1. Gini kpiapai Yesu amoihe fu apefuoko na ginipai i amangihe? (Oni bi gu sura duti kpotoho.)

YESU adu na ruru bipai rogo gako sunge tungusapai yo dunduko auru kpotosende ane, na ko naida apefuoko du na kina gu bangisa ruru bipai re gene tungusapai yo a. (Yo. 4:35, 36) Ho Yesu adu ni na gako abawiriki, i aatungusapai zaaza. (Rk. 10:1, 5-11, 17) Fuo i zi Yesu na ki imiko, nyemu tungusapai agbataka tipa bete regbo ti abawiriki. (Yo. 16:32) Tifuo Yesu zingi be kpio, ko angarasi yo i moiberã yo gbe kuti sunge tungusapai. Tifuo ko ga ku ngbangbaturũ yo, i atungusipai kakaka gbe si ki sa gupai nga avurayo kpakanahe ki ya: “Oni bí, oni hihisi Yerusarema ni gaoni yugopai.”—Amo. 5:28.

2. Waigu Yekova nafu maku kurii sunge tungusapai?

² Yesu angbe kumbatayo fu agu aKristano naadu rogo bambata sa kama agarã wa i aatungusapai, na Yekova aima undo yo. Sidu, badungu aboro naidi na gayo pangbanga. Ni kpiapai, ti regbo Pendekote rogo gu garã nangia 33 Fuo Batikayo Kristo, aboro bangeyo adu wa 3,000 nazi bapatiza. (Amo. 2:41) Na bange abawiriki aasona gbe kina kumbatayo. (Amo. 6:7) Ono tie, Yesu aima gumba gupai kumbatayo nga, badungu aboro nika ida na wene pangbanga ti yangara arame.—Yo. 14:12; Amo. 1:8.

3-4. Tipagine sunge tungusapai narengbe ka kpakara ti ni ni kerehe fu kura aboro, na gini apai ani nika sakapai tipaha rogo gi kekeapai re?

³ Ani dunduko naˈasada kadu na ruru bipai tipa sunge tungusapai. Rogo kura aringara, si ni taataha ka manga gipai re. Tipagine? Bambiko badungu aboro du na nyemu ka wirika Ziazia Kekeapai na mbiko gipai re, agu akurayo nasungo asungo mbata daho i nika gbia Dezire Yekova ni ni wirikipai na yo! Ono rogo kura apapara zegino kuba ni, sunge tungusapai ima kpakara fu abatungusipai ni kerehe bambiko i abingo aboro gbe tii kporo te na agu aboro i abi yo tii kporo ima rengba ka yugo wiri nyemupai tooni gbua tipa Ziazia Kekeapai.

⁴ Ka singia mo naraka rogo gu rago sunge tungusapai naima  kpakara rogoho ni kerehe, si nawira gupai nga, agu aberãpai du rogo gi kekeapai re nika undo ro aundo. Ani nika sakapai tipa agu apai kura awirina namangihe tipa ka gbia badungu aboro gbe gene gayo sunge tungusapai yo. Na ani nika sakapai tipa ndu gupai si aida ani nye ti ni na ruru bipai singia aboro nadia gaani pangbanga kugume watadu i adianga ha te.

5. Gini akpakarapai badungu aDezire Yekova agbiatiyo na ni?

⁵ Si nakpakara kina kumbatayo fu dungu aDezire Yekova tipa i gbia aboro rogo akpuyo. Kura abatungusipai naraka rogo agu aba i abanda akporo abanda rogoho gbe watadu agu aba i akiso angbadimoho akiso. Agu akporo re watadu agu aba re ima rengba kadu na aboro ho ngbadimo nabandaha, nga aguyo ambunga aboro i rimi ku rogo agu akporo re watadu ku rogo agu aba re ya kina gu ka agu aboro naraka yo idihe fuyo. Kura abatungusipai natungusapai atungusa kporo na kporo, ono i nabi aboro gbua ni kina beteyo tii kporo. Berewe a, kura abatungusipai natungusapai rogo agu aba kina bete aboro araka rogoho. Agi abatungusipai re ima rengba ka ndu tipa gbanga regbo tipa ka gbia boro sa—nga gu ni naima rengba ka zanga du tii kporo a! Ka si du nga ani nagbiatirani na ngbatunga akpakarapai wa gere, si naida ani naandu kindi kumbatayo kaa tungusapai. Ginipai rengbe ani ka mangaha ka diabe agu akpakarapai re na gaani sunge tungusapai kidu na wene surungbaha?

