1. Waigu rengbe ani ka dia regbo na Yekova?

 ANI ima kpinyemu dia regbo na agu aboro ani aberã payo. Arogotise ima kpinyemu kaa dia bakere regbo kina sa. Paranga aboro ima kpinyemu kaa dia regbo na mbembedi abakureayo. Na ani dunduko naima kpinyemu dia regbo na akuarani aidipase. Ono tie, gu nyakipaha gbe nga, ani ima kpinyemu dia regbo na gaani Mbori. Ani rengbe ka manga gipai re ni manga ani kparakpee fuko, ni geda ani Fugoko, na ni berã ani kurii gako ringbisapai gbiati gako bawene asino. Gu regbo ani adiaha na Yekova ima du na nyanyakipaha gbe nirengo!—Tam. 139:17.

2. Gini kpakarapai ani agbia tirani na ni?

² Wa vura duhe nga ani ima kpinyemu dia regbo na Yekova, kpakarapai kinaho ani agbia tirani na ni. Gaani raka ima du na badungu apai rogoho ani amangaha, nga gu rengbe ka saha furani ni mbumbuhe tipa ani gbia regbo tipa agu apai nga ga toro. Gaani sunge marã, aborokporo, gbiati gu kura apai si aida aida ani mangihe ima rengba ka dia bakere regbo berani, si ki sa gupai nga ani bihe nga regbo berani tipa manga kparakpee, wisigopai, watadu berãkuriipai te.

3. Gini kurapai rengbe ka dia regbo berani?

³ Kurapai kinaho berewe a rengbe ka dia gaani regbo. Ka ani adunga na rubangirise ya, ani rengbe kaa dia regbo kuti manga agu apai adunga ni gbegberẽhe ya, ono nga gu nadia bakere regbo berani si ki sa gupai nga si du ni mbumbuhe furani ka mbeda gbe na Yekova. Ni kpiapai, si ni wenepai kadu na regbo tipa zambuasitise. Gu zambuasitise ani asiaha ima rengba kadu ni wenehe, ono ka ani adia bakere regbo kutini, si rengbe ka sa  gupai nga ka ani dunga na regbo tipa agu apai nga ga toro ya. Sidu, si naida ani moi zambuasitise rogo gaha ndikidi bangiriba.—Snz. 25:27; 1 Tim. 4:8.

4. Gini apai ani nika sakapai tipaha awere?

⁴ Rogo gi kekeapai re, ani nika wisigopai tipa ndu gupai si aida ani diberã ti ni tipa gupai nyakipaha gbe rogo gaani raka yo. Ani nika sakapai a tipa wai rengbe ani ka mangasunge na gaani regbo wenengai na Yekova na wai rengbe ani ka gbia undo ti gi mangasunge na gaani regbo ni tatamana re.

5. Waigu rengbe berãkurii gu rugute du rogo AEfeso 5:15-17 ka undo paranga boro ni sia gu gene raka ngba kisusi?

⁵ Oni sia gu gene raka ngba kisusi. Paranga aboro nabaka bangiriyo dedede tipa gu bawene gene rengbe yo ka mangasunge na gayo raka ngbaha. Ono tie, gu gayo abayugupai na gayo aborokporo angianga aDezire Yekova ya rengbe ka ngarasayo i ndu ku yunivasiti yo tipa gupai nga i rengbe ka gbia wene sunge na ka manga bakere marã. Gi ngbatunga wirikapai re rengbe ka dia bakere regbo beyo. Ono tie, agu avunguagude na abakure du rogo dungurati rengbe ka ngarasa paranga aboro i di gayo regbo kuti mangasunge fu Yekova rogo gayo raka yo. Ginipai rengbe ka undo gu paranga boro kpinyemu Yekova ni mangi gu diaberã ngba kisusi? Si adu ni wenepai funi ka ni gedi AEfeso 5:15-17 na ki berẽkuriihe. (Oni gedihe.) Tingbafuo geda agi averesi re, paranga boro rengbe ka sana tini nga: ‘Ginihe “[Yekova] akpi nyemu he”? Gini diaberã nika sa ngbarago tiko? Gini diaberã nika undo re mi mangisunge na gimi regbo wenengai?’ Oni tingidi gupai nga, “rago gbegberẽ,” na gi zegino Satana azogaha re nika digo barambeda. Si adu ni pa tatamana ka mangasunge na gaani raka ka manga agu apai nika sa ngbarago ti Yekova.

