1. Ringbisihe kuti Matayo 28:18-20, gini zinahe Yesu afuhe?

TIFUO zingisa yo Yesu be kpio, ko ayugu tiko fu gako abawiriki nga aguyo nadunguratiyo ku Gariraya yo. Nyanyakipa pai kinaho ko aaida ka gumbaha fuyo. Ginipai du nangiaha? Ani nabi afugoko rogo Matayo 28:18-20.—Oni gedihe.

2. Gini asanahe ani nika sakapai tipaha?

² Ga Yesu zinahe ka sa aboro ni abawiriki nabi gu ga Mbori amoyambu abi du areme. Sidu, ani wisigingo asanahe biata du tipa gu sunge Yesu nafuhe furani re. Bambataha nga, gini kura apai si aida ani mangihe kurii gu nga kaa yugo agu apai Mbori akpinyemuhe fu vovo abawiriki? Uehe nga, waigu rengbe abatungusipai dunduko rogo dungurati ka fubee kuti gu sonakumbatayo nga ga abawiriki Ziazia Kekeapai? Biataha nga, waigu rengbe ani ka undo agu akuarani aidipase naima zera rogo toro yo tipa i tona mangasunge tungusapai berewe?

3. Gini ziazia arugapai Yesu akodihe ku rogo gu rugute yo ko afuhe?

³ Ga Yesu arugapai adu ziazia. Si naida ani yugu agu apai fu aboro ko arugu rani kutini. Ono tie, si aidanga bangirani go ti gu nyanyakipa pai Yesu agumbaha te. Yesu aapenga gupai nga: ‘Oni yugu agu apai dunduko fuyo mi arugu roni na ni te.’ Kuba gure, ko aya: Oni ruguyo ‘i niká kuti agu apai dunduko mi arugu roni kuti ni.’ Tipa ka mangapai kuti ga Yesu ziazia rugapai, si naida ani yugu gupai fu gaani bawiriki Ziazia Kekeapai si aida ni mangihe na wai si aida ni mangihe. (Amo. 8:31) Tipagine si aida ani mangi gupai re ti ni?

4. Rogo gupai yo nga ka kakuti rugute nga gine? Oni funga kpiapai.

⁴ Ka “kakuti” rugute nayugo gupai nga ka mangapai kutini. Tipa ka yugo kpia wai rengbe ani ka yugopai fu boro ni kakuti watadu ni  mangipai kuti ga Kristo arugute, oni berẽnga kurii gi kpiapai re. Gini gene bayugu tarambiri ni naayugopai ngbaha fu agu aboro nawirika tarambiri tipa i mangipai kuti agu andiko nga ga gene? Ni bambataha, bayugu tarambiri nasungo mbata ka yugo agu arugute na andiko si aida bawiriki tarambiri mangipai kutini bangirigene. Ono tie, tipa ni yugu wai ka mangapai kuti agu arugute re fu gani bawiriki tarambiri, kurapai kinaho si aida ni mangihe. Si naida ni kuru na gu bawiriki tarambiri re ku bangirigene tipa ni tona gbe tarambiri na wa ni nikaa gbehe, gu bayugu tarambiri re nikaa fu arugapai funi na kini yugu wai rengbe ni ka mangapai kuti gupai ni nawirikihe. Ginipai rengbe ani ka wirikaha ti gi kpiapai re?

5. (a) Ringbisihe kuti Yoane 14:15 na 1 Yoane 2:3, ginipai si aida ani yuguhe fu gaani abawiriki Ziazia Kekeapai i mangihe? (b) Oni funga akpiapai nga gu nayugo wai rengbe ani ka undo gaani abawiriki Ziazia Kekeapai.

⁵ Ho ani awisigo Ziazia Kekeapai ni na kura aboro, ani nayugo gupai fuyo Mbori akpinyemuhe be rani. Ono si naida ani mangipai kisusi gure. Si naida ani yugupai fu gaani abawiriki Ziazia Kekeapai i naamangapai kuti gupai i awirikaha rogo gayo raka yo na aˈuru dũ. (Oni gedi Yoane 14:15; 1 Yoane 2:3.) Na gaani kpiapai, ani rengbe ka yugo wai fu gaani abawiriki Ziazia Kekeapai i narengbe ka mangapai kuti gu bangua arengo nga ga Ziazia Kekeapai sukuru yo, basunge yo, watadu ti regbo zambuasitise. Ani rengbe ka pepa pai fuyo nga gu namangi rogo gaani raka yo tipa ka yugo wai fuyo mangapai kuti gu rugute nga ga Ziazia Kekeapai abanda rani be kerepai watadu wai si aundo rani ani mangi wene diaberã. Ho du ani ni na gaani abawiriki Ziazia Kekeapai, ani rengbe ka manga kparakpee fu Yekova na ki sana ko tipa ko ngbe fuyo kumbatayo na gako ziazia toro.—Yo. 16:13.

