“MI ADI bapatiza ho garã re adu ni nga 15, na fuo adiwi sita kusa, mi atona ka mangasunge moundo anazakigene. Tifuo garã sa, mi asanahe tipa ka mangasunge ni nazakigene. Ho mi anyasi sukuru ni, mi asanahe ka mangasunge rogo gu ba du na bakere zingo abatungusipa Kindo rogoho. Mi aaida ka guari kusayo rogo gu gbata mi adu rogoho na pati tita nga gu ri mi aaraka na ri ono naangianga dezire Yekova ya. Nairiwo gu bakere gberãrago mi adu na ni ho babi adungurati aya ni wẽ mi nika mangasunge kina rogo gu gbata i avungure rogoho! Mi aˈasadi ka õka gimi gberãrago tiko. Mi adua rire kusende ki kuru ku zegiyo tipa ka berãkurii gupai ko apehe re. Mi aya fu gi badiasunge we: “Mi nabihe nga mi namangapai awere wakina Yona. Ono niyangaraha, Yona aima ndu ku Nineve yo. Sidu, mi nika mangasunge kina rogo gu ba i nafuhe fere.”

“Mi ima mangasunge nazakigene awere rogo gu gbata i avungu re rogoho re tipa agarã biama, na mi nabi wai abi si adu ni patatamana ka mangapai kuti gu rugute i afuhe fere re. Gimi bangua kpakarapai nangia gimi iraira bipai. Mi nagbia bakere ngbarago awere. Rogo diwi sa, mi anaawisigo Ziazia Kekeapai na aboro nga 24. Tambuahe fu Yekova mbiko mi atona ka wisigo Ziazia Kekeapai na tita nga guri nanaasoga rengo asoga mbata.”

Si aidi kura nawisigi Ziazia Kekeapai sa Fiji yo mangi siapai singia ka ndu tipa gaani bakere dunguratise watadu ka ndu na kumbari kupati ga gume kumbari pumbo nga ga tingida uru pabatika. Kumbari aidihe furi ri ndu tipa bakere dunguratise. Ri ape gupai fuko nga ri nika ye fuoko kusa tifuo nyasa dunguratise. Ono tie, ho ri aga ni ku kporo yo tifuo nyasa bakere dunguratise, ri abi gupai nga si angbaangba ka ri rimisingo tiri ku rogo gupai ka sa gari du wenengai rogo toro yo ngbapai ya, na ri aandunga te.

Ti kina gu bangisa regbo re, ho kumbari ape gupai ni fu agumeko nga ko ni idihe fu diako nga ri ye kusa fuo nyasa ri gari “dunguratise nga ga Adezire,” i akaragapai nga, “Ri ayengo te; aDezire Yekova naamanganga pumbo nga ga uru batika te!” *

Ni sangbana gipai re, kumbari adu na bakere ngbarago mbiko diako aru nyanyaki ka songoda gari idapase na gari sangbakpotoseyo. Padu ri ni ruru ri afu momu furi kusa ri tungusipai fuko na fu kura aboro. Sangbanaha angia gine? Kumbari aidipa wisigo Ziazia Kekeapai na ko ki tona kaa ndu tipa adunguratise wa sa na diako.