro. (Snz. 17:17) Gu nyakipaha gbe nga mo mangipai kuti gu rugute Yekova afuhe foro rogo Fugoko yo.—Snz. 3:5, 6.

14. Gini aregbo rengbe 2 Timoteo 1:12-16; 4:6-11, 17-22 ka ngarasaro?

¹⁴ Ya mo mo nagbia tiro na sogote be gamo aborokporo? Watadu ya mo mo naraka rogo gu ringara adunga ga Yekova aboro rogoho na  ranirii dunduko ka manga gayo sunge ya watadu i naima rugusa gayo sunge rogoho? Kangia wo duhe, mo ima rengba ka gbia ngarasaro ni geda mo 2 Timoteo 1:12-16 na 4:6-11, 17-22. * Pauro ake gi papara Ziazia Kekeapai re ho ko adu ni bambukiso yo.

15. Ginipai rengbe mo ka sana Yekova tipaha?

¹⁵ (1) Mo mangi kparakpee. Mbata fu mo gedi gu kekeapai re, mo pepa gamo kpakarapai fu Yekova na wai si asa ro mo du. Mo pepa kina boro gupai namanga ro. Fuo gure, mo ki sana Yekova ko undo ro tipa mo bi abangua arengo rogo agu apangbanga yo du tipa ga Pauro akpakarapai, nga gu rengbe ka undo ro mo ini wai ka mangapai kuti gu kpakarapai mo agbia tiro na ni.

16. Ginipai namangi Pauro?

¹⁶ (2) Mo makiapai. Mo makianga patiro rogo gupai yo Pauro adu rogoho. Ko adu ni ziziko rogo azogbo bambukiso yo Roma yo. Ko aima du bambukiso yo mbata kusayo, ono bara gere, ko aima ino gupai ni rengo nga i nika imoko aimo. Kura abakureako aima mbuko, na ko ki ima du rogo mbugo.—2 Tim. 1:15.

17. Gini apai Pauro aima rengba ka mangaha?

¹⁷ Pauro aima rengba kaa berã gbe kina kurii agu apai namangi kusayo, kini berẽ gupai nga ka ko amangi agu adiaberã naadu kia, ka i azingo ko te. Pauro aima rengba kadu na zinga na agu aboro naadu Asia yo, nga aguyo naambu ko, na ko aima rengba ka mbu kido kuti kura abakureako. Ono pai ho dagba agu apai re Pauro amangihe te. Tipagine ko arengbe ka nye ti ni na kido na kidu na maabangirise?

18. Ginipai Pauro amangihe rogo gu kpakarapai yo ko adu rogoho?

¹⁸ (3) Mo berẽkuriipai. Mo karagapai kuti gu sanahe nga, “Ginipai Pauro amangihe tipa ka mbakada gako kpakarapai?” Zavura ti gu regbo Pauro aini gupai nga ko nika kpi barambeda, bangiriko aagonga ti gupai nga si ni nyanyakipa pai gbe ka ye na taarimo fu Yekova te. Ko aandu kindi kumbatayo kaa berãpa wai rengbe ko ka ngarasa kura aboro. Ko aakido kuti Yekova rogo kparakpee yo dedede. (2 Tim. 1:3) Pauro aanyenga kaa berã kindi tipa agu awirina nambu ko te, kuba gure, ko ape gupai nga ko adu na bakere tambuahe tipa gu gene abakureako asongodi ko na ki undo ko ngbaha ni nyemuse. Kurigure, Pauro aandu kindi kumbatayo kaa wisigo Fugo Mbori. (2 Tim. 3:16, 17; 4:13) Gu paha anyaki gbe nga, ko aima du na bakere kido nga Yekova gbiati Yesu ima kpinyemuko. I aambunga ko te, na i nika fu mosoro afu fuko tipa gako ruru sunge.

19. Waigu Yekova aundo Pauro?

¹⁹ Yekova aima fu zahe fu Pauro nga ko nika hi arungosiro ahi mbiko padu ko ni Kristano. (Amo. 21:11-13) Waigu Yekova aundo Pauro? Ko akaragapai kuti ga Pauro akparakpee na fuo bete regbo ko ki fu ome fuko. (2 Tim. 4:17) I afu gu kido fu Pauro nga, ko nika gbia gu mosoro agbia ko amangisunge nyanyaki gbe tipa ka gbiaha. Yekova amangisunge a na ruru abakurea Pauro tipa i fu undo fuko rogo mangimangipai yo.

