1. Wakina Bakindo Davide, gini sanahe agu akura rani narengbe ka sanaha?

ANI DUNDUKO naida kadu zezeredi rogo raka yo. Boro ho dagbarani yo naida kadu rogo bakabangirise te. Ono tie, ti kura aregbo, ani ima rengba kadu rogo bakere bakabangirise. Si nga ndu gupai kura ga Yekova amoyambu narengbe ka sana gu bangisa sanahe ti ni Bakindo Davide asana Yekova na ni ki ya: “Rago adu waĩ mi ni sakipai mbisimore yo, ki du na kina rungo kpotore yo na auru dũ?”—Tam. 13:2.

2. Gini apai ani nika sakapai tipaha rogo gi kekeapai re?

² Wa vura duhe nga ani dunduko nidu adu rogo bakabangirise ti kura aregbo, apai kinaho rengbe ani ka mangaha tipa ka zanga du rogo bakere bakabangirise. Rogo gi kekeapai re, ani nika sakapai tipa bete agu apai rengbe ka sarani ani du rogo bakabangirise. Fuo gure, ani ki sakipai tipa apai sita nga gu rengbe ani ka mangaha tipa kadu zezeredi ho du ani ni rogo akpakarapai.

3. Gini apai rengbe ka sarani ani du rogo bakabangirise, na ya mo rengba berani ka rugusa agu apai re?

³ Badungu apai duho rengbe ka sarani ani du rogo bakabangirise. Na agu kinaho adunga ani na rengba ka rugusaha ya. Ni kpiapai, ani na rengba ka rugusa pa wai gino riahe, aroko watadu abambu akio kumbatayo rogo agarã dunduko te, na ani na rengba a ka rugusa pa wai gaani abadiasunge na akuarani sukuru yo aˈasada dedede ka sarani ani du ni airaziree watadu ani mangi wasiwasi mangaapai te. Berewe a, ani arengbanga ka rugusa gu gbegberẽ apai namanga rogo gaani dagbarago te. Ani nagbia tirani na agi akpakarapai re bambiko ani naraka rogo gu zegino badungu aboro rogoho amanganga adiaberã ringbisihe kuti agu arugute nga ga Baibiri ya. Berewe a, Satana nga mbori  gi zegino re ima ino gupai nga kura aboro kinaho nikaa irisongo Yekova ya bambiko gupai nga “berã pa zegino” nasayo i du rogo bakere bakabangirise. (Mt. 13:22; 1 Yo. 5:19) Sidu, si airiwongo tirani te nga zegino ima hi be akpakarapai nga gu nasa aboro i du rogo bakere bakabangirise!

4. Ginipai rengbe ka manga ka ani abakabangirani ni bakerehe tipa gaani akpakarapai?

⁴ Ani ima rengba kadu rogo bakere bakabangirise mbiko agu akpakarapai ani agbiatirani na ni si ki sa gupai nga ka ani berẽnga pa kurapai ya. Ni kpiapai, ani ima rengba kaa bakabangirani nga marã adunga berani rengbe arengba ka ngerafuo gaani azingo na ni te watadu ani ima rengba kaa bakabangirani nga ani nika ti na kaza na ka ani adunga na rengba ka manga gaani sunge ya watadu zavura ani ki zanga gaani sunge. Ani ima rengba a kaa bakabangirani nga ani nika zanga gaani padu ni ruruse ka i asadi rani ani kuo ga Mbori arugute. Barambeda, Satana nika sa agu aboro du ko na ome kurii yo i zubo ga Mbori aboro, sidu, ani ima rengba kaa bakabangirani nibipa wai ani nika mangapai ti gu regbo agu aboro re nika zubo rani. Ani ima rengba kaa bakabangirani nga, ‘Ya mo si ni irairapai kaa bakabangire tipa agu apai re?’

