GU KEKEAPAI DU TIPA WISIGOHO 4
Ndu Gupai Ani Naadu ti ni Pati Tingidipa Pakpio Yesu
“Oni mangi gere nitingidi pa re.”—RK. 22:19.
BIA 20 Mo Afu Wiro Nyakipa Ko Gbe
AGU APAI DU ROGO GI KEKEAPAI RE *
1-2. (a) Gini regbo gbe ani naatingidapa gu gaani boro kpi? (b) Ginipai Yesu amangihe rogo gu yuru naadu mbata fu ko kpi?
KA SI vura du nga gaani aboro akpiki bakuru kusayo, ani natingida payo kindi. Ani ninaaberã payo gbe ti gu ramediwi i akpi ti ni.
2 Rogo agarã dunduko, ani nidu dagba agu amirioni aboro rogo zegino dunduko ninaadungura tiyo ka tingida pakpio gu boro ani naima kpinyemu ni gbe—nga Yesu Kristo. (1 Pet. 1:8) Ani ninaadungura tirani ku rogo ba sa tipa ka tingidapa gu boro naafu unga ni ni motumo tumorii tipa ka batasa rani be ingapai na kpio. (Mt. 20:28) Yesu aaida gupai nga apefuoko naatingida pakpio ko. Rogo gu yuru naadu mbata fu kpiko, ko asigira pa kparakpara riahe nga ga nyemu na ki fu gu rugapai nga: “Oni mangi gere nitingidi pa re.”—Rk. 22:19.
3. Gini apai ani nika sakapai tipaha rogo gi kekeapai re?
3 Bete aboro dagba agu aboro yo ninaaye tipa Tingida Pakpio Kristo nabi gu maabangirise nga ga ngbangbaturũ na nyanyakipaha. Ono gu dungu amirioni aboro du na gu maabangirise nga ga raka auru kpotosende ninaaye aye a tipaha. Rogo gi kekeapai re, ani nika wisigopai tipa gu nduapai ninaasa gi badona aboro ue re i du na nyemu kaa du pati Tingida Pakpio Yesu na agarã dũ. Ani nika wisigopai awisigo a tipa wai ani ninaagbia undo ti du pati ni. Ani tonanga ha na wisigo bete gu nduapai ninaasa mbedimbedi aKristano i du pati ni.
NDU GUPAI MBEDIMBEDI AKRISTANO NAADU TI NI PATI TINGIDA PAKPIO YESU
4. Tipagine mbedimbedi aKristano ninaari gu kpakuto ti ni na kini mbiri gu imekakue nidu ti regbo Tingida Pakpio Yesu?
4 Rogo agarã dunduko, gu mbedimbedi aKristano ninaandu tipa Tingida Pakpio Yesu ninaari kpakuto na kini mbiri imekakue. Tipagine du i naari kpakuto na kini mbiri imekakue ti ni? Tipa ka karagapai kuti gu sanahe re, oni bingo gupai namangi rogo gu yangara yuru Yesu adu ni ungako auru kpotosende. Tingbafuo gu riahe nga ga Pumbo Susiri, Yesu asigira guhe i ayambaha nga, Ga Gbia Riahe. Ko afu kpakuto na imekakue fu gako ruru amokedi naadu bawe na sa na ki pe gupai fuyo nga i rihe na ki mbirihe. Yesu afura fuyo tipa amozunga ue watadu adakutipai ue—vovo mozunga na gu mozunga nga ga Kindo. * (Rk. 22:19, 20, 28-30) Agi amozunga re azakigene fu agu amokedi re gbiati bete kura aboro i da ni abakindo na ni aboromotumo ngbangbaturũ yo. (Yugo. 5:10; 14:1) Kina gu yangara mbedimbedi aKristano * nga aguyo du rogo agi amozunga ue re, rengbe ka ri kpakuto na ki mbiri imekakue ti regbo Tingida Pakpio Yesu.
