1, 2. Gini akpakarapai ga Yekova amoyambu asovura kutini?

NAATONA ti gu bambata ruru kumba nangia Ebere dati gi gaani regbo re, ruru airisimbori aima digo ni sota na apai. Gu mokedi nangia Pauro akepai fu agu aKristano nangia aEbere nga i ‘ahi bakere vura ni aima,’ wa i amanga ome tipa Yekova idi na yo na ka gbia maku beko. (Eb. 10:32-34) Pauro aringbisi gu ome aKristano amangaha kuti gu ome abamangi abaangirã anaamangaha ringara aGiriki yo, wa ngbatunga gu nga, ato, bauya, na takpata. (Eb. 12:1, 4) Areme, ani naora oto abaangirã tipa raka, na ani nagbia tirani na agu avurarani naida ka gbeberã rani kusayo, ka kotosa rani, ka dia berani, ka dia gaani ngbarago tirani kusayo na agu amaku du kumbatayo.

² Bambatapai nga, ani nasovura na Satana gbiati gako gbegberẽ zegino. (Ef. 6:12) Si ni nyanyakipa pai ka ani mbunga gu “nyanyaki agbata” watadu gu nyanyaki apai nga ga zegino si moipai kurirani ya. Agu apai re nakoda gaha aida, dudunguro wisigoapai tipa raka, na gbegberẽ mangaapai wa manga meteka, vugundö, kpibuda na rũ kere angua kutii kpotose yo. Na si naida ani nisovura aso kindi kuti gaani arungbura nga ga borose gbiati agberarago.​—2 Kor. 10:3-6; Koro. 3:5-9.

3. Wai du Mbori araba rani ani sovura kuti avurarani?

 ³ Ya mo ani rengbe ka diabe gu nyanyaki avurarani re? Ii, ono angianga zanga sota ya. Ho Pauro amangisunge ni na gu kpiapai nga ga agu abatakpata naadu bakuru kusayo, ko aya tipa tiko wẽ: “Mi namaa ngbondo, wa ka mi ataka yuge te.” (1 Kor. 9:26) Kina wai batakpata naata avurani, kinawo du a si aida ani ta avurarani. Yekova naraba rani na kini undo rani ani sovura. Ko nafu arugapai tipa ka batasa rani rogo Fugoko yo. Ko naundo rani a vurube agu awaraga du mburuhe rii Ziazia Kekeapai, agu adunguratise nga ga aKristano, na bakere adunguratise. Ya mo mo namanga agu apai mo awirikaha? Ka mo amanganga ha wo ya, si nika duwa ka mo “ataka yuge,” ka mo asonga vura kuti vuraro wenengai ya.

4. Wai du rengbe ani ka zanga mbu gbegberẽpai si di berani?

⁴ Avura rani rengbe ka kimbo rani na vura ho ani aberãnga paha ni ya na ho adunga ani ni na ome ya, sidu, si naida ani ningere angera kindi. Ziazia Kekeapai naza rani nga: “Ka gbegberẽpai di nga be roni ya, oni di adia be gbegberẽpai ni wenepai.” (Rom. 12:21) Gu ngarasaro nga ka ani mbunga tirani ‘gbegberẽpai di ‘be rani ya’ nayugo gupai nga ani rengbe arengba ka diabe gbegberẽpai. Ani rengbe ka mangaha wo ka ani asovura aso kindi kutini. Ono Satana na gako gbegberẽ zegino gbiati bororani nga ga zangarengba ima rengba ka dia berani ka ani abandanga tirani ya na ki mbu sovura. Ka ani ya mbunga gene fu Satana ko gundesi rani ani mbu sovura ya!​—1 Pet. 5:9.

5. (a) Ginipai rengbe ka undo rani ani sovura aso kindi tipa ka gbia ga Mbori amaku? (b) Gini aboro du payo rogo Ziazia Kekeapai yo ani nika wisigopai tipa yo?

⁵ Tipa agu aboro nasovura du na diabese, si aidanga bangiriyo go ti gu ndupai i asovura ti ni te. Tipa Mbori idi na yo na i gbia gako amaku, si naida i moi bangiriyo fuo gu kidohe ani agedapaha rogo AEbere 11:6 nga: “Gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.” Gu pa-Giriki sayo ho nga “nagbata” si nayugopa manga bakere ome. (Amo. 15:17) Ziazia Kekeapai na wene akpiapai rogoho nga ga akumba na adee nga aguyo namangi bakere ome tipa ka gbata ga Yekova amaku. Yakobo, Raere, Yosefa, na Pauro agbiatiyo na agu apai naima du ni mbumbuhe fuyo, ono wa si avura duwo, i ayuguhe nga kpatagara kuti pai naye na dungu amaku. Wai du rengbe ani ka wirika gi wene abasovura re?

