1-2. Gini akpakarapai kura dungu aDezire Yekova agbiatiyo na ni?

GU MOKEDI nangia Pauro angarasi Timoteo na kura aKristano dunduko nga i digisi gayo sunge wenengai. (2 Tim. 4:5) Ani napekafuo ga Pauro rugute na kini mangi gaani sunge fu Mbori wenengai gbe wa rengbe omerani na ni. Ono ti kura aregbo, gipai re ima du ni kpakarakpakaraha. Badungu kura awirinarani nagunde agunde ka mangasunge tungusapai. (2 Tim. 4:2) Ni kpiapai, oni berẽnga pa agu awirinarani naraka rogo agu aringara adunga ani na ranirii ka manga gaani asunge naabaha rogoho ya watadu i naima rugusa gaani sunge naabaha rogoho. I natungusapai atungusa si ki vura du vurũ nga i ima ino gupai nga i ima rengba ka ba yo ku bambukiso yo!

² Ga Yekova aboro nagbiatiyo na badungu akpakarapai nga gu naima rengba ka ba gberãrago tiyo. Ni kpiapai, badunguyo namangasunge tipa dungu asa tipa gupai nga ka gbia agu ahe du gayo aborokporo na zingoho. I naida aida ka mangasunge tungusapai ni bakerehe, ono i na ome tiyo ni bakerehe ti digido poso te. Agu akurayo namangasunge gbua tooni tingba ga Yekova sunge bambiko gupai nga i na kere akaza tiyo watadu i ni gbinza yo; na watadu i na rengba ka guari ba yo kporo te. Berewe a, agu akurayo ti aregbo dunduko na gu bipai nga, payo anyakanga fu Yekova te. Mary, * nga gu kura wirina sa naraka Middle East yo aya: “Mi naamanga bakere asadatise tipa ka sovura kuti gimi iraira abipai ho du mi ni na gberãrago na si naada ti gupai nga mi du na bakere mbugo. Sidu, mi nidu na gberãrago mbiko gupai nga gipai re nasa gupai nga ka mi dunga na regbo gbiati ome ka manga gimi sunge tungusapai ya.”

3. Ginipai ani nika sakapai tipaha rogo gi kekeapai re?

³ Ka ani vura kaa gbiatirani na kina gini akpakarapai, Yekova ima rengba ka fu gu ome furani ani aidaha tipa kaa mangasunge kindi fuko ni bakerehe wa rengbe omerani na ni. Mbata fu ani sakipai tipa wai Yekova narengbe ka undo rani, ani sakingo pai tipa wai ko afu ome fu aPauro na Timoteo tipa i digisi gayo sunge tungusapai wenengai akpakarapai ki vura du vurũ.

4. Gini akpakarapai Pauro agbiatiko na ni?

⁴ Pauro agbiatiko na dungu akpakarapai. Ko aaida ome gbe ti gu regbo i ata ko, ki sopo ko na mbia, na ki ba ko ku bambukiso yo. (2 Kor. 11:23-25) Zee aamanganga Pauro ka gumba gupai nga ti kura aregbo, si aniidi ko mangi bakere asadatise tipa ka sovura kuti gberãrago te. (Rom. 7:18, 19, 24) Berewe a, ko adu na kpakarapai nga ga kaza kpotose, nga gu naadu wakina ‘kiwe tii kpotoko yo’ na ko aaida gupai nga Mbori dihe kusayo ni ipo.—2 Kor. 12:7, 8.

