1-3. Gini akpakarapai rengbe ka sa ga Yekova aboro i kpari ni aume?

 GINI yangada regbo mo akpari ni aume? Ti kura aregbo, ani ninaakpara ni aume mbiko ani na ngbarago. Ono dedede, ani ninaakpara ni aume mbiko ani na gberãrago. Ni kpiapai, ani nakpara ho gaani boro nakpi ni. Lorilei, nga wirina Amerika yo akepai nga: “Ti kura aregbo, mi anidu na bakere gberãrago mbiko pakpio wire nangia degude, si kidu wa ka i ya pai ho ka fu wasa fere te. Ti agu aregbo re, mi aaberãnga gupai nga mi azanga du na bakere gberãrago te.” *

² Ani ima rengba ka kpara ni aume tipa kura nduapai. Hiromi nga nazakigene Japan yo aya: “Ti kura aregbo, mi nidu adu na gberãrago mbiko agu aboro mi atungusapai fuyo na nyemu ka giapai tipa Ziazia Kekeapai te. Mi naamanga kparakpee fu Yekova ti kura aregbo na aume bangire yo nga ko undo re mi gbia gu boro nagbata rengo.”

³ Ya mo mo naabitiro ti kura aregbo wakina agi awirina re? Badungu rani ima rengba ka bi tirani wo. (1 Pet. 5:9) Ani naida ka iriso “Yekova na ngbarago,” ono ani ninaakpara ni aume ti kura aregbo mbiko pakpio gaani boro, mbiko ani na gberãrago, watadu ani nagbiatirani na akpakarapai nasaha ni kpakarakpakaraha furani ani nye ni rururani fu Mbori. (Tam. 6:6; 100:2) Ginipai rengbe ani ka mangaha ka ani du wa gure?

4. Gini apai ani nika sakapai tipaha rogo gi kekeapai re?

⁴ Ani ima rengba ka wirikapai ti ga Yesu kpiapai. Ti kura aregbo, ko aima gbiatiko a na gu nyanyaki apai nasako ko ‘kpari ni aume.’ (Yo. 11:35; Rk. 19:41; 22:44; Eb. 5:7) Ani fugüngo agu apai nangiaha re. Wa ani nikaa fugoho, ani nika bi agu apai rengbe ani ka wirikaha be Yesu gbiati Bako nga Yekova. Ani  nika bi agu apai abi a rengbe ani ka mangaha ho ani agbiatirani ni na agu apai nasarani ani kpari ni aume.

5. Ginipai ani awirikaha tipa Yesu ti gu pangbanga du ni kekehe rogo Yoane 11:32-36?

⁵ Ti regbo garã rogo gu garã nangia 32 Fuo Batikayo Kristo, bawene bakurea Yesu nangia Razaro ati na kaza na ko ki kpi. (Yo. 11:3, 14) Razaro adu na adawiriko ue, nangia aMaria na Marata, na Yesu aima kpinyemu agi aborokporo re ni bakerehe gbe. Agi adee re adu na bakere gberãrago mbiko pakpio kawiriyo. Tifuo Razaro kpi, Yesu andu ku rogo gu gbaria nangia Betania, yo aMaria na Marata aaraka ni. Ho Marata agi gupai ni nga Yesu naye, ri andu niipo ka gbiako. Oni berẽnga pa gu gberãrago ri adu rogoho ho ri aya ni wẽ: “Gbia, ka mo adu erẽ, ka kawire akpi nga te.” (Yo. 11:21) Ngbutuko fuoho, ho Yesu abi Maria ni na kura aboro i nikpari ni aume, ko “ki nikpari ni aume.”—Oni gedi Yoane 11:32-36.

6. Tipagine Yesu akpari ti ni ni aume ti gu regbo re?

⁶ Tipagine Yesu akpari ti ni ni aume ti gu regbo re? Gu buku nga Insight on the Scriptures nakaragapai nga: “Pakpio bakurea Yesu nangia Razaro na gu imisiri adawiri Razaro adu rogoho, nasa Yesu ko kpari ni aume ‘nunga ki zi ko toroko yo.’” * Si ima rengba kadu nga Yesu aaberãpa gu igirã wene bakureako nangia Razaro adu rogoho ho ko aawoka ni na wai Razaro adu ho ko abi gupai ni nga ko ima mbeda ka kpi. Nirengo, Yesu akpari ni aume a ho ko aabi wai ni aMaria na Marata adu na bakere gberãrago mbiko pakpio kawiriyo. Ka si du nga mbembedi bakureamo watadu gamo borokporo kpi, zanga kapa, mo na kina ngbatunga gu gberãrago re. Oni bingo apai biata rengbe ani ka wirikaha ti gipai re.