6. Gini siapai Maria amangihe, na tipagine gu siapai re adu ti ni nipa tatamana?

⁶ Oni moi agu apai nyakipaha mbatayo. Ti kura aregbo, mangasunge na gaani regbo ngba wene gene nakoda manga siapai dagba apai ue nga gu adunga ni gbegberẽ nitihe ya. Ani rengbe ka bi gipai re ti gupai namangi ho Yesu andu ka bi aMaria na Marata. Marata adu na bakere ngbarago ka dia Yesu kugume ni gari gino, si ki sa gupai nga ri mbakadi bakere riahe tipa ko. Ono Maria asungu sande na Yesu na ki dege turi kuti gupai ko aagumbaha. Gupai Marata amangihe re aagberãnga te, ono Yesu aya, Maria “asia gu wene pai.” (Rk. 10:38-42) Fuo regbo kusa, si rengbe kadu nga bangiri Maria aima go ti gu riahe i amangihe ti gu regbo re, ono ani ima rengba kadu na gu kido nga bangiri Maria aagonga ti gupai ri awirikihe be Yesu te. A kina wai Maria abi gu regbo ri adihe na Yesu na nyanyakipaha, kinawo a ani abi gu regbo ani adiaha na Yekova na nyanyakipaha. Wai du rengbe ani ka mangasunge na gu regbo re wenengai?

7. Tipagine duhe ti ni ni nyanyakipa pai gbe ka manga kparakpee, ka wisigopai, na ka berãkuriipai?

⁷ Mo rugu tiro na gupai nga kparakpee, wisigopai, na berãkuriipai nga papara gaani irisombori. Ho ani amanga kparakpee ni, ani nafura na gu Barani du ngbangbaturũ yo, nga guko naima kpinyemu rani gbe. (Tam. 5:7) Ho ani awisigo Ziazia Kekeapai ni, ani nagbia gu “inahe nga ga Mbori,” nga guko du ni Mburu tatamana dunduko. (Snz. 2:1-5) Ho ani aberã ni gbe kurii agu apai ani awirikaha tipa Yekova, ani naberãpa gako bawene asino, na kini tingidipa gu bawene apai ko aida ka mangaha furani  na fu ngbatunga aboro dunduko. Gere nga gu bawene gene kisusi rengbe ani ka mangasunge na gaani regbo ngbaha. Ono ginipai rengbe ka undo rani ani mangi gipai re.

8. Ginipai rengbe ani ka wirikaha ti wai Yesu amangisunge na gako regbo ngbakungba yo?

⁸ Ka rengba du, mo sia gu rago du ni zezeredihe. Oni bingo gu kpiapai nangia ga Yesu. Mbata fu ko tona gako sunge auru kpotosende, Yesu adi arame 40 ku ngbakungba yo. (Rk. 4:1, 2) Rogo gu zezeredi ba re, Yesu adu na rengba ka kpara fu Yekova na kini berẽkurii gupai Bako akpinyemuhe tipa ko. Zanga kapa, mangaha wo aima mbakada Yesu tipa agu aˈasada naaye fuko kumbatayo. Waigu rengbe mo ka gbia undo ti ga Yesu kpiapai? Ka mo du rogo gu riikporo du na badungu aboro rogoho, mo arengbanga ti aregbo dunduko ka gbia gu ba du ni zezeredihe kporo te. Ho du pai ni wa gure, mo rengbe ka gbia gu ba du ni zezeredihe kusayo ti kporo. Si nga gupai Julie ninaamanga ha ho ri aida ka dia regbo ni na Yekova rogo kparakpee yo. Ri na kumbari naraka rogo umba bambu France yo, na si ni kpakarakpakaraha boro du ni sani ka woroahe adunga ya. Julie aya, “Mi naandu na aˈuru dũ ku rogo gu ba i ambakadihe tipa aboro naaongoda rogoho. Yo rengbe mi kadu ni ni sare ka pai adunga ho nagbeberã re kusayo ya, na mi kini fura nzunzu fu Yekova.”

