BADUNGU awirinarani nga aguyo naambu gayo aringara tipa ka ndu ku gii ngbii yo ka mangasunge marã ima karaga tiyo awere ku rogo gayo aringara. Gu nyemuse du yo na ni koyo du Yekova ni gbiati kura aboro ima fõngbaduyo yo tipa i ga ku rogo agu aba du na bakere zingo abatungusipa Kindo rogoho. (Mt. 22:37-39) Gini apai i ambupaha na waigu Yekova afu maku fuyo? Tipa ka ino gipai re, ani furanga tipa kura ringara sa nga Cameroon du rogo gu papara Afirika du ku padiyo.

Rogo gu garã nangia 1998, wirina du rimoko nga Onésime aguari rogo gu kpuko naadu Cameroon yo ka ga ku gii ngbii yo na ko araki yo tipa agarã 14. Rogo gu kura uru sa ti regbo gu dunguratise nga ga aKristano, bagumbapai ape kpiapai rogo gako gumbapai yo naafura tipa sunge tungusapai. Gu bagumbapai re aya, “Ka abakure ue amangasunge zio atĩo rogo aba ni bakiakia, gu kura ni sa kini zi atĩo kisusi bakureani, ya mo gu ni azionga atĩo gbe re ya ndunga ku rogo gu ba gu kura ni re azio ra rogoho gbe te?”

Gu kpiapai re asa Onésime ko berẽpa karagatiko tipa ka undo agu abatungusipai naadu Cameroon yo, nga gu ba badungu aboro adu na nyemu ka wirika Ziazia Kekeapai rogoho. Ono ko adu na abakabangirise. Ko aabakabangiriko nga, ya mo ko ainido tiko berewe na agu apai naadu rogo gako ringara tifuo gi dungu agarã ko namangihe ku gii ngbii yo re? Tipa Onésime ini singia ko adu na rengba ka inido tiko na agu apai du yo, ko andu ka raka Cameroon yo tipa adiwi sita. Na rogo gu garã nangia 2012, ko kini ga kaa raka yo.

Onésime aya: “Si aidi mi inidi tire na gu faa uru naadu yo gbiati gu gene aboro aaraka ngbaha. Si aidi mi inidi tire berewe na sungo rii gu gbanga abasungo nga ga ngua naadu Bambu Kindo yo. Ko agumba gupai na mongo ti ngbako nga, “Ho mi anaagbeberã re ni gbe kurii gu mbakadapai nga ga dunguratise, si anaasa re bangire go ti gu wene abasungo naanidu rogo agu aBambu Kindo naadu rogo gu ringara mi ayego rogoho.”

Rogo 2013, Onésime amangi rogatise na Géraldine, nga guri naga ku Cameroon yo fuo raka ri France yo tipa agarã nga ribua. Waigu Yekova afu mosoro fuyo mbiko maa yo gupai ko akpinyemuhe ni bambatapai rogo gayo raka yo? Onésime aya: “Ani andu sa tipa Gu Sukuru Du Tipa Abatungusipa Kindo na ani ki mangisunge Betere yo. Rogo gu garã nasusi, abawiriki Ziazia Kekeapai 20 nazi bapatiza rogo gaani dungurati. Mi nabi tire awere nga mi rogo wene ba tipa ‘zia atĩo.’” (Mk. 1:17, 18) Géraldine ape kurapai nga: “Mi ima gbia dungu amaku kisusi gu mi aberẽpaha.”

Judith aga kaa raka Amerika yo, ono ri adu na nyemu ka kiiso gari sunge tungusapai. Ri aya, “Ti agu aregbo dunduko mi anaakaraga tire ku Amerika yo tifuo ndu mi ku Cameroon yo, mi anaakpara  ni aume mbiko mi anaambu dungu aboro nga agu yo mi aniima tona wisigo Ziazia Kekeapai na yo.” Ono tie, Judith aduadu dindikodindiko tipa ka karaga tiri ku Cameroon yo. Ri aamanga wene sunge marã nga gu naaundo ri tipa ri naatumo tipa ga bari kaza nga gu ko naaraka Cameroon yo. Ono tie, Judith akido kuti Yekova na ki ga ku Cameroon yo. Ri ape gupai nga, ri aaberã pa gu wene raka aberã ri aarakaha ho ri adu ni Amerika yo. Ri amangi kparakpee fu Yekova tipa ko undo ri ri mangi ariapai, na ri agbia undo be gu ngarasaro ri agbiaha be babi adungurati na diako.