6. Waigu du abatungusipai wakina abaziatĩo?

⁶ Yesu aringbisi sunge tungusapai kuti gu sunge nga ga baziatĩo. (Mk. 1:17) Kura abaziatĩo kinaho rengbe ka mangasunge zio atĩo tipa dungu arame ka i aziongo atĩo ya. Ono omeyo abatanga te, i naˈaria gu gene i amangasunge zio atĩo ngbaha. I naˈaria gu regbo, gu ba, watadu gu gene i azio atĩo ngbaha. Ani ima rengba ka manga ngbatunga aˈariapai wa gure rogo gaani sunge tungusapai. Oni bingo agi aberãpai re.

7. Gini sangbanapai rengbe kadu ka ani atungusapai ti aregbo ni bakiakia?

⁷ Oni asadi ka ndu fuo aboro ti aregbo ni bakiakia. Ka ani aatungusapai ti gu regbo rengbe ani ka bi aboro kporo, si nika sa gupai nga ani fura na badungu aboro. Kurapai berewe nga, aboro ninaanyenga ku gene ta yo te, i naaga aga ku kporo yo! Dungu awirina ninaatungusapai tingbafuo bebere uru watadu nyemu, mbiko agu aregbo re i naagbia dungu aboro ti ni. Kurii gure, airakporo ima rengba kadu na rengba gbe na kadu regerege ka fura ti agu aregbo re. Watadu mo ima rengba ka asada ka manga gupai gu bakumba du rimoko nga David ninaamanga ha. Ko ape gupai nga, fuo tungusa yo pai rogo dagbarago tipa bete regbo, ko na gu boro i nikuru na ni gene tungusapai yo ninaakaraga tiyo berewe ku rogo agu akporo i naabingo aboro tiihe ya. Ko aya, “Kina ngbare ninaazera ka bi wai nge aboro tii kporo ho ani ninaakaraga tirani ni berewe ni uehe ku rogo agu akporo re.” *

8. Waigu rengbe ani ka mangasunge na Batungusipai 11:6 nibipa gaani sunge tungusapai?

⁸ Si naida ani naamanga asadatise kindi tipa kaa gbia aboro tii kporo. Gere nga gupai ani awirikaha ti gu veresi du mburu gi kekeapai re riihe. (Oni gedi Batungusipai 11:6.) David i nifura tipa ko kusayo aambunga gbata aboro te. Rogo kura kporo sa, ko agbia irakporo nga gu ni ko aima dogoda bara dunguhe zanga gbia ni. Gu kumba ko agbia ko aima ida ka sakapai tipa Ziazia Kekeapai, na ko aya, “Mi ima raka ane tipa agarã wa muambe, na mi aabingo Dezire Yekova ni naye ku kpure ane te.” David  aya, “Ho mo adogoda ni fuo aboro na niyangaraha mo kini ye ka gbia yo kporo, dedede, i naadegatuyo adega kuti gu pangbanga ani atungusaha.”

9. Waigu kura aDezire Yekova agbia agu aboro si naima mbu ka gbia yo tii kporo?

⁹ Mo asadi kura ba du kia. Tipa gupai nga ka gbia agu aboro si naima mbu ka gbiayo tii kporo, kura abatungusipai ima aria agu aba i atungusapai rogoho. Ni kpiapai, tungusapai bangiri gene na mangasunge na ũtura awaraga ima yugo tihe ni gu gene tungusapai naima ngba gbe tipa ka gbia agu aboro naraka rogo kikindigi abambu nga agu abambu i aidanga gu sunge tungusapai nga ga kporo na kporo rogoho ya. Gi gene tungusapai re nasa aDezire Yekova i gbia agu aboro naraka rogo agu abambu re. Na berewe a, badungu abatungusipai ima bi gupai nga aboro na nyemu ka fura gbe watadu ka dia gaani awaraga rogo agu aba du na dungu aboro rogoho na babagaahe yo. Floiran nga babi adungurati Bolivia yo aya: “Ani ninaandu ku babagaahe yo bangbanda gu saa nga saa 1:00 na 3:00 uru, nga gu regbo angenga dungu apai gbe ti ababagiahe ya. Ani nidu na wene fugodagbase na aboro na zavura ki tona wisigo Ziazia Kekeapai na yo.”