9. Wa apai avura nge ti Yesu vurũ, wai du ko ayugu gupai nga ko aabi gako pagume na Yekova na nyanyakipaha?

⁹ Dungu apai aima nge ti Yesu nga gu ko aamangaha rogo gako raka yo. Ti regbo gako sunge tungusapai auru kpotosende, badungu aboro anaapeka ko ku rogo agu aba ko anaandu ku rogoho, na i dunduko naaida ka dia regbo na ko. Ti kura regbo sa, ‘agu aboro naadu bakporo yo dũ atiria ku ngbadimo’ ka bi ko. Ono wa si avura du wo, Yesu anaagbia regbo agbia ti aregbo dunduko kaa manga kparakpee fu Yekova. Mbata fu kura uru, ko andu ku “ngbakungba yo,” nga gu ba ko arengbe ka dia regbo rogoho nisako na Bako.—Mk. 1:32-35.

10-11. Ringbisihe kuti Matayo 26:40, 41, gini rugute Yesu afuhe fu gako abawiriki kina boro ti wene regbo ati Getesemane yo, ono ginipai namangi?

¹⁰ Rogo gu yangara yuru Yesu adu ni unga ko auru kpotosende ho gako sunge tungusapai anyasi ni auru kpotosende, Yesu agbata gu zezeredi ba berewe ko arengbe ka berãkuriipai rogoho na ki mangi kparakpee. Ko abi gu zezeredi ba re ati Getesemane yo. (Mt. 26:36) Ti gu regbo re, Yesu afu rugute fu gako abawiriki nibipa kparakpee kina boro ti wene regbo.

¹¹ Oni bingo gupai namangi. Ho i ada ni ati Getesemane yo, regbo aima susa, isoke bebere yuru aima susa. Ko asana amokedi tipa i ‘nangera angera kindi,’ na ko ki ndu ka manga kparakpee. (Mt. 26:37-39) Ono ho ko aamanga kparakpee ni, i ati ni rame. Ho Yesu  abi yo ni i nira, ko angarasi yo nga i ‘naangera ki nikpari.’ (Oni gedi Matayo 26:40, 41.) Ko aima ino gupai nga i aima du ni fudifudiyo berãyo yo gbe na ki du na mbugo. Yesu aima rugatiko na gupai ni nunga nga, ‘borose anyakanga te.’ Yesu andu berewe bara ue ka manga kparakpee, na ho ko anikaraga tiko ni, ko anibi gako abawiriki i nira ara kuba gupai nga i naamanga kparakpee.—Mt. 26:42-45.

12. Ginipai rengbe ani ka mangaha ka ani bi gupai nga ti kura aregbo, ani ni fudifudi rani gbe watadu ani na mbugo gbe, ka gene adunga ani mangi kparakpee ya?

¹² Mo sia gu regbo rẽarẽ. Ti kura aregbo, ani ima rengba kadu ni fudifudi rani gbe watadu na bakere mbugo ka gene adunga ani mangi kparakpee ya. Ka si du nga gupai re aima manga ro, mo nisaro te. Ginipai rengbe mo ka mangaha? Agu aboro ninaamanga kparakpee dedede fu Yekova ti digido uru ima bihe ni pa undo kaa manga kparakpee mbata fu regbo susi nyemu, nga gu regbo adunga yo na bakere mbugo ya. Kura aboro bi gupai nga apai agbenga berãyo kusayo ho i amanga kparakpee ni rogo gu kura ngbatunga gene te, ni kpiapai, ho i asungo ni kuari watadu ka kuko ngba rukusiyo. Ono tie, na ka mo bihe nga mo rogo bakere bakabangirise watadu bakere gberãrago ka gene adunga mo mangi kparakpee ya? Mo pepa wai du mo fu Yekova. Mo ima rengba kadu na gu kido nga gu Barani du na inapai nika ruga tiko aruga na gupai du mo rogoho.—Tam. 139:4.

