ROGO agu agarã yo naatona rogo 1910, avungure aguari Tbilisi du Georgia yo ki ga ku Kanada yo, i amoi kpuyo pati gu ati du mbembedi na gu gbaria nga Pelly, Saskatchewan du rogo gu papara Kanada du ku dioyo. I avungure rogo gu garã nangia 1928, ani adu sita na mi nangia yangada riyo. Buba akpi adiwi sita mbata fu i batika re, na nina akpi mbure kindi ni fogo gude. Lucy nangia bambata rirani akpi bete agarã kusa ho garãri adu ni nga 17. Fuo gure ngbutuko, ando nangia Nick adi re gbiati awirinami ka ngerafuo rani.

Rogo kura uru sa ho mi adu ni ni tooni gude, gimi aborokporo abire mi ni gbe so dongi sa dagba agu adongi naadu ati yo. I atangbayo kurire nga mi mbu gbe soru, mbiko i aagunde nga u nika sĩ re, ono mi aambunga gbe soru te. Mi asa giire koyo i adu kuhoni, na mi aagianga yo i nitangbayo te. Si nipa ngbarago nga, kerepai ho namangi re te, ono gure nangia gu uru gimi aborokporo aini gupai nga mi angia irangbiängä.

Kumba sa naana ye fuo rani ku kporo afu gu berãpai nga i ndu na mi ku rogo gu sukuru naayugopai fu kura agu agude nga airangbiängä, sidu, ando nga Nick andu na mi ku rogo gu sukuru nga ga airangbiängä naadu Saskatoon, Saskatchewan yo. I aga na mi ku rogo gu rago naima turo ti gimi aborokporo ni kerehe, na wa garãre adu ti gu regbo re gbua nga bisue, mi aima du na bakere gunde. Mi anaandu kaa bi gimi aborokporo sa kinaho i anikisi sukuru ni na ti aregbo ongoda kitö. Niyangaraha, mi awiriki fugo ni bee na rago kini ngba tire ni kerehe kaa ngimbaro na kura agude.

Rogo gu garã nangia 1939, dawire nga Marion nangbefuo Lucy amangi rogatise na Bill Danylchuck, na i ki di re gbiati gu dawire nangia Frances kaa ngerafuo rani. I nangia gu bambata aboro rogo gaani ngbadimokporo aDezire Yekova atungusipai fuyo. Ti gimi aregbo ongoda kitö, i aamanga bakere ome ka yugo gupai fere  i aawirikaha rogo Ziazia Kekeapai yo. Ka pe guhe nga rengo, si aadunga taata ka fura na yo te, mbiko i aainongo fugo ni bee te. Ono wa gopai ayugoho, i aima bi ndikidi nyemu agu apai rogore yo nga ga toro. Mi aini gupai nga ngbanya adu kina bangbanda gupai i aamangaha na gupai Baibiri agumbaha, sidu, mi anaapeka yo wa i anaandu kaa tungusapai. Si aimanga te mi ki idi ka zio bapatiza, na rogo Mbirinvuo ti rameru 5 rogo gu garã nangia 1941, Bill abapatiza re rogo gu ime i agbehe guga yo ku rogo ngbunguru. Gu ime re azere ni kerehe!

Rogo 1946 ho mi akaraga tire ni ku kporo ti regbo ongoda kitö, ani andu tipa bakere dunguratise ku Cleveland du Ohio Amerika yo. Rogo gu bambata uru nga ga gu bakere dunguratise re, adawire aakeka agu apai fere i aagumbaha tipa gupai nga mi rengbe ka pekafuo mbakadapai. Ono tie rogo gu ue uru, mi adu na bakere ngbarago ka kura bara gupai nga badona adu kinaho nga ga airangbiängä na boro adu kina yo naasa gumbapai fuyo ku rogo fugo ni bee. Niyangaraha, mi aima rengba ka gbia ngbarago ti gu mbakadapai re, na si aima ngba ka giarogo gu rengo yo nga ga Ziazia Kekeapai ziazia!

