1. Tipagine ka ani akapanga gupai ti ni nga Fugo Mbori na ome ti ni ya? (Oni bi gu sura duti tonatonaha.)

WANGIA ani ga Yekova aboro, ani akapanga gupai nga fugo Mbori fu aboro “na unga, ki du na tandu” te. (Eb. 4:​12) Badungu rani nga gu kpiapai nayugo gupai nga Ziazia Kekeapai na ome ti ni ka aria ga aboro raka. Kura awirinarani kinaho naadu mbata ni airadi, agu aboro nadia kere angua kutii kpotoyo yo, watadu amangi wasiro. Agu akurayo aduadu na bete diabese rogo gi sino raka re ono i kini bi gupai nga pai kinaho nakpa rogo gayo raka yo. (Batu. 2:​3-​11) Dedede, agu aboro si aangera wa maabangirise aadunga tipa yo te akurubara gu gene nga ga unga mbiko gu ome du ti Ziazia Kekeapai ka aria ga boro raka. Si nawira wa mo aima gbia bakere ngbarago ti geda agu apangbanga ninaaye rogo Ngbaõbambu Sinziri nga “Ziazia Kekeapai Rengbe Arengba ka Aria Gaoni Raka.” Na mo ima bi gupai nga zavura tingbafuo aKristano di rengo kugume, Ziazia Kekeapai naundo yo kindi i naandu kumbatayo kaa manga sonakumbatayo.

2. Wai du Fugo Mbori adu na ome kurii aboro rogo bambata sa kama agarã?

² Ya mo si naida ngbarani zere mbiko badungu aboro ti gi gaani regbo re ima manga bakere aʹariapai ni sangbana wisigo yo Fugo Mbori? Wagusa te! Gupai re natingida rani na pa agu awirinarani naadu rogo bambata sa kama agarã, nga aguyo naadu na gu maabangirise nga ga ga ku ngbangbaturũ yo. (Oni gedi  1 AKorindo 6:​9-​11.) Tingbafuo gu mokedi nangia Pauro pekepa gu ngbatunga aboro nikaa dianga kumbo ga Mbori Kindo ya, ko ape kurapai nga: ‘Agu yo dagba roni yo adu ni amangi agi apai re.’ Ono Ziazia Kekeapai gbiati ga Mbori ziazia toro aima undoyo i mangi ariapai. Zavura tingbafuo i ye ku rogo rengo yo, agu akurayo aima manga kere aingapai. Ziazia Kekeapai fura tipa kura mbedimbedi Kristano sa rogo bambata sa kama agarã yo nga guko si aidi i kusiko akusa kusayo rogo dungurati; kusa, i agasi ko ku rogo dungurati. (1 Kor. 5:​1-5; 2 Kor. 2:​5-8) Ya mo ani agbianga ngarasaro ti makiapa gu dungu akpakarapai akuarani aidipase agbiatiyo na ni na ki dibehe mbiko Fugo Mbori te?

3. Ginipai ani ka wisigoho rogo gi kekeapai re?

³ Mbiko gupai nga Fugo Mbori nga gu ũsunge du na ome ti ni na si kina berani, nirengo, ani naida ka mangasunge na ni ngba wene gene. (2 Tim. 2:​15) Rogo gi kekeapai re, ani nika sakapai tipa wai rengbe ani ka mbu gu ome nga ga Fugo Mbori (1) si mangisunge na gaani raka, (2) si mangisunge na gaani sunge tungusapai, na (3) si mangisunge ho ani ayugopai ni rii tambara yo. Agi atingidapai re nika undo rani ani yugu gaani nyemuse gbiati tambuahe fu gu Barani nga boro nyemuse du ngbangbaturũ yo, nga guko nayugopai furani tipa ani gbia undo tipa tirani.​—Yes. 48:17.

4. (a) Ginipai si aidaha tipa gupai nga Fugo Mbori du na ome kurirani? (b) Wai du mo naagbia regbo tipa ka geda Ziazia Kekeapai?

