1-2. Waigu rengbe ani ka pekafuo gu rugute du rogo Asanza 4:25? Oni funga kpiapai.

ONI berẽnga pa agi akpiapai re. Sosono wirina ni dee naberãkurii gu wene apai namangi furi kusayo. Wa vura duhe nga gari raka awere na badungu akpakarapai rogoho, ri nandu kindi kumbatayo kaa manga agu apai dunduko rengbe ri ka mangaha fu Yekova. (1 Kor. 15:58) Aˈuru dunduko ri aberãkuriipa wai ri nikaa raka sa na gari aborokporo gbiati abakureari rogo vovo zegino. Gu kura wirina ni dee tingidi gupai nga kura wirina sa rogo dungurati amangipai nga gu naimisi ri ni kerehe, ono ri diberã ka zanga kaa berãkurii gupai re kindi. (Koro. 3:13) Gu kura wirina sa ni kumba tingidi pa agu aingahe ko amangihe kusayo, ono ko namaaberã ko gbe kuti manga agu apai dunduko rengbe ko ka mangaha tipa kadu ni ruruko fu Yekova awere.—Tam. 51:10.

² Ginipai du kina sa tipa agi awirina re? I dunduko natingida agu apai atingida namangiyo kusayo, ono i aberãnga pa agu apai re ti aregbo dunduko te. Kuba gure, i ‘nangera kumbatayo diiri.’—Oni gedi Asanza 4:25.

3. Tipagine si aida ani ‘nangera kumbatayo diiri’ ti ni?

³ Tipagine duhe ti ni ni nyanyakipa pai kaa ‘ngera kumbatayo diiri’? Gu boro nangera ni gii ni ho ni andu ni arengbanga ka ndu nzunzu te. Kina gu bangisa pai re du tipa gaani sunge fu Yekova. Ani arengbanga kaa mangasunge fu Yekova wenengai ka si du nga ani naberã kina pa agu apai ti aregbo dũ namangi watadu ani amangihe kusayo te.—Rk. 9:62.

4. Gini apai ani nika sakapai tipaha rogo gi kekeapai re?

⁴ Rogo gi kekeapai re, ani nika sakapai tipa agbina biata nga gu rengbe ka sarani ani naaberã ni bakerehe gbe tipa agu apai namangi kusayo. Agu agbina re nga: (1) nyemu gu weneapai namangi kusayo, (2) kpipai, na (3) bakere gberãrago mbiko manga aingapai kusayo. Rogo agu apai re dunduko, ani nika bi wai agu abangua arengo nga ga Baibiri narengbe ka undo rani tipa ka ani naamaanga  berãrani gbe kuti ‘agu apai naadu kusayo ya,’ ono kuti ‘agu apai du kumbatayo.’—Frp. 3:13.

5. Gini gbina Batungusipai 7:10 aza rani ti ni?

⁵ Oni gedi Batungusipai 7:10. Gi veresi re apenga gupai nga si ni gbegberẽpai ka sanahe nga: ‘Ginipai bambata arame angba ti ni?’ te te. Tingidapa gu weneapai namangi kusayo nga gamahe be Yekova. Ono tie, gu veresi naya: “Ka mo yá nga, ‘Gini pai bambata arame angba ti ni gbe ti agi arame re? ya.’” Ka pehe rogo kura afugo, si naida ani du na rubangirise tipa ka zanga ringbisa wai gaani raka adu kusayo na wai duhe awere na kini ru kaa berã gupai nga apai dunduko ima gberã awere kisusi gu naadu mbata ya. Gu kura sasa-fugo Ziazia Kekeapai sa moi gu veresi re nga: “Ka mo sananga he nga, ‘Ako, tipagine apai angba ti ni kisusi mbata kusayo ya?’ Si ni patatamana ka sana gu sanahe re te.”

6. Tipagine adunga ha ti ni ni patatamana kaa berã gupai nga raka rani adu ni wenehe kisusi mbata kusayo ya? Oni funga kpiapai.