7. Ginipai ani awirikaha tipa Yekova ti wai Yesu akpari ni aume tipa abakureako?

⁷ Yekova ima rugatiko na pa gu gberãrago du mo na ni. Yesu nga ‘ndikidi kpia’ Bako. (Eb 1:3) Ho Yesu akpari ni, ko ayugu wai du Yekova na  gberãrago tipa kpio gu boro ko nakpinyemu ni. (Yo. 14:9) Ka si du nga gamo boro kpi, mo ima rengba kadu na gu kido nga Yekova abingo kina gu rungo sa du mo na ni te, ono ko na bakere gberãrago a tipa gupai du mo rogoho. Ko naida aida ka husa gu kpotoro yo nga du na rungo re.—Tam. 34:18; 147:3.

8. Tipagine rengbe ani kadu ti ni na gu kido nga Yesu nika zingisa gu gaani aboro azingisa be kpio kpiki?

⁸ Yesu naida gupai nga ka zingisa gu gamo aboro be kpio kpiki. Ngbutuko mbata fu Yesu kpari, ko akido Marata nga: “Kawiro azínga azinga berewe.” Marata aima du na kido kuti Yesu. (Yo. 11:23-27) Mbiko gupai nga Marata aairiso Yekova, ri aima ino gupai nga agu anebi nangia Eriya na Erisa aima zingisa aboro be kpio mbata kusayo. (1 Aba. 17:17-24; 2 Aba. 4:32-37) Na si nawira gupai a nga ri aima giapa wai Yesu azingisi aboro be kpio. (Rk. 7:11-15; 8:41, 42, 49-56) Oni ima rengba kadu na gu kido a nga, oni nika bi gu gaoni aboro abi berewe kpiki. Sidu, ginipai ani awirikaha ti gu rengo nga Yesu akpari ni aume ho ko aafu wasa ni fu abakureako naadu na rungo? Ani nawirika gupai nga, Yesu na bakere nyemu ka zingisa agu aboro be kpio kpiki!

9. Wakina Yesu, waigu rengbe mo ka fu wasa fu agu aboro narungo tipa pakpio gayo aboro? Oni funga kpiapai.

⁹ Mo ima rengba ka fu wasa fu agu aboro narungo tipa pakpio gayo aboro. Yesu aakparanga kina kpee ni aume na aMarata na Maria te, ono ko aima degatuko a fuyo na ki fu wasa fuyo. Ani ima rengba ka manga kina bangisa gupai re fu agu aboro narungo tipa pakpio gayo aboro. Dan nga bakumba naraka Austroria yo aya: “Ho diare akpi ni, mi aaida na undo. Dungu awirina ti aregbo dunduko adu regerege ka degatuyo fere. I anaambu gene fere mi naayugo gimi gberãrago, na zee anaaziongo yo ho mi anaakpara ni te. I anaaundo re a na asunge wa, zunda gimi tarambiri, ngbekaahe fere, na kini mangi riahe fere ho mi anaadunga ni na rengba ka manga agi apai re nitire ya. Na i anaamanga kparakpee na mi dedede. I aima yugo gupai ziazia nga i nga ndikidi abakure na ni agu awirina i avungu yo ‘tipa unda rago gberãngbi.’”—Snz. 17:17.

10. Ginipai i nasakipai tipaha rogo Ruka 19:36-40?

¹⁰ Yesu ada Yerusarema yo rogo Nisana 9, rogo gu garã nangia 33 Fuo Batikayo Kristo. Ho ko aambeda ni na gu gbata re, rimbasa aboro adunguratiyo na aboro ki gbaragi gayo aremu bangirigene tipa ka yugo gupai nga i ima ida na ko ni gayo Bakindo. Gipai re aima ngia pangbarago nirengo. (Oni gedi Ruka 19:36-40.) Sidu, gako abawiriki aainongo gupai nika manga tingbafuo gure te. “Ho Yesu ambedi ni, ko ki bi bakporo, ki ta kpara mbiko ho.” Na aume bangiri Yesu yo, ko apepa gu kereapai naandu ka manga aboro Yerusarema yo ngbutuko.—Rk. 19:41-44.

11. Tipagine Yesu akpari ti ni tipa agu aboro naaraka Yerusarema yo?

¹¹ Yesu adu na gberãrago mbiko ko aima ino gupai nga badungu aYudo nikaa idanga na gu pangbanga nga ga Kindo ya. Ni sangbana gipai re, si adu nga i nika gbarasa Yerusarema na agu aYudo nika bata nika da ni akanga. (Rk. 21:20-24) Si nipa gberãrago nga, badungu aboro aká Yesu kina wai ko agumbaha nga si nika manga. Waigu badungu aboro amangapai kuti gu pangbanga nga ga Kindo rogo gu ba mo araka rogoho? Ka si du nga kina bete aboro gbua naida na gu rengo mo ayugoho fuyo, ginipai rengbe mo ka wirikaha ti gu regbo Yesu akpari ni aume tipa agu aboro ko aatungusapai fuyo? Ani bingo kura apai biata berewe rengbe ani ka wirikaha.