5. Ginipai mbedimbedi aKristano nainihe tipa gu maabangirise i nafuhe fuyo?
5 Gu kura ndupai mbedimbedi aKristano nidu ti ni na nyemu kadu pati Tingida Pakpio Yesu nga: Si naafu momu fuyo tipa i berẽkurii gayo maabangirise. Yekova ima fu bawene maabangirise fuyo—tipa i gbia gu unga ngbangbaturũ yo kaa kpingo ya na kaa zirõnga ya, tipa i mangisunge wa sa na Yesu Kristo nga guko naazingi be kpio gbiati yangara agu aboro du bangeyo nga 144,000 na gu nyakipaha kisusi nga, tipa kadu barabangiri Yekova Mbori! (1 Kor. 15:51-53; 1 Yo. 3:2) Mbedimbedi aKristano ini gupai nga i yambu yo i ndu ka gbia ngbarago ti gu ngbatunga amomu re ngbangbaturũ yo. Tipa gupai nga i mbu gene fuyo i ndu ku ngbangbaturũ yo, si naida i nye ni ruruyo da kuho i nika kpi ni. (2 Tim. 4:7, 8) Ho mbedimbedi aKristano aberã ni kurii gayo maabangirise nga ga ngbangbaturũ, i nadu na bakere ngbarago. (Tito 2:13) Na gu “kura akandoro” tigayo? (Yo. 10:16) Gini bete nduapai ninaasa gupai nga i naandu tipa Tingida Pakpio Yesu?
NDU GUPAI KURA AKANDORO NAANDU TI NI TIPA TINGIDA PAKPIO YESU
6. Tipagine kura akandoro naandu ti ni tipa Tingida Pakpio Yesu na agarã dunduko?
6 Kura akandoro ninaandu andu tipa Tingida Pakpio Yesu, na i naaringa kpakuto na kini mbiri imekakue yo te, ono i nidu kindi na ngbarago kadu pati ni. Rogo 1938, i ayambu agu aboro du na gu maabangirise nga ga raka auru kpotosende i du pati Tingida Pakpio Yesu, na gure nangia bambata regbo i du pati ni. Gu Ngbaõbambu Sinziri nangia ga Marungu 1, 1938, ape gupai nga: “Si nika du ni gupai du ni ruruhe na rẽarẽ tipa [kura akandoro] du pati gu ngbatunga dunguratise re na ki bi gupai namanga. . . . Si naida si du ni regbo ngbarago fuyo a, regbo ngbarago du ngaha.” Kina wai agu agino i naayamba yo i ye kadu pati pumbo diadee nidu na ngbarago kadu pati ni ki bi gupai namanga, kinawo a du kura akandoro na ngbarago kadu pati Tingida Pakpio Yesu na ki bi gupai namanga.
7. Tipagine kura akandoro ninaangera ti ni kumbatayo tipa gu gumbapai ninaamanga ti regbo Tingida Pakpio Yesu?
7 Gu kura akandoro a naberãpa gayo maabangirise aberã. I naangera kumbatayo tipa gu gumbapai nidu ti regbo Tingida Pakpio Yesu, bambiko badungu agu apai nidu rogoho ninaafura gbe tipa gupai Kristo na agu aboro du bangeyo nga 144,000 nga aguyo nika zogarago na ko nika mangaha fu ruru aboro ti regbo Zogarago Tipa Agarã Kutu. Tii gu zogarago nga ga gayo Bakindo nga Yesu Kristo, agu aboro nikaa zogarago ngbangbaturũ yo re nika undo na sa kpotosende ni paradizo, na ki undo aboro i da ni rengberengbe yo. Nairiwo wai duhe nipa ngbarago fu agu amirioni aboro ninaandu ka bi gupai namanga ti regbo Tingida Pakpio Yesu ka makiapa gu digisidigisi sangbaanebi nga ga Ziazia Kekeapai, wa agu du rogo Yesaya 35:5, 6; 65:21-23; na Yugoti 21:3, 4. Ni berãyo pa tiyo na gayo aboro rogo gu vovo zegino re, i nanyakasa gayo maabangirise tipa kumbatayo na gayo diaberã ka zanga mbu iriso Yekova.—Mt. 24:13; Gara. 6:9.