Ho Judith atingidipa wai ni apai adu ho i akaragatiyo ni ku Cameroon yo, ri aya, “Vuru agarã yo biata, mi adu na ngbarago ka undo aboro biama tipa i zi bapatiza.” Judith atona mangasunge ni kparakpara nazakigene. Areme, ri gbiati kumbari nga Sam-Castel namangasunge biko adungurati. Ono ginipai namangi tipa bavungu Judith? Ri gbiati agumeri adu na rengba ka gbia kura bambungua rogo gu kura ringara nga gu naadu na rengba ka tumo tipa gba yo gako kaza. Si nipa ngbarago nga i aima gba ko wenengai.

Wirina du rimoko nga Victor aga ku Canada yo. Tifuo ko gedi kekepai rogo Ngbaõbambu Sinziri tipa bakere wirikapai, ko aberẽkurii gako wirikapai. Ko ambu nduge ku yunivasiti yo na ki tona gu wirikapai du ni guruhe. Ko aya: “Gipai re asa re mi gbia sunge marã ni ipo, na ki sa re mi mangi gu sunge mi aima digo nikpinyemu ka mangaha tipa gbanga regbo nga—ka mangasunge ni bazakigene.” Kusa, Victor amangi rogatise na Caroline, na i kini ndu ku Cameroon yo. Ti gu regbo i andu ka bi gu be-basunge du yo, kura awirina angarasiyo tipa i berẽkuriipa mangasunge Kindo Cameroon yo. Victor aya: “Ndupai aadunga ho tipa ka ká te, na wa ani aima sa gaani raka taata, ani aima rengba ka ida na gi yambahe re.” Wa si avura du nga Caroline adu na bete akpakarapai nga ga kpotose, i adiberã ka ga ku Cameroon yo.

Victor na Caroline atona mangasunge ni abazakigene tipa ka undo agu aboro dunduko i agbiayo nga agu yo naadu na nyemu wirika Ziazia Kekeapai tiyo. Tipa bete regbo, i adu na rengba kaa raka rii kina gu marã i adunguraha. Tifuo gure, i amangisunge Canada yo tipa bete adiwi, nga gu naaundo yo tipa i karaga tiyo ku Cameroon yo na ki ndu kumbatayo na sunge abazakigene. Gini amaku i agbiaha? I andu tipa Gu Sukuru Du Tipa Abatungusipa Kindo, ki mangisunge ni kparakpara abazakigene, na i namangasunge meka arago nga ga Kindo awere. Victor aya, “Pa mbu ani gaani wene raka asarani ani gbia ga Yekova amaku.”

Rogo 2002, Alain, nangia gude sukuru nga ga yunivasiti ko Germani yo agedi gu trakte nga Youths—What Will You Do With Your Life? Gupai ko agedihe yo afõngbadukoyo tipa ko moi vovo asasa. Rogo 2006, ko andu tipa gu Sukuru Du Tipa Yugopai fu Amoyambu, na i afu ko na sunge Kindo ku Cameroon yo, nga gu ringara i avunguko rogoho.

Ho Alain adu ni Cameroon yo, ko agbia sunge ko anaamangangaha na asaa dunduko ya. Fuo gure kusa, ko agbia sunge nga gu marãha adu kuari, ono ko aabakabangiriko nga ko adunga na rengba tipa ka tungusapai na ka yugopai wagu naadu mbata te. Sidu, ho i ayambu Alain ni tipa ko tona mangasunge ni kparakpara bazakigene, ko aidihe zanga manga ndundu. Gako bairasunge afu gu sunge fuko marãha adu kuari, ono ko aima kakuti gako diaberã na ki da ni kparakpara bazakigene. Kusa, Alain amangi rogatise na Stéphanie, nga guri naaraki France yo tipa agarã. Gini akpakarapai ri agbia tiri na ni fuo gari ku Cameroon yo?

