1. Ginipai nazeresi ngbaro ho mo aasadi ni ni bambataha ka gumba gu pangbanga nga ga Baibiri fu kura aboro?

YA MO mo natingidapa gu regbo mo abi gupai nga mo ima gbia gu rengo du vuru Ziazia Kekeapai yo? Si adu taata tipa mo rugutiro na agu apai dunduko mo aawirikaha rogo Ziazia Kekeapai yo! Mo aberẽ gupai nga, aboro dunduko nika du na ngbarago ka wirikapai tipa agu ayugopai mo naye ka ida kutini. Mo aidi kuti gupai nga, gu pangbanga du rogo Ziazia Kekeapai yo nika fu wene raka fu aboro awere gbiati bawene maabangirise kumbatayo. (Tam. 119:105) Sidu, mo agumbapa agu arengo mo awirikihe re fu abakureamo gbiati agumero. Ono ginipai naamangi? Kina ngbaro nazere ka bi gupai nga dunguyo aima ká gupai mo agumbaha fuyo.

2-3. Waigu badungu aboro amangipai na Yesu ti ragoko?

² Si aidanga ngbarani zere ho kura aboro asoga gu pangbanga ni ani atungusaha te. Ti regbo Yesu, badungu aboro aima ká ko, wa si avura du vurũ nga ko aamanga iiriwoapai nga gu naayugo gupai nga Mbori adu kina kugiiko. Ni kpiapai, Yesu azingisi Razaro be kpio—nga gu iiriwopai agu aboro naasoga ko aarengbanga ka tikangoho ya. Wa si avura du wo, ga aYudo abarumbatayo aaidanga kuti gupai nga Yesu nga Masiya te. Zavura i aidi ka imo aYesu na Razaro!—Yo. 11:47, 48, 53; 12:9-11.

³ Yesu aima ino gupai nga, badungu aboro nika ká ka ida kuti gupai nga ko nga Masiya. (Yo. 5:39-44) Ko agumba gupai fu gu badona abawiriki nangia ga Yoane Bafu Bapatiza yo nga: “Boro maku [ngbarago] nga gu ni abi nga ũkota ti re ya.” (Mt. 11:2, 3, 6) Tipagine badungu aboro aká Yesu ti ni?

4. Gini apai ani nika sakapai tipaha rogo gi kekeapai re?

⁴ Rogo gi kekeapai re na gu nika ngbe tifuoho, ani nika sakapai tipa ndu agu apai badungu aboro rogo bambata sa kama agarã aadunga ti ni na idapase kuti Yesu ya. Ani nika bi gu ndupai  a badungu aboro areme aká gaani pangbanga ti ni. Gu nyakipaha gbe nga, ani nika wirikapai tipa ndu gupai rengbe ani kadu ti ni na nyanyaki idapase kuti Yesu tipa gupai nga, ka pai kánga na ani ti du ni apefuoko ya.

5. Tipagine kura aboro arengbe ka berã gupai ti ni nga, Yesu nangia gu Masiya i agumbapa ko te?

⁵ Badungu aboro naká Yesu mbikopa gu ba ko asono rogoho. I aima ida kuti gupai nga, Yesu angia wene bayugupai na ko aamanga iiriwoapai. Ono ko adu fuyo gbua wa wiri rungorungo bakpengua. Ko aye Nazareta yo, nga gu gbata aboro aima rengba ka berã gupai nga paha anyakanga te. Zavura Natanaere nga gu ko naye kada ni ga Yesu bawiriki ape gupai mbata nga: “Ka wene he kuru Nazareta yo?” (Yo. 1:46) Si ima rengba kadu nga, Natanaere aakpingo nyemu gu gbata Yesu araki rogoho te. Watadu si ima rengba kadu nga, ko aaberãpa gu sangbanebi du rogo Mika 5:2, nga gu nagumba gupai kumbatayo tipa Masiya nga, i nika vungako Betereme yo angianga Nazareta yo ya.