5. Ginipai Pauro adu na rengba ka mangaha ko ki vura ka gbiatiko vurũ na akpakarapai?

⁵ Yekova afu ome fu Pauro tipa ko naandu kindi kumbatayo na gako sunge nga ga tungusapai, ko ki vura kaa gbiatiko vurũ na akpakarapai. Oni bingo agu apai Pauro amangihe. Ni kpiapai, ti gu regbo ko adu ni zizi ko ku kporo Roma yo, ko aatungusapai kakaka fu badungu aboro, isoke kodihe na airangbii. (Amo. 28:17; Frp. 4:21, 22) Ko atungusipai a fu badungu ababanda bambu bazogo, na ki mangi dezirepai fu agu aboro dunduko nanaaye kaa bi ko. (Amo. 28:30, 31; Frp. 1:13) Ti kina gu bangisa regbo re, Mbori amangisunge na Pauro ko keke awaraga, nga gu naaundo gu ndikidi aKristano naadu mbata, na nga gu naundo ndikidi aKristano areme a kindi. Kurigure, ga Pauro kpiapai aima nyakasa gu dungurati naadu Roma yo, na gipai re akusi gu sangbanapai nga, awirinako atona ka ‘gumba pa Mbori zukazuka gbe ni dungu yo zanga gunde.’ (Frp. 1:14) Wa si avura du nga Pauro aadunga na rengba ka mangapai ni bakerehe wa gu ko aaidaha te, ko amangi gupai ko adu na rengba ka mangaha, na gipai re ki ndu “sa kina turusa wene pangbanga ku mbata yo.”—Frp. 1:12.

6. Ringbisihe kuti 2 AKorindo 12:9, 10, ginipai naaundo Pauro ko digisi gako sunge tungusapai?

⁶ Pauro arugutiko na gupai nga, agu apai dunduko ko amangihe tingba ga Yekova sunge, ko amangihe mbiko ga Mbori ome, angianga mbiko gako ome ya. Ko agumba gupai nga, ga Mbori ome “du ni mbakadimbakadi he ziazia rogo rungbura yo.” (Oni gedi 2 AKorindo 12:9, 10.) Yekova afu ome fu Pauro vurube gako ziazia toro tipa gupai nga ko digisi gako sunge tungusapai wenengai, si ki vura du vurũ nga ko agbiatiko na arungosiro, i ki ba ko ku bambukiso yo, na ko ki gbiatiko na kura akpakarapai.

7. Gini akpakarapai si aaida Timoteo dibehe tipa gupai nga ka digiso gako sunge?

⁷ Si aaida gupai a nga Timoteo nga guko nangia ga Pauro paranga badiasunge kido kuti gu ome nga ga Mbori tipa ka manga gako sunge. Timoteo anaagasa Pauro na gu sunge nga ga  amokedi ku rogo tuturũ arago. Berewe a, Pauro akedi ko ko ndu gu kura anunguro tipa ka bi adungurati na ki ngarasi he. (1 Kor. 4:17) Timoteo aima rengba ka bi tiko nga ko arẽnga te. Isoke si du Pauro ape gupai ti ni fuko nga: “Ka boro páyasi nga pa ro mbiko wa du mo ni paranga wa sa ya.” (1 Tim. 4:12) Kurigure, ti gu regbo re, Timoteo aima du a na gako kpakarapai nga gu naadu wakina kiwe ti kpotokoyo, nangia, ko “awoka dedede.” (1 Tim. 5:23) Ono Timoteo aima ino gupai nga, ga Yekova ziazia toro du na ome ti ni nika fu gu ome afu fuko ko aidaha tipa ka tungusa wene pangbanga na kini undo awirinako.—2 Tim. 1:7.

8. Waigu Yekova anyakasa gako aboro areme?

⁸ Areme, Yekova nafu gu “bakere [ome] susi” fu gako aboro tipa gupai nga i naandu kindi kumbatayo kaa irisoko ni ruruyo. (2 Kor. 4:7) Ani sakingo pai tipa apai biama nga gu Yekova afuhe si nyakasi rani na si undo rani ani nye ni rururani fuko, si nga: kparakpee, Ziazia Kekeapai, kodatise nga ga aKristano, gbiati gaani sunge tungusapai.

