1, 2. Ginipai nika koda rani dunduko sa rogo 2018, na tipagine? (Oni bi gu sura duti tonatonaha.)

HO Uru nika tona kaa ti ni rogo Marungu ti rameru 31, 2018, ga Mbori aboro gbiati gu kura badungu agu aboro du na nyemupai nika dunguratiyo tipa Ga Gbia Riahe nga gu ninaamanga na agarã dũ. Ho uru nikaa ti ni re, amirioni aboro nika dunguratiyo ka manga Tingida Pakpio Kristo. Rogo agarã ni basasa dũ, Tingida Pakpio Yesu nga gu iˈiriwo dunguratise nga gu nakoda aboro kisusi adunguratise dũ auru kpotosende!

² Ani ima rengba ka berãpa wai aYekova na Yesu nidu na bakere ngbarago ho i abi amirioni aboro ni auru kpotosende dũ i nidu pati gi kparakpara mbakadapai re rogo gu uru re. Ziazia Kekeapai ape gupai nga “bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko” nika paa kuari ni bakere fugo ki ya: “Gaani bata ye be gaani Mbori nasunga auru mbatabakindo, na be Wiri Kandoro a.” (Yugo. 7:9, 10) Nairiwo gu wenepai ngaha nga badungu aboro nafu irisa fu aYekova na Yesu ngba gi gene re ti regbo Tingida Pakpio Yesu na agarã dunduko!

3. Gini asanahe gi kekeapai re nika karagapai kutini?

 ³ Asanahe kinaho gi kekeapai re nika karagapai kutini. Si nga, (1) Wai du rengbe ani ni basasa dunduko ka mbakadatirani tipa Tingida Pakpio Yesu na ki gbia undo ti du pati ni? (2) Rogo gini agene Tingida Pakpio Yesu aundo ga Mbori aboro dunduko i du ni kodikodi yo? (3) Wai du rengbe ani ni basasa dunduko ka fubee kuti gu kodatise re? (4) Ya mo yangara Tingida Pakpio Yesu aduho ti ni? Kangia wo duhe, ti gini regbo?

4. Tipagine duhe ti ni furani ni nyanyakipa pai kadu pati Tingida Pakpio Yesu?

⁴ Oni berẽkurii wai nyakipa du pati Tingida Pakpio Yesu. Oni tingidi gupai nga, agu adunguratise nga ga dungurati nga papara gaani irisombori. Nirengo, aYekova na Yesu ima inopa gu boro namanga ome kadu pati gi nyanyakipa dunguratise nga ga garã re. Si naida aYekova na Yesu bi gupai nga ani nika duadu pati Tingida Pakpio Yesu, kina gu ka si du nga rengba ho wa ka ani ndu kandara tooni te. Ho ani ayugo gupai ni na gaani mangaapai nga dunguratise tipa irisombori nga nyanyakipa pai furani, ani nafu kura ndupai fu Yekova ko banda rimo rani rogo gako “kitabu tingidapai” du nga “kitabu unga” nga gu du na rimo agu aboro rogoho ni kekehe du tipa gbia nyenye unga.—Mara. 3:16; Yugo. 20:15.

5. Rogo agu aˈuru nika du mbata fu Tingida Pakpio Yesu, wai du rengbe ani ka ‘wisigo tirani singia ani rogo idapase yo’?

⁵ Rogo agu aˈuru nika du mbata fu Tingida Pakpio Yesu, ani ima rengba kaa dia regbo tipa kaa manga kparakpee na kaa berã wenengai tipa wai du gaani pagume na Yekova. (Oni gedi 2 AKorindo 13:5.) Wai du rengbe ani ka manga gupai re? Ni ‘wisigo ani tirani singia ani rogo idapase yo.’ Tipa ka manga gupai re, si naida ani sana tirani nga: ‘Ya mo mi ima ida kuti gupai nzunzu nga mi nga papara gu bangisa riigbu Yekova naidi paha nga si naamanga gupai ko akpinyemuhe? Ya mo mi namanga bakere ome kaa tungusa gu wene pangbanga nga ga Kindo na kini yuguhe? Ya mo gimi mangaapai nayugo gupai nga mi ima ida kuti gupai nzunzu nga ani naraka ti yangara areme na digido ga Satana zogarago ima mbeda? Ya mo mi na kina gu bangisa kido mi adu na ni kuti aYekova na Yesu ho mi akpara gimi raka ni fu Yekova Mbori?’ (Mt. 24:14; 2 Tim. 3:1; Eb. 3:14) Berãkurii akaragapai kuti ngbatunga agi asanahe re nika undo rani ani naayugo gini ngbatunga aboro kindi nga ani.