8. Gini kura ndupai ninaasa kura akandoro i du pati Tingida Pakpio Yesu?
8 Oni bingo gu kura ndupai kura akandoro ninaandu ti ni tipa Tingida Pakpio Yesu. I naida ka yugo gayo nyemuse gbiati undo tipa mbedimbedi aKristano. Fugo Mbori ape gupai kumbatayo nga, mbembedi pabakure nika du dagba mbedimbedi aKristano na agu aboro du na gu maabangirise nga ga raka auru kpotosende. Wai du duhe wo? Ani sakingo pai tipa bete akpiapai.
9. Ginipai gu sangbanebi du rogo Zekaraya 8:23 ayugoho tipa gu gene kura akandoro abi mbedimbedi aKristano ngbaha?
9 Oni gedi Zekaraya 8:23, NW. Gi sangbanebi re nasakapai wenengai tipa gu gene kura akandoro abi agu awirinayo nga mbedimbedi aKristano ngbaha. Agu afugo nga “boro Ebere” na “oni” nafura tipa kina bangisa badona—du nga yangara mbedimbedi aKristano. (Rom. 2:28, 29) Agu “akumba bawe du na afugoyo ni bakiakia dagba arikaaboro yo re” narukuba kura akandoro. I ‘nazada’ watadu ka zio tiyo kuti mbedimbedi aKristano, kini kodi tiyo na yo rogo ziazia irisombori yo. Rogo gu yuru ningia ga Tingida Pakpio Yesu, gu kura akandoro nayugopa wai du yo mbembedi na mbedimbedi aKristano nidu yo na yo pati ni.
10. Ginipai Yekova namangihe tipa ka digiso gu sangbanebi du rogo Yezekere 37:15-19, 24, 25?
10 Oni gedi Yezekere 37:15-19, 24, 25. Yekova adigisi gi sangbanebi re nisa ko mbedimbedi aKristano na kura akandoro i mangisunge kina sa mbembedi. Gu sangbanebi re nafura tipa angua ue. Agu aboro du na gu maabangirise nga ga raka ngbangbaturũ yo wakina gu ngua du “tipa Yuda” (gu ngbatunga i anaasia abakindo nga ga Yisaraere rogoho), na agu aboro du na gu maabangirise nga ga raka auru kpotosende wakina “ga Efuraima” ngua. * Si adu nga Yekova nika koda agu abadona re tipa gupai nga si da ni “ngua sa.” Gere nayugo gupai nga i namangasunge ni kodikodi yo tiibe gayo bangisa Bakindo nga, Kristo Yesu. Rogo agarã dunduko, mbedimbedi aKristano na kura akandoro ninaadu pati Tingida Pakpio Yesu angianga ni kparakakparaka abadona ya, ono ni ‘rimbasa akandoro sa’ tiibe ‘babanda akandoro sa.’—Yo. 10:16.
11. Waigu agu “akandoro” i napepa ra rogo Matayo 25:31-36, 40 asongoda awirina Kristo?
11 Oni gedi Matayo 25:31-36, 40. Agu “akandoro” du rogo gi sanza re narukuba ruru aboro ti digido regbo nga aguyo du na gu maabangirise nga ga raka auru kpotosende—naida ka ya kura akandoro. I nasongoda gu yangara awirina Kristo du auru kpotosende ni undo yo yo i digisi bakere sunge, du nga gu sunge tungusapai gbiati sa aboro ni abawiriki namanga rogo zegino dunduko.—Mt. 24:14; 28:19, 20.
12-13. Gini kura agene kura akandoro asongoda awirina Kristo ngbaha?
12 Agarã dunduko rogo agu aposo ninaandu kuti Tingida Pakpio Yesu, gu kura akandoro ninaasongoda awirina Kristo ni manga yo tua ni bakerehe rogo zegino dunduko tipa ka yamba agu aboro du na nyemupai i du pati Tingida Pakpio Yesu. (Oni bi gu Sanduki nga, “ Ya mo Mo Nambakada Tiro Kumbatayo Tipa Regbo Tingida Pakpio Yesu?”) I naamanga agu ambakadapai dunduko a si aidaha tipa gupai nga Tingida Pakpio Yesu mangi rogo adungurati dunduko rogo zegino, ka si vura du nga badungu adungurati na agu aboro rogoho nari kpakuto na kini mbiri imekakue te. Kura akandoro na bakere ngbarago tipa ka songoda awirina Kristo rogo ngbatunga agene wa gure. Agi akandoro re ima ino gupai nga Yesu nabi agu apai i amangaha fu mbedimbedi awirinako nga i namangaha fu kina boro ko nitiko.—Mt. 25:37-40.