⁶ Tipagine adunga ha ti ni ni patatamana kaa berã gupai nga raka rani adu ni wenehe kisusi mbata kusayo ya? Du na nyemu gu weneapai namangi mbata kusayo rengbe ka sarani ani naatingida kina gu weneapai sa namangi furani kusayo. Watadu si rengbe ka sarani ka ani naaberãnga pa agu akpakarapai ani anaagbia tirani na ni ya. Ni kpiapai, oni bingo gupai naadu tipa agu aYisaraere naadu mbata kusayo. Tingbafuo i kuru kusayo Ezipeta yo, bangiriyo aima go ni ipo ti wai gayo raka adu ni kpakarakpakaraha yo. I atona kaa berã gbe kina tipa gu wene ariahe i anaarihe. I aya: “Ani tingidi pa atĩo, nga agu ra ani anari ra Ezipeta yo gbua, na akoforo, zuzuhe wa apaipai, na abaro, na amatangburu, na rukutu amatangburu fũ afũ gbe!” (Geda 11:5) Ono ya mo i anaari agu ariahe re nzunzu “gbua”? Oó. AYisaraere anaarungo ni kerehe; ti gu regbo re, i anaarungosi yo ni kerehe ni akanga Ezipeta yo. (Gate 1:13, 14; 3:6-9) Ono wa si avura duwo, bangiriyo aima go kusa ti agu arungosiro i anaagbiatiyo na ni re, na i ki du na kina nyemu wai gayo raka adu kusayo. I adiberã ka maaberã yo gbe kuriipa gu weneapai naadu kusayo kuba gupai nga kaa maaberã yo gbe kuriipa gu weneapai Yekova amangihe fuyo. Rago aima gberã ti Yekova mbiko gu sino i adu na ni re.—Geda 11:10.

7. Ginipai naundo kura wirina sa tipa ri ne gu gbina nga ga du na nyemu gu weneapai namangi kusayo?

 ⁷ Waigu rengbe ani ka ne gu gbina nga ga du na nyemu gu weneapai namangi kusayo? Oni bingo kpiapai nga ga kura wirina sa nga guri naatona mangasunge Betere yo Brooklyn yo rogo 1945. Fuo bete agarã kusa, ri amangi rogatise na kura wirina nga guko naamangasunge kina Betere yo a, na i ki mangisunge wa sa Betere yo tipa dungu agarã. Ono tie, rogo 1976, kumbari atona woka. Ri ape gupai nga ho ko aini gupai ni nga ko ima mbeda ka kpi, ko afu wene rugute furi tipa si undori ho ri nika du ni ni dekurugbo. Ko aya furi wẽ: “Gaani rogatise nidu ni bawenehe. Badungu aboro duho gayo rogatise aadunga wo ya.” Ono ko angarasi ri a ki ya: “Bangiro agonga ti gu weneapai ani amangihe sa na mo te, ono ka mo moingo berãro gbe kurii agu apai re ya. Wa regbo nikaa susa, gamo gberãrago nikaa go ago yeeye. Ko mo dunga na bakere gberãrago tipa gupai mangi ro ya. Mo du na ngbarago tipa gu wene aregbo ani adihe sa kuti mangasunge fu Yekova. . . . Tingidapa gu weneapai namangi kusayo nga gamahe be Yekova.” Wene rugute du ko afuhe furi re!

8. Waigu kura wirina sa agbia undo ti ga kumbari rugute?

⁸ Gu wirinarani re aima mangapai kuti ga kumbari rugute. Ri amangisunge fu Yekova niruru ri da kuti gu regbo ri akpi ho garã ri adu ni nga 92. Bete agarã kusayo mbata fu kpi ri, ri aya: “Ho mi aberã ni kusayo kuriipa wai mi namangisunge fu Yekova ti aregbo dũ tipa agarã naima susa 63, mi rengbe ka ya mi nidu na bakere ngbarago rogo raka yo.” Tipagine? Ri aya: “Ani rengbe kadu na ngbarago rogo raka yo bambiko gupai nga ani nga papara gu bawene riikporo nga ga awirina na ani na gu maabangirise nga ga raka wa sa na yo rogo Paradizo auru kpotosende nyeanye kindi kini irisi Yekova duni Bakerepa Bakusiahe na ni bangisa ndikidi Mbori.” * Ani rengbe ka wirikapai ni bakerehe gbe be gi wirina namoi berãri gbe kuti ga Yekova akidohe re!