6. (a) Gini bangisa gene sa nandu sa unga? (b) Wai du kura bakumba sa naambakada tiko tipa Tingida Pakpio Yesu na agarã dũ, na wai du rengbe mo ka manga ngbatunga gupai re?

⁶ Mo gedi gu kekeapai du mburuhe rii Ziazia Kekeapai nga gu nafura tipa pa wai nyakipa Tingida Pakpio Yesu. (Oni gedi Yoane 3:16; 17:3.) Gu yangara gene nandu koyo du nyenye unga ni nakoda ‘ino’ Yekova gbiati ‘ida pa’ bangisa Wiri Ko nga Yesu. Tipa ka mbakada tiro tipa Tingida Pakpio Yesu, si adu ni wenepai ka mo sia kekeapai tipa kaa wisigoho nga gu nika undoro mo mbedi gbe na Yekova gbiati Yesu. Mo bingo gupai kura wirina sa nga guko naima du ni bakumba tipa gbanga regbo naamangaha. Vuru agu agarã ninaasusa, ko naadungura gu kekeapai nga ga Ngbaõbambu Sinziri nga gu nafura tipa Tingida Pakpio Yesu gbiati gu nyemuse aYekova na Yesu nayuguhe furani. Rogo agu aposo nidu mbata fu Tingida Pakpio Yesu, ko naageda gi kekeapai re berewe na kini berẽkurii pa wai nyakipa Tingida Pakpio Yesu. Ti kura aregbo, ko naagbia vovo kekeapai sa watadu ue kuti gu gako dungura dungura kekeapai re. Gi bakumba re bi gupai nga ho ko ageda gi kekeapai re ni berewe na ho ko amanga gu gedapai ni nga Geda Ziazia Kekeapai Kini Tingidi Pakpio Yesu na kini berẽkurii gupai ko agedaha, ko nawirika vovo apai na agarã dũ. Gu nyakipaha anyaka gbe nga, ko nabihe nga gako nyemuse tipa Yekova gbiati Yesu nakio na agarã dunduko. Ngbatunga gu mbakadapai nga ga wisigopai re ima rengba ka undo ro mo kiisi gamo nyemuse gbiati tambuahe tipa  aYekova na Yesu na pa manga mo ho wo rengbe ka undo ro mo gbia undo wenengai ti Tingida Pakpio Yesu.

7. (a) Ginipai Yesu amangi kparakpee tipaha rogo gu yuru i ari Ga Gbia Riahe rogoho ni bambataha? (b) Ginipai nayugo gupai nga Yekova ima karagapai kuti ga Yesu kparakpee?

⁷ Rogo gu yuru i ari Ga Gbia Riahe rogoho ni bambataha, Yesu amangi kparakpee nga wene kodatise du dagba apefuoko wakina gu du dagbako na Bako. (Oni gedi Yoane 17:20, 21.) Nirengo, Yekova aima karagapai kuti gu kparakpee Wiriko amangihe re, na awere, badungu amirioni aboro idi kuti gupai nga Yekova aima keda Wiriko. Tingida Pakpio Yesu, nga gu dunguratise paha naima nyaka kisusi nafu gu ndikidi gopai nga ga gu kodatise nga ga aDezire Yekova. Badungu ngbatunga aboro na arangi kpotoyo ni bakiakia ninaadungura tiyo rogo gayo aba dunguratise rogo zegino dunduko. Rogo kura aba, agu aboro du angbatungayo ni bakiakia naadunguranga tiyo sa tipa irisombori te, watadu ho i adunguratiyo ni sa, kura aboro nabihe nga si arẽnga te. Ono ngbatunga gu kodatise re ni bawenehe bangiri Yekova gbiati Yesu!