⁴ Tipa gupai nga Fugo Mbori du na ome kurii rani, si naida ani naagedaha dedede, ka gene du, na aʹuru dũ. (Yos. 1:8) Rengo ngaha nga, badungu rani na badungu apai tirani rogo raka yo. Wa vura duhe wo, pai ho si aida ani mbuhe si rugusi rani ti geda Ziazia Kekeapai te, zavura agu atindiro du kurii rani. (Oni gedi AEfeso 5:​15, 16.) Badungu ga Yekova aboro ima kurabara agene nga gu nasa yo i gbia regbo tipa geda Ziazia Kekeapai na aʹuru dũ, singia kaa gedaha wiso watadu nyemu, watadu bara bebere agu aregbo re yo. I wakina gu bake papara Atambuahe naake gupai nga: “Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.”​—Tam. 119:97.

5, 6. (a) Tipagine du berãkuriipai ti ni na nyanyakipaha? (b) Wai du rengbe ani ka berãkuriipai wenengai? (d) Wai du mo nagbia undo ti geda Fugo Mbori na kini berẽkuriihe?

⁵ Kupati geda Ziazia Kekeapai, si ni nyanyakipa pai furani ka berãkurii gupai ani agedaha. (Tam. 1:​1-3) Mangaha wo nika sa gupai nga ani gbia undo ti gaha tatamana. Singia ani nagedaha rogo gu Ziazia Kekeapai i aima kusaha ti waraga watadu ani nagedaha rogo gu kura he kia, si naida gaani sasa du nga ka diaha kpakpu waraga yo ki moihe ku ngbaduraniyo.

⁶ Wai du rengbe ani ka berãkuriipai wenengai? Badungu aboro ima bihe ni pa undo ka ongoda tooni tingbafuo geda yo pai rogo Ziazia Kekeapai na ki berẽkurii asanahe wa ngbatunga gu nga: ‘Ginipai gipai re ayugoho  fere tipa Yekova? Rogo gini agene yo du mi apekafuo gu rugute apeka rogo gimi raka yo nga gu du rogo gi papara Fugo Mbori re? Gini abangiriaba rengbe mi ka manga ariapai rogoho?’ Wa ani kaa kpara fu Mbori na kini berẽkurii Fugoko, si nika fõngbaduraniyo ani pekefuo gaha rugute ni bakerehe gbe. Nirengo, ani nika mbu gaha ome si mangisunge na gaani raka ngba bakere gene.​—2 Kor. 10:​4, 5.

7. Wai du si aida ani mangisunge na Fugo Mbori wenengai gene tungusapai yo?

⁷ Gine rengbe ka undo rani ani mangisunge na Fugo Mbori wenengai gene sunge tungusapai yo? Bambatapai nga ka mangasunge na ni ni bakerehe ho ani atungusapai ni na ho ani ayugopai ni. Kura wirina sa afura tipa gipai re ngba gi gene re, “Ka i niya mo natungusapai kporo na kporo na Yekova, ya mo kina ro kaa fura afura kindi watadu mo mbugene fuko ko fura?” Gupai ko aaida ka gumbaha nga: Ho ani ageda Fugo Mbori ni fu boro gene tungusapai yo, gure nga ani nambu Yekova ko fura fu gu boro re. Ka ani sia veresi wenengai ka gedaha funi, si rengbe kadu na ome kisusi agu apai dunduko rengbe ani ka gumbaha. (1 Tesa. 2:​13) Mo sana tiro nga, ‘Ya mo mi naagbata momu ka geda Fugo Mbori fu agu aboro mi naandu na wene pangbanga fuyo?’