6. Ginipai si aaida si undo aboro ti rago Yesu tipa i ini ko ni Masiya?

⁶ Ginipai Ziazia Kekeapai agumbaha? Gu sangbanebi nga ga Yesaya agumba gupai kumbatayo tipa Yesu nga, avurako amaanga berãyo tipa “gu futufutuapai du tipa ngbatunga [Masiya] te.” (Yes. 53:8, NW) Sangbaanebi aima fura tipa ngbatunga gu futufutuapai re kumbatayo. Ka agu aboro re adi regbo ka wisigo agu arengo dunduko naadu ho, ka i aima rugatiyo na gupai nga, i avungu Yesu Betereme yo na ko aye rogo ngbatunga Bakindo Davide. (Rk. 2:4-7) Sidu, i avungu Yesu rogo gu ba i aima gumbapaha kumbatayo rogo Mika 5:2. Ono ga agu aboro kpakarapai re nzunzu angia gine? Aboro amangi diaberã ni ipiipihe. I aadunga na arengo dunduko beyo te. I aká Yesu mbiko gipai re.

7. Tipagine badungu aboro aká ga Yekova aboro ti ni areme?

⁷ Ya mo ani nabi kina gu bangisapai re areme? Ii. Badungu ga Yekova aboro adunga ni airakumuko watadu ni nyanyakipa aboro ya; sidu, badungu aboro naberã gupai nga, i nga tatamana “tatamana aboro ni airainahe te.” (Amo. 4:13) Kura aboro naberã gupai nga, ga Yekova aboro arengbanga ka yugo Ziazia Kekeapai te mbiko i andunga tipa gu nyanyakipa asukuru nga ga apambori te. Kura aboro nape gupai nga, aDezire Yekova nga “gu pambori nga ga Amerika,” ono gu rengo duho nga, badungu aDezire Yekova arakanga Amerika yo ya. Berewe a, i ima gumba gupai fu kura aboro nga, aDezire Yekova aidanga kuti Yesu te. Vuru agu agarã yo ninaasusa, aboro ninaayamba rani nga “akomunisti,” “abamoi nga ga Amerika,” na “agu aboro naye na kparakaro ku dagba aboro.” Sidu, badungu aboro aidanga kada ni aDezire Yekova te mbiko i nagia agi apangbanga re na ka i ainongo gu rengo du tipa ga Yekova aboro ya.

8. Ringbisihe kuti Amokedi 17:11, ginipai si aida aboro mangihe ka i aida ka ino ada nga ga Mbori amoyambu areme?

⁸ Ginipai rengbe ka rugusa boro ti zanga ni gani idapase? Si naida aboro wisigi agu arengo duho. Gure nangia gupai gu bake wene pangbanga nangia Ruka adiberã ka mangaha. Ko amangi ome ka wisigoapai “nzunzu ti tonatona ha dunduko.” Ko aaida agu aboro naageda gu buku ko akehe “ini he ya rengo nangia agu apai” i agihe tipa Yesu. (Rk. 1:1-4) Agu aYudo naadu rogo gu gbata naadu mbata nga Beroya adu wakina Ruka. Ho i agi wene pangbanga ni ni bambataha tipa Yesu, i aringbisihe na Kuru Ndika tipa ka bihe singia agu apai i ayuguhe fuyo angia rengo. (Oni gedi Amokedi 17:11.) Wakina gure a, si naida aboro wisigi agu arengo duho tipa pai. Si naida i ringbisi agu apai ga Mbori aboro ayugoho fuyo na gupai Ziazia  Kekeapai agumbaha. Si naida i wisigipai a tipa agu apai ga Mbori aboro namangihe ti gi gaani regbo re. Ka i mangi wetekapai tipa agu arengo duho, i ambunga kparakaro watadu agu apai aboro agumbaha tipa si nangi yo te.

9. Ginipai namangi ho Yesu aká ni ka manga gupai i aino pai ti ni ngbangbaturũ yo?

⁹ Gu kura aboro ti rago Yesu aarengbanga be gako bawene ayugopai te. I aaida kura badungu apai. I asanako tipa ko mangi gupai nika yugo gupai nga ko nga Masiya ni yugoko “gu pai i aina pai ti ni ngbangbaturũ yo.” (Mt. 16:1) Isoke i asanako ko mangi gipai re mbiko gupai i agedihe rogo Daniere 7:13, 14. Ono tie, anga gure nangia ga Yekova regbo tipa gu sangbanebi re digisitihe te. Gupai Yesu aayugoho aima rengba tipa ka sa yo i idi kuti gupai nga ko angia Masiya. I aká ko mbiko ko aká ka manga gu iiriwopai i aaidaha.—Mt. 16:4.

