1. Tipagine Yesu asana Yekova ti ni ko banda gako abawiriki?

ROGO gu yangara yuru Yesu araki auru kpotosende ane ni boro, ko aabaka bangiriko tipa agu akpakarapai gako abawiriki nika gbiatiyo na ni. Mbiko gu nyemuse Yesu adu na ni tipa gako abawiriki, ko asana Bako tipa ko ‘ka aka kuti yo be gbegberẽ ko.’ (Yo. 17:14, 15) Yesu aima ino gupai nga, fuo ko ga ku ngbangbaturũ yo, Satana Bakitingbanga nikaa ndu kindi kumbatayo kaa sovura kuti ai gu boro nika ida ka iriso Yekova. Si tie ziazia nga, si adu nga ga Yekova aboro nika ida aida na bandahe.

2. Waigu rengbe ani kadu na gu kido nga, Yekova nika karagapai akaraga kuti gaani akparakpee?

² Yekova akaragapai kuti ga Yesu kparakpee mbiko Gako nyemuse tipa Wiriko. Ka ani asadi tirani na omerani dunduko ka sa ngbarago ti Yekova, ko nika kpinyemu rani a, na ko nika degatuko kuti gaani akparakpee tipa undo na bandahe. Yekova nga gu Barani du na nyemuse, sidu, ko nikaa ndu kindi kumbatayo kaa ngerafuo awiriko. Rimoko ima rengba ka gberã ka si du nga ko amanganga ha wo te!

3. Tipagine ani aida na ga Yekova bandahe ti ni areme?

³ Ani naida na ga Yekova bandahe awere kisusi gu nidu mbata. I aima ba Satana ngbangbaturũ yo na ko na “bakere zinga.” (Yugo. 12:12) Ko aima sa kura aboro i niiberẽ gupai nga, ho i arungosi rani ni, gure nga i “narũ he arũ fu Mbori.” (Yo. 16:2) Agu aboro aidanga kuti Mbori ya, i narungosi rani mbiko gupai nga ani kia ti agu aboro du rogo zegino. Ka aboro vura kaa rungosi rani kina wai, ani agundenga te. Tipagine? Mbiko Fugo Mbori naya: “Gbia nga irarengo ko anyakasa roni, ki nibanda roni be gbegberẽ ko.” (2 Tesa. 3:3) Waigu Yekova abanda rani? Ani sakingo agene ue.

4. Ringbisihe kuti AEfeso 6:13-17, ginihe Yekova nafuhe tipa si banda rani?

⁴ Yekova ima fu ũvura furani nga gu rengbe ka banda rani be ga Satana azubohe. (Oni gedi AEfeso 6:13-17.) Gi ũvura nga ga toro re ni nyanyakihe na si namangasunge wenengai! Ono tipa gu ũvura re banda rani, si naida ani mangisunge na apaparaha dunduko. Agu apaparaha re ni basasa narukuba gine? Ani nika wisigopai tipaha ni basasa.

5. Gu giri dimose nga ga rengo nga gine na tipagine ani avoho ti ni?

⁵ Gu rengo ani avoho dimorani narukuba agu arengo du rogo Fugo Mbori yo nga Ziazia Kekeapai. Tipagine si aida ani vo gi giri dimose re ti ni? Bambiko Satana nga ‘irazire nga baha.’ (Yo. 8:44) Satana aima digo nigumba ziree tipa dungu akutu agarã na ko ima nanga “aboro kpotosende yo dunduko”! (Yugo. 12:9) Ono gu rengo du vuru Ziazia Kekeapai yo nabanda rani tipa ka ko nangingo rani ya. Waigu ani avo gi giri dimose nga ga rengo re? Ani navo gu giri dimose nga ga rengo, ni wirika ani gu rengo du tipa Yekova, ni iriso ani ko “ni toro na rengo,” na ni manga ani pai ni ruruhe rogo apai yo dunduko.—Yo. 4:24; Ef. 4:25; Eb. 13:18.