9. Waigu rengbe kparakpee ka undo rani?

⁹ Kparakpee nanyakasa rani. A wa duhe ni kekehe rogo AEfeso 6:18, Pauro angarasi rani nga, ani ‘naakpara akpara kindi’ fu Mbori. Mbori nika karagapai kuti gaani akparakpee ni nyakasako rani. Wirina du rimoko nga Jonnie, nga guko naraka Bolivia yo aima gbia gu undo re ti gu regbo ko agbiatiko na dungu akpakarapai. Diako gbiati avunguko atona woka ni kerehe ti bangisa regbo sa. Jonnie aasota ka ngerafuo agu azingo nga ga agi aboro dunduko biata re. Nako akpi, na si ki di bagbanga regbo tipa diako gbiati bako hu be gayo akaza. Ho Jonnie aafura ni tipa gu kpakarakpakara regbo re, ko aya, “Ho mi anaabaka bangire ni ni kerehe, gupai nanaaundo re ti aregbo dunduko nga ho mi anaamanga kparakpee ni fu Yekova na kini pekepa wai fuko mi adu.” Yekova afu gu ome fu Jonnie ko aaidaha tipa ka hipai. Ronald nga bakumba Bolivia yo, aye ka ino gupai nga nako na kansa tiri. Ri akpi tingbafuo diwi sa kusa. Ginipai naaundo ko ti gu kpakarakpakara regbo re? Ko aya: “Kparakpee fu Yekova nasa re mi kusuko kpotoreyo fuko na ki pekepa agu apai namanga re. Mi ima ino gupai nga ko ima rugatiko na mi kisusi ai kura boro, na zavura kisusi wai mi naini tire.” Ti kura aregbo, ani ima rengba ka bihe nga ka ani hinga gaani akpakarapai te na ani ima rengba ka zanga ino gupai si aida ani mangi kparakpee tipaha. Ono Yekova nape gupai furani nga ani mangi kparakpee fuko ka si vura du nga si ni mbumbuhe furani ka pekapa gaani aberãpai fuko gbiati agu apai namanga rani.—Rom. 8:26, 27.

10. A wa duhe ni yuguyuguhe rogo AEbere 4:12, tipagine du geda Ziazia Kekeapai ti ni na kini berẽkurii gupai ani agedaha na nyanyakipaha gbe?

¹⁰ Ziazia Kekeapai nanyakasa rani. Pauro anaageda Ziazia Kekeapai tipa ka gbia ome gbiati wasa, na si naida ani mangi kina gu bangisapai re. (Rom. 15:4) Ho ani ageda Fugo Mbori ni na kini berẽkuriihe, Yekova rengbe ka undo rani ani rugutirani na wai Ziazia Kekeapai narengbe ka undo rani. (Oni gedi AEbere 4:12.) Ronald, i nifura tipa ko kusayo aya: “Mi na tambuahe nga mi asonosi gu sino nga ga geda papara Ziazia Kekeapai na ayuru dũ. Mi naaberã ni bakerehe kurii ga Yekova asino na wai ko amangapai na gako amoyambu rogo nyemuse yo. Gipai re ninaanyakasa re anyakasa.”

11. Waigu Ziazia Kekeapai anyakasi kura wirina sa nga gu ri naadu rogo imisiri?

¹¹ Ani ima rengba ka sonosa ruru bipai tipa agu apai du tipa rani ni berã ani kurii Fugo Mbori. Oni bingo wai Ziazia Kekeapai aundo dekurugbo nga guri naadu rogo imisiri. Bakumba afu gu berãpai furi nga, ri ima rengba ka wirika apai nga gu rengbe ka undo ri ni geda ri gu buku nga ga Eyobo. Ho ri amangi gipai re ni, gu bambatapai ri amangihe nga ka bisirapa Eyobo tipa gako iraira berãpai. Ri afu gu zahe fuko berãri yo nga: “Eyobo! Ka mo naaberãnga kina pa gamo akpakarapai sa ya!” Ono tie, ri aye ka rugatiri na gupai nga, gari bipai adu wakina ga Eyobo bipai. Gipai re aundo ri ka ri moingo berãri gbe kuti gari akpakarapai ya, ono ri moiberã ri gbe kuti Yekova gbiati gu maabangirise ko afuhe furani na mangaha wo anyakasi ri ri dibe gu imisiri ri adu na ni mbikopa zanga ri kumbari rogo kpio yo.

