I avungure rogo gu garã nangia 1983. Mi adu na kpotore wenengai rogo gu bambata agarã mi adu ni gude, ono ho garãre adu ni bawe, kpotore dunduko atona ka igirã ni kerehe. Fuo agarã wa ue kusa, mi azingi rame yo wiso na ka mi adunga na rengba ka gbiso ba re ya. Wa mi avura ka asada tire nyanyaki ka gbiso andu re rogo gu baha, ome aadunga rogo andu re yo te. Naatona rogo gu uru re ka ndu kumbatayo, mi aandunga ngba ndu re berewe te. Gimi kaza asa re a ka mi sononga berewe ya. Areme, mi kindi ni tooni re wakina gude.

Fuo bete adiwi tingbafuo tona mi kaza na ka gene adunga bere ka guari kporo kaa ta berewe ya, aDezire Yekova ue aye ku kpurani. Ho agino anaaye ni ku kpurani, mi anaasada dedede kaa gbu agbu, ono rogo gu uru re, mi ambu agu aDezire Yekova nangia adee re i fura na mi. Wa i aafura tipa Paradizo, si atingidi re na gupai mi agihe ho garãre adu ni wa bisue. Ti gu regbo re, mokedi rimoko angia Jethro naaraka Suriname yo, anaaye ku rogo gaani gbaria bara sa vuru diwi yo na ko kini wisigi Ziazia Kekeapai na buba. Jethro anaamanga pai na mi wenengai gbe. Ko aima ngba tire nikerehe. Berewe a, atita re anaandu andu na mi tipa adunguratise nga ga aDezire Yekova ti kura aregbo, nga gu i anaamangaha rogo gaani gbaria. Sidu, ho Florence nangia dee sa dagba agu adee yo ni aDezire Yekova naye fuo re rogo gu uru re asana re ni singia mi nakpinyemu ka wirika kura dungu apai, mi aya ii.

Florence akaraga tiri fuo re na kumbari nangia Justus, na i kini tona wisigo Ziazia Kekeapai na mi. Ho i abi gupai ni nga mi aainongo gedapai te, i aundo re tipa mi tona ino gedapai. Tingbafuo bete regbo, mi atona gedapai nitire. Rogo kura uru sa, agu arogotise re ape gupai fere nga i ima fuyo na sunge tungusapai ku Suriname yo. Si afu kina gberãrago nga, boro aadunga vuru Orealla narengbe kaa ndu kumbatayo kaa wisigo Ziazia Kekeapai na mi te. Ono mi na ngbarago nga bangiri Yekova aagonga tire te.

Fuo ho aturongo te, bazakigene rimoko angia Floyd ki ye ku vuru Orealla, na ko agbia re ho ko aatungusapai ni kporo na kporo. Ho ko afura ni fere tipa wisigo Ziazia Kekeapai, mi amomu tingba re. Ko asana re nga, “Tipagine mo amoma ti ni?” Mi agumba gupai fuko nga mi aima wirika gu burosua nga Gine Mbori Akpinyemuhe be Rani? Na mi ki ima tona wirika gu buku nga Gu Inohe Nandu na Boro sa Nyenye Unga. * Mi asaki ndu gupai fuko gimi wirikapai aru ti ni. Floyd anyasi wirika gu buku na mi nga Inohe, ono fuo gure, i akedi ko a ko ndu ka mangasunge Kindo rogo kura ba. Berewe a,  boro aadunga ho kaa wisigo Ziazia Kekeapai na mi te.

Ono tie, rogo 2004, i akedi kparakpara abazakigene ue nangia Granville na Joshua ku Orealla no. I aatungusapai kporo na kporo, fuani, i kini bire. Ho i asanahe ni singia mi naida ka wirikipai, mi amomu tingba re. Mi aya fuyo i tona wirika gu buku na mi nga Inohe kina boro ti tonatonaha yo. Mi aaida ka bihe singia i nika yugo kina gu bangisa apai fere agu aboro nawirikipai na mi mbata ayuguhe fere. Granville ape gupai fere nga adunguratise kinaho i amangaha rogo gaani gbaria. Wa si avura du nga mi aima dia agarã mbembedi kuti bawe ka mi aguaringa kporo ya, mi aima ida ka ndu tipa agu adunguratise re. Sidu, Granville aye ku kpurani yo, ki moi re rii ngbagida gbarĩgbarĩ aboro na ki turã re ku Bambu Kindo yo.