8. Gini pangbanga Yekova agumbaha fu Yezekere nibipa kodatise?

⁸ Ni du ani ni ga Yekova aboro, gu kodatise du dagbarani airiwongo tirani te. Yekova zaatu aima fura tipa gipai re. Oni berãnga pa gu pangbanga ko agumbaha fu gu nebi nangia Yezekere nibipa kpamia angua ue ku rogo ba sa, gu ngua naadu “tipa Yuda” gbiati gu ngua “naadu tipa Yosefa.” (Oni gedi Yezekere 37:15-17.) Gu kekeapai nga “Asanahe be Agedihe” nga gu naadu rogo gu Ngbaõbambu Sinziri nangia ga Bamburu 2016 ape gupai nga: “Yekova agumba pangbanga maabangirise fu Yezekere nga gu naakido pa koda rika aYisaraere sa fuo karaga yo tiyo ku Ringara Mokido yo. Gu pangbanga re afura kumbatayo a tipa pa koda ga Mbori aboro sa nga gu natona manga rogo yangara arame.”

9. Wai du digisidigisi gu sangbanebi du rogo Yezekere nidu ni yuguyuguhe rogo agarã dunduko ti regbo Tingida Pakpio Yesu?

⁹ Natona rogo gu garã nangia 1919 ka ndu kumbatayo, gupai Yekova amangihe ni bambataha angia kaa mbakada mbedimbedi aKristano berewe yeeye na kini kodiyo a berewe sa, nga aguyo naadu wa gu ngua naadu “tipa Yuda.” Fuo gure, wa badungu agu aboro du na gu maabangirise nga ga raka auru kpotosende nga aguyo du wa gu ngua “du tipa Yosefa” atona ka kodatiyo na mbedimbedi aKristano, gi badona aboro ue re ada ni ‘rimbasa akandoro sa.’ (Yo. 10:16; Zek. 8:23) Yekova akidohe nga ko nika kpamia agi angua ue re na ki sa ha si du sa beko yo. (Yeze. 37:19) Awere, agu abadona ue re namangasunge sa tii gu Bakindo sa nga Yesu Kristo, nga guko du ni taasitaasi ko na i nafura tipa ko ni ga Mbori “moyambu nga Dawidi” ni sangbanebi. (Yeze. 37:24, 25) Gu wene kodatise i nafura tipaha rogo Yezekere re nidu ni yuguyuguhe ziazia rogo agarã dunduko wa yangara mbedimbedi aKristano gbiati “kura akandoro” naadunguratiyo sa kaa Tingida Pakpio Yesu! Ginipai tie rengbe ani dunduko ni basasa ka mangaha ka banda gu kodatise re si naandu kindi kumbatayo?

10. Wai du rengbe ani ka sa gupai nga kodatise du dagba ga Mbori aboro?

¹⁰ Gene sa rengbe ani ka banda gu kodatise nga ga ga Mbori aboro ngbaha nga ka sonosa gu sino nga ga umbasitise. Ho Yesu adu ni auru kpotosende, ko arugu gako abawiriki nga i umbasipa tiyo. (Mt. 23:12) Ka si du nga ani na umbasitise, ani funga tirani sa gu toro nga ga kiisopa tise du rogo zegino te. Kuba gure, gaani umbasitise nika undo rani ani ra fu agu aboro nangbembatayo rogo apai yo, na ngbatunga gu toro nga ga giasangba re na nyanyakipaha tipa kodatise du rogo dungurati. Gu susi asusa gbe nga, gaani umbasitise nika fu ngbarago fu Mbori, nga guko ‘naka fu aboro rekangose,  ono kini fu undahe fu aguyo naumbasi tiyo.’—1 Pet. 5:5.

11. Wai rengbe berãkurii agu apai gu kpakuto gbiati gu imekakue du tipa Tingida Pakpio Yesu arukubaha ka undo rani ani banda gaani kodatise?