5. Ginipai Yesu aaida ka pehe ho ko aya ni wẽ: “Ka oni bakingo bangironi ya”?

⁵ Ani ima ino gupai nga Yesu ape gupai fu apefuoko nga: “Ka oni bakingo bangironi ya.” (Mt. 6:25, NW) Ya mo Yesu aape gupai ape nga ka ani bakingo bangirani tipa ai pai ya? Oó! Oni tingidi gupai nga kura gu ga Yekova ruru amoyambu naadu bakuru kusayo anaabaka bangiriyo abaka a. Ono tie, Yekova adu kindi na ngbarago na yo. * (1 Aba. 19:4; Tam. 6:3) Sidu, kido du Yesu aafuhe furani. Ko aaidanga gupai nga ani du rogo bakere bakabangirise tipa pa gbia agu ahe ani aidaha si ki sa gupai nga iriso Yekova da ni gupai paha anyakanga rogo gaani raka yo ya te. Gini apai tie rengbe ani ka mangaha ho du ani ni rogo bakabangirise?—Oni bi gu sanduki nga, “ Wai ka Mangaha.”

6. Ringbisihe kuti AFiripoio 4:6, 7, ginipai rengbe ka undo rani ani du zezeredi?

⁶ (1) Mo naamanga kparakpee dedede. Ho du kpakarapai ni nga gu nasa ro mo naabaka bangiro, mo rengbe ka kpara fu Yekova tipa undo. (1 Pet. 5:7) Yekova rengbe ka karagapai kuti gamo kparakpee ni fuko “gu zereda nga ga Mbori nagasi rugatinapai [nga ga aboro] dunduko” foro. (Oni gedi AFiripoio 4:6, 7.) Yekova nika fu gu zereda re foro vurube gako ziazia toro du na ome ti ni.—Gara. 5:22.

7. Ginipai si aida ani tingidihe ho ani amanga kparakpee ni fu Mbori?

⁷ Ho mo amanga kparakpee ni fu Yekova, mo peke agu apai dunduko du berã ro yo fu ko. Mo peke kina boro agu apai mo aidaha. Mo pe gupai fu ko namanga ro, na ki saki wai fu ko du mo. Ka si du nga rengba kina bero ka mangapai kuti gupai re, mo sana ko tipa tatamana tipa ka ino gupai rengbe mo ka mangaha na mo ki sana ko a tipa gu ome si aidaha tipa ka mangaha. Ka si du nga pai ho rengbe mo ka mangaha tipa gupai re te, mo sana Yekova tipa ko undo ro ka mo dunga na bakere bakabangirise tipaha ya. Ho mo ape gupai ni rogo gamo akparakpee yo mo aidaha nzunzu, mo nabi wai abi wenengai kusa Yekova akaragapai kutini. Ka si du nga mo aima digo nimangi kparakpee tipa gbanga regbo ono ka karagapai ayengo ya, ka mo mbunga manga kparakpee ya. Yekova aidanga kina gupai sa nga mo pe gupai namanga ro fu ko te, ono ko naida gupai a nga mo naamanga kparakpee kindi tipa gupai re.—Rk. 11:8-10.

8. Ginipai si aida ani kodihe ku rogo gaani akparakpee yo?

 ⁸ Ho mo aba gamo akpakarapai ni ku auru Yekova rogo kparakpee yo, mo moi afugo tambuahe ku dagbaha yo. Si ni wenepai ani naatingidapa gu wene ahe dunduko du berani, zavura ho du ani ni rogo dungu akpakarapai. Ono ginipai rengbe mo ka mangaha ka si du nga mo ainongo wai ka pe gupai namanga ro fu Yekova te? Mo tingidi gupai nga Yekova nika karagapai akaraga kuti gamo kparakpee, zavura ka si vura du nga gupai rengbe mo ka pehe gbua nga, ‘Mo undongo re!’—2 Peka 18:31; Rom. 8:26.