6. Gini kura apai si aida ani mangihe ho ani ayugopai ni fu kura aboro tipa i mangipai kuti ga Yesu arugute?

⁶ Ginipai pa yugopai fu kura aboro i mangipai kuti ga Yesu arugute akodaha? Si naida ani undo gaani abawiriki Ziazia Kekeapai tipa i sonosi nyemu sunge sa aboro ni abawiriki. Gu kura abawiriki Ziazia Kekeapai ima rengba kadu na gunde tipa ka tungusapai. Sidu, si naida ani du na zerangbaduse wa ani aundo yo tipa i rugutiyo na agu arengo nga ga Ziazia Kekeapai wenengai tipa gupai nga i du na nyanyaki idapase. Ka ani mangihe wo, gupai re nika zio ngbaduyo yo na si ki fõngbaduyo yo i tungusipai. Ginipai rengbe ani ka mangaha tipa ka undo gaani abawiriki Ziazia Kekeapai tipa i du na nyemu ka tungusa wene pangbanga?

7. Waigu rengbe ani ka undo bawiriki Ziazia Kekeapai tipa ni sonosi nyemu tungusa wene pangbanga fu kura aboro?

⁷ Ani ima rengba ka sana gaani bawiriki Ziazia Kekeapai na agu asanahe du wa: “Waigu gamo raka nada ni bawenehe mbiko manga mo pai kuti gupai Ziazia Kekeapai ayugoho? Ya mo mo nabihe nga si naida kura aboro gi gi pangbanga re? Ginipai rengbe mo ka mangaha tipa ka undo yo?” (Snz. 3:27; Mt. 9:37, 38) Mo yugu agu atrakte du dagba gu gaani Aũsunge Nga ga Yugopai yo fu ni na ki sana ni ni sia agu ni abihe nga si rengbe ka ngba ti agumeni, abakureani watadu gani abadiasunge. Mo fu badungu atrakte fu gamo bawiriki Ziazia Kekeapai. Oni mangi kpia wai na ni ni narengbe ka fu trakte fu kura aboro. Rengo ngaha nga, tifuo i idihe fu gaani bawiriki Ziazia Kekeapai ni da ni gu batungusipai ata ziongo bapatiza ya, si nika ida ani naakura na ni gene tungusapai yo tipa ka undo ni.—Batu. 4:9, 10; Rk. 6:40.

8. Tipagine duhe ti ni ni nyanyakipa pai tipa ka sonosa bakere nyemuse tipa Mbori gbiati kura aboro? (Oni bi gu sanduki a nga, “ Wai ka Undo Gaani Abawiriki Ziazia Kekeapai Tipa I du na Bakere Nyemuse Tipa Mbori.”)

⁸ Si naida ani moi gupai ku berãrani yo nga Yesu arugu rani tipa ani yugupai fu kura aboro tipa ‘i kakuti agu apai dunduko ko arugu rani kuti ni.’ Gere nirengo nakoda gu nyanyakipa arugute du nga—ka kpinyemu Mbori na ka kpinyemu akurase—nga agu apai ue du na ngbanya dagbaha na  sunge tungusapai gbiati sunge sa aboro ni abawiriki. (Mt. 22:37-39) Gini ngbanya du dagbaha? Gu bangua ndupai nasarani ani naatungusapai nga gu nyemuse du ani na ni tipa Mbori gbiati akuarani. Si ni rengo nga, berãpa mangasunge tungusapai ima rengba ka ba gunde ti kura abawiriki Ziazia Kekeapai. Ono ani rengbe ka kido yo nga, na ga Yekova undo, i nika dia adia be gupai nga ga gunde be aboro. (Tam. 18:1-3; Snz. 29:25) Gu sanduki du rogo gi kekeapai re nasakapai tipa gupai rengbe ani ka mangaha tipa ka undo gaani abawiriki Ziazia Kekeapai i kpinyemu Mbori ni bakerehe gbe. Kurigure, ginipai rengbe dungurati ka mangaha tipa ka undo vovo abawiriki tipa i yugu nyemuse ni bakerehe gbe?