12. Ginipai rengbe ani ka wirikaha tipa Yekova ti gu regbo Yesu akpari ni aume tipa agu aboro ko aatungusapai fuyo?

 ¹² Yekova naberãpa aboro aberã. Ga Yesu aume natingida rani na pakio wai Yekova aberãpa aboro. “Ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Pet. 3:9) Areme, ani nayugo gupai nga ani ima kpinyemu agu aboro ani atungusapai fuyo ni asada ani ti aregbo dunduko ka undo yo i wirikipai tipa gu wene pangbanga nga ga Kindo.—Mt. 22:39.

13-14. Waigu Yesu ayugu nunga fu aboro, na waigu rengbe ani ka sonosa gu sino re?

¹³ Yesu anaamanga sunge tungusapai kakaka. Ko ayugu gako nyemuse tipa aboro nindu ko kumbatayo kaa tungusapai fuyo ti ai gu regbo ko anaagbia momu. (Rk. 19:47, 48) Ginipai nasako ko mangi gipai re? Yesu adu na nungayo tiko. Ti kura aregbo, badungu aboro anaaida ka gia afugo Yesu si ki sa gupai nga ka rengba dunga beko na gako abawiriki “wa ka i ri riahe ya.” (Mk. 3:20) Na ho kura kumba adu ni na nyemu ka fura na Yesu yuru, Yesu aima du na nyemu ka gbiako tigu regbo re. (Yo. 3:1, 2) Badungu agu aboro nadegetuyo fu Yesu aadanga ni gako abawiriki te. Ono agu aboro dunduko nadegetuyo fuko, i aima manga dezirepai fuyo sirisiri. Areme, ani naida ka fu gu momu fu aboro dunduko nga ga gia wene pangbanga. (Amo. 10:42) Tipa ka manga gipai re, si naida ani aria gu gene ani atungusapai ngbaha.

¹⁴ Oni du na nyemu ka manga agu aˈariapai si aidaha. Ka si du nga ani natungusapai dedede ti kina bangisa regbo, ani arengbanga ka gbia gu kura aboro du na nyemu ka wirikapa wene pangbanga te. Nazakigene du rimori nga Matilda aya: “Mi gbiati kumbami ninaˈasada ka tungusapai fu aboro ti aregbo ni bakiakia. Kina boro ngbawiso, ani ninaatungusapai rogo gu dagbarago nga ga babagaahe. Bebere uru ho du dungu aboro ni bangirigene, ani ninaamangasunge na ũtura awaraga. Rogo gu uru re kusa, ani ninaagbia badungu aboro rogo akpuyo.” Si aidanga ani naatungusapai kinaho du rengba ni berani te, si naida ani du na nyemu ka manga ariapai ka tungusapai ti agu aregbo si angera wa ani rengbe ka gbia dungu aboro ti ni. Ka ani mangihe wo, ani ima rengba kadu na gu kido nga Yekova nika du na ngbarago.

15. Ginipai namangi rogo gu yangada yuru Yesu adu ni ungako, a wa duhe ni kekehe rogo Ruka 22:39-44?

¹⁵ Kusa rogo gu nyemu naadu rogo Nisana 14, rogo gu garã nangia 33, Fuo Batikayo Kristo, Yesu andu ku rogo gu ati nangia ga Getesemane. Yo ko akusuko kpotokoyo ni fu Yekova. (Oni gedi Ruka 22:39-44.) Ti gu kpakarakpakara aregbo re, Yesu ‘afu akpe . . . na nyanyaki akpe du na aume.’ (Eb. 5:7) Ginipai Yesu akpari tipaha rogo gu yangara yuru naadu mbata fu kpio ko? Ko akpari tipa gupai nga ka nye niruru ko fu Yekova na ka manga gupai Ko akpinyemuhe. Yekova aima gia gu kparakpee naaye kina boro kpoto Wiriko yo re na ko ki kedi maraika tipa ko nyakasi ko.

