1. Waigu ani aino gupai nga sunge sa aboro ni abawiriki nabatasa aboro?

SUNGE sa aboro ni abawiriki nga gu sunge nabatasa aboro! Wai du ani aino gipai re? Ho Yesu afu gu rugute ni du ni kekehe rogo Matayo 28:19, 20, ko aya: “Oni ndú, . . . ki sa arikaaboro dunduko ni abawiriki, kini bapatizi yo.” Wai du nyakipa zio bapatiza? Ka ani aida ka gbia bata, ani duwa ka ani zi bapatiza. Si naida gu boro naida ka zio bapatiza idi kuti gupai nga ni rengbe ka gbia nyenye unga kina mbiko gupai sa nga Yesu akpi tipa rani. Si du nga ndu gupai gu mokedi nangia Petero agumba gupai ti ni fu akurako aKristano nga: ‘Ime nga gu he nabatasa roni, nga bapatiza, mbiko gu zingabekpio nga ga Yesu Kristo.’ (1 Pet. 3:21) Sidu, ho vovo bawiriki azio bapatiza ni, ni rengbe kadu na gu maabangirise nga ga raka nyeanye kindi.

2. Gini ngbatunga abayugupai 2 Timoteo 4:1, 2 aya ani du nga yo?

² Tipa ka sa aboro ni abawiriki, si naida ani sonosi abirĩ “yugopai.” (Oni gedi 2 Timoteo 4:1, 2.) Tipagine? Bambiko Yesu arugu rani nga: “Oni ndú, . . . ki sa arikaaboro dunduko ni abawiriki . . . , ki nirugu yo” watadu kini yugupai fuyo. Gu mokedi nangia Pauro aya mo “ka kuti” gu sunge re, ‘bambiko manga mo wa gere, mo abatasa tiro na agu yo nagia paha ngba ro.’ Sidu, mbiko gipai re, si arẽarẽ Pauro ya: “Mo bérẽ pa . . . ga yugopai.” (1 Tim. 4:16) Wa duhe nga tipa ka sa aboro ni abawiriki si naida ani yugupai ayugo fuyo, si naida gaani yugopai du ni bawenehe gbe.

3. Ginipai ani nika fura tipaha rogo gi kekeapai re nibipa wirika Ziazia Kekeapai na aboro?

³ Ani nawirika Ziazia Kekeapai na amirioni aboro rogo zegino dunduko. Ono a wa i apehe rogo gu kekeapai naadu mbata fu gere, si naida ani ini wai rengbe ani ka undo badungu agu aboro re i da ni gu ga Yesu Kristo abawiriki naima zio bapatiza. Rogo gi kekeapai  re, ani nika fura tipa kura apai bisue nga gu si aida ai bayugupai mangihe tipa ka undo bawiriki Ziazia Kekeapai ni mangi sonakumbatayo ki zi bapatiza.

4. Tipagine si aidanga bayugu Ziazia Kekeapai naafura afura ni bakerehe ti ni ya ho ni awisigo Ziazia Kekeapai ni na boro? (Oni bi rukutu kekeapai a.)

⁴ Ani ima kpinyemu gupai ani ayugoho rogo Fugo Mbori yo. Sidu, ani ima rengba ka ida ka fura ni bakerehe tipaha. Ono tie, singia boro nanungusa Wisigo Ngbaõbambu Sinziri, Gu Wisigo Ziazia Kekeapai Nga ga Dungurati, watadu wisigo Ziazia Kekeapai na boro, si aidanga ni naafura afura gbe te. Ai bayugupai si aida ni mangisunge na Ziazia Kekeapai wenengai, sidu, si naida ni du na rubangirise tipa ka zanga kaa fura ni bakerehe na ka zanga ka asada ka sakarogo agu apai yo dunduko ni nainihe nibipa kura veresi sa rogo Ziazia Kekeapai yo watadu kurapai. * (Yo. 16:12) Mo berẽnga pa bakio agu apai mo ainihe nibipa Ziazia Kekeapai ti gu regbo mo azi bapatiza na bakio gu badungu apai mo nainihe awere. Ti gu regbo mo azi bapatiza, si nawira gupai nga kina bangua ayugopai nga ga Ziazia Kekeapai sa mo arugutiro na ni. (Eb. 6:1) Si ima dia ro na agarã tipa mo wiriki agu apai mo nainihe areme, sidu, ka mo asadingo ka yugo apai dunduko fu vovo bawiriki Ziazia Kekeapai ti bangisa regbo ya.

5. (a) Ringbisihe kuti 1 ATesaroniko 2:13, ginipai si aida ani undo gaani bawiriki Ziazia Kekeapai ni rugutini na ni? (b) Waigu rengbe ani ka ngarasa bawiriki Ziazia Kekeapai ni fura tipa agu apai ni awirikaha?

⁵ Si naida gaani bawiriki Ziazia Kekeapai rugutini na gupai nga gupai ni awirikaha naye rogo Fugo Mbori yo nga gu gako toro adu kugiipa kehe. (Oni gedi 1 ATesaroniko 2:13.) Waigu rengbe ani ka undo ni ni rugutini na gupai re? Mo ngarasi ni tipa ni naafura tipa agu