6. Ginihe nga gu marã ngbaduse nga ga rurupai, na tipagine si aida ani voho ti ni?

⁶ Marã ngbaduse nga ga rurupai narukuba gu ga Yekova arugute du tipa ruru mangaapai. Tipagine si aida ani vo gi marã ngbaduse nga ga rurupai re ti ni? A kina wai marã ngbaduse abanda ngbadu banzengere, gu marã ngbaduse nga ga rurupai nabanda rani tipa gupai nga, ka gu gbegberẽpai nga ga zegino gberesinga gu ngbatunga boro nga ani ya. (Snz. 4:23) Yekova naida gupai nga ani kpinyemuko na kini irisiko na ngbaduraniyo dũ. (Mt. 22:36, 37) Sidu, Satana naˈasada ka sa rani ani mbu iriso Yekova na kpotoraniyo dunduko ni sako rani tipa ani kpinyemu agu ahe du rogo gi zegino re nga gu Yekova asogaha. (Yak. 4:4; 1 Yo. 2:15, 16) Na ka ko adunga na diabese rogo gi gene re ya, ko ima rengba ka ba gunde tirani tipa ani asadi ka manga gupai nika ba gberãrago ti Yekova.

7. Waigu ani avo gu marã ngbaduse nga ga rurupai?

⁷ Ani navo gu marã ngbaduse nga ga rurupai ni manga ani pai kuti gu ga Yekova arugute du tipa gupai du ni ruruhe na gupai du ni irairaha. (Tam. 97:10) Kura aboro ima rengba ka berã gupai nga, ga Yekova arugute naká aká na gayo ranirii. Ono ka ani mbu mangapai kuti gu bangua arugute nga ga Ziazia Kekeapai rogo gaani raka yo, ani du wakina gu banzengere naura gani marã ngbaduse ti ngba vura mbiko gupai nga ni naberã gupai nga si ima rõa ni kerehe. Nairiwo wai ka gipai re du nipa mungo! Ono ka ani akpinyemu Yekova, gako arugute adunga ni gupai susi rii “omerani te,” ono si nika du ni gupai nabatasa ungarani.—1 Yo. 5:3.

8. Ginipai pa voda ani ndurani na gu ũnyaka nga ga wene pangbanga ayugoho?

⁸ Pauro angarasi rani a tipa ani vodi ndurani ni gu ũnyaka nga ga wene pangbanga zereda. Ka pepai ngba kura gene, si naida ani du ti aregbo dunduko regerege tipa ka tungusa gu wene pangbanga nga ga Kindo. Ho ani afura ni fu kura aboro tipa gupai du rogo Ziazia Kekeapai yo, gaani idapase nadu ni nyanyakihe. Ani nagbia ngarasaro ho ani abi wai ni ga Yekova aboro rogo apapara zegino dunduko amangasunge na agu amomu du beyo tipa ka tungusapai rogo agu aba du yo rogoho. Ni kpiapai, i natungusapai basunge yo watadu sukuru yo, ho i andu ni kporo na kporo watadu ho i atungusapai ni rogo gu dagbarago nga ga ba bagaahe, ho i andu kaa ngbe ahe ni na ho i andu ni kaa biko agu agume yo adunga ni aDezire Yekova ya, watadu kaa fura na agu aboro i naini yo. Ka ani du na bakere gunde si ki sa gupai nga ani mbu tungusapai, ani du wakina gu banzengere naura  gani rakata kusayo ti regbo vura, nga gu rengbe ka sa gupai nga ni hõ ni ipo. Ni sangbana gipai re, si ima rengba kadu ni kpakarakpakaraha fu ni tipa ni banda tini ho ka i zubo ni ni.

9. Tipagine si aida ani tindi vurakube ti ni?

⁹ Vurakube nga idapase narukuba gu idapase du ani na ni kuti Yekova. Ani na idapase kuti gupai nga, ko nika digiso gako akidohe dunduko. Gu idapase re naundo rani ani “rengbe ka bisa gu siida we nga ga gbegberẽ ko na ni.” Tipagine si aida ani naatinda gu vurakube re ti ni? Bambiko si nika banda rani tipa gupai nga ka agu aziree ayugopai nga ga abasamungu kuti ndikidi pambori nangingo rani ya na tipa ka ani dunga na gberãrago ho aboro asawia gaani aida ni ya. Ka ani adunga na idapase ya, ani adunga na rengba tipa ka giasangba Yekova ho aboro nikaa sosoda rani ni ani basasangba ko te. Ono ti agu aregbo dunduko ani aká ka manga gupai Yekova asogaha singia basunge yo watadu sukuru yo, gaani idapase nabanda rani. (1 Pet. 3:15) Gaani idapase nabanda rani ti ai gu regbo ani aká gu sunge ka ani naagbia bakere marã ti ni, ono nga gu ka mbunga gene furani tipa ani mangisunge fu Yekova na omerani dũ ya. (Eb. 13:5, 6) Gaani idapase nabanda rani ti agu aregbo dunduko ani airiso Yekova ani ki vura kaa gbiatirani na arungosiro vurũ.—1 Tesa. 2:2.