10. Gini kurapai berewe rengbe mo ka mangaha tipa ka tungusapai fu aboro?

¹⁰ Mo asadi gu gene tungusapai du kia. Ani yanga mo ima asada bara dunguhe ka gbia boro. Mo ima ndu fuo ni ti aregbo ni bakiakia ono ka mo agbianga ni tii kporo ya. Ya mo kura agene ho rengbe mo ka gbia ngbatunga gu boro re ngbaha? Katarína aya, “Mi naake awaraga fu agu aboro mi agbianga yo kporo ya, kini peke agu apai rogoho ka mi nipehe fuyo ho ka mi nigbia yo ni.” Ginipai ani awirikaha ti gari kpiapai? Mo asadi ka gbia aboro dunduko na wene pangbanga rogo gamo dagbarago,  rogo ai gu gene rengbe mo ka mangaha ngbaha.

11. Tipagine adunga nyemu gaani pangbanga ti ni ti kura aboro ya?

¹¹ Kura aboro kinaho adunga na nyemu gaani pangbanga tiyo ya. I abingo ho nga si naida i inipai tipa Mbori watadu Ziazia Kekeapai te. I aidanga kuti Mbori te mbiko gu bakere arungo i abihe si nimangi rogo zegino. I aidanga kuti Ziazia Kekeapai te mbiko gu biriki nga ga abarumbatayo rogo pambori nga aguyo naya i naraka kuti agu apai du rogo gu buku re. Agu akurayo naberãpa gayo asunge, gayo aborokporo, watadu gayo akpakarapai ti aregbo dunduko na i abingo ho nga Ziazia Kekeapai rengbe ka undo yo te. Waigu rengbe ani ka banda gaani ngbarago ho agu aboro ani atungusapai fuyo aberãnga gupai ni nga gaani pangbanga na nyanyakipaha ya?

12. Waigu rengbe mangapai kuti agu afugo du rogo AFiripoio 2:4 ka undo rani gene tungusapai yo?

¹² Mo yugu gupai nga mo naberãpa aboro aberã. Badungu agu aboro ninaadunga na nyemu gaani pangbanga tiyo ti bambata regbo ya, ninaadia gaani pangbanga adia kusa kugume mbiko i abi gupai nga batungusipai aaberãpa yo aberã. (Oni gedi AFiripoio 2:4.) Ni kpiapai, David i nifura tipa ko kusayo aya, “Ho boro niya ni ni na nyemupai te, ani ninaamaa gaani Ziazia Kekeapai gbiati gaani awaraga ku rogo gaani amangu na ki ya: ‘Mi na nyemu ka ino ndu gupai du mo ti ni na gi bipai re.’” Ho boro ayugo gupai ni nga ni naberãpa aboro aberã, agu aboro re nainoho aino. Bangiriyo ima rengba ka go ti gupai nzunzu ani agumbaha, ono si nawira gupai nga, i nika tingidapa wai atingida ani ayugu gupai nga ani naberãpa yo aberã. Zavura ka airakporo ambunga gene furani ani fura ya, ani ima rengba ka yugoho ro wai ani amangapai na wai du kpakpuraniyo nga ani naberãpa yo aberã.