13. Waigu rengbe aũfugodagbase ka gberesa gaani regbo na Yekova?

¹³ Ka pai gbenga berãro kusayo ho mo amanga wisigopai ni ya. Anga kparakpee nga gu yangara gene rengbe ani ka nyakasa gaani pabakure rogoho na Yekova te. Wisigo Fugo Mbori na kini du pati agu adunguratise nga ga aKristano ima rengba a ka undo rani ani mbedi gbe na Mbori. Ya mo pai ho rengbe mo ka mangaha tipa ka mangasunge wenengai na gu regbo mo adiaha kuti wisigopai na agu adunguratise nga ga dungurati? Mo sananga tiro nga, ‘Ginihe nagbeberã re kusayo ho du mi ni pati adunguratise watadu ho mi aˈasada ni ka manga wisigopai?’ Ya mo si rengbe kadu nga tumba terefuni ho i ayamba ro ni watadu ho i akepai ni foro rogoho watadu rogo kura aũfugodagbase? Areme, abirioni aboro du na agi ahe re beyo. Kura abawetekepai nape gupai nga, ho ani aˈasada ni ka maaberã rani kuti pai, ka terefuni du mbembedi na ani, si ima rengba  ka gbeberã rani kusayo. Kura wene bawirikipai sa aya, “Gene adunga mo moingo berãro gbe kuti gupai mo amangaha te. Berãro nadu kubani kia.” I naape gupai furani dedede mbata fu bakere adunguratise nga ani moi gaani aũfugodagbase rogo gu gene si nikaa fudanga kura aboro ya. Ya mo ani rengbe ka manga kina gu bangisapai re ho du ani ni nisarani tipa gupai nga ka gaani aũfugodagbase fudinga rani watadu ka gberesa pa gaani regbo na Yekova ya?

14. Ringbisihe kuti AFiripoio 4:6, 7, wai du Yekova nika undo rani ani moiberã rani kuti pai?

¹⁴ Mo sana Yekova ko undo ro mo moiberãro kuti pai. Ho mo abi gupai ni nga berãro nata ata ti regbo wisigopai watadu ti regbo gu dunguratise nga ga dungurati, mo sana Yekova ko undo ro. Ka si du nga mo rogo bakabangirise, si arengbanga kadu foro taata mo moi gamo abakabangirise kusayo ki gbeberã kuti agu apai nga ga toro te, ono si ni nyanyakipa pai gbe mo mangihe wo. Mo mangi kparakpee tipa gu zereda nika banda angianga kina kpotoroyo sa ya, ono gamo “berã” a.—Oni gedi AFiripoio 4:6, 7.

15. Gini undo sa duti dia regbo na Yekova?

¹⁵ Ka mo aadia regbo kaa fura fu Yekova, kini degeturo fuko, na kini berẽ pako, mo nika gbia undo ni bakerehe. Ngba gini gene? Bambatapai nga, mo nika manga bawene adiaberã. Ziazia Kekeapai nape gupai furani nga “gu boro nata na boro tatamana ni adú ni iratatamana a.” (Snz. 13:20) Sidu, wa mo nikaa dia regbo na Baenge tatamana nga Yekova, mo nika du na bakere tatamana tiro. Mo nika rugatiro wenengai na wai ka fu ngbarago fuko na wai ka ne manga agu asiapai naimisa ko.

16. Waigu pa dia ani regbo na Yekova ambakada gaani yugopai?

¹⁶ Uepai nga, mo nika da ni bawene bayugupai. Ho ani awisigo Ziazia Kekeapai ni na boro, sasa sa dagba gaani nyanyakipa asasa yo nga ka undo gaani bawiriki Ziazia Kekeapai ni mbedi na Yekova. Ka ani amanga kparakpee fu Yekova gbe na kini wirikipai tipa ko gbe, gaani nyemuse tipa ko nika sona gbe na ani nika du na bakere rengba gbe ka undo gaani bawiriki Ziazia Kekeapai ni kpinyemuko. Oni berẽnga pa gu kpiapai nangia ga Yesu. Ko afura tipa Yekova rogo gi bawene gene re na si ki undo gako abawiriki i kpinyemu Yekova a.—Yo. 17:25, 26.