20. Waigu rengbe ani ka wirika gu idapase Pauro ayuguhe rogo ARomo 8:38, 39?

²⁰ (4) Mo mangipai. Mo sana tiro nga, ‘Waigu rengbe mi ka wirika Pauro?’ Wakina Pauro, si naida ani moi gupai ku berãrani yo nga, ani nika gbiatirani agbia na arungosiro tipa gaani idapase. (Mk. 10:29, 30) Tipa ka nye ni rururani fu Yekova ho du ani ni rogo akpakarapai, si naida ani naamanga kparakpee fuko kindi, na si naida ani naawisigo Fugoko dedede. Na si naida ani naatingida gupai ti aregbo dunduko nga, gu nyanyakipa pai kisusi rengbe ani ka mangaha nga ka ye na taarimo fu Yekova. Ani rengbe kadu na gu kido nga Yekova ambunga rani te, na pai ho rengbe boro ka mangaha tipa ka rugusa gako nyemuse koyo du ani ni te.—Oni gedi ARomo 8:38, 39; Eb. 13:5, 6.

21. Gini apai naundo Aya gbiati Hector tipa i dibe agu akpakarapai i agbiatiyo na ni?

²¹ Ka kina gini apai vura du tipa rani, ani ima rengba ka gbia ome ti agu akpiapai du rogo Ziazia Kekeapai yo. Ni kpiapai, Aya, nga nazakigene Japan yo aya, gu pangbanga nga ga Yona aundo ri tipa ri dibe gunde be manga dezirepai gbaiga. Hector, nga kura paranga sa Indonesia yo, nga guko adunga avunguko ni airisi Yekova ya aya, gu kpiapai nga ga Ruta aundo ko tipa ko idi ka wirikapai tipa Yekova na ka irisoko.

22. Waigu rengbe mo ka gbia bakere undo ti agu adrama nga ga Ziazia Kekeapai watadu ti gu buku nga, Oni Wiriki Gayo Idapase?

²² Wari rengbe mo ka gbia akpiapai ni nga ga Ziazia Kekeapai nga gu nika nyakasi ro? Gaani avidio, dede fugo adrama gbiati gu buku nga Oni Wiriki Gayo Idapase naundo na sa agu apangbanga nga ga Ziazia Kekeapai ni unga. * Mbata fu mo bi agi apangbanga i amanga wetekapai tipaha wenengai re, watadu ka degeturo kutini, na ka gedaha, mo sana Yekova tipa ko undo ro mo bi agu apai nzunzu rengbe mo ka mangapai kuti ni. Mo makiapa tiro nga mo du nga gu boro mo ageda pai tipa ni re. Mo berẽkurii agu apai gi ga Yekova ruru amoyambu re amangihe, na wai ko aundo yo tipa i dibe akpakarapai. Fuo gure, mo ki mangipai kuti agu apai mo nawirikihe re rogo gamo kpakarapai. Mo fu tambuahe fu Yekova tipa gu undo ko afuhe foro. Na mo yugu gupai nga mo na tambuahe tipa gu undo re ni gbata mo amomu tipa ka ngarasa kura aboro na ka songoda yo.

23. Ringbisihe kuti Yesaya 41:10, 13, ginipai Yekova nakido pa mangaha furani?

²³ Raka rogo gi zegino Satana azogaha re ima rengba kadu ni kpakarakpakaraha, na ti kura aregbo, ani ainongo gupai rengbe ani ka mangaha te. (2 Tim. 3:1) Ono si aidanga ani du rogo bakabangirise watadu ka gunde te. Yekova ima ino gupai ani andu rogoho. Ho ani aida undo ni, ko kidohe nga, ko nika songoda rani na nyanyaki kumbabeko. (Oni gedi Yesaya 41:10, 13.) Ani ima du na gu kido nga Yekova nika undo rani aundo, na Ziazia Kekeapai nafu gu ome furani ani aidaha tipa ka hi ai kpakarapai.