6. Ginihe naundo Yakobo ko kpatagara kuti pai, na wai du ko agbia mosoro? (Oni bi gu sura duti tonatonaha.)

⁶ Gu tita aYisaraere nangia Yakobo asota na ki kpatagara mbiko ko aima kpinyemu Yekova, ko abi agu apai nga ga toro na nyanyakipaha, na ko adu na idapase kuti ga Yekova kidohe tipa ka fu maku fu atitako. (Bam. P. 28:3, 4) Gere nayugo gu ndupai ko amangi bakere ome ti ni ka gbia ga Mbori amaku garãko ki vura mbeda kuti 100 vurũ; ko atakpata a na gu maraika nadi kpoto boro kuti ni. (Oni gedi Bambata Pai 32:24-28.) Ya mo Yakobo nitiko adu na gu ome gbiati hipai si aaidaha tipa ka sovura kuti nyanyaki maraika? Nirengo, ko aadunga na ni te! Ono ko angia gu bata kpata naima diaberã, na ko ayuguhe nga ko azubongo be gu kpata re te! Na nirengo, ko aima gbia mosoro wa ko akpatagara. Ko agbia gu rimo narẽarẽ na ko nga Yisaraere, (du rogoyo nga “Bata Kpata [Ba Kpatagara Kuti Pai] na Mbori” watadu “Takpata na Mbori”). Yakobo agbia gu badungu amosoro ani agbataha a, nga Yekova idi na ani na ka gbia gako amaku.

7. (a) Gini kpakarapai Raere agbia tiri na ni? (b) Wai du ri atakpata ata kindi na ki gbia amaku niyangaraha?

 ⁷ Gu dia Yakobo ko akpinyemu ri gbe nangia Raere adu na bakere nyemu ka bi wai Yekova nika digiso gako kidohe fu kumbari. Ono kpakarapai adu kinaho i aarengbanga ka diabe he ya. Agude aadunga beri te. Ti ragori, i anaabi gupai re ni kere rungosiro. Wai du Raere agbia ome tipa kaa sovura kuti gupai naaba bakere gberãrago ti ri ono ka gene adunga beri ka mangapai sa ni re ya? Ri aambunga du na maabangirise te. Kuba gure, ri atakpata ata kindi ni manga ri kparakpee nyanyaki. Yekova agi ga Raere kpesarawatise, na ni yangadaha, ko afu agude furi. A wa du sino aboro, Raere apoi kuari na diabese nga: ‘Mi sovura ni bakere he, mi ki dibese!’​— Bam. P. 30:8, 20-24.

8. Gini kere kpakarapai Yosefa agbiatiko na ni nga gu naima dia gbanga regbo, na wai du gu gene ko amangipai ngbaha namoi wene kpiapai furani?

⁸ Zanga kapa, gu kpiapai nga ga ru nyanyaki Yakobo gbiati Raere amoihe adu na nyanyaki sangbanaha kurii gu wiriyo nangia Yosefa, si adu na maapai kurii wai ko amangipai kuti agu apai naˈasadi gako idapase. Ho garã Yosefa adu ni 17, gako raka aˈariatihe ni gbegberẽhe. Mbiko kpihe, awiribako abagiko ni kanga. Kusa, ko ahipai tipa dungu agarã bambukiso Ezipeta yo. (Bam. P. 37:23-28; 39:7-9, 20-21) Yosefa aambunga gberãrago si di beko te; ko aakpingo pai a ki idi ka irobape te. Kuba gure, ko agbe berãko na ngbadukoyo kuti gako wene pagume na Yekova. (Pa Mot. 19:18; Rom. 12:17-21) Si naida ga Yosefa kpiapai undo rani. Ni kpiapai, ka si vura du nga raka aima mbu furani mburani rukutu watadu agu apai du tipa rani awere afunga maabangirise furani te, si naida ani nisovura aso kindi na ki kpatagara. Ani rengbe kadu na kido nga ka ani mangihe wo, Yekova nika fu maku afu furani.​—Oni gedi Bambata Pai 39:21-23.