Ti gu regbo re, Ue Vura Nga ga Zegino anyasi ka si aimanga ya na aboro kidu na kiisopa ringara ni kerehe. Mi akaraga tire ba bakere dunguratise yo ki ima diaberã ka ru nyanyaki tipa gimi idapase sukuru yo. Sidu, mi ambu de masa fu bendeere na ki mbu bi bia nga ga sambuo ringara nga gu ani anaabihe na fugo ni bee. Mi ambu rimiso tire a ku rogo agu apumbo nga ga ngbii na ki mbu nduge ku kanisa yo. Agu aboro naamangasunge sukuru yo aadunga na ngbarago te na i aasadi ka gundesi re na ka gumba aziree fere tipa mi aria berãre. Badungu akuare sukuru yo naafura tipa gipai re, ono si afu momu fere mi mangi dezirepai. Agu akuare mi adu na yo sukuru yo wa Androsoff, Norman Dittrick, gbiati Emil Schneider agi rengo niyangaraha, na i nairiso Yekova ni ruruyo da ku areme.

Ho mi anaandu ni ku rogo kura agbata, mi anaatungusapai ti aregbo dunduko fu agu aboro nga airangbiängä. Ni kpiapai, ho mi adu ni Montreal yo rogo gu ba airangbiängä adunguratiyo ku rogoho, mi atungusipai fu Eddie Taeger, nga gu paranga kumba naadu rogo gu gbuu nga ga abatuka. Da kuho ko akpi ni rogo gu garã nasusi, ko adu rogo gu dungurati nga ga fugo ni bee du Laval, Quebec yo. Mi agbia paranga kumba a rimoko angia Juan Ardanez nga guko namangi wisigopai tipa ka ino gupai nga rengo du nga gu pangbanga du rogo Ziazia Kekeapai yo kina wai aboro Beroya amangihe. (Amo. 17:10, 11) Ko aye ku rogo rengo a na kini mangisunge abaakumba ni ruruko Ottawa, Ontario yo daho ko akpi ni.

Rogo gu garã nangia 1950, mi aga ku Vancouver yo. Wa vura duhe nga mi ima kpinyemu tungusapai fu airangbiängä, bangire agonga te ti gupai naamangi ho mi atungusipai ni fu dee nga Chris Spicer nga guri naagia pai agia. Ri aidi gupai nga amagazini naaye furi na  adiwi dũ na ri aida gupai nga mi gbia kumbari nga Gary. Sidu, mi andu ku kpuyo yo, na ani asakipai ni gbangaha gbe ni keka ani pai ti wiri awaraga. Gure nangia gu yangara regbo ani abi tirani na yo da kina fuo bete agarã kusa ho ngbare azere ni nga i abi re dagba rimbasa aboro yo ti regbo bakere dunguratise Toronto, Ontario yo. Gary aandu ka zio bapatiza rogo gu uru re. Gu wenepai namangi fere re atingidi re na pa nyaka gupai nga kaa tungusapai atungusa kindi mbiko ani ainongo wari na gini regbo du rengo nika maa tarãha te.

Kusa, mi akaraga tire ku Saskatoon yo. Mi agbia dee yo naya fere mi yugu Ziazia Kekeapai fu awiiri ue nga agu adegude nangia abi na ni airangbiängä, rimoyo angia Jean gbiati Joan Rothenberger, i angia agude sukuru kina rogo gu bangisa sukuru nga ga airangbiängä mi adu rogoho mbata. Si aaimanga te agu adegude re ki tona ka tungusa gupai i aawirikaha fu agu akurayo i adu na yo sukuru yo. Niyangaraha, adegude bisue rogo gayo riko ada ni aDezire Yekova. Boro sa dagbayo yo angia Eunice Colin. Mbata kusayo mi aima gbia Eunice rogo gu sukuru nangia ga airangbiängä re ho mi aambeda ni ka nyasaha. Ti gu regbo re, ri afu arawa fere na ki sana re singia ani rengbe kadu nga abakure. Ri aye kada kusa nga nyanyakipa papara gimi raka, ri ada ni diare!