13 Gini kura nduapai ninaasa rani dunduko ani naandu tipa Tingida Pakpio Yesu, singia ani na gu maabangirise nga ga raka ngbangbaturũ yo watadu auru kpotosende?
NDU GUPAI ANI DUNDUKO NAANDU TI NI TIPA TINGIDA PAKPIO YESU
14. Waigu aYekova na Yesu nayugu bakere nyemuse furani?
14 Ani na tambuahe tipa gu nyemuse aYekova na Yesu nayuguhe furani. Yekova ima yugo gako nyemuse furani ngba dungu agene, ono gene kinaho sa naima du ni bakerehe kisusi agu akuraha dunduko. Gu bakerepa gene kisusi gaani Mbori ayugu nyemuse furani ngbaha nga ni keda ko nyanyakipa Wiriko ko rungo na ki kpi tipa rani. (Yo. 3:16) Na Yesu aima yugo bakere nyemuse a nidu ko na nyemu ka fu ungako tipa rani. (Yo. 15:13) Ka ani tumongo aYekova na Yesu tipa gu nyemuse i nayuguhe furani te. Ono ani rengbe ka yugo gaani tambuahe rogo gu gene yo ani araka ngbaha na aˈuru dunduko. (Koro. 3:15) Na ani ninaandu tipa Tingida Pakpio Yesu tipa gupai nga ka tingidapa gayo nyemuse koyo du ani ni na ki yugu gaani nyemuse tipa yo a.
15. Tipagine mbedimbedi aKristano na kura akandoro abi gu gamahe ti ni nga ga motumo tumorii na nyanyakipaha gbe?
15 Ani nabi gu gamahe nga ga motumo tumorii na nyanyakipaha gbe. (Mt. 20:28) Motumo tumorii ima du na nyanyakipaha gbe fu mbedimbedi aKristano, bambiko si nasa gupai nga i du na bawene maabangirise. Bambiko gupai nga i na idapase kuti ga Kristo motumo, Yekova nabi yo niruru aboro na ko ima dia yo ni awiriko. (Rom. 5:1; 8:15-17, 23) Gu kura akandoro ima du na tambuahe a tipa motumo tumorii. Mbiko gupai nga i na idapase kuti ga Kristo motumo, i ni gigiriyo barabangiri Mbori, i rengbe ka manga ziazia sunge fuko, na i na gu maabangirise nga ga kura rogo “bakere gberãngbi.” (Yugo. 7:13-15) Gene sa mbedimbedi aKristano gbiati gu kura akandoro ayugo gayo tambuahe tipa motumo tumorii ngbaha nga nidu yo pati Tingida Pakpio Yesu na agarã dunduko.
16. Gini kura ndupai nasa rani ani naandu tipa Tingida Pakpio Yesu?
16 Gu kura ndupai ani ninaandu ti ni tipa Tingida Pakpio Yesu nga ani naida ka giasangba Yesu. Ka si vura du vurũ nga ani na kina gini maabangirise tipa kumbatayo, ani dunduko si aida ani irisi gu rugapai Yesu afuhe rogo gu yuru ko asigira pakpio ko, ko aya: “Oni ta manga gere nitingidi pa re.”—1 Kor. 11:23, 24.
WAI ANI DUNDUKO AGBIA UNDO TI DU PATI TINGIDA PAKPIO YESU
17. Waigu Tingida Pakpio Yesu aundo rani ani mbedi gbe na Yekova?
17 Ani nambeda gbe na Yekova. (Yak. 4:8) A wa ani nawirikihe, Tingida Pakpio Yesu nafu momu furani tipa ani berẽkurii gu maabangirise Yekova nafuhe furani na ki berẽkurii gu bakere nyemuse ko nayuguhe furani. (Yere. 29:11; 1 Yo. 4:8-10) Ho ani aberã ni kuriipa gaani maabangirise tipa kumbatayo na kuriipa ga Mbori nyenye nyemuse tipa rani, ani naakiiso gaani nyemuse nitirani tipa Yekova na ki nyakasi gaani pabakure na ko.—Rom. 8:38, 39.