9. A wa furayo tipaha rogo Pa Amotumo 19:18, ti gini regbo gbe rengbehe kadu ni ba mbumbuhe furani ani mbupai fu gu boro ba gberãrago tirani?

⁹ Oni gedi Pa Amotumo 19:18. Ti kura aregbo,  si nidu ni ba mbumbuhe furani ka mbupai ka si du nga boro rogo dungurati, wene bakurearani, watadu gumerani ba gberãrago tirani. Ni kpiapai, kura wirina sa akitingbanga kura wirina rogo dungurati nga ri dĩ marã beri, ono kusa ri kini bi gupai nga pai aamanganga wo te, na ri kini hõmbupai be gu wirina ri akitingbanga ri re. Ono tie, gu wirina ri akitingbanga ri re adu rogo bakere gberãrago na ka ri arengbanga ka mbu berãpa gupai re ya. Ya mo mo abingo tiro rogo pai wa gure? Ka si vura du vurũ nga ani aagbianga tirani na kina boro ngbatunga gupai re te, si nawira gupai nga badungu rani kinaho boro aima ba gberãrago tirani, na ani ki bihe nga ka ani mbunga pai funi te.

10. Ginipai rengbe ka undo rani ho ani nakpipai ni kuti boro?

¹⁰ Ginipai rengbe ka undo rani ho ani nakpipai ni kuti boro? Pai sa nga ka tingida gupai nga Yekova nabi apai dunduko. Ko ima inopa agu apai dunduko ani andu rogoho, kodihe na gu irairaapai aboro amanga rani na ni. (Eb. 4:13) Ko na gberãrago ho ko abi rani ni ani nirungo. (Yes. 63:9) Na ko ima kidohe nga ko nika dia ai gu imisiri kusayo ani agbia tirani na ni mbiko gu irairaapai aboro amanga rani na ni.—Yugo. 21:3, 4.

11. Waigu ani agbia undo ho ani ambupai ni fu aboro?

¹¹ Si naida ani tingidi gupai a nga ho ani ambupai ni fu boro ki zanga kpipai, ani nagbia undo agbia nitirani. Gure nga gupai gu wirina i akitingbanga ri re aye ka rugatiri na ni. Fuo bete regbo kusa, ri aima ye ki mbupai fu gu wirina nakitingbanga ri re. Ri arugu tiri na gupai nga ho ani ambupai ni fu aboro, Yekova nambupai fu furani a. (Mt. 6:14) Ri aima ino gupai nga gupai gu wirina re amangi ri na ni aima gberã, ono ri kini diberã ka mbupai furi. Ni sangba gipai re, gu wirinarani nambupai re adu na bakere ngbarago na kidu na rengba ka maaberã ri gbe kuti gari sunge fu Yekova.

12. Ginipai ani awirikaha rogo 1 Yoane 3:19, 20?

¹² Oni gedi 1 Yoane 3:19, 20. Aregbo kinaho ani nidu na gberãrago mbiko agu aingahe ani amangaha. Ni kpiapai, kura aboro nidu na gberãrago mbiko agu apai i amangihe mbata fu i ini rengo. Agu akurayo kinaho a du na gberãrago mbiko agu aingahe i amangihe tingbafuo i naima zio bapatiza. (Rom. 3:23) Rengo ngaha nga, ani naida ka manga gupai du ni ruruhe. Ono tie, “ani nakota dunduko rogo dungu apai.” (Yak. 3:2; Rom. 7:21-23) Wa vura duhe nga ani naadunga na ngbarago ho du ani ni ni fudifudi rani mbiko manga ani aingahe te, padu ani ni fudifudi rani ima rengba kadu ni wenehe furani. Tipagine? Bambiko si rengbe ka fõngbaduraniyo ani mangi aˈariapai rogo gaani raka yo na ki diberã ka zanga manga gu bangisa aingahe ani amangihe.—Eb. 12:12, 13.