Fuo bete regbo kusa, Granville angarasi re tipa mi rimi Gu Sukuru Nga ga Siokrasia. Ko aya fere: “Mo nga gbarĩgbarĩ boro, ono mo ima rengba ka fura. Rogo kura uru, mo amanga gumbapai amanga. Mo du wa ka mo mangihe.” Agu afugo ngarasaro ko agumbaha re aima fu kido fere.

Mi atona tungusapai na Granville. Ono dungu agene rogo gaani gbaria aima gberã ni kerehe tipa kaa ndu na ngbagida gbarĩgbarĩ aboro ngbaha. Sidu, mi asana Granville ko moi re rogo buruwete kaa tũra re na ni. Gu mbakadapai re aima du na diabese. Mi azi bapatiza rogo Zerekpe 2005. Fuo gure ngbutuko, awirina araba re tipa mi naangerafuo agu awaraga nga ga dungurati na kaa mangasunge na aũworo ahe Bambu Kindo yo.

Si nafu kina gberãrago nga, fuo gure rogo 2007, buba ati kurungba yo kini fõ tiko ti aũ kurungba na ko kini kpi fuo bete aˈuru kusa. Gaani riikporo aima du rogo bakere gberãrago. Granville amangi kparakpee na ani na ki gedi agu averesi nafu wasa furani. Agarã ue kusa, rago agberẽ tirani berewe ni kerehe mbiko kura gberãngo—ga Granville kurungba arindo yuru rogo bitimo ku ime yo. Na fuo auru ue fuo gako kurungba rindo, i kini bi kangbako.

Gaani umba dungurati naadu na bakere gberãrago anye zanga bakumba na kina moundo abaakumba gbua sa kidu ho. Pakpio bawene bakureami nangia Granville aima imisa re nikerehe. Ko anaaundo re dedede mi mbedi na Yekova na ko kini mangi kura dungu apai fere mi anaaidaha. Ti regbo dunguratise fuo kpio ko, i afu gu sunge fere nga ga geda gu Ngbaõbambu Sinziri du tipa wisigoho. Fuo geda mi genewaraga sa na ue, mi atona ka kpara na aume kini kaa uka bangire yo kindi. Si aye kada ti gupai nga mi zorõ azorã rii tambara yo.

Rago atona ka ngba tire ho awirina rogo kura dungurati aye ni ka undo rani Orealla no. Berewe a, be-basunge akedi bazakigene nangia Kojo. Gupai nafu ngbarago fere berewe nga, nina gbiati tooni tamere atona ka wirika Ziazia Kekeapai na i ki zi bapatiza. Na rogo Marungu 2015, i amoihe re ni moundo abaakumba. Fuo bete regbo, mi afu gimi bambata gumbapai. Rogo gu uru re, mi amomu na ki kpari ho mi atingidi gupai ni Granville apehe fere agarã kusayo ki ya: “Rogo kura uru, mo amanga gumbapai amanga. Mo du wa ka mo mangihe.”

Vurube gu mbakadapai nga ga JW Broadcasting^®, mi ima ye ka ino gupai nga, kura awirina kinaho du rogo kina ngbatungapai wa gu du mi rogoho. Wa vura duhe nga badungu akaza tiyo, i ima du na rengba ka manga badungu apai na i na ngbarago. Mi a tigimi ima du na rengba ka manga kuraapai. Gu nyemupai mi adu na ni ka fu gu ome du tire fu Yekova aima sa re mi da ni bazakigene. Na mi agi bawene tingidapai nga gu mi aainongo nga mi nika giaha ya rogo Mbirinvuo 2019! Mi aye ka ino gupai rogo gu diwi re nga, i ima maa re ni bakumba mi naamangasunge rogo gaani dungurati du na abatungusipai rogoho 40.

Mi na tambuahe fu agu awirina nawiriki Ziazia Kekeapai na mi na ki undo re mi irisi Yekova. Gu nyakipaha anyaka gbe nga, mi na bakere tambuahe nga bangiri Yekova aagonga tire te.