Ho na Eunice akurubara gupai ni nga ri aawirika Baibiri, ri aya fu bangerekurii abayugupai sukuru yo wẽ ko asadi ka sosoda ri ri mbuhe. Ko azi agu awaraga ri aawirika pai rogoho. Ono tie, Eunice aima diaberã ka maa berãri kina fuo ga Yekova pai. Ho ri aaida ka zio bapatiza ni, avunguri ape gupai furi nga, “Mo da kindi ni Dezire Yekova, mo naguari kpurani ane!” Ho garãri adu ni nga 17, Eunice aima guari kporo na kura aborokporo sa nangia aDezire Yekova adi ri ku kpuyo yo kaa ngerafuo ri. Ri andu kumbatayo na gari wirikapai na ki zi bapatiza kusa. Ho ani amangi rogatise ni rogo 1960, avunguri aayengo tipa gaani pumbo rogatise te. Ono tie, a wa agarã aasusa, i aye kadu na irisa koyo du ani ni mbiko gaani ida gbiati gu gene ani aasonosa awirani ngbaha.

Wa ani angia agu avunguagude nga airangbiängä, ani asonosi awirani saba nga akumbagude nga aguyo angianga airangbiängä ya. Gipai re aima kpakara, ono ani amangi ome i ini fugo ni bee tipa gupai nga ani naafura na yo wenengai na ka yugo rengo fuyo. Awirina rogo dungurati aundo rani ni bakerehe. Ni kpiapai, kura avunguagude sa ake wiri waraga furani ki ya kura wirani sa aagumba gbegberẽ afugo Bambu Kindo yo. Ani amangipai tipa gupai re nibasa kinaho. Awire biama nga James, Jerry, Nicholas, na Steven namangasunge fu Yekova awere ni ruruyo na adiayo gbiati awiriyo. Agu akumbagude biama re dunduko nga abaakumba. Kurigure, Nicholas na diako nga Deborah naundo na sunge safugo ku rogo fugo ni bee rogo gu be basunge du ringara aNgirisi yo, Steven na diako nga Shannan tigayo namangasunge safugo ku rogo fugo ni bee rogo gu be basunge du Amerika yo.

Mbu diwi sa koyo ani mbedi kada na agarã 40 ku rogo rogatise, Eunice akpi be gu kaza nga kansa. Ri aima du ni ngangarã ri vuru gu kpakarakpakara aregbo re yo dunduko. Gari idapase kuti zingabekpio asari ri ru nyanyaki. Mi nangera kumbatayo tipa gu uru mi nika bi ri berewe.

Rogo Wegebe 2012, mi ati gbengberekere ki kuo, na si ki da nga si naida i niundo re aundo. Sidu, mi aga fuo kura wire na diako. Ani awere nga papara gu Dungurati Nga ga Fugo ni Bee Nga Calgary, mi namangasunge yo kindi ni bakumba. Nirengo, gere nga gu bambata regbo mi nadu rogo gu dungurati nga ga fugo ni bee. Mo bingo gupai re! Nga vuru agu agarã re yo dunduko naatona rogo gu garã nangia 1946, mi adu rogo gu dungurati nga ga pa-Ingirisi, gine naundo re rogo toro yo? Yekova ima kakuti gako kidohe ka ngerafuo awirinyaure. (Tam. 10:14) Mi na tambuahe tipa gu bakere ome nga ga agu aboro naadu na nyemu kaa keka wiri awaraga fere ti regbo adunguratise, ka wirika fugo ni bee na kaa manga ome kaa sapai fere.

Ka pehe guhe nga rengo, kura aregbo kinaho rago anaagberã tire na mi ki idi ka mbu apai dunduko kusayo mbiko mi aagianga rogo gupai yo i anaagumbaha te watadu si aangera wa aboro aruganga tiyo na gu zingo nga ga airangbiängä te. Ono tie, ti agu aregbo re, mi anaaberã kurii agu afugo Petero ko agumbaha fu Yesu nga: “Gbia, ani andú koyo du da ni? Wa du mo du agu apai be ro nga ga nyenye unga.” (Yo. 6:66-68) Wakina gu ngisapai du tipa kura agu awirina nga airangbiängä areme, mi ima wirika gupai nga kadu na zerangbaduse. Mi ima wirika ka pido Yekova na gako riigbu, na awere mi ima gbia undo ti mangaha wo! Awere mi na bakere riahe nga ga toro rogo fugo re yo, na mi nagbia ngbarago ti kodatise na awirina badunguratise yo na ba bakere adunguratise yo rogo fugo ni bee. Nirengo, mi ima raka wene raka tingba gu sunge nga ga Yekova gaani bakerepa Mbori.