¹¹ Gu ue gene rengbe ani ka banda kodatise ngbaha nga kaa berãkurii agu apai gu kpakuto gbiati gu imekakue i naamangasunge na ni ti regbo Tingida Pakpio Yesu arukubaha. Mbata fu gu kparakpara yuru re na gbe rogo gu yuru re, mo berẽkurii wai nyakipa gu kpakuto adunga agbooro rogoho re ya gbiati zamba imekakue. (1 Kor. 11:23-25) Gu kpakuto re narukuba kpoto Yesu adunga ingapai ti ni ya nga gu ko afuhe ni motumo. Ono si aidanga ani rugutirani sa na kina agu ahe gu kpakuto re gbiati gu imekakue re arukubaha te. Oni tingidi gupai nga ga Kristo motumo tumorii nakoda bakere mangaapai ue nga ga nyemuse; gu nyemuse Yekova ayuguhe ni fuko Wiriko tipa rani gbiati gu nyemuse Yesu ayuguhe ni ida ko ka fu ungako tipa rani. Si naida berãkurii gayo nyemuse fõngbaduraniyo ani kpinyemu yo a. Na gu nyemuse tipa Yekova du ani na ni gbiati agu aboro ani airisombori na yo nakoda rani sa na si nanyakasa gaani kodatise.

12. Rogo gu kpiapai yo nga ga bakindo gbiati gako amoyambu, wai du Yesu ape gupai ziazia nga Yekova naida gupai nga ani naambupai fu akuarani?

¹² Gu biata gene rengbe ani ka banda kodatise ngbaha nga kaa mbupai fu akuarani. Ho ani ambupai ni fu agu aboro ingipai kuti rani, ani nayugo gupai nga ani na tambuahe tipa gupai nga Yekova ima rengba ka mbupai furani ti gaani aingapai mbiko gu motumo tumorii nga ga Yesu. Oni berẽnga kurii gu ga Yesu kpiapai du rogo Matayo 18:23-34. Mo sananga tiro nga: ‘Ya mo mi naida ka mangapai kuti gupai Yesu ayuguhe re? Ya mo mi nayugo gupai nga mi na zerangbaduse gbiati giarogopaiyo ko yo du agu aboro ni ani airisombori na yo? Ya mo mi regerege ka mbupai fu agu aboro naingapai kuti re?’ Rengo ngaha nga kura aingapai kinaho naima du ni kerehe kisusi akuraha, na agu kinaho si naima du ni ba mbumbuhe fu kpakpa aboro i mbupai tipaha. Ono wa vura duhe wo, gi kpiapai re nayugo gupai furani Yekova aidaha. (Oni gedi Matayo 18:35.) Yesu aima pehe ziazia nga ka ani ambunga pai fu awirinarani ho du wene nduapai adu ni tipa mangaha wo ya, Yekova ambunga pai furani te. Nirengo, gere nga gupai si aida aida ani berẽkuriihe wenengai! Ani nabanda gaani kodatise ho ani  ambupai ni fu akuarani wa kina gu Yesu ayuguhe nga ani naamangaha.

13. Wai du yugo tirani ni aboro zereda abanda kodatise?

¹³ Ho ani ambupai ni fu akuarani, ani nayugo gupai nga ani nga aboro zereda. Oni tingidipa gu rugute gu mokedi nangia Pauro apehe nga si naida ani “nike na ka kuti gu du sa nga ga Toro zikazika, ni gu ũkpamiatise nga zereda.” (Ef. 4:3) Rogo agu adiwi nika ngia ga Tingida Pakpio Kristo, gbe rogo gu uru nga ga Tingida Pakpio Yesu re, mo berẽ dudunguro tipa wai mo naamangapai na aboro. Mo sananga tiro nga: ‘Ya mo gopai ho ziazia nayugo gupai nga mi nga gu boro ninaakpingo pai ya? Ya mo aboro ini re ni gu boro namanga bakere ome ka banda zereda gbiati kodatise?’ Gere nga nyanyaki asanahe si aida ani berẽkuriihe ti gi regbo nga ga garã re.