13. Waigu rengbe ani ka aria gaani pangbanga si ndu na gu zingo nga ga ai irakporo?

¹³ Ani nayugoho nga ani naberãpa irakporo aberã ho ani aˈaria gaani pangbanga ni si ndu sa na gu zingo gbiati nyemupai nga ga irakporo. Ni kpiapai, ya mo ani nabinga gopai ho nga agude naraka rogo gu kporo re? Avunguagude ima rengba kadu na nyemu agu arugute du rogo Ziazia Kekeapai yo tipa wai ka sonosa agude watadu tipa wai kadu na gu ramukporo du na ngbarago. Ya mo ani bi dungu arifungura ti ga airakporo angbadimo? Ani ima rengba ka diaberã ka fura tipa gu gbegberẽ apai namanga rogo zegino na wai si asa aboro i du na gunde. Irakporo ima rengba kadu na ngbarago ka gia gupai nga, gbegberẽ apai nika nyasa anyasa dunduko kusayo. Ai gu regbo mo agbia agu aboro naida ka degatuyo foro, mo asadi  ka undo yo i rugutiyo na pa wai rengbe agu arugute nga ga Ziazia Kekeapai ka undo. Katarína i nifura tipa ri kusayo aya, “Mi naatingidapa wai atingida rengo asa gimi raka si du ni bawenehe.” Ni sangbana gipai re, Katarína ninaafura na kido, na agu aboro ri naafura fuyo ninaabihe abi.

14. Ringbisihe kuti Asanza 27:17, waigu agu aboro kuru gene tungusapai yo sa narengbe ka undo tiyo dagbatiyo?

¹⁴ Mo gbia undo be kura aboro. Rogo bambata sa kama agarã, Pauro ayugupai fu Timoteo tipa wai ka tungusapai na ka yugopai, na ko angarasi Timoteo ko undo kura aboro kina ngba gu gene re. (1 Kor. 4:17) Wakina Timoteo, ani rengbe ka gbia undo be agu aboro du na bakere inohe rogo gaani dungurati. (Oni gedi Asanza 27:17.) Oni bingo gu kpiapai nga ga kura wirina sa du rimoko nga Shawn. Tipa bete regbo, ko amangisunge abazakigene rogo gu gbaria badungu aboro aaida na kina gayo pambori rogoho. Wai du ko abanda gako ngbarago? Ko aya, “Ai gu regbo rengba anidu, ani anaatungusapai na boro. Ho ani anitungusipai ni rogo kporo, mbata fu ani ndu ku rogo kura kporo, ani anaadia regbo tipa ka undo tirani tipa wai rengbe ani ka mbakada gaani birĩ gene yugopai. Ni kpiapai, ani anaafura tipa gupai irakporo nipehe na wai ani nikaragapai. Na tifuo gure, ani ki sakipai tipa wai rengbe ani ka karagapai kia ka ani gbiatirani na ngbatungapai wa gure berewe.”

15. Tipagine du kparakpee ti ni na nyanyakipaha rogo gaani sunge tungusapai?

¹⁵ Mo kpari fu Yekova tipa undo. Mo sana Yekova tipa undo ti ai gu regbo mo atungusapai. Zanga gu undo nga ga gako ziazia toro du na ome ti ni, boro ho dagbarani yo rengbe kadu na rengba ka manga ai pai te. (Tam. 127:1; Rk. 11:13) Ho mo asana Yekova ni tipa undo rogo kparakpee yo, mo pe kina boro gupai nzunzu mo aidaha. Ni kpiapai, mo sanako ko nungusi ro fuo ai gu boro naida ka wirikapai tipa ko nga gu ni du regerege ka degatuni. Fuo gure, mo mangipai ringbisihe kuti gamo kparakpee ni tungusa mo pai fu agu aboro dunduko mo agbia yo.

16. Tipagine du wisigopai nisase ti ni na nyanyakipaha tipa gaani sunge tungusapai?

¹⁶ Mo di regbo tipa wisigopai nisase. Fugo Mbori naya: “Oni kpária pa gu he nga ga Mbori nyemu he du ni wene he, nzunzu, ni ziazia ha.” (Rom. 12:2) Ho ani amanga wisigopai ni, ani naye ka ino Mbori bakere gbe na mbiko gipai re, ho ani nikaa fura ni fu kura aboro tipa ko, i nika bihe abi nga ani ima ida nzunzu kuti gupai ani apehe fuyo. Katarína, i nifura tipa ri kusayo aya: “Barambeda kusayo, mi aye ka rugatire na gupai nga, si naida mi nyakasi gimi idapase nibipa kura abangua ayugopai nga ga Ziazia Kekeapai. Mi amangi wisigopai sirisiri tipa gu gopai nayugo gupai nga Bakusiahe kina ti ni, na Ziazia Kekeapai nzunzu nga Fugo Mbori, na Mbori na kina riigbu beko nga gu narukuba ko areme.” Katarína ape gupai nga gari wisigopai nisase anyakasi gari idapase na ki kiisi gari ngbarago gene tungusapai yo.

