1. Waigu rengbe boro kadu ho i nakusi gani borokporo ni kusayo rogo dungurati?

YA MO i kusi nga gamo boro kusayo rogo dungurati? Gipai re ima rengba kadu ni kere pa gberãrago! Wirina du rimori nga Hilda aya, “Ho kumbami akpi ni niruru ko tingbafuo dia ani agarã 41 ku rogo rogatise, mi aberẽ gupai nga, gipai re gberẽ kisusi apai dunduko. * Ono ho wire ambu dungurati ni, ki mbu diako na awiriko, gipai re nagberẽ berewe kisusi apai dũ.”

2-3. Ringbisihe kuti Atambuahe 78:40, 41, waigu du Yekova ho gako amoyambu ambu ko ni?

² Oni berẽnga pa wai Yekova adu na bakere gberãrago ho kura gako amaraika naadu mbata ni papara gako aborokporo aká ko ni! (Yuda 6) Na oni berẽnga pa wai ko adu na gberãrago ho ko aabi gako aboro ni ko akpinyemu yo gbe nangia aYisaraere i nisamungu kutiko berewe na berewe. (Oni gedi Atambuahe 78:40, 41.) Oni du na gu kido nga, gu Barani du ngbangbaturũ yo nga boro nyemuse nadu adu a na gberãrago ho gaani boro ambuko ni. Ko ima rugatiko a na pa gu gberãrago oni andu rogoho. Ko nika fu gu ngarasaro afu furoni na undo oni aidaha.

³ Rogo gi kekeapai re, ani nika sakapai tipa wai rengbe ani ka gbia ga Yekova undo ho gaani boro ambu irisoko ni. Ani nika wisigopai a tipa wai rengbe ani ka undo agu aboro i nakusi gumeyo kusayo rogo dungurati. Ono ni bambataha, ani wisigingo pai tipa gu iraira aberãpai si aida ani nehe.

4. Waigu du badungu avunguagude ho wiriyo ambu Yekova ni?

⁴ Ho gude ambu iriso Yekova ni, dedede, avunguru ima rengba ka berã gupai nga si aaida i mangi bakere ome amanga tipa ka undo ru u naairiso Yekova kindi. Wirina du rimoko nga Luke i akusi  wiriko kusayo rogo dungurati aya: “Mi aima bira tire. Na mi anaarara gbegberẽ amusumo tipa gupai re. Ti kura aregbo, mi anaakpara ni kerehe na mi kidu na bakere gberãrago.” Gu wirina nga Elizabeth i akusi wiiri a kusayo rogo dungurati anaaberã gupai dedede nga: “Wangia mi nagude, si ima rengba kadu nga mi aima manga dungu aingahe. Mi aberẽ gupai nga, mi aamanganga bakere asadatise rengbe arengba tipa ka yugopai fu wire ko kpinyemu Yekova te.”

5. Ho boro ambu Yekova ni, gada ingahe du?

⁵ Si naida ani tingidi gupai nga, wa du ani ni basasa dunduko, Yekova ima fu gu gamahe furani nga ga ranirii ka siapai. Gere nayugo gupai nga ani ima rengba ka siapai singia ani nika giasangbako watadu ani agianga sangbako te. Kura agude kinaho avunguyo aadunga ni wene kpiapai ya, ono agu agude re ima diaberã ka iriso Yekova na ka nye ni ruruyo fuko. Agu akurayo kinaho avunguyo amangi nyanyaki asadatise tipa ka yugopai fuyo i kpinyemu Yekova, ono kusa fuo sono yo, i kini mbu Yekova. Sidu, ani dunduko nibasasa si aida ani diberã, singia ani nika iriso Yekova. (Yos. 24:15) Sidu, aguroni nga avunguagude awironi nambu iriso Yekova, ka oni berẽnga gupai nga gaoni ingahe du ya!