9. Tipa ka wirika Yakobo, Raere, na Yosefa, si naida ani mangi gini ome tipa ka gbia ga Yekova amaku?

⁹ Mo berẽnga pa gupai mo agbia tiro na ni nga gu rengbe kadu ni asada foro. Isoke si rengbe kadu nga iraira mangapai, iraira bipai tipa ro watadu sawia he. Watadu gu asada mo agbia tiro na ni nga boro kitingbanga ro ni wia, isoke mbiko kpihe. Kuba gupai nga mo mbupa tiro fu gupai re, mo tingidipa gupai naasa Yakobo, Raere, na Yosefa i nimangisunge kindi fu Yekova na ngbarago. Mbori anyakasi yo na ki fu maku fuyo mbiko i adu na bakere tambuahe tipa agu apai nga ga toro. I atakpata ata kindi na kini mangipai ringbisihe na gayo kparakpee. Ani naraka mbembedi na digido gi gbegberẽ zegino re; rogo gi gene re, ani na wene ndupai berani ka kakuti gu nyanyaki maabangirise du furani kumbatayo! Ya mo mo na nyemu ka manga ome tipa Yekova idi na mo, na ka pepai ni masaku, ka takpata tipaha?

10, 11. (a) Wai du rengbe ani ka takpata tipa ga Mbori amaku? (b) Ginihe nika undo rani ani mangi wene asiapai na ki sovura na diabese kuti gberãrago gbiati agu apai nagbeberã boro?

¹⁰ Gini apai du rengbe ka ida ani takpata tipa ga Mbori amaku? Pai sa dungu aboro agbiatiyo na ni nga ka sota ka diabe agu arungbura nga ga borose. Kura aboro kinaho si aida i diberã ka manga ome kadu na wene bipai tipa tungusapai. Si rengbe kadu tipa ro nga, si naida mo du na hipai, wa vura duhe nga mo nawoka awoka dedede watadu mo nasungo nisaro. Si aidanga ani bi gu ome na taata paha a kura aboro amangaha tipa ka mbupai fu agu aboro imisi yo watadu ingi kutiyo te. Ka ani vura dia gbanga regbo kina wai vurũ kuti mangasunge fu Yekova, ani dunduko si aida ani sovura kuti agu apai rengbe ka gbarasapa gaani sunge fu Mbori,  nga guko nafu mosoro fu agu aboro du ni ruruyo.

¹¹ Ka pe rengo, si rengbe kadu ni mbumbuhe ka manga wene asiapai na ka pekafuo gu raka nga ga aKristano. Gipai re rengbe ka manga wo ka si du nga ngbadurani yo nangi rani ani mangi gupai du kia. (Yere. 17:9) Ka mo bi gupai nga si ima saro mo mangi gupai du ni gbegberẽhe, mo kpari tipa ziazia toro. Kparakpee gbiati ziazia toro rengbe ka fu ome foro mo mangi gupai mo nainihe nga si nga rurupai nga gu rengbe Yekova arengba ka fu maku kuriihe. Mo mangipai ringbisihe kuti gamo akparakpee. Mo asadi ka geda Ziazia Kekeapai na aˈuru dunduko, na ki moi regbo tipa wisigopai nisase na kini mangi Gu Irisombori Nga ga Aborokporo dedede.​—Oni gedi Atambuahe 119:32.

12, 13. Wai du kura aKristano ue agbia undo tipa ka sovura kuti gbegberẽ nyemupai?

¹² Badungu akpiapai duho tipa wai Fugo Mbori, gako toro, gbiati gaani awaraga nga ga aKristano naundo aKristano i dibe gbegberẽ nyemuapai. Paranga kumbagude sa agedi gu kekeapai nga “How Can You Resist Wrong Desires?” rogo gu Awake! nangia ga Banduru 8, 2003. Gako mangaapai adu wai kutini? Ko aya, “Mi naasovura kuti gbegberẽ aberã. Ho mi agedi gupai ni rogo gu kekeapai re nga ‘tipa dungu aboro, gu vura du tipa ka diabe gbegberẽ nyemuapai ima nyaka,’ si asa re mi bi tire nga mi nga papara awirina. Mi abi tire nga mi nisare te.” Gi paranga re aima gbia undo a ti gu kekeapai nga “Alternative Life-Styles—Does God Approve?” nga gu naadu rogo gu Awake! nangia ga  Tanvuo 8, 2003. Ko akparia gupai nga si ape gupai nga tipa gu kura aboro, gu vura re wakina ‘kiwe tii kpotose’ yo. (2 Kor. 12:7) Wa vura duhe nga i nasovura kindi tipa ka manga rurupai, i rengbe arengba kadu na kido tipa kumbatayo. Ko aya, “Mbiko gu ndupai re, mi naberãha nga aˈuru dunduko rengbe mi arengba ka nye niruru re. Mi nafu bakere tambuahe fu Yekova wa ko amangasunge na gako riigbu tipa ka undo rani ani bati rogo gi gbegberẽ zegino re.”