17. Tipagine Yesu abanda ruru bipai ti ni rogo gako sunge tungusapai yo?

¹⁷ Yesu anye na ruru bipai na kini tungusipai kindi si ki vura du vurũ nga kura aboro kinaho naaidanga ka degatuyo kuti gako pangbanga ya. Tipagine? Ko aima ino gupai nga, si aaida aboro ini rengo, na ko kini idi ka undo badungu aboro. Ko aima ino gupai a nga, gu kura aboro naadeganga tuyo mbata ya aima rengba ka degatuyo kusa. Oni bingo gupai namangi rogo gako ngbadimo kporo. Ti regbo ga Yesu tungusapai naabaha nga gu naadu tipa agarã biata na beberehe, boro ho dagba awirinako yo naada ni gako bawiriki te. (Yo. 7:5) Ono wa si avura du wo, tifuo ko zingi be kpio, i aima da ni aKristano.—Amo. 1:14.

18. Tipagine ani andu ti ni kindi kumbatayo kaa tungusapai?

 ¹⁸ Ani ainongo agu aboro nzunzu nika ida na agu arengo nga ga Ziazia Kekeapai ani ayugoho te. Si nadia regbo adia ni gbangaha fu kura aboro tipa i tona ka wirika rengo. Zavura agu aboro aidanga ka degatuyo furani ya, nabi gaani wene mangaapai abi gbiati gaani ruru bipai na i ima rengba ka tona ‘taasa rimo Mbori.’—1 Pet. 2:12.

19. Ringbisihe kuti 1 AKorindo 3:6, 7, ginipai si aida ani inihe?

¹⁹ Wa vura duhe nga ani natungusapai na kini yugupai, si naida ani tingidi gupai nga, Mbori du nasa gupai nga ani du na diabese rogo gaani sunge yo. (Oni gedi 1 AKorindo 3:6, 7.) Getahun nga wirina Etiopia yo aya: “Tipa agarã naima susa 20, mi nangia gu yangara Dezire Yekova naadu rogo gu ba mi aaraka rogoho. Ono awere, abatungusipai ima du ane nga 14. Aguyo bawe na biata naima zio bapatiza kodihe na diare gbiati awirani biata. Gu bange aboro ninaaye kupati gaani adunguratise niidu dedede nga 32.” Getahun na ngbarago nga ko aandu kindi kumbatayo kaa tungusapai kini pidi Yekova na zerangbaduse tipa ko gbe agu aboro du na ruru ngbaduyo yo ku rogo Gako riigbu!—Yo. 6:44.

20. Ngba gini gene du ani wakina abatasi aboro?

²⁰ Yekova nabi aboro dunduko na nyanyakipa yo. Ko nafu gu momu furani nga ga mangasunge wa sa na Wiriko tipa ka dungura aboro dagba rikaaboro yo dunduko mbata fu digido gi sino raka re da. (Agai 2:7) I rengbe ka ringbisa gaani sunge tungusapai kuti sunge batasa aboro. Ani wakina agu aboro i akeda yo i ndu ka batasa agu aboro kongo rogo due ge dahabu. Wa vura duhe nga kina bete age dahabu i narengbe ka biyo ni unga yo, gu sunge agu aboro re dunduko namangihe na nyanyakipaha gbe. Kina gu bangisapai re du tipa gu sunge ani amangaha rogo gaani sunge tungusapai. Ani ainongo bange aboro wai nye kindi koyo i nika batasa yo be ga Satana zegino te. Ono Yekova ima rengba ka mangasunge na ai boro sa dagbarani yo tipa ni undo yo. Kura wirina sa nga Andreas naraka Bolivia yo aya, “Ho boro awirika rengo ni na ki zi bapatiza, si wo mbiko gupai nga badungu aboro namangi sunge wa sa tipa ka undo ni.” Ani dunga na kina gu bangisa ruru bipai re tipa gaani sunge tungusapai. Ka ani mangihe wo, Yekova nika fu maku furani na gaani sunge tungusapai nika du ni mburu ndikidi ngbarago furani.