17. Tipagine kparakpee na wisigopai aundo rani ti ni ani nyakasi gaani idapase?

¹⁷ Biatapai nga, gamo idapase nika nyaka gbe. Mo berẽnga pa gupai namanga ho mo asana Mbori ni tipa rugapai, wasa watadu undo. Ai gu regbo Yekova akaragapai kuti agu akparakpee re, gamo idapase kutiko nasona. (1 Yo. 5:15) Gini kurapai berewe rengbe ka  nyakasa gamo idapase? Wisigopai nisase. Mo tingidi gupai nga, “idapase aye be giapai.” (Rom. 10:17) Ono tie, tipa ka sonosa nyanyaki idapase, dungu apai si aida ani mangihe kisusi gu gbua nga ka wirika apai. Gini kura pai berewe si aida ani mangihe?

18. Oni funga kpiapai nga gu nayugo ndu gupai si aida ani berẽkuriipai ti ni.

¹⁸ Si naida ani berẽkurii gupai ani awirikaha. Oni berẽnga pa gu kpiapai nga ga bake Atambuahe 77. Ko adu na gberãrago bambiko ko aberẽ gupai nga ko na akurako aYisaraere aima zanga gayo pagume na Yekova. Agu abakabangirise re asa ko ka ko ranga yuru ya. (Veresi 2-8) Ginipai ko amangihe? Ko aya fu Yekova: “Mi amákia pa ga sunge dunduko a, kini bakibangire tipa ga mangaapai.” (Veresi 12) Gu bake papara Atambuahe re aima ino pa agu apai wenengai Yekova amangihe mbata kusayo, ono gu kumba naadu na bakabangirise re aaberã gupai nga: “Bangiri Mbori go tipa ina pai fu aboro? Ko kisi gako wene nunga aboro ni zinga?” (Veresi 9) Gu bake papara Atambuahe re aaberãkurii ga Yekova mangaapai na kurii gu rengo nga Mbori aima yugo inapai na nunga mbata kusayo. (Veresi 11) Sangbanaha angia gine? Gu bake papara Atambuahe re adu na gu kido nga Yekova arengbanga ka mbu Gako aboro te. (Veresi 15) Wakina gure a, gamo idapase nika sona nyanyaki gbe wa mo nikaa berãkurii agu apai Yekova naima mangaha fu gako aboro na agu ko namangihe foro nitiro.

19. Waigu rengbe ani ka gbia undo berewe ti dia ani regbo na Yekova?

¹⁹ Biama pai nga gu du na nyanyakipaha kisusi nga, gamo nyemuse tipa Yekova nika dunguro. Nyemuse nika fõngbaduroyo mo gisangba Yekova, mo mbupa kura gamo apai tipa ka fu ngbarago fuko, na mo hi ai asada. (Mt. 22:37-39; 1 Kor. 13:4, 7; 1 Yo. 5:3) He ho du na nyanyakipaha kisusi ti du na wene mbembedi pabakure na Yekova te!—Tam. 63:1-8.

20. Wai du mo asogima pai tipa ka banda gamo regbo na Yekova?

²⁰ Mo tingidi gupai nga kparakpee, wisigopai, na berãkuriipai nga papara gaani irisombori. Wakina Yesu, mo gbata agu aba du ni zezeredihe tipa ka dia regbo na Yekova. Mo ne agu apai rengbe ka gbe berãro kusayo. Mo sana Yekova ko undo ro mo moiberãro ho mo amanga agu apai ni nga ga toro. Ka mo amangasunge na gamo regbo ngba wene gene awere, Yekova nika fu mosoro foro mo raki nyeanye kindi rogo ga Mbori vovo zegino.—Mk. 4:24.