9. Ginipai rengbe ani ka mangaha ho du ani ni rogo gunde?

⁹ (2) Mo naakido kuti ga Yekova tatamana, angianga gamo ya. Kusayo rogo muambe kama agarã Mbata fu Batikayo Kristo, avuru Yuda aagunde nga aAsuro nika zubo yo. Avuru Yuda aaidanga gupai nga aAsuro dibe yo te, si du i kini sana aEzipeto tipa i undo yo. (Yes. 30:1, 2) Yekova aza yo nga kido kuti aEzipeto nika ye na kina gberãngo. (Yes. 30:7, 12, 13) Vurube Yesaya, Yekova ape pa wai fu aboro i narengbe ka gbia ndikidi ngbabase. Ko aya: “Rogo du zezeredi na du [na kido kuti Yekova] si oni ka du ti ni na ome.”—Yes. 30:15b.

10. Gini aregbo rengbe ani ka yugo gaani kido ti ni kuti Yekova?

¹⁰ Gini aregbo rengbe ani ka yugo gaani kido ti ni kuti Yekova? Oni bingo bete akpiapai. I fu bawene sunge marã foro nga gu nikaa ida gupai nga mo naamangasunge kugii regbo yo na ka mo adunga na rengba kaa mangasunge fu Yekova wenengai gbe wa gu mo amangaha awere ya. Boro basunge yo naba nyemuni tiro, ono gu boro re nga ga Mbori moyambu naima zio bapatiza te. Watadu ginipai rengbe mo ka mangaha ka boro sa dagba gamo aborokporo yo pe gupai nga ni nika mbu ro ka mo aairiso Yekova kindi? Rogo agi apai re dunduko ni basasa, si nika ida gupai nga mo mangi nyanyaki diaberã, ono rogoho dunduko, Yekova nika fu gu rugapai afu foro mo aidaha. (Mt. 6:33; 10:37; 1 Kor. 7:39) Gu sanahe duho nga, ya mo mo adu na kido kuti Yekova na ki mangipai kuti gako rugapai?

11. Gini apangbanga nga ga Ziazia Kekeapai rengbe ani ka wisigoho tipa gupai nga kadu zezeredi ho ani agbiatirani ni na sogote?

¹¹ (3) Mo wirikipai ti wene akpiapai na gbegberẽ akpiapai. Ziazia Kekeapai na dungu apangbanga rogoho nga gu nayugo gupai nga si ni nyanyakipa pai gbe kadu zezeredi na kini kido kuti Yekova. Wa mo nikaa wisigo agi apangbanga re, mo bingo gupai naaundo ga Mbori amoyambu i du zezeredi ti gu regbo i aagbia tiyo na kere sogote. Ni kpiapai, ho ga aYudo Bakere Bambu-gumba ngbanga ape gupai ni fu amokedi nga i mbu tungusapai, i aagundenga te. I ape gupai ni wingbaduse nga: “Ani gi nga sangba Mbori agia susi ga aboro.” (Amo. 5:29) Zavura fuo ta yo amokedi, amokedi aagundenga te. Tipagine? Bambiko i aima ino gupai nga Yekova aasongoda yo asongoda. Ko aima du na ngbarago na yo. Sidu, i aandu kindi kumbatayo kaa tungusa wene pangbanga. (Amo. 5:40-42) Wakina gure a, ho i aambeda ni ka imo gu bawiriki nangia Setefano, ko adu kindi zezeredi na kpakpuko yo kini ngere “wa kina kpakpu maraika.” (Amo. 6:12-15) Tipagine? Ko aima du na gu kido nga Yekova aima du na ngbarago na ko.

