ROGO wiri umba gbata du Gujarat, India yo, ba John azi bapatiza ki da ni Dezire Yekova rogo 1950. John na atameko na adawiriko gbiati nayo angia aboro gu pambori nga ga aKatoriko na i kini sogo ga bayo ida.

Rogo kura uru sa, ba John aya fuko wẽ ko ndu na zerifu fu bakureako i adu na ko sa rogo dungurati. Ono tie, rogo gu wiso re, wiribe John aima ho gbegberẽ ho ko aazaka ngba akoro marã ni. Ono wa si avura du wo, ko aaida ka giasangba bako, sidu, ko ki vo gu wiri beko re ki ndu na gu zerifu re.

Ho John ada ni rogo gu kporo i akedi ko ku rogoho, dia gu wirina i akedi gu zerifu re fuko adi gu zerifu re. Ri ki bi gu wiri beko naho re na ri kini idi ka undo ko. Ri akusi gari sanduki nga ga adawa, ki girisi gako oro, na ki voho. Fuani, ri ki moi wiri fofoi ime fuko ko mbirihe, na kini fura na ko ngba wene gene riipa Ziazia Kekeapai.

Ti gu regbo re, ga John iraira bipai tipa aDezire Yekova atona kaa zera, sidu, ko asana ri tipa riiapai ue nga gu ga bako ida tipaha adu kia ti gako, gu riiapai re adu nga, singia Yesu nga Mbori na singia si naida aKristano naakpara fu Maria. Wa gu wirina re aima wirika ga John fugo nga Gujarati, ri afu karagapai fuko rogo Ziazia Kekeapai yo kina rogo gu fugo re na ki fu gu wiri tooni buku fuko nga “This Good News of the Kingdom.”

Kusa, wa John aageda gu wiri tooni buku re, ko abihe nga gure nangia bambata regbo fuko ko gi gu rengo nga ga Ziazia Kekeapai. Ko andu ki sana gako bavugahe na kina gu bangisa asanahe naadu ue re. Gu bavugahe re azingi ni kina boro ipo ki so ko na Baibiri, ki ta ngbako nga: “Mo ima da ni Satana! Mo yugu wari fere Baibiri aya ni wẽ Yesu nga Mbori te. Mo yugu wari fere si aya ni wẽ ka boro irisingo Maria ya. Mo yuguhe fere!” Iriwopai aima ti ti John na gupai gu bavugahe re amangihe, na si ki sako ko pe gupai nga “Mi andunga berewe ku rogo gu kanisa nga ga aKatoriko te.” Na ko aadanga yo berewe te!

John atona ka wisigo Ziazia Kekeapai na aDezire Yekova, ki di rengo kugume, na ki tona iriso Yekova. Kusa, badungu gako aborokporo amangihe kinawo. Areme, serõ kindi ti wiri kumbabe John ho ko aho ni agarã 60 kusayo. Ko natingida pa gu wenesino mangapai kindi sa nga ga aKristano nga gu naye na ko ku rogo gu raka nga ga ziazia irisombori.​—⁠2 Kor. 6:​4, 6.