10. Kpakpari bata nga gine, na tipagine si aida ani voho ti ni?

 ¹⁰ Kpakpari bata nga gu maabangirise Yekova nafuhe furani, du nga kadu na gu maabangirise nga ko nika batasa rani be kpio na ki fu mosoro fu agu aboro dunduko namanga gupai ko akpinyemuhe. (1 Tesa. 5:8; 1 Tim. 4:10; Tito 1:1, 2) A kina wai kpakpari naabanda rii banzengere, kinawo a gu gaani maabangirise nga ga bata abanda gaani tandu berãpai. Ngba gini gene? Gu maabangirise re naundo rani ani moiberãrani kuti ga Yekova akidohe na kini undo rani tipa ka ome gaani akpakarapai funga rii omerani ya. Waigu ani amanga gipai re? Ani namanga gipai re nindu ani kindi kumbatayo kaa bi apai wa gu Yekova abihe. Ni kpiapai, ani namaa gaani maabangirise angianga kuti kura aũkumuko ya ono kuti Mbori.—Tam. 26:2; 104:34; 1 Tim. 6:17.

11. Gu basape nga ga Toro nga gine, na tipagine si aida ani mangisunge ti ni na ni?

¹¹ Gu basape nga ga Toro nga Fugo Mbori nga Baibiri. Gu basape re na ome ka kusa aziree gbaiga na ka fu ranirii fu aboro be ziree ayugopai gbiati kere sino mangaapai. (2 Kor. 10:4, 5; 2 Tim. 3:16, 17; Eb. 4:12) Ani nawirika wai ka mangasunge wenengai na gu basape re vurube wisigopai nisase na vurube gu rabahe ani agbiaha be ga Yekova riigbu. (2 Tim. 2:15) Kupati gu ũvura Yekova nafuhe furani, kura ngbatunga bandahe kinaho berewe ko afuhe furani. Gini ngbatunga bandahe du?

12. Gini kura undo berewe ani aidaha na tipagine?

¹² Gu banzengere du na bakere inohe ima ino gupai nga, ka ni songa vura kuti badungu abasovura ni tini kidu na diabese te, na ni naida aida na gu undo nga ga akurani abanzengere. Wakina gure a, ani arengbanga ka sovura kuti Satana gbiati apefuoko ni tirani kidu na diabese te, ani naida aida na gu undo nga ga awirinarani. Yekova ima fu “awirina” furani nga aguyo duho tipa ka undo rani.—1 Pet. 2:17.

13. Ringbisihe kuti AEbere 10:24, 25, gini undo ani agbiaha ti ndu ani ku pati adunguratise?

¹³ Gene sa ani agbia undo ngbaha nga ni ndu ani kupati gaani adunguratise. (Oni gedi AEbere 10:24, 25.) Ani dunduko nidu adu na gberãrago ti kura aregbo, ho gipai re amanga ni, adunguratise nangarasa rani. Ani nagbia ngarasaro be gu wene akaragapai awirinarani afukaha. Agu agumbapai gbiati akpiapai du mburuhe rii Ziazia Kekeapai i amangaha nanyakasa gaani diaberã ka iriso Yekova. Agu afugo ngarasaro ani apekaha mbata fu dunguratise na tifuoho nangarasa rani. (1 Tesa. 5:14) Kurigure, gaani adunguratise nafu momu furani tipa ani gbia gu ngbarago naye ti undo kura aboro. (Amo. 20:35; Rom. 1:11, 12) Gaani adunguratise naundo rani aundo ngba gu kura agene a. Si naundo rani ani du ni wene abatungusipai na ni wene abayugupai. Ni kpiapai, ani nawirika wai ka mangasunge wenengai na gu gaani Aũsunge Nga ga Yugopai. Sidu, mo mbakadi tiro wenengai tipa agu adunguratise nga ga dungurati. Ti regbo dunguratise, mo degeturo wenengai. Mo mangipai kuti gu rabahe mo nagbiaha. Ka mo mangi agi apai re, mo nika du ni “ga Kristo Yesu wene banzengere.”—2 Tim. 2:3.