6. Waigu rengbe paranga boro kadu ho vungu ni ambu Yekova ni?

⁶ Ti kura aregbo, bagude watadu nagude ima rengba ka mbu iriso Yekova na zavura ki mbu gani aborokporo. (Tam. 27:10) Gipai re ima rengba kadu nikere pa gberãrago fu agu agude nairisa avunguyo na kini biyo na nyanyakipa yo. Esther nga gu wirina i akusi ba ri kusayo rogo dungurati aya: “Mi anaakpara na aume dedede mbiko mi arugu tire na gupai nga, anga ko aabitikpa gbua kusayo ti rengo te. Diaberã du ko amangihe nga ko aidanga ka iriso Yekova berewe te. Mi ima kpinyemu buba, sidu, ho i akusi ko ni kusayo rogo dungurati, mi aabaka bangire abaka tipa padu ko wenengai. Zavura he anaamaka re amaka.”

7. Ga Yekova bipai nga gine tipa gu paranga boro i nakusi vungu ni kusayo rogo dungurati?

⁷ Paranga aboro, ka si du nga i ima kusa vunguroni kusayo rogo dungurati, ani na bakere gberãrago tipa roni! Oni du na gu kido a nga, Yekova ima inopa bakio wai gupai re aimisa roni. Ko ima kpinyemu roni, na ko na ngbarago nga oni nandu kindi kumbatayo kaa irisoko niruru roni. Zavura ani nga awirinaroni rogo dungurati na ngbarago na oni a. Oni tingidi gupai a nga, ka i biranga roni tipa ga avunguroni adiaberã te. Wa gu i nifura tipaha kusayo, Yekova ima fu gu ranirii fu aboro nga ga siapai singia i naida ka irisoko watadu i aidanga ha te. Na ai gu boro naima kpara gani raka fu Yekova na ki zi bapatiza, “nakpida kina gani pai.”—Gara. 6:5.

8. Ginipai rengbe agu aborokporo du ni ruruyo ka mangaha wa i nikaa pido gayo boro ni karaga tini fuo Yekova? (Oni bi gu sanduki a nga, “ Mo Karagatiro fuo Yekova.”)

⁸ Ho gamo boro ambu Yekova ni, gbegberẽpai ngaha kadu na maabangirise nga ni akaraga tini akaraga fuo Ko rogo kura uru sa te. Ginipai rengbe mo kaa mangaha wa mo nikaa pido ni tipa ni karaga tini fuo Yekova? Mo mangi agu apai dunduko du mo na rengba ka mangaha ka banda gamo idapase si du ni nyanyakihe. Ka mo mangihe wo, mo nika maa bawene kpiapai fu kura gamo aborokporo na zavura isoke fu gu boro i nakusi ni kusayo rogo dungurati. Mo nika gbia gu ome a mo aidaha tipa ka hi gamo gberãrago. Sidu, ginipai rengbe mo ka mangaha ka banda gamo idapase si du ni nyanyakihe.

9. Ngba gini agene rengbe mo ka gbia ome be Yekova? (Oni bi gu sanduki a nga, “ Agu Averesi Nafu Wasa ka si Du Nga Gamo Boro Mbu Yekova.”)

⁹ Mo mangi agu apai dunduko rengbe mo ka mangaha ka banda gamo idapase si du ni nyanyakihe. Si ni nyanyakipa pai mo naandu kindi kumbatayo kaa nyakasa tiro gbiati kura gamo aborokporo. Waigu rengbe mo ka manga gupai re? Mo gbia ome be Yekova nigeda mo Ziazia Kekeapai na aˈuru dunduko, kini berẽkuriihe, na kini ndu tipa agu adunguratise nga ga aKristano. Joanna, nga gu ri ba ri gbiati unvurari ambu rengo aya: “Ho mi ageda agu apangbanga ni nga ga agu aboro du payo rogo Ziazia Kekeapai yo wa Abigaira, Esetere, Eyobo, Yosefa, na Yesu, si nasa re ka mi bakingo bangire gbe ya. Gayo akpiapai nangarasa re na kini undo re mi du na ruru bipai. Gaani kparakpara abia ima fu ngarasaro fere a.”