¹³ Oni bingo gu kpiapai a nga ga wirinarani sa Amerika yo. Ri akepai nga: “Mi naida ka tambua roni tipa wai oni afu kina gu riahe furani ani aidaha ti wene regbo. Dedede, mi naabi tire nga i naake agi awaraga re tipa kina re. Mi aima digo nisovura na bakere nyemu gupai Yekova asogaha tipa dungu agarã. Ti kura regbo, mi naida ka tumba abere ku ariyo na ki mbu sovura. Mi ima inoho nga Yekova na inapai na ko nambupai fu aboro, ono mbiko gupai nga mi na nyanyaki nyemupai rogore yo nga gu mi asoganga ha ya, mi nabi tire nga mi arẽnga tipa gako undo te. Gi vura re ima du na ome kurii gimi raka naabaha. . . . Tingbafuo mi gedi gu kekeapai nga ‘Ya mo Oni na gu “Ngbaduse” Nga ga Ino Yekova?’ rogo gu Ngbaõbambu Sinziri nangia ga Marungu 1, 2013, mi abi tire nga Yekova naida ka undo re.”

14. (a) Gini bipai Pauro adu na ni tipa agu apai ko aasota na ni? (b) Wai du rengbe ani ka sovura kuti agu arungbura nga ga borose kidu na diabese?

¹⁴ Oni gedi ARomo 7:21-25. Pauro nitiko aima ino wai duhe ni mbumbupai tipa ka sota na gu nyemuapai nga ga gu borose nga ga zangarengba gbiati gaha arungbura. Ono tie, ko aima du na kido nga ko arengbe arengba ka diabe gu vura re ni kido ko kuti Yekova rogo kparakpee yo na kadu na idapase kuti ga Yesu motumo. Na ginipai tigaha du tipa rani? Wa ani kaa sovura tipa ka zanga mbu tirani fu gaani arungbura nga ga borose, ani rengbe arengba kadu na diabese. Wai du? Ni wirika ani gu kpiapai nga ga Pauro nikido kuti Yekova rogo gaani apai yo dũ angianga ka kido kuti gaani ome ya, na kadu na idapase kuti ga Yesu motumo.

15. Tipagine du rengbe kparakpee ti ni ka undo rani ani nye ni ruru rani na ka hi aˈasada?

¹⁵ Kura aregbo kinaho Mbori naima rengba ka mbu rani ani yugupa wai ani abaka bangirani tipa kura apai. Ni kpiapai, ginipai ka mangi ka si du nga kere kaza zi rani (watadu gaani borokporo) watadu ani nagbiatirani na iraira mangaapai? Ani rengbe ka yugo gaani kido kuti Yekova ni sarawa ani tirani fuko rogo kparakpee yo ko fu ome furani ani nye niruru rani ka pa gaani ngbarago gberẽnga ya na gaani padu wenengai rogo toro yo. (Frp. 4:13) Gu kpiapai nga ga gu dungu aboro naadu ti rago Pauro na ti gi gaani regbo re, nayugoho nga kparakpee rengbe ka undo rani ani gbia ome na ka sonosa wingbaduse tipa kaa hipai ahi kindi.

16, 17. Wangia mo bata kpata, gamo diaberã nga gine?

¹⁶ Gupai Bakitingbanga aida ka bihe nga ka biro omero nabati na ko ki dibe ro. Mo diberã ka “ká kuti gu du ni wene he nyanyaki.” (1 Tesa. 5:21) Mo du na kido nga mo rengbe arengba ka diabe gu vura du kuti Satana, gako gbegberẽ zegino, na nyemu ingapai. Mo rengbe ka mangaha wo nidu mo na bakere kido kuti ga Mbori ome ka nyakasa ro.​—2 Kor. 4:7-9; Gara. 6:9.

¹⁷ Ka kina ginipai vura ka manga vurũ, oni nisovura aso kindi. Oni nisota asota kindi. Oni nita kpata ata kindi. Oni kpatagara akpatagara kindi. Oni du na gu kido nga Yekova nika “uka maku ku ri roni ka ba adu nga tipa ha ya.”​—Mara. 3:10.