14. Gini kura undo duho furani?

¹⁴ Ani nagbia undo a be dungu amirioni amaraika du na ome tiyo. Mo berẽnga gupai rengbe maraika sa ka mangaha! (Yes. 37:36) Na mo berẽnga pa gupai rengbe dungu ariivura nga ga amaraika ka mangaha. Boro ho watadu daimona rengbe ka sovura kidu na diabese kuti gu ga Yekova abasovura du na ome te. Yekova na ome tiko kisusi, sidu, ka ko du ku giirani, ani nadu ni nyanyaki rani ti aregbo dunduko kisusi agu aboro nasovura kuti rani ka i vura nge kina wai vurũ. (Abasa. 6:16) Ani ima rengba  kadu na gu kido nga rengo du nga gipai re! Mo berẽpa agu aboro rengbe ka undo ro ho du mo ni na gberãrago mbiko gupai gamo badiasunge, kuaro sukuru yo, watadu gu gumero adunga ni Dezire Yekova ya nagumbaha watadu namangihe. Mo tingidi gupai nga, mo nisaro rogo gi vura re te. Mo napekafuo ga Yekova arugapai.

15. Ringbisihe kuti Yesaya 54:15, 17, tipagine ka boro arugusanga ga Mbori aboro ti ni ti tungusapai ya?

¹⁵ Gi zegino Satana azogaha re nasoga rani tipa dungu nduapai. Ani asongodanga agu ariigbu nga ga biri-zogarago te na ani asonga vura a te. Ani natakapande pa rimo Mbori na kini tungusi gupai nga kina ga Mbori Kindo sa nika ye na zereda na ani naraka ringbisihe kuti gu ga Mbori ruru arugute du tipa mangaapai. Ani nayugoho a fu aboro nga, bazogo gi zegino re nga gbegberẽ iraziree na ni baimiaboro. (Yo. 8:44) Na ani natakapande gupai nga i nika gbarasa ga Satana zegino barambeda. Ono Satana gbiati apefuoko arugusanga gaani sunge tungusapai te. Kuba gure, ani nikaa tambua Yekova kindi rogo agu agene dunduko rengbe ani ka mangaha ngbaha! Wa vura duhe nga Satana na bakere ome tiko, rengba beko tipa ka ká na aboro ti tungusa yo wene pangbanga fu aboro rogo zegino dunduko te. Gipai re wo mbiko gupai nga Yekova nabanda rani.—Oni gedi Yesaya 54:15, 17.

16. Waigu Yekova nika batasa gako aboro ti regbo bakere gberãngbi?

¹⁶ Gini apai nika manga kumbatayo? Ti regbo bakere gberãngbi, Yekova nika batasa rani ngba iiriwo agene ue. Ni bambataha, ko nika batasa gako ruru amoyambu ti gu regbo ko nika sa abakindo nga ga kpotosende yo i gberesi Babera Du na Bakere Ome Ti Ni nga bariwara ngbii zire pambori. (Yugo. 17:16-18; 18:2, 4) Na ko nika batasa gako aboro ti gu regbo ko nikaa gberesa gi yangara papara ga Satana zegino re ti regbo Aramegido.—Yugo. 7:9, 10; 16:14, 16.

17. Waigu ani agbia undo ti nye mbembedi na Yekova?

¹⁷ Ho ani anye ni niruru rani fu Yekova, pai ho rengbe Satana ka manga rani na ni rengbe ka gberesapa rani nyeanye kindi te. Gu rengo duho nga, ko du i nika gberesa ko nyeanye kindi. (Rom. 16:20) Sidu, mo vodi tiro na ũvura na kini ndu kumbatayo kindi kaa mangasunge na ni! Ka mo asadingo ka so gu vura re nisaro ya. Mo undo awirinamo. Na ki pekefuo ga Yekova arugapai. Ka mo mangihe wo, mo ima rengba kadu na gu kido nga, gu Bamo nga boro nyemuse du ngbangbaturũ yo nika nyakasa ro na ki banda ro.—Yes. 41:10.