14. Wai du rengbe ani ka yugo gupai nga ani ‘nahi pai fu akuarani ni nyemuse’?

¹⁴ Gu biama gene rengbe ani ka banda kodatise ngbaha nga ka wirika Yekova nga Mbori nyemuse niyugo ani nyemuse. (1 Yo. 4:8) Agu afugo nga, “Mi nikaa mbupai ambu fuyo, ono anga si nga i ngba tire te,” si aidanga ani naagumbaha tipa agu aboro ani airisombori na yo te! Gu ngbatunga berã re andunga sa na gu rugute Pauro afuhe nga si naida ani ‘hi pai fu akuarani ni nyemuse’ te. (Ef. 4:2) Oni tingidi gupai nga ko aayanga gbua wẽ ani ‘hi pai fu akuarani’ te. Ko agbia kurapai kutini nga ani mangihe wo “ni nyemuse.” Kparakparapai kina bangbanda agu afugo re. Ngbatunga aboro dunduko du rogo gaani adungurati nga aguyo Yekova nagbe yo koyo du ko ni. (Yo. 6:44) Wa duhe nga Yekova ima gbeyo koyo du ko ni, si ima du nga ko ima biyo ni wene yo. Tipagine tie ani narengbe ka sarangbanga wirinarani ti ni nga ni arẽnga tipa gaani nyemuse te? Si aidanga ani ka na gu nyemuse Yekova aruga rani nga ani yuguhe te!—1 Yo. 4:20, 21.

15. Wai du ani aino gupai nga uru adu kinaho ani nika manga yangara Tingida Pakpio Yesu?

¹⁵ Uru adu kinaho ani nika manga yangara Tingida Pakpio Yesu. Wai du ani aino gipai re? Rogo gu bambata waraga ga Mbori toro adu kugii gu mokedi nangia Pauro ko kehe fu aKorindo, ko ake gupai fu mbedimbedi aKristano nga ho i atingida pakpio Yesu ni na agarã dunduko, i ‘nataka pande ga Gbia kpio da ho ko ka ye ni.’ (1 Kor. 11:26) Gu fugo du ane nga “ka ye,” kinaha a nga gu fugo nga “niye” nga gu Yesu afura tipaha rogo gu gako sangbanebi du tipa digido rago. Nibipa gu bakere gberãngbi nga gu naima mbeda gbe, ko aya: ‘I ki bi gu pai i aina pai ti ni nga ga Wiri boro ngbangbaturũ yo. Ngbatunga aboro auru kpotosende dunduko i ki nirungo arungo, i ki bi Wiri boro ko niye rogo mai ngbangbaturũ na tandu na bakere taarimo. Yesu ki kedi gako amaraika na bakere woro ngbunga, i ki dungura gako siasia aboro rogo arago dũ, ti digida ngbangbaturũ dunduko.’ (Mt. 24:29-31) Yesu nika “dungura gako siasia aboro” ti gu regbo ko nika dia gu yangara mbedimbedi aKristano dunduko nika du auru kpotosende ane ku ngbangbaturũ yo. Gipai re nika manga tingbafuo bambata papara bakere gberãngbi nasusi, ono mbata fu gu vura nga ga Aramegido. Fuo gure tie, agu aboro dunduko du bangeyo nga 144,000 nika kodatiyo na Yesu ka diabe agu abakindo nga ga kpotosende yo. (Yugo. 17:12-14) Gu Tingida Pakpio Yesu i nika mangaha mbata fu Yesu ‘ye’ ka dungura mbedimbedi aKristano ku ngbangbaturũ yo nika ngia yangara Tingida Pakpio Yesu.

16. Tipagine mo nadiberã ti ni kadu pati Tingida Pakpio Yesu rogo gi garã re?

¹⁶ Ani dinga berã adia ka gbia undo tipa tirani ni du ani pati Tingida Pakpio Yesu rogo Marungu 31, 2018. Na ani sana Yekova ko undo rani tipa ani naafubee kindi kuti gu kodatise nga ga gako aboro! (Oni gedi Atambuahe 133:1.) Oni tingidi gupai nga, uru adu kinaho ani nika manga yangara Tingida Pakpio Yesu. Ono wa du rago re tie, ani mangingo bakere ome amanga tipa kadu pati Tingida Pakpio Yesu, na ani bingo gu wene kodatise abi na nyanyakipaha du dagbarani ti regbo ho.