10. Waigu Atambuahe 32:6-8 aundo rani ani hi gberãrago?

¹⁰ Mo pepa agu apai dunduko fu Yekova nasa ro mo du na bakabangirise. Ho du mo ni na gberãrago, ka mo mbunga kparakpee fuko ya. Mo naandu kindi kumbatayo kaa sana gaani Mbori nyemuse ko undo ro mo naaberãkurii apai wa ko na ko ‘rába ro ki yugu pai foro ngba gu gene mo ka ndu ngba ha.’ (Oni gedi Atambuahe 32:6-8.) Rengo ngaha nga, si ima rengba kadu ni kere iigirã ha foro mo pepa wai nzunzu du mo fu Yekova. Ono Yekova ima rugatiko wenengai na gu igirã du kpotoro yo. Ko ima kpinyemu ro ni bakerehe gbe na ko nazungodi ro mo uka kpotoro yo fuko.—Gate 34:6; Tam. 62:7, 8.

11. Ringbisihe kuti AEbere 12:11, tipagine si aida ani du ti ni na kido kuti gu rugute Yekova afuhe rogo nyemuse yo? (Oni bi gu sanduki a nga, “ Kusa Boro Kusayo Rogo Dungurati Nayugopa ga Yekova Nyemuse Tipa Rani.”)

¹¹ Oni songodi gu diaberã nga ga abaakumba. Pa kusa boro kusayo rogo dungurati nga papara ga Yekova mbakadapai. Gu rugute ko afuhe rogo nyemuse yo nga bawene gene kisusi tipa ka undo gu boro mbu irisoko na si ni wenehe tipa aboro  dunduko. (Oni gedi AEbere 12:11.) Kura aboro rogo dungurati ima rengba ka gumba gupai nga, gu diaberã abaakumba amangihe ka kusa boro kusayo rogo dungurati aarunga te. Ono oni tingidi gupai nga, dedede, ngbatunga agu aboro ninaagumba gupai re ninaapenga gu gbegberẽpai gu boro i nakusi ni kusayo rogo dungurati amangihe te. Gu rengo duho nga, ani ainongo agu arengo du tipa gupai re dunduko te. Sidu, si naida ani du na gu kido nga, agu abaakumba nasapungbanga gu boro re amangipai kuti gupai Ziazia Kekeapai apehe na ki sapungbanga ‘fu Yekova.’—2 Peka 19:6.

12. Gini aundo kura aboro nagbiaha mbiko ka yo kuti gu rugapai du tipa zanga kodatise na agu aboro i nakusi yo kusayo rogo dungurati?

¹² Ni songoda mo gu diaberã abaakumba namangihe tipa ka kusa gamo boro kusayo rogo dungurati, mo ima rengba ka undo ni ni karaga tini fuo Yekova. Elizabeth i nifura tipa ri kusayo aya, “Si aima kpakara ni kerehe ka zanga fugo na wirani. Ono fuo ko karaga tiko fuo Yekova, ko aidi kuti gupai nga, si arẽarẽ i kusiko kusayo rogo dungurati. Fuo bete regbo kusa, ko agumba gupai nga ko aima wirika badungu weneapai. Mi aye ka wirika gupai nga, ga Yekova arugute ti aregbo dunduko ni kina ruruhe.” Kumbari nga Mark agbia kurapai kuti ni nga: “Fuo gbanga regbo kusayo, wirani agumba gupai furani nga, ko aaida ka karagatiko mbiko gupai nga ani aakodanga tirani na ko kandara tooni te. Mi na bakere ngbarago nga Yekova aundo rani ani du ni aboro giasangba.”