12. Waigu Yekova anyakasa rani vurube agu akuarani ani airisombori na yo?

 ¹² Gu kodatise nga ga aKristano nanyakasa rani. Gu kura gene Yekova anyakasa aKristano ngbaha nga vurube agu akurayo i airiso Mbori na yo. Pauro ake gupai nga, ko adu na nyemu i “mongo wasa” na agu awirinako nga ga toro yo. (Rom. 1:11, 12) Mary, i nifura tipa ri kusayo nabi gi ngbatunga kodatise re na nyanyakipaha. Ri aya: “Yekova ima mangasunge na awirina nga aguyo naainongo pa gimi akpakarapai zaatu ya. I anaapeka afugo ngarasaro fere watadu kini kedi kekeapai fere, na si nga kina boro gupai nzunzu mi aaidaha. Si ima du ni pa undo a ka fura na kura awirina nga adee nga aguyo naadu kina rogo gu bangisa akpakarapai re na ki wirikipai ti gupai i amangihe. Na abaakumba ninaasa re ti aregbo dunduko mi naabihe nga mi nga papara dungurati na kidu na nyanyakipa re.”

13. Waigu rengbe ani ka nyakasa tirani dagba tirani ti regbo adunguratise nga ga dungurati?

¹³ Ba sa dagba gu bawene aba yo rengbe ani ka ngarasa tirani dagba tirani rogoho nga ti regbo adunguratise nga ga dungurati. Ho mo andu ni ku ba dunguratise yo, mo ima rengba ka asada ka nyakasa kura aboro ni pe mo gupai fuyo nga mo ima kpinyemu yo na mo na tambuahe tipa gupai i amangaha. Ni kpiapai, mbata fu kura dunguratise sa, kura bakumba sa du rimoko nga Peter ape gupai fu wirina sa ni navungu agude adunga gari badiarogatise ni Dezire Yekova ya nga: “Si ni pa ngarasaro gbe ka bi ro ane. Ti aregbo dunduko, mo naambakada awiro wa du yo dunduko sita na i kidu regerege tipa akaragapai.” Ri adu na bakere tambuahe na ki gumba gupai nga: “Gere nga kina boro gupai mi naaida ka giaha areme.”

14. Waigu sunge tungusapai aundo rani?

¹⁴ Sunge tungusapai nanyakasa rani. Ho ani atungusapai ni fu kura aboro, si nasarani ani du wenengai, singia aboro nadegatuyo kutini watadu i adeganga tuyo te. (Snz. 11:25) Gu kura wirina sa du rimori nga Stacy abi wai sunge tungusapai narengbe kadu ni pa nyakasaro. Ho i akusi boro ni rogo dungurati kusayo dagba gari aborokporo yo, ri adu na bakere gberãrago na ri aasana tiri nga, ‘Ya mo pai kinaho si aaida mi mangihe ni bakerehe tipa ka undo?’ Si aima du ni mbumbuhe fu Stacy ri mbu berãkurii gupai re. Ginipai naundo ri ri sovura kuti gi kpakarapai re? Sunge tungusapai! Ho ri anaatungusapai ni, ri atona ka maaberã ri gbe tipa agu aboro du rogo dagbarago nga ga tungusapai nga aguyo naaida na gari undo. Ri agumba gupai nga: “Ti gu regbo re, Yekova agamu nawiriki Ziazia Kekeapai fere, nga guri namangi sonakumbatayo ni kina boro ipo. Na gipai re aima ngarasa re ni bakerehe. Gupai naima undo re ni bakerehe gbe nga sunge tungusapai.”