10. Waigu Yesu adigisi gupai Yesaya agumbaha tipa Masiya?

¹⁰ Ginipai Ziazia Kekeapai agumbaha? Gu nebi nangia Yesaya akepai tipa Masiya ki ya: “Ko akpara nga te, ko apaa nga ku ari te, i agia nga fugoko ti gene bakporo a te.” (Yes. 42:1, 2) Yesu amangi gako sunge tungusapai zanga gbe berã aboro kuti ko. Ko aamenga kikindigi ayekaru te, na ko aavonga gu kparakpara aroko nga ga apambori watadu ka ida aboro naayamba ko na nyanyakipa arimo nga ga pambori te. Ti gu regbo i aasarangbanga Yesu, Yesu aká ka manga iiriwopai fu Bakindo Erode wa si avura du vurũ nga gako raka adu ngba kerepai yo. (Rk. 23:8-11) Yesu aima manga bete iiriwoapai, ono gupai ko amoiberã ko tipaha angia tungusa wene pangbanga. Ko agumba gupai fu gako abawiriki nga: “Si du mi [aye] ti ni.”—Mk. 1:38.

11. Gini iraira aberãpai du kura aboro na ni areme?

¹¹ Ya mo ani nabi kina gu bangisapai re areme? Ii. Areme, gupai rago angba ti badungu aboro na ni nga, kikindigi bawene mekemeke abambu nga ga apambori, agu abarumbatayo rogo apambori du na nyanyakipa arimo riyo, gbiati agu apumbo bangiri badungu aboro naima go ti gupai nga, mburuhe aainganga yo du aKristano ni te. Ono agu aboro nandu ku pati agu adunguratise nga ga apambori re awirikanga  dungu apai tipa Mbori na gako ringbisapai te. Agu aboro nandu tipa gu gaani adunguratise nga ga aKristano nawirikapai tipa gupai Yekova akpinyemuhe berani na wai ka mangapai kuti gupai ko akpinyemuhe. Gaani aBambu Kindo ni gigirihe na ni iriirihe, ono i ambakadanga ha na gu kerekere geno ahe naba iriwo rago ti aboro te. Agu aboro nangbembatayo rogo apai yo avodanga kparakpara aroko te, na i adianga kikindigi arimo kurii yo te. Fugo Mbori nga mburu agu apai ani ayugoho na kini idi kutini. Wa vura duhe wo, badungu aboro areme naká gaani pangbanga mbiko gupai nga gaani gene irisombori ima du ni wiri taataha gbe na gupai ani ayugoho andunga sa na gupai i aida ka giaha te.

12. A wa i nasakihe rogo AEbere 11:1, 6, si naida ani me gaani idapase riimburu gine?

¹² Waigu rengbe ani ka ne kota ki zanga mbu pekafuo Yesu? Gu mokedi nangia Pauro agumba gupai fu agu aKristano naadu Roma yo nga: “Idapase aye be giapai, giapai be ga Kristo pai.” (Rom. 10:17) Sidu, ani nasonosa gaani idapase ni wisigo ani Ziazia Kekeapai, angianga ni manga ani agu apumbo nga ga apambori nga gu Ziazia Kekeapai ayugo gupai nga si ni irairaha ka si vura du nga agi apumbo re ni bawenehe vurũ ya. Si naida ani sonosi nyanyaki idapase riimburu ndikidi inohe bambiko “zanga idapase ga boro pai arengba nga na ngba bangiri Mbori te.” (Oni gedi AEbere 11:1, 6.) Sidu tie, si aidanga ani bi kina iiriwopai mbata ngbangbaturũ yo ani kini ru ka bihe nga ani ima gbia rengo te. Pa wisigo ani agu ayugopai nga ga Ziazia Kekeapai nga gu nanyakasa gaani idapase ima rengba ka yugo gupai furani nga ani ima gbia rengo na ani ki di ai kapa kusayo.