13. Ginipai rengbe ka undo ro mo mangipai kuti gberãrago?

¹³ Mo fura fu agu abakureamo rugutiyo na pa wai du mo. Mo naakoda tiro na agu aKristano naima nyaka rogo toro yo nga aguyo rengbe ka undo ro mo banda ruru bipai. (Snz. 12:25; 17:17) Joanna, i nifura tipa ri kusayo aya: “Mi aabi tire nga mi nisare. Ono pa fura mi na agu abakureami du mi na kido kutiyo aima undo re ni bakerehe gbe.” Ono ginipai rengbe mo ka mangaha ka si du nga kura aboro rogo dungurati nape agu apai foro nasa ro mo du na bakere gberãrago?

14. Tipagine si aida ani naandu ti ni kumbatayo kaa hipai ‘fu akuarani na kini vu akuarani’?

¹⁴ Mo yugu zerangbaduse fu awirinamo. Ka gumba guhe nga rengo, anga aboro dunduko rengbe ka gumba gupai du ni ruruhe te. (Yak. 3:2) Ani dunduko nga kpakpa aboro, sidu, ka ngbaro zerenga ka si du nga kura aboro ainongo gupai ka i pehe te watadu i pe gupai imisi ro zanga i ini gupai nga si nika imisa ro ya. Mo tingidi gupai nga, gu mokedi nangia Pauro afu gu rugute nga: “Nihi pai fu akuaroni, nivu akuaroni, ka pai du bangiri gu boro kuti kura ni.” (Koro. 3:13) Kura wirina sa i akusi gumeri kusayo rogo dungurati aya: “Yekova ima undo re mi mbupai fu agu awirina naˈasadi ka ngarasa re ono kini imisi re kuba gu nga i ngarasi re.” Ginipai rengbe dungurati ka mangaha ka undo agu aborokporo nye ni ruruyo i nakusi gayo boro kusayo rogo dungurati?

15. Ginipai rengbe ani ka mangaha ka undo agu aboro i nakusi gayo boro kusayo barambeda rogo dungurati?

¹⁵ Oni di agu aborokporo kugume esuesu nye ni ruruyo nga aguyo i nakusi gayo boro kusayo rogo dungurati. Wirina du rimori nga Miriam ape gupai nga ri aabaka bangiiri abaka tipa nduge  tipa adunguratise fuo kusayo kawiiri kusayo rogo dungurati. Ri aya, “Mi aagunde agunde tipa gupai aboro nika gumbaha. Ono badungu awirina adu kinaho a naadu na gberãrago tipa gupai namangi na i aapenga gbegberẽ apai tipa kawire te. Tambuahe fuyo, mi aabingo ho wa mi nisare rogo gimi gberãrago te.” Kura wirina ni dee aya: “Fuo i kusi wirani rogo dungurati kusayo, wene abakurearani aye ka fu wasa furani. Agu akurayo agumba gupai furani nga, i aainongo gupai ka i pehe te. Agu akurayo aakpara wa sa na mi agu akurayo ki kedi waraga ngarasaro fere. Gupai i amangihe re aima undo re ni bakerehe gbe!”

16. Waigu rengbe dungurati kaa ndu kumbatayo kindi kaa undo agu aboro i nakusi gayo boro kusayo rogo dungurati?

¹⁶ Oni naandu kindi kumbatayo kaa songoda agu aborokporo nye ni ruruyo. I naida na gaoni nyemuse gbiati ngarasaro awere kisusi gu nidu mbata. (Eb. 10:24, 25) Ti kura aregbo, agu aboro i nakusi gayo boro kusayo rogo dungurati naye ka bi gupai nga, kura aboro rogo dungurati nambu fugo kungba yo si kidu wa ka i ya i ima kusayo a rogo dungurati. Ka oni mbunga gupai re si mangi ya! Si naida ani naatambua gu paranga aboro avunguyo naima mbu iriso Yekova na kini ngarasi yo. Maria nga guri i akusi kumbari kusayo rogo dungurati na ko ki mbu gako aborokporo aya: “Kura abakureami aye ku kpure yo ki undo re ka manga riahe na ka wirikapai na awire. I aima du na bakere gberãrago na i ki kpari wa sa na mi. I asongodi pai kubara re yo ho aboro atona ka gumba agu apai ni tipa re naangianga rengo ya. I aima ngarasa re ni bakerehe gbe!”—Rom. 12:13, 15.