18. Ginipai pa berã ani kurii ga Yesu kpiapai afõngbaduraniyo ani mangihe?
18 Ngbaduraniyo nafõ rani ani wiriki ga Yesu kpiapai. (1 Pet. 2:21) Rogo agu aˈuru ninaandu kuti Tingida Pakpio Yesu, ani ninaagbeberã rani kuti agu apangbanga nga ga Ziazia Kekeapai du tipa ga Yesu yangara poso auru kpotosende, kpioko, gbiati gako zingabekpio. Fuo gure, rogo gu nyemu ningia ga Tingida Pakpio Yesu, gu gumbapai i naamangaha ninaatingida rani na pa ga Yesu nyemuse tipa rani. (Ef. 5:2; 1 Yo. 3:16) Ho ani agedapai ni tipa ga Yesu kpiapai nga ga futise na kini berẽkuriihe, si nafõngbaduraniyo tipa ani ‘naata a wa ko anata tigako.’—1 Yo. 2:6.
19. Waigu rengbe ani ka nye rogo ga Mbori nyemuse yo?
19 Ani nadiaberã gbe ka nye rogo ga Mbori nyemuse yo. (Yuda 20, 21) Ani nanye rogo ga Mbori nyemuse yo ni manga ani agu apai dunduko rengbe ani ka mangaha ka giasangba ko, ka ziasi rimoko, na ka ye na ngbarago ku kpotokoyo. (Snz. 27:11; Mt. 6:9; 1 Yo. 5:3) Tingida Pakpio Yesu nafõngbaduraniyo ani diberã bakere gbe kaa raka na aˈuru dũ ngba gu gene nika du wa ka i ya ani naya fu Yekova, ‘Mi naida ka nye rogo gamo nyemuse yo nyeanye kindi!’
20. Gini wene nduapai du berani kaa du pati Tingida Pakpio Yesu?
20 Singia ani na gu maabangirise nga ga raka nyeanye kindi ngbangbaturũ yo watadu auru kpotosende, ani na wene nduapai berani kaa du pati Tingida Pakpio Yesu. Rogo agarã dunduko ho ani ninaadungura tirani ni ti gu ramediwi re, ani ninaatingida pakpio gu boro ani naima kpinyemu ni, nga Yesu Kristo. Gu susi asusa gbe nga, ani ninaatingidapa gu bakere mangapai kisusi nga ga nyemuse—gu nyemuse Yekova ayuguhe furani ni fuko Wiriko ni motumo tumorii. Rogo gi garã re, Tingida Pakpio Yesu nika manga rogo gu nyemu nga ga Rago Bisue, Zerekpe 15, 2022. Ani ima kpinyemu Yekova na Wiriko sidu, rogo gu nyemu nika ngia ga Tingida Pakpio Yesu, pai ho nika du na nyanyakipaha furani kisusi du pati Tingida Pakpio Yesu te.
BIA 16 Oni Tambua Yekova Tipa Wiriko
^ Singia ani na gu maabangirise nga ga raka ngbangbaturũ yo watadu rogo paradizo auru kpotosende, ani ninaangera kumbatayo na agarã dunduko tipa Tingida Pakpio Yesu. Gi kekeapai re nika sakapai tipa wene nduapai du mburuhe rii Ziazia Kekeapai nga gu ninaasa gupai nga ani naadu pati Tingida Pakpio Yesu na wai ani agbia undo ti mangaha wo.
^ Tipa ka bi kura apai nibipa vovo mozunga na gu mozunga nga ga Kindo, oni bi gu kekeapai nga, “Oni Adu ni ‘ga Bakindo Aboromotumo’” rogo gu Ngbaõbambu Sinziri nangia ga Tanvuo 1, 2014, kpe. 18-20.
^ SAKAROGOPAIYO: Gu fugo nga yangara mbedimbedi aKristano nabipa gu yangara mbedimbedi aKristano du ni unga yo kindi auru kpotosende.
^ Tipa ka bi kura apai nibipa gu sangbanebi du tipa angua ue rogo Yezekere 37, oni bi gu buku nga Pure Worship of Jehovah—Restored At Last!, kpe. 130-135, genewa. 3-17.