15. Ginipai mo awirikaha ti gupai Mary agumbaha?

¹⁵ Kura aboro rengbe ka bihe nga i na rengba ka tungusapai ni bakerehe te mbiko agu apai du tipa yo. Ka si du nga wo mo abihe, mo tingidi gupai nga Yekova na ngbarago na mo ka mo amanga gupai amanga rengbe na omero. Oni bingo gu kpiapai nga ga Mary berewe. Ho ri aga ni ku rogo gu ba aboro ape kura fugo kia rogoho, ri aabihe nga ri arengbanga ka undo ni bakerehe te. Ri aya, “Tipa bete regbo, gupai mi anaamangaha gbua nga, ka fu taata karagapai, watadu ka geda veresi rogo Ziazia Kekeapai yo na watadu ka fu trakte gene tungusapai yo.” Ri aabihe nga, ri na rengba ka mangapai ni bakerehe wa agu aboro naape gu fugo re wenengai  te. Ono tie, ri aye ki aria gu bipai ri adu na ni. Ri atona ka rugatiri na gupai nga, Yekova ima rengba ka mangasunge na ri ka si vura du vurũ nga ri apenga gu fugo re wenengai te. Ri aya, “Gupai Baibiri apehe, si ni taataha, na si rengbe ka aria gu raka nga ga aboro.”

16. Ginipai rengbe ka undo agu aboro naida ka tungusapai ono ka i adunga na rengba ka guari ba yo kporo ya?

¹⁶ Yekova ima ino gupai nga agu akura rani kinaho naida ka mangasunge tungusapai, ono tie, ani na rengba ka guari ba rani kporo te. Sidu, ko ima rengba ka undo rani ani tungusipai fu agu aboro naye kaa ngerafuo rani, watadu fu amunganga na agu aboro nangerafuo aborokaza. Ka ani aringbisa gupai ani narengbe ka mangaha awere na gu ani adu na rengba ka mangaha kusayo, si ima rengba ka sarani ani du rogo bakere gberãrago. Ono ka ani rugutirani na pa wai Yekova aundo rani awere, si nika fu gu ome furani ani aidaha tipa ka hi ai asada na ngbarago.

17. Ringbisihe kuti Batungusipai 11:6, tipagine si aida ani naandu kindi ti ni kumbatayo na gaani sunge tungusapai ka si vura du vurũ nga ani agbianga asangbanapai ni kina boro ipo te?

¹⁷ Ani ainongo gini tunga nga ga rengo dagba agu atunga rengo yo ani arũhe rengbe ka maa tarãha na ki tona sona te. (Oni gedi Batungusipai 11:6.) Ni kpiapai, kura wirina sa nga Barbara garãri naima susa 80, ninaamanga dezirepai dedede rogo terefuni na ni keka ri awaraga. Rogo waraga sa dagba agu awaraga yo ri akekehe, ri amoi gu Ngbaõbambu Sinziri pati ni nangia ga Marungu 1, 2014, nga gu riihe adu nga, “Gupai Mbori Amangihe Furoni.” Ri aainongo gupai nga ri aima keda gu waraga re fu arogotise nga aguyo naangianga aDezire Yekova berewe ya te. I agedi gu magazini re tona ti tonatonaha ki da ti digidoho. Bairakporo abihe wa ka i ya Yekova aafura kina boro fuko nzunzu. Agu arogotise re atona nduge tipa adunguratise na niyangaraha, i ki da berewe ni agu aDezire Yekova naima nyaka rogo toro yo tingbafuo agarã naima susa 27. Barbara agbia ngarasaro gbiati nyakasaro ni bakerehe ho ri abi gu wene asangbanapai ni naakuru ti gu bangisa waraga ri akehe re!

18. Ginipai rengbe ani ka mangaha tipa ka gbia undo ti ga Mbori ome?

¹⁸ Yekova nafu bakere momu furani tipa ani gbia gako bakere ome. Yekova nafu badungu apai furani tipa si nyakasi rani, wa gu nga, kparakpee, Ziazia Kekeapai, awirinarani, gbiati sunge tungusapai. Ho ani amangasunge ni na agi apai re, ani nayugo gupai nga ani ima kido kuti gupai nga, ko ima rengba ka undo rani na ko naida aida ka mangaha wo. Sidu, si naida ani naakido ti aregbo dunduko kuti gu Barani du ngbangbaturũ yo, nga guko du na ngbarago “ka yugo tiko na pa nyaka fu agu yo du kpotoyo yo ziazia koyo du ko ni.”—2 Peka 16:9.