12. Ringbisihe kuti 1 Petero 3:14 na 4:14, tipagine rengbe ani kadu ti ni na ngbarago ho i arungosi rani ni?

¹² Amokedi aima du na gupai beyo ziazia nga gu naayugo gupai nga Yekova adu na kina yo. Ko aima fu ome fuyo tipa i naamanga iiriwoapai. (Amo. 5:12-16; 6:8) Yekova afunga ome areme furani tipa ani naamanga iiriwoapai te. Ono wa vura duhe wo, Yekova nape gupai furani vurube Fugoko nga ho i arungosi rani ni tipa  rurupai, ko na ngbarago na ani na gako toro na kina rani a. (Oni gedi 1 Petero 3:14; 4:14.) Sidu, kuba gupai nga kaa bakabangirani na pa gupai ani narengbe ka mangaha ka ani gbiatirani na arungosiro kumbatayo, si naida ani moiberãrani gbe kurii gupai rengbe ani ka mangaha awere tipa ka nyakasa gaani kido kuti gupai nga Yekova ima rengba ka songoda rani na ki batasi rani. A kina wai agu abawiriki naadu bakuru kusayo amangihe, si naida ani kido kuti gu ga Yesu kidohe nga: ‘Mi afú ngba tatamana fu roni, nga gu ka avuraroni akáraga nga pai kuti ni niti kangu he a ya.’ Yesu nakido rani nga: “Rogo gaoni hipai oni abátasa ungaroni abatasa.” (Rk. 21:12-19) Na ka bangironi gonga ti gupai nga Yekova natingidapa gu futufutuapai dunduko du tipa gu gako amoyambu nakpi ni ruruyo fuko ya. Mbiko padu ko na gi inohe re, ko nika zingisa yo azingisa be kpio.

13. Waigu rengbe ani ka gbia undo ti wisigopai tipa agu apangbanga nga ga agu aboro naaidanga kadu zezeredi na ki kido kuti Yekova ya?

¹³ Ani ima rengba ka wirikapai a ti agu apangbanga nga ga agu aboro naaidanga kadu zezeredi na ki kido kuti Yekova ya. Wisigopai tipa gu gbegberẽ akpiapai re nika undo rani ani ne manga gu bangisa aingahe i amangihe. Ni kpiapai, ti gu regbo Bakindo Asa ada ni bakindo nga ga Yuda, na bakere riivura kini ye ka zubo ko, ko akido kuti Yekova, na Yekova ki ima undo ko ko dibe gu riivura re. (2 Peka 14:9-12) Kusa, gu Bakindo nangia ga Yisaraere ko nangia Basa aye na umba riivura ka zubo Asa. Ono ti gi regbo re, Asa aadunga na kido kuti Yekova tipa ko batasi ko wa gu ko abatasi ko kusayo te. Kuba gure, Asa atumo aSurio tipa i undo ko. (2 Peka 16:1-3) Na ho gako raka aambeda ni ka digo, ti gu regbo ko ati na kere kaza, ko aakidongo kuti Yekova tipa ko undo ko te.—2 Peka 16:12.

14. Ginipai rengbe ani ka wirikaha ti ga Asa aingahe?

¹⁴ Ti tonatonaha, Asa angere koyo du Yekova ti gu regbo ko adu rogo akpakarapai. Ono kusa, ko aakidongo kuti gako Mbori tipa ko undo ko te. Kuba gure, ko aˈasadi ka mangapai kuti gako akpakarapai ni kina tiko. Gupai Asa amangihe nga ka sana aSurio tipa undo re aima rengba ka ngera ti tonatonaha wa wenepai. Ono tie, gako diabese adu tipa kina wiri guru regbo. Yekova ape gupai fuko vurube nebi nga: “Bambiko mo kida kuti bakindo aSurio, ka mo akida nga kuti Yekova ga Mbori ya, si du du gu rimbasa aboro vura ti ni nga ga bakindo aSurio ni merẽmerẽ yo be ro.” (2 Peka 16:7) Si naida ani du na rubangirise ki zanga berã gupai nga ani ima rengba ka mbakada gaani akpakarapai nitirani zanga sana Yekova tipa undo vurube Fugoko. Zavura ho ani aida ka manga diaberã ni ni ipiipihe, si naida ani du zezeredi na ki kido kuti Yekova, ko nika undo rani aundo ani mangi ruru diaberã.