13. Ginipai nasa dungu aboro i ká Yesu?

¹³ Ti rago Yesu, ngba agu abawiriki nangia ga Yoane Bafu Bapatiza yo azere bambiko ga Yesu abawiriki anaaginongo riahe te. Yesu asaki rogo gupai yo nga, ndupai ho tipa i naagino riahe mbuko kindi ni unga ko te. (Mt. 9:14-17) Zavura aFarusi na kura asogo Yesu asogoko mbiko ko aapekanga fuo gayo asino atitase te. I adu na zinga ho ko asia ni ka husa kazakaza aboro Rago Sabiti. (Mk. 3:1-6; Yo. 9:16) I  anaagumba gupai nga i nairisa gu Ndiko nangia ga Rago Sabiti; ono i abihe nga gbegberẽpai ngaha ka bagaahe yekaru yo te. I adu na bakere zinga ho Yesu azingi ni mbiko gipai re. (Mt. 21:12, 13, 15) Na agu aboro Yesu aatungusa pai fuyo naadu rogo gu bambutiria nangia ga Nazareta adu na zinga mbiko Yesu amangisunge na gu kpiapai naadu rogo gu pangbanga nangia ga aYisaraere tipa ka yugo wai i adu ni aboro gbangbati na ni agu aboro naadunga na idapase ya. (Rk. 4:16, 25-30) Badungu aboro aká Yesu mbiko gupai nga ko aamanganga gupai i aberẽhe nga ko nika mangaha te.—Mt. 11:16-19.

14. Tipagine Yesu abisirapa agu asino ti ni nga ga aboro nga gu naadunga ringbisihe kuti Ziazia Kekeapai ya?

¹⁴ Ginipai Ziazia Kekeapai agumbaha? Yekova agumba gupai vurube gu gako nebi nangia Yesaya nga: “Bambiko wa agi aboro nambeda kono du mi ni re, ki niirisi re ni kina ngbayo na ni kpotongbayo a, ono kpotoyo yo ki du ti re tuturũ, gayo gunde ti re nga kina gu rugute nga ga aboro i ayugu he ayugo fu yo.” (Yes. 29:13) Si aruaru nirengo fu Yesu ko bisirapa agu asino naadunga kuti Ziazia Kekeapai ya. Agu aboro naayugo gupai nga, agu asino nga ga aboro paha anyaki kisusi Ziazia Kekeapai aká Yekova gbiati gu boro ko akedi ni ni Masiya.

15. Tipagine badungu aboro aidanga na aDezire Yekova ti ni areme ya?

¹⁵ Ya mo ani nabi kina gu bangisapai re areme? Ii. Badungu aboro nidu na gberãrago ho aDezire Yekova akodanga tiyo ni na yo kaa iriso agu asino mangaapai adunga ringbisihe kuti Ziazia Kekeapai ya wa gu nga, iriso uru batikase gbiati Krisimasi. Agu akurayo na zinga mbiko gupai nga aDezire Yekova akodanga tiyo na yo rogo agu apumbo nga ga ringara watadu kaa manga agu agene kpara boro adunga kuti Fugo Mbori ya te. Agu aboro du na zinga kuti aDezire Yekova mbiko agi andu apai re ima rengba ka ida kuti gupai nzunzu nga Mbori naida aida na gu gene i airisoko ngbaha. Ono i arengbanga ka sa ngbarago tiko ka si du nga i nakpi kina nyemu agu ayugopai nga ga zegino kisusi agu ayugopai du ziazia rogo Ziazia Kekeapai yo te.—Mk. 7:7-9.

16. Ringbisihe kuti Atambuahe 119:97, 113, 163-165, ginipai si aida ani mangihe na ginipai si aida ani nehe?

¹⁶ Waigu rengbe ani ka ne kota ki zanga mbu pekafuo Yesu? Si naida ani sonosi bakere nyemuse tipa ga Yekova andiko na arugute. (Oni gedi Atambuahe 119:97, 113, 163-165.) Ka ani kpinyemu Yekova, ani nika soga agu asino mangaapai nafu gberãrago fuko. Ani ambunga ai pai si du na nyanyakipaha kisusi gaani nyemuse tipa Yekova te.