9. Rogo gu kpiapai nga ga bawiriki tarambiri, gini agene bawiriki tarambiri awirika nyanyakipa apai ngbaha?

⁹ Oni berẽnga berewe kurii gu kpiapai ningia ga bayugu tarambiri. Wa bawiriki tarambiri agbe tarambiri na bayugu tarambiri patiko, gini agene gu bawiriki tarambiri re awirikapai ngbaha? Ni nawirikapai ni dega ni tuni fu bayugu tarambiri na ni bi ni gu kura wene abakama atarambiri. Ni kpiapai, bayugu tarambiri ima rengba ka yugo kura bakama tarambiri fu ni nga gu ni nambugene fu kura bakama tarambiri ni pere mbatayo fu ni. Watadu bayugu tarambiri ima rengba ka yugopa gu kura bakama tarambiri nga gu ni nagbisa gani we tarambiri kuti gu akingo gbe ya tipa ka saha taata fu gu kura abakama tarambiri i naangera wenengai na ni rengbe ka ngarasa bawiriki tarambiri ni mangi kina gu bangisa pai re. Ngbatunga agi akpiapai re nayugo nyanyakipa apai fu bawiriki tarambiri nga gu rengbe ni ka mangapai kutini ho ni agbe tarambiri ni.

10. Ginipai nika undo bawiriki Ziazia Kekeapai ni sono rogo toro yo?

¹⁰ Teketeke a, gu bawiriki Ziazia Kekeapai tona ndu ngba gu gene nga ga nyenye unga awirikanga pai sa kina be gani bayugu Ziazia Kekeapai te, ono ni nawirikapai a ti gu wene akpiapai nga ga kura ga Yekova amoyambu. Sidu tie, ginipai nika undo bawiriki Ziazia Kekeapai ni bakerehe gbe tipa ni mangi sonakumbatayo rogo toro yo? Ndu tipa gaani adunguratise. Tipagine duhe ti ni wo? Agu apai i agiaha ti regbo adunguratise nika undo yo tipa i wiriki badungu apai, ki nyakasi gayo idapase, na ki kiisi gayo nyemuse tipa Mbori. (Amo. 15:30-32) Kurigure, bayugu Ziazia Kekeapai rengbe ka yugo gani bawiriki Ziazia Kekeapai ti regbo adunguratise fu agu awirina du wakina ni watadu nahi kina gu bangisa apai ni ahihe. Gu bawiriki Ziazia Kekeapai re nika bi gu wene akpiapai nga ga awirina nga aguyo nayugo nyemuse rogo dungurati. Oni berẽnga pa agi akpiapai re.

11. Gini akpiapai rengbe gu boro nawirika Ziazia Kekeapai ka bihe rogo dungurati, na gini sangbanapai rengbehe kadu na ni kurii ni?

¹¹ Nawiriki Ziazia Kekeapai ni gu vungugude adunga kumba beri ya bi Kristano nga gu ri du kina rogo gupai yo ri andu rogoho. Gu ome gu Kristano re amangaha tipa ka ye ku Bambu Kindo yo na rukutu awiiri zi ngbadu gu nawiriki Ziazia Kekeapai re yo. Bawiriki Ziazia Kekeapai nga gu ko naˈasada ka mbu vugundö gbia gu kura wirina nga guko naasota na pa mbu vugundö ono ko ki ima ye kidu na diabese. Gu wirina re pepa wai fu gu bawiriki Ziazia Kekeapai re gako nyemuse tipa Yekova afõngbadukoyo ko irisi ga Mbori arugute. (2 Kor. 7:1; Frp. 4:13) Fuo gu bawiriki Ziazia Kekeapai re dege tuko kuti gupai naadu tipa gu wirina re, ko na bakere kido ho gu wirina re naya ni fuko, “Mo ima rengba ka mbu vugundö a.” Paranga degude nga nawiriki Ziazia Kekeapai bi paranga wirina nga gu ri nagbia ngbarago rogo gari raka yo wa du ri ni Dezire Yekova. Fuo gu nawiriki Ziazia Kekeapai re bi wai du gu paranga wirina re na ngbarago, si sa ri ri du na nyemu ka ino gu ndupai du ri ti ni ti aregbo dũ na ngbarago.