13. Tipagine si aida ani bandatirani ti ni ti gu gbina nga ga du na bakere gberãrago mbiko manga aingapai kusayo?

¹³ Ono tie, ani ima rengba kadu rogo bakere gberãrago mbiko agu aingapai ani amangihe kusayo, naida ka ya kadu kindi rogo gberãrago zavura tingbafuo ani naima manga saberã na Yekova ki ima yugo gupai nga ko ima mbupai furani. Gu ngbatunga du na gberãrago mbiko manga aingahe re ima rengba kadu na kere sangbanaha. (Tam. 31:10; 38:3, 4) Wai du duhe wo? Oni bingo kpiapai nga ga kura wirina sa nga guri naadu kindi rogo gberãrago mbiko agu aingapai ri amangihe kusayo. Ri aya: “Mi aabihe nga si aidanga mi fu tire kaa mangasunge fu Yekova nyanyaki te, mbiko si nawira gupai nga mi abatanga te.” Badungu rani kinaho rengbe kadu na gu bipai re. Si ni nyanyakipa pai furani ani bandatirani ti gu gbina nga ga du na bakere gberãrago mbiko agu aingapai ani amangihe kusayo. Tipagine? Bambiko Satana rengbe kadu na bakere ngbarago ka ani mbu mangasunge fu Yekova, si ki vura du vurũ nga Yekova ima mbupai furani!—Oni ringbisingaha na 2 AKorindo 2:5-7, 11.

14. Waigu rengbe ani kadu na gu kido nga Yekova naida aida ka mbupai furani?

 ¹⁴ Berewe a, kura aboro rengbe kaa bakabangiriyo nga, ‘Waigu rengbe mi ka ino gupai nzunzu nga Yekova naida aida ka mbupai fere?’ Ka mo sana tiro na gu sanahe, gure nayugo gupai nga Yekova ima rengba ka mbupai foro. Dungu bawe agarã kusayo, Ngbaõbambu Sinziri ape gupai nga: “Ani ima rengba kaa manga bangisa ingahe berewe na berewe. Si ima rengba kadu nga ani aadunga na rengba ka diabe rungbura nga gu ani adu na ni mbata fu ani tona iriso Yekova te. . . . Mo du kindi na maabangirise. Ka mo berẽnga gupai nga mo ima manga gu ingapai ka Yekova ambunga pai foro ti ni ya ya. Wo du Satana aida mo naaberã. Mo na gberãrago kidu ni fudifudi ro ho mo amanga gu ingahe re ni. Gipai re nayugo gupai nga gbegberẽ boro nga mo te, na Yekova ima rengba ka mbupai foro. Mo nye ni boro umbasitise na kini mangi kparakpee fu Mbori kindi tipa ko naambupai foro, ko undo ro mo du na gigiri sangbakpotoseyo berewe, na ko undo ro mo mbu manga gu bangisa ingahe re. Ka tooni gude vura kadu rogo bangisa kpakarapai dedede, u naandu ti aregbo dũ fuo bai tipa ko undo ru. Sidu, mo naasana Yekova kindi tipa undo na ko nika undo ro aundo mbiko gako weneringise arẽnga aboro tipaha ya.” *

15-16. Ginipai mangi tipa kura aboro mbiko inoyo gupai nga ome Yekova ata batanga beyo te?

¹⁵ Badungu ga Yekova aboro ima gbia wasa mbiko ino yo gupai nga ome Yekova ata batanga be yo te. Ni kpiapai, bete agarã kusayo, kura pangbanga sa i akusihe rogo gu kekeapai nga “The Bible Changes Lives” aundo kura wirina sa ni kumba. Rogo gu kekeapai re, kura wirina sa ape gupai nga mbiko gu gbegberẽ apai namangi rogo gari raka yo, si aima du ni mbumbuhe furi ka ida kuti gupai nga Yekova ima rengba ka kpinyemu ri. Na ri adu kindi na gu bipai re zavura tipa dungu agarã tingbafuo zio ri bapatiza. Ono tie, ho ri aberẽ ni dudunguro kuriipa motumo tumorii, si aundo ri ri idi kuti gupai nga Yekova ima kpinyemu ri. *