17. Ginipai rengbe abaakumba ka mangaha ka fu wasa fu agu aboro du na gberãrago?

¹⁷ Abaakumba, oni naamangasunge na agu amomu dunduko oni agbiaha tipa ka nyakasa agu aborokporo nye ni ruruyo. Oni na gu tindiro beroni nga ga fu wasa fu agu aboro dunduko gayo aboro nambu Yekova. (1 Tesa. 5:14) Oni di regbo ka ngarasa yo na ka fura na yo mbata fu dunguratise na tifuo dunguratise. Oni naandu kaa bi yo kpuyo yo na kini mangi kparakpee na yo. Oni naatungusapai na yo watadu ka yamba yo ti kura aregbo i ye ka kodatiyo na oni tipa gu irisombori nga ga aborokporo. Si naida abaakumba naangerafuo agu aboro du na gberãrago na kini yugu gu nunga gbiati nyemuse fuyo si aidaha.—1 Tesa. 2:7, 8.

18. Ringbisihe kuti 2 Petero 3:9, ginipai Mbori aida agu aboro mbu irisoko mangihe?

¹⁸ Yekova “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (Oni gedi 2 Petero 3:9.) Wa vura duhe nga boro ima rengba ka manga kere ingapai, gani raka kindi na nyanyakipaha fu Mbori. Oni tingidi gupai nga, Yekova afu nyanyakipa geno he nga gu unga nga ga Wiriko tipa rani nibasasa dunduko. Yekova naˈasada ni nyemuse ka undo agu aboro mbuko tipa i karaga tiyo fuo ko. Ko na maabangirise nga i nika sia gupai asia nga ka karagatiyo fuo ko, a wa ani abihe rogo gu ga Yesu sanza yo du tipa ingiingi paranga. (Rk. 15:11-32) Badungu agu aboro nambu rengo aima karagatiyo kusa fuo gu Bayo du ngbangbaturũ yo nga boro nyemuse. Na awirina adu na bakere ngbarago ka dia yo kugume berewe. Elizabeth i nifura tipa ri kusayo aima du na bakere ngbarago ho i akaraga wiiri ni ku rogo dungurati. Ri aya, “Mi na bakere ngbarago nga badungu aboro angarasi rani ani du kindi na maabangirise nga wirani nika karagatiko akaraga ku rogo dungurati.”

19. Tipagine rengbe ani ti ni kaa ndu kindi kumbatayo kaa kido kuti Yekova?

¹⁹ Ani naakido kuti Yekova ti aregbo dunduko. Gako arugute ti aregbo dunduko nikaa undo rani aundo. Ko nga boro gamahe na ni gu Barani nga boro nunga nga gu ko du na dudunguro nyemuse tipa agu aboro dunduko nakpinyemuko na kini irisiko. Oni du na kido nga Yekova ahenga roni ti kere aregbo te. (Eb. 13:5, 6) Mark i nifura tipa ko kusayo aya, “Ka Yekova henga rani wa sa te. Ko nikaa undo rani ti aregbo dunduko ho ani andu ni rogo akpakarapai.” Yekova nikaa ndu kindi kumbatayo kaa fu “gu bakere tandu susi” watadu ome furani. (2 Kor. 4:7) Nirengo, oni ima rengba ka nye niruru roni na kidu kindi na maabangirise zavura ho gaoni boro ambu Yekova ni.