17. Ginipai badungu aboro ti rago Yesu aamaabangiriyo nga Masiya nika mangaha?

¹⁷ Gu kura aboro ti rago Yesu aaida ariapai rogo zogarago. I adu na gu maabangirise nga Masiya nika kusa yo tiibe gu zogarago nangia ga aRomo nga aguyo naarungosi yo. Ono ho i aasadi ni ka maa Yesu ni gayo bakindo, ko aima ká. (Yo. 6:14, 15) Abarumbatayo rogo pambori gbiati kura aboro aagunde nga, Yesu nika asada ka aria zogarago na aRomo nika du na zinga ki di gu ome i afuhe fu abarumbatayo rogo pambori re. Bambiko wa badungu aYudo adu na bakabangirise tipa kina birĩ zogarago, i aká Yesu.

18. Gini asangbaanebi nga ga Ziazia Kekeapai du tipa Masiya dungu aboro akáha?

¹⁸ Ginipai Ziazia Kekeapai agumbaha? Wa vura duhe nga, dungu asangbaanebi aima gumba gupai kumbatayo nga Masiya nika ngia bakere Badibepai, kura asangbaanebi aima yugo gupai nga, ko nika ngia gu bambata boro nika kpi tipa gaani aingapai. (Yes. 53:9, 12) Sidu, tipagine aYudo adu ti ni na iraira aberãpai tipa Masiya? Badungu aboro ti rago Yesu  naaidanga na ai agu asangbaanebi naafunga kidohe tipa ka digiso gayo akpakarapai ti gu regbo re ya.—Yo. 6:26, 27.

19. Gini iraira abipai nasa dungu aboro i ká gaani pangbanga?

¹⁹ Ya mo ani nabi kina gu bangisapai re areme? Ii. Badungu aboro areme nasoga rani mbiko ani naká ka rimiso tirani ku rogo agu apai nga ga birĩ-zogarago. I naida gupai nga ani bawaraga ti regbo bawaraga. Ono tie, ka ani sia wiri boro ni du ni bazogo kurirani, gure nga ani naká Yekova. (1 Sam. 8:4-7) Aboro ima rengba ka berã gupai nga, si naida ani naameka asukuru gbiati abambungua na kini mangi agu apai nga gu nafu undo fu aboro rogo dagbarago. I naká gaani pangbanga mbiko ani namanga ome nyanyaki tipa kaa tungusapai, kuba gupai nga ka asada ka mbakada agu akpakarapai du awere nga ga zegino.

20. A wa agu afugo Yesu du rogo Matayo 7:21-23 ayugoho, ginipai si aida ani moiberãrani kutini?

²⁰ Waigu rengbe ani ka ne kota ki zanga mbu pekafuo Yesu? (Oni gedi Matayo 7:21-23.) Si naida ani moiberãrani kuti manga gu sunge Yesu afu zinahe furani ani mangihe. (Mt. 28:19, 20) Si aidanga ani gbeberã rani kuti agu apai nga ga birĩ-zogarago gbiati asada ka mbakada agu akpakarapai nga ga zegino te. Ani ima kpinyemu aboro, na ani naberãpa gayo akpakarapai aberã, ono ani ima ino gupai nga, gu wene gene ngba kisusi rengbe ani ka undo akuarani ngbaha nga niyugo ani pai fuyo tipa ga Mbori Kindo na niundo ani yo i sonosi pabakure na Yekova.

21. Ginipai si aida ani diberã ka mangaha?

²¹ Rogo gi kekeapai re, ani ima sakapai tipa nduapai biama nga gu nasa dungu aboro rogo bambata sa kama agarã i ká Yesu na nga gu rengbe ka sa kura aboro areme ka i pekenga fuo Yesu ya. Ono ya mo gere nga gu yangara apai si aida ani nehe? Oó. Rogo gu kekeapai ngbefuo gere, ani nika wisigo kura apai biama nga gu rengbe kadu ni mbia kota fu aboro ki sayo ka i pekenga fuo Yesu ya. Ani dinga berã adia ka zanga mbu pekafuo Yesu na kini banda gaani idapase kindi ni nyanyakihe!