12. Tipagine rengbe ani ka ya ti ni wẽ ai boro rogo dungurati rengbe ka mangapai tipa ka undo abawiriki Ziazia Kekeapai?

¹² Ho abawiriki Ziazia Kekeapai aye ni ka ino agu abatungusipai nibasasa nairiso Yekova ni ruruyo, i nawirikapai ti gayo akpiapai tipa gupai pa mangapai kuti ga Kristo arugute du tipa  kpinyemu Mbori gbiati akuarani ayugoho. (Yo. 13:35; 1 Tim. 4:12) Kurigure, a wa ani nigumbaha kusayo, bawiriki Ziazia Kekeapai rengbe ka wirikapai be agu abatungusipai du apai tipa yo wakina gu gu bawiriki Ziazia Kekeapai re agbia tini na ni. Bawiriki Ziazia Kekeapai nawirika gupai ti agu akpiapai re nga, ni ima rengba ka manga agu aˈariapai si aida ni mangihe tipa ka da ni ga Kristo bawiriki. (Pa Rug. 30:11) Aboro nibasasa rogo dungurati ima rengba ka mangapai ngba agene ni bakiakia tipa ka undo abawiriki Ziazia Kekeapai i mangi sonakumbatayo rogo toro yo. (Mt. 5:16) Gini ome mo amangaha ni tiro tipa ka ngarasa agu abawiriki Ziazia Kekeapai naye tipa adunguratise?

13-14. Ginipai Yesu amangihe ti gu regbo gako amokedi adu na gberãrago?

¹³ Si naida ani undo agu awirina naima zera rogo toro yo tipa i tona tungusapai berewe na kini sa aboro ni abawiriki. Gu gene Yesu aamanga pai ngbaha na gu gako amokedi naadu na gberãrago nayugopa gupai rengbe ani ka mangaha areme.

¹⁴ Ti digido ga Yesu sunge tungusapai auru kpotosende ngbutuko mbata fu imo yo ko, amokedi “aguari pati ko dũ, ki oro.” (Mk. 14:50; Yo. 16:32) Wai du Yesu amangipai na gako amokedi ho i adu ni ni rurungbura yo tipa bete regbo? Ngbutuko tingbafuo Yesu zingi be kpio, ko aya fu kura gako amokedi wẽ: “Ka oni gunde nga ya; oni ndu ki gumba ha fu awirinami [nga mi ima zinga be kpio].” (Mt. 28:10a) Yesu aambunga gako amokedi te. Wa si avura du nga i aima mbu ko, ko aayamba yo kindi nga “awirinami.” Wakina Yekova, Yesu adu na inapai gbiati mbupai.—2 Aba. 13:23.

15. Gaani bipai nga gine tipa agu aboro atungusanga pai berewe ya?

¹⁵ Wakina gure a, ani na bakere nyemuse tipa agu aboro naima rugusa tungusapai. Kina awirinarani du nga yo na ani ima kpinyemu yo! Ani kindi natingida pa gu mangaapai nga ga nyemuse agu awirina re amangihe kusayo na isoke agu akura yo kinaho naaima mangasunge nyanyaki tipa dungu agarã. (Eb. 6:10) Ni rengo, ani nazingo azingo tipa yo! (Rk. 15:4-7) Ni wirika ani gu kpiapai nga ga Yesu, gini agene rengbe ani ka yugo gupai ngbaha nga ani naberã payo aberã?

16. Waigu rengbe ani ka yugo gupai nga ani naberãpa agu awirinarani aberã naima zera rogo toro yo?

¹⁶ Oni yambu yo tipa adunguratise. Gene sa Yesu angarasi gu gako amokedi naadu na gberãrago ngbaha angia ka yamba yo tipa dunguratise. (Mt. 28:10b; 1 Kor. 15:6) Wakina gure areme a, ani rengbe ka ngarasa agu aboro naima zera rogo toro yo ni yamba ani yo tipa i ye tipa adunguratise ka si du nga i ata tonanga ye tipaha te. Si naida ani rugutirani na gupai nga, si rengbe ka ida ani yambu yo mbata bara dunguhe i kini ru ka ye tipa adunguratise. Yesu aima du nirengo na ngbarago nga gako abawiriki aima dia gako yambahe kugume.—Oni ringbisingaha na Matayo 28:16 na Ruka 15:6.