8. Tipagine si aidanga ani gedi kina kungbo geda averesi gbua ti ni gene tungusapai yo ya?

⁸ Rengo ngaha nga, anga gupai gbua si aidaha nga ka geda agu averesi nga ga Ziazia Kekeapai fu agu aboro ani afura na yo te. Tipagine? Mbiko badungu aboro na kina wiri bete inohe gbua nga ga Ziazia Kekeapai watadu aguyo na ni kandara tooni te. Gure nga gupai naadu rogo bambata sa kama agarã, na kina gu ngisapai re du areme a. (Rom. 10:2) Sidu, si aidanga ani berẽ gupai nga boro nika giarogo gupai yo veresi apehe mbiko gupai gbua nga ani gedi gu veresi re te. Si naida ani di regbo ka nyakasa apapara gu veresi re, isoke ni geda ani gu meme afugo berewe du rogoho, na ki sakirogoyo. Ka ani mangihe wo, si rengbe ka sa gupai nga  gu pangbanga nga ga Fugo Mbori rimi ku berã agu aboro yo ani atungusapai fuyo na si rimi ku ngbaduyo yo.​—Oni gedi Ruka 24:32.

9. Wai du rengbe ani ka undo aboro i bi Ziazia Kekeapai na irisa? Oni funga kpiapai.

⁹ Gupai ani agumbaha mbata fu ani gedi veresi ima rengba ka sa irakporo ni bi Ziazia Kekeapai na irisa. Ni kpiapai, ani rengbe ka ya, “Ani bingo gupai Bakusirani apehe nibipa gipai re.” Ho ani afura ni na gu boro angianga Kristano ya, ani rengbe ka ya, “Ani bingo gupai Ziazia Kekeapai apehe furani.” Watadu kaa ani aatungusapai fu gu boro naima wirikapai gbe, ani rengbe ka sana ni nga, “Ya mo mo aginga gi kuru sanza re mbata no?” Nirengo, ani nabi aboro dunduko ni bakiakia na kini fura fuyo ringbisihe na agu apai du tipa yo.​—1 Kor. 9:​22, 23.

10. (a) Oni penga gupai namangi fu kura wirina sa. (b) Wai du mo nabi gu ome nga ga Fugo Mbori rogo gamo sunge tungusapai yo?

¹⁰ Badungu aboro ima bi gupai nga mangasunge na Fugo Mbori gene tungusapai yo rengbe kadu na bakere maapai kurii agu aboro i atungusapai fuyo. Ani bingo kpiapai. Wirina sa akaraga tiko fuo sosono bakumba nga guko naima digo ni gedi gaani amagazini tipa dungu agarã. Kuba gupai gbua nga ko fu gu vovo Ngbaõbambu Sinziri naadu beko fuko, gu wirina re adiberã ka geda veresi sa naadu rogo gu Ngbaõbambu Sinziri re. Ko agedi 2 AKorindo 1:​3, 4, nga gu naya: “Ba inaapai, nga Mbori wasa dunduko; nafu wasa fu rani rogo gaani gberãngbi yo dunduko.” Agu afugo re aima fõngbadu gu irakporo re yo ni kerehe si ki sa gupai nga ko sana gu wirina re ko gedi gu veresi re berewe. Gu kumba re ape gupai nga ko na diako aaida wasa ni kerehe, na ko awere na nyemu gu pangbanga nga ga Ziazia Kekeapai. Ya mo mo arengbanga ka ida kuti gupai nga Fugo Mbori na ome ti ni rogo gaani sunge tungusapai yo te?​—Amo. 19:20.

11. Gini tindiro du kurii agu awirina nayugopai rii tambara yo?

¹¹ Ani dunduko nagbia ngbarago ti du pati gaani adunguratise nga ga aKristano kodihe na bakere adunguratise. Gu memepai ani adu patini ti ni nga ka iriso Yekova. Ani nagbia bakere aundo a ti agu arugapai nga ga toro ani agbiaha ti agu aregbo re. Agu awirina nayugopai ti agu aregbo re na bakere momu beyo. Ti kina gu bangisa regbo re, si naida i ini gupai nga i na rorõi tindiro kuriyo. (Yak. 3:1) Agu apai i ayugoho, si naida mburuhe du ti aregbo dunduko kina rii Fugo Mbori. Ka i fu gu sunge foro nga ga yugopai rii tambara yo, wai du rengbe mo ka mbu gu ome nga ga Ziazia Kekeapai si mangisunge na gamo gumbapai?