Stéphanie aya: “Zegino wiri akaza atona ka  manga re, ono mi amangi ome kaa gbia husa dedede na mi kini gbia wasa.” Agu arogotise re aima gbia mosoro gayo hipai. Alain aya: “Ho ani andu ni ka tungusapai rogo kura tuturũ gbaria nga Katé, ani agbia badungu aboro nga aguyo naaida ka wirika Ziazia Kekeapai. Kusa, ani adu na rengba kaa wisigo Ziazia Kekeapai na yo rogo terefuni. Aboro ue dagba agi abawiriki Ziazia Kekeapai re aima ye ki zi bapatiza, na i ki kusi badona nga ga abatungusipai.” Stéphanie ape kurapai berewe nga: “Ngbarago ho kii kisusi gu ngbarago nga ga undo aboro i rẽ ka kpara gayo raka fu Yekova te. Mbiko manga ani sunge Kindo ane, ani ima gbia gu ngbarago re bara dunguhe.” Areme, Alain na Stéphanie namangasunge ta kaa bi adungurati.

Gisèle azi bapatiza ho ri aawirikapai ni nga ga amunganga Itaria yo. Rago aima ngba tiri ka bi gu taata raka agu arogotise nangia abazakigene nawiriki Ziazia Kekeapai na ri aarakaha, na ri kini idi ka mangasunge tungusapai ni bakerehe. Sidu, Gisèle atona ka mangasunge ni nazakigene.

Gisèle adu na nyemu ka mangasunge fu Yekova ni bakerehe Cameroon yo, ono abakabangirise kinaho ri adu na ni. Ri aya, “Si adu nga mi nika zanga gimi rengo nga ga raka vuru Itaria, ki kpara na agu abakureami gbiati aborokporo naaraka Itaria yo.” Ono wa si avura du wo, Gisèle akaraga tiri ku Cameroon yo rogo Merekoko 2016. Fuo bete regbo kusa, ri amangi rogatise na Léonce, na gu be-basunge nga ga Cameroon kini fu gu berãpai nga i ga ku rogo gu gbata nga Ayos, nga gu naadu na bakere zingo abatungusipa Kindo rogoho.

Raka adu wai Ayos yo? Gisèle aya: “We karaba anaakata dedede tipa aposo. Badungu aregbo si anaamanganga sunge ya. Mi awiriki wai ka manga riahe ngba nyake, na ani anaandu na buruwete gbiati bataria kaa tu ime yuru ti gu regbo aboro anaangenga di yo ya.” Ginipai naaundo agu arogotise re i hipai? Gisèle aya: “Ga Yekova toro aima undo rani ani hipai. Berewe a, ani anaaundo tirani aundo dagba tirani na kumbami. Na gaani aborokporo gbiati abakurearani aima ngarasa rani, na ti kura regbo, i anaaundo rani aundo na marã.”

Ya mo Gisèle na ngbarago mbiko gupai nga ri akaraga tiri ku rogo gari ringara? Ri aya, “Ii! Zanga kapa. Ti tonatonaha, ani aima gbiatirani na akpakarapai gbiati kura apai nga gu naafu gberãrago furani, ono tingbafuo ani dibehe, ani abihe nga ani amangi kina gupai nzunzu si aaida ani mangihe. Ani ima kido kuti Yekova na ani nabihe nga ani mbembedi gbe na ko.” Léonce na Gisèle andu tipa Gu Sukuru Du Tipa Abatungusipa Kindo, na i namangasunge awere ni kparakpara abazakigene tipa bete regbo.

Wakina agu abaziatĩo nayugo wingbaduse tipa ka zio badungu atĩo si ki vura du vurũ nga i nagbiatiyo na akpakarapai, agu aboro nakaraga tiyo ku rogo gayo aringara nambupa kura gayo apai tipa ka undo agu aboro du na wene ngbaduyo yo nga aguyo nadegatuyo kuti gu pangbanga nga ga Kindo. Zanga kapa, Yekova nika tingidapa agi abatungusipai namangasunge nyanyaki re atingida tipa gu nyemuse i nayuguhe tipa rimoko. (Nem. 5:19; Eb. 6:10) Ka si du nga mo naraka gii ngbii yo na zingo abatungusipa Kindo kini du rogo gamo ringara, ya mo mo du na rengba ka karagatiro ku rogo gamo ringara? Ka mo mangihe wo, badungu amaku napido ro.—Snz. 10:22.