16. Tipagine Yesu adu ti ni na gberãrago ho ko aamanga kparakpee ni rogo gu ati nangia ga Getesemane?

¹⁶ Zanga kapa, Yesu aakpara ni aume rogo gu ati nangia ga Getesemane mbiko ko adu na gberãrago nga aboro nika biko ni gu boro adunga na irisa tipa rimo Mbori ya. Ko aima inopa wai si adu ni nyanyakipa pai fuko ko nye ni ruruko na ki ziasi rimo Bako. Ka si du nga mo nagbiatiro na gupai nafu gberãrago foro nga gu namaa gamo padu niruruse fu Yekova ngba asada, ginipai rengbe mo ka wirikaha ti ga Yesu aume? Ani bingo kura apai berewe biata rengbe ani ka wirikaha.

17. Ginipai rengbe ani ka wirikaha tipa Yekova ti wai ko akaragapai kuti gu ga Yesu akparakpee naaye ngbadukoyo?

¹⁷ Yekova nadegatuko adega kuti gamo akpesarawati. Yekova aima degatuko fu Yesu tipa agu apai ko aasanahe tipaha. Tipagine ko adegetuko ti ni? Mbiko gupai Yesu aabakabangiriko tipaha angia ka nye niruru ko fu Bako na tipa ka ziasi rimoko. Ka si du nga gupai ani abakabangirani tipaha nga ka nye ni rururani fu Yekova na ka ziasi rimoko, ko nika karagapai akaraga kuti gaani akparakpee tipa undo.—Tam. 145:18, 19.

18. Ngba gini agene Yesu adu na nunga na ki rugutiko na pa agu apai bakureako adu rogoho?

¹⁸ Yesu ima rugatiko na pa wai du mo. Ho du ani ni na gberãrago, ani na ngbarago tipa kadu na gu bakure rugutini na pa gu gberãrago du ani rogoho, gbe, ka si du nga gu bakurearani re aima gbia ti ni na agu aˈasada du wakina gu ani agbiatirani na ni. Yesu du nga gu  bakure re. Ko ima inopa wai du boro ho du ni ni nirurungbura ni na ho ni aida na undo ni. Ko ima rugatiko na pa gaani arungbura, na ko nika bi gupai abi nga ani ima gbia gu undo ani aidaha ti “rago zingo” watadu ti wene regbo. (Eb. 4:15, 16) Kina wai Yesu adi undo kugume rogo gu ati nangia ga Getesemane, si naida ani du na nyemu ka dia gu undo kugume Yekova afuhe, singia rogo waraga, vidio, gumbapai, watadu ho bakumba watadu gu bakure naima nyaka rogo toroyo naye ni ka fu wasa furani.

19. Waigu rengbe oni ka gbia ome ho oni agbiatironi ni na agu apai nafu gberãrago furoni nga gu namaa gaoni padu ni ruruse fu Mbori ngba asada? Oni funga kpiapai.

¹⁹ Yekova nika fu “gu zereda nga ga Mbori” furoni. Waigu Yekova nika nyakasa rani? Ho ani amanga kparakpee ni, ani nagbia “gu zereda nga ga Mbori nagasi rugatinapai dunduko.” (Frp. 4:6, 7) Gu zereda Yekova afuhe furani nasa gupai nga ani du zezeredi na ki undo rani ani naaberã wenengai. Gere nga gupai gu wirina du rimori nga Luz abihe. Ri aya: “Dedede, mi naabi tire nga mi nisare. Mi naaberã gupai ti kura aregbo nga Yekova akpinga nyemu re te. Ono ho gipai re ninaamanga ni, mi naape pa wai niipo fu Yekova du mi. Kparakpee ninaaundo re mi du wenengai.” A wa gari kpiapai ayugoho, kparakpee ima rengba ka undo rani ani gbia zereda.

20. Gini apai ani nawirikihe ti ga Yesu aume?

²⁰ Nairiwo gu pa wasa ani nagbiaha na agu apai rengbe ani ka wirikaha ti ga Yesu aume! Gako aume natingida rani na gupai nga, si naida ani songodi agu abakurearani narungo tipa pakpio gayo aboro na kidu na kido nga aYekova na Yesu nika songoda rani asongoda ho ani nazanga gaani boro ni rogo kpio yo. Ga Yesu aume nafõngbaduraniyo ani tungusipai na kini yugupai ni nunga mbiko Yekova Mbori gbiati Yesu Kristo ima yugo gi bawene sino re. Na ani nagbia wasa ti ino ani gupai nga aYekova na Wiriko ima rugatiyo na pa wai du ani, i ima rugatiyo na pa gaani arungbura, na i naida ka undo rani aundo ani hipai. Ani naandunga andu kindi kumbatayo kaa mangapai kuti agu apai ani nawirikihe da kinaho Yekova nika digiso gu gako bawene kidohe ni du tipa ‘wéga aume ti bangirani ku sa yo dunduko’!—Yugo. 21:4.