15. Ginipai rengbe ani ka mangaha ho ani ageda Ziazia Kekeapai ni?

¹⁵ (4) Mo zi averesi nga ga Ziazia Kekeapai kuri ro yo. Ho mo abi averesi ni nga ga Ziazia Kekeapai nga gu nayugo wai duhe ni nyanyakipa pai kadu zezeredi na kini kido kuti Yekova, mo asadi ka zioho ku riro yo. Tipa gupai nga ka zioho ku riro yo, mo ima rengba ka bihe ni pa undo kaa gedaha na fugoro kuari watadu ka kehe sande na kini gedihe dedede. Yekova ape gupai fu Yosua nga ko naageda gu kitabu nga ga Rugute dedede na woro fugoko ku sende tipa gupai nga ka mangapai ni tatamana. Gupai ko aagedaha rogo gu kitabu nga ga Rugute aima rengba a ka undo ko ka ko gundenga ya, ono ko du na wingbaduse tipa ka ngbembatayo fu ga Mbori aboro. (Yos. 1:8, 9) Badungu averesi du rogo Fugo Mbori yo nga gu naima rengba ka undo ro mo du na zereda nga ga berãseyo ho du mo ni rogo agu apai yo rengbe ka saro mo du na bakabangirise watadu gunde.—Tam. 27:1-3; Snz. 3:25, 26.

16. Waigu Yekova amangasunge na dungurati tipa ka undo rani ani du zezeredi na kini kido kuti Yekova?

 ¹⁶ (5) Mo naakoda tiro na ga Mbori aboro. Yekova namangasunge na awirinarani tipa ka undo rani ani du zezeredi na kini kido kutiko. Ti regbo gaani adunguratise, ani nagbia undo ti agumbapai, agu akaragapai aboro afuhe, gbiati agu afugo ngarasaro ani apekaha na awirinarani. (Eb. 10:24, 25) Berewe a, ani ima rengba ka gbia bakere ngarasaro ho ani apeka agu apai ni nafu bakabangirise furani fu mbembedi abakurearani rogo dungurati. Ka bakurearani pe “wene fugo” furani, si ima rengba ka undo rani ka ani dunga rogo bakere bakabangirise ya.—Snz. 12:25.

17. Ringbisihe kuti AEbere 6:19, waigu rengbe gu gaani maabangirise du tipa Kindo ka undo rani ani du zezeredi ti regbo akpakarapai?

¹⁷ (6) Mo banda gamo maabangirise si du ni nyanyakihe. Gu gaani maabangirise du tipa Kindo wakina “ũzada mbisimo,” si nafu ome furani si ki vura du vurũ nga ani nagbia tirani na akpakarapai watadu abakabangirise. (Oni gedi AEbere 6:19.) Mo berẽpa gu kidohe Yekova namangihe tipa kumbatayo. Ti gu regbo re, pai ho nika sa boro ninaabaka bangirini te. (Yes. 65:17) Mo berẽpa tiro rogo vovo zezeredi zegino, nga gu gbegberẽ apai nikaa manganga rogoho ya. (Mika 4:4) Mo nika nyakasa gamo maabangirise anyakasa a ho mo nikaa fura fu kura aboro ni tipa vovo zegino. Mo naamanga sunge tungusapai na sunge sa aboro ni abawiriki ni bakerehe wa rengbe omero na ni. Ka mo mangihe wo, mo nika ‘hika be maabangirise, dati kina digida rame.’—Eb. 6:11.

18. Ginipai rengbe ka manga kumbatayo, na ginipai rengbe ani ka mangaha tipaha?

¹⁸ Bambiko gupai nga ani ima mbeda kuti digido gi sino raka re, ani nikaa gbiatirani na badungu akpakarapai nga gu rengbe ka sarani ani du rogo bakabangirise. Gu gaani veresi nga ga gu garã nga 2021 rengbe ka undo rani ani dibe agu akpakarapai re kidu zezeredi, angianga na gaani ome ya, ono vurube gaani kido kuti Yekova. Rogo gi garã re, ani yugungo gupai ayugo na gaani mangaapai nga ani ima du na idapase kuti gu ga Yekova kidohe nga: ‘Rogo du zezeredi na du na kido si oni ka du ti ni na ome.’—Yes. 30:15.