12. Wai du rengbe bagumbapai ka sa Ziazia Kekeapai ni nyanyakipa papara gako gumbapai?

¹² Si naida Ziazia Kekeapai du ni nyanyakipa papara gamo gumbapai. (Yo. 7:​16) Ginipai si akodaha? Bambatapai nga, mo du na rubangirise ka apangbanga, akpiapai, watadu gamo gene manga gumbapai funga rii gamo gumbapai watadu ka gbeberã aboro kusayo ti agu averesi mo amangasunge na ni ya. Berewe a, mo tingidi gupai nga, anga geda badungu averesi nayugo gupai nga mo nayugopai rogo Ziazia Kekeapai yo te. Ka mo gedi badungu averesi zaatu, si rengbe ka sa gupai nga ka badungu aboro tingidinga gu kandara sa ya. Sidu, mo sia gamo meme averesi na rubangirise, na ki di regbo ka gedaha, ka sakarogoyo, ka fu kpiapai kutini, na ki yugu wai rengbe aboro ka wirikapai ti ni. (Nem. 8:8) Ka si du nga mo namanga gu gumbapai gaani riigbu aima kusa awaraga ha, mo wisigi gu waraga gumbapai re gbiati agu averesi du rogoho wenengai. Mo asadi ka giarogo gu ngbanya du dagba gupai waraga gumbapai agumbaha na agu averesi keke yo ho yo. Fuani mo ki mangisunge na siasia averesi ka yugo gu memepai du rogo gu waraga gumbapai re. (Mo rengbe ka gbia wene aberãpai  rogo gu wirikapai nga ga 21 kuti 23 nga ga gu buku nga Benefit From Theocratic Ministry School Education.) Gu nyakipaha anyaka gbe nga, mo kpari fu Yekova na ki sanako tipa ko undoro mo yugu gu nyanyakipa aberãpai du rogo Fugoko yo.​—Oni gedi Ezara 7:​10; Asanza 3:​13, 14.

13. (a) Gu gene i amangisunge na veresi ngbaha ba gu dunguratise yo nga ga aKristano, wai du si adu na maapai kurii kura wirina sa? (b) Wai du mo nagbia undo ti agu ayugopai du mburuhe rii Ziazia Kekeapai nga gu i ayugoho ba gaani adunguratise yo?

¹³ Veresi sa i agedihe ti regbo gu dunguratise nga ga aKristano aima du na bakere maapai kurii kura wirina sa Australia yo. Wa ri avura ka sona rogo dungu akpakarapai, ri adi gu pangbanga nga ga Ziazia Kekeapai kugume na ki kpara gari raka fu Yekova. Ono wa si avura duwo, si aima kpakara furi ka ida kuti gupai nga Yekova ima kpinyemuri. Ono kusa tie, ri aye ka ida kuti gupai nga Mbori ima kpinyemuri. Gine naundo ri ri dakuti gu digisopai re? Ariapai amangi ho ri aberẽ ni kurii veresi sa nga gu i amangisunge na ni ti regbo gaani dunguratise na ri ki ringbisi gu veresi re na gu kura averesi nga ga Ziazia Kekeapai. * Wakina gure a, ya mo gu gene i amangisunge na Fugo Mbori ngbaha ba dunguratise yo gbiati bakere adunguratise adunga na maapai kuriro?​—Nem. 8:​12.

14. Wai du rengbe ani ka yugo gaani tambuahe tipa Fugo Yekova?

¹⁴ Ya mo anga ani na tambuahe fu Yekova tipa Fugoko du ni kekehe nga Ziazia Kekeapai te? Anga kina fufuhe sa ko afuhe fu aboro te, ono ko ima ka a kuti gako kidohe nga si nika nyeanye kindi. (1 Pet. 1:​24, 25) Nirengo, si naida ani naageda Fugo Mbori dedede, kini mangisunge na ni rogo gaani raka yo, na kini mangisunge na ni ho ani aundo kura aboro ni. Ho ani amangaha ni wa gure, si nayugo gaani nyemuse na tambuahe tipa gu nyanyakipa ũkumuko ye be Mbori re, na gbe tipa Baenge kehe nga Yekova Mbori.