¹⁶ Waigu gu pangbanga re aundo gu wirina nga kumba re? Ko akepai ki ya: “Ho mi adu ni tooni, mi anaabiko kpia kundiri aboro dedede, na si aima du ni ba mbumbuhe fere ka mbu manga gipai re. Bambeda kusayo, mi amangi kina gu bangisapai re berewe. Mi asana abaakumba tipa i undo re, na mi  ima manga ome tipa ka diabe gu kpakarapai re. Abaakumba ima undo re mi idi kuti gupai nga Mbori ima kpinyemu re na ko naida aida ka mbupai fere. Ono tie, ti kura aregbo, mi naabi tire kindi nga sunge tire te na ka Yekova kpingo nyemu re te. Geda ga [gu wirina re] pangbanga ima undo re. Mi ima rugatire awere na gupai nga ho mi aya ni ka Mbori mbunga pai fere te, gure wa ka i ya mi idi kuti gupai nga ka ga Wiriko motumo rengbenga ka dada gimi aingapai te. Mi ima yera gu kekeapai re tipa gupai nga kaa gedaha na kini berẽkuriihe ti ai gu regbo mi aberã gupai nga Yekova akpingo nyemu re te.”

17. Waigu gu mokedi nangia Pauro ane gu gbina nga ga du na bakere gberãrago mbiko manga aingapai kusayo?

¹⁷ Ngbatunga agi apangbanga re natingida rani na pa gu mokedi nangia Pauro. Mbata fu ko da ni Kristano, ko aima manga badungu kere aingapai. Pauro anaatingida pa agu apai atingida ko amangihe kusayo, ono ko anaaberãnga kuriihe ti aregbo dunduko te. (1 Tim. 1:12-15) Ko aabi motumo tumorii ni gu gamahe i afuhe kina boro tipa ko. (Gara. 2:20) Sidu, Pauro aanyenga kindi rogo gberãrago mbiko agu aingahe ko amangihe kusayo te, ono ko amoiberã ko gbe tipa manga ai gupai rengbe ko ka mangaha fu Yekova.

18. Gini apai ani nawirikihe rogo gi kekeapai re?

¹⁸ Gini apai ani nawirikihe ti wisigo ani apai tipa agu agbina ani nafura tipaha rogo gi kekeapai re? (1) Tingidapa gu weneapai namangi kusayo nga gamahe be Yekova; ono ka si vura du vurũ nga gaani raka adu ni wenehe mbata kusayo, gaani raka ni kadu ni bawenehe kisusi rogo vovo zegino. (2) Kura aboro ima rengba ka ba gberãrago tirani, ono ho ani adiaberã ni ka mbupai, ani nadu na rengba ka maaberã rani gbe kuti iriso Yekova. (3) Du na bakere gberãrago mbiko manga aingapai kusayo ima rengba ka sa gupai nga ka ani naairisongo Yekova na ngbarago ya. Sidu, wakina Pauro, si naida ani idi kuti gupai nga Yekova ima mbupai furani.

19. Waigu ani aino gupai nga rogo vovo zegino, ani atingidanga pa agu apai naba gberãrago tirani te?

¹⁹ Ani na gu maabangirise nga ga raka nyeanye kindi. Na rogo ga Mbori vovo zegino, ani atingidanga pa agu apai naba gberãrago tirani te. Ziazia Kekeapai nafura tipa gu regbo re ki ya: “I atíngida nga pa [kuru] apai te.” (Yes. 65:17) Oni berẽnga kurii gipai re: Badungu rani naima gbinza kutingba ga Yekova sunge, ono rogo vovo zegino, ani nika da berewe ni paranga aboro. (Eyo. 33:25) Sidu, ani diberã ka zanga kaa berã ni bakerehe gbe tipa agu apai namangi kusayo. Ono, ani moiberã rani gbe tipa vovo zegino na ki mangi agu apai dunduko rengbe ani ka mangaha tipa gupai nga kada yo!