17. Waigu si aida ani mangipai ho ka gu wirinarani naima zera rogo toro yo ye ni tipa dunguratise?

¹⁷ Oni di yo kugume na kpotoroniyo dũ. Yesu asa gako abawiriki i bi tiyo nga ko ima dia yo kugume ho ko agbia yo ni; ko aasungongo asungo tipa gako abawiriki ye mbata fuoko te, kuba gure, ko andu fuoyo na ki fura na yo. (Mt. 28:18) Waigu si aida ani mangipai ho ka gu boro naima zera rogo toro yo ye ni ku Bambu Kindo yo? Si naida ani guari ni tirani ka dia ni kugume zaaza. Ti tonatonaha, ani ima rengba kaa bakabangirani tipa gupai ani nika pehe. Ono tie, ani rengbe ka pe pa wai gbua funi du ani na ngbarago ka bi ni, ono zanga ka ba zee tini.

18. Waigu rengbe ani ka ngarasa agu abatungusipai naima zera rogo toro yo?

¹⁸ Oni ngarasi yo. Si nawira gupai nga ga Yesu abawiriki aaberã gupai nga i adunga na rengba ka tungusapai rogo zegino dunduko te. Yesu angarasi apefuoko ni gumba ko agu afugo nga: “Mi na  oni ti arago dũ.” (Mt. 28:20) Ya mo gipai re aundo gako abawiriki? Ii. Fuo regbo ngbutuko, i adu zaaza na ka yo ‘apiriga nga ti yugo pai na tungusapai’ ya. (Amo. 5:42) Si naida gupai aida a nga ani ngarasi agu aboro naima zera rogo toro yo. I ima rengba kadu na gunde tipa ka tona tungusapai berewe. Ani rengbe ka ngarasa yo ni gumba ani gupai fuyo nga i atungusanga pai ni sa yo te. Ti gu regbo i nika du na rengba ka kura gene tungusapai yo, ani ima rengba ka kura na yo. Si nawira gupai nirengo nga i nika duadu na tambuahe tipa gu undo ani nika fuhe fuyo wa i aˈasada ka tona tungusa wene pangbanga berewe. Ho ani ayugo gupai ni fu agu aboro naima zera rogo toro yo nga ani naberã payo aberã ni awirinarani, i ima rengba ka tona gayo apai berewe nga ga toro nga gu naye na ngbarago fu aboro dunduko rogo dungurati.

19. Gini nyemupai du ani na ni, na tipagine?

¹⁹ Ani nika mangasunge sa aboro ni abawiriki tipa bagizo regbo wai? Ani nika mangaha ki da ti digida zegino. (Mt. 28:20) Ya mo ani adu na rengba ka tungusapai na ki sa aboro ni abawiriki dakuti gu regbo re? Ani ima diaberã ka mangaha wo! Ani na ngbarago ka fu gaani regbo, gaani ome, gbiati agu amarã du berani tipa ka gbata agu aboro “i aima ringbisa yo sa nyenye unga” watadu agu aboro du na nyemu ka gbia nyenye unga. (Amo. 13:48) Ho ani amangaha ni wo, ani napekafuo ga Yesu kpiapai. Ko aya: ‘Gi riahe nga manga kina gu pai gu ko akpi nyemu he nakedi re, mi nyasi gako sunge.’ (Yo. 4:34; 17:4) Gere nga gupai du ani dunduko na nyemuhe. Si naida ani nyasi gu sunge i nafuhe furani. (Yo. 20:21) Na ani naida gu kura aboro kodihe na agu aboro naima zera rogo toro yo hipai rogo gi sunge re na ani wa sa.—Mt. 24:13.

20. Ringbisihe kuti AFiripoio 4:13, tipagine du ani ti ni na rengba ka digiso gu sunge Yesu afuhe furani ani mangihe?

²⁰ Nirengo, taatapai nga ha ka manga gu sunge Yesu afuhe furani te. Wa vura duhe wo, ani amanganga gi sunge re nisarani te. Yesu akidohe nga ko nika du na kina rani. Ho ani asa aboro ni ni abawiriki, ani nga “ga Mbori abadiasunge” na “ani nagumba pai rogo Kristo yo,” sidu, aYekova na Yesu naundo rani ani mangi gi sunge re. (1 Kor. 3:9; 2 Kor. 2:17) Sidu tie, ani ima rengba ka digisoho. Nairiwo gu pa momu na pa ngbarago ngaha tipa ka manga gi sunge re na ka undo kura aboro a i mangi kina gu bangisapai re!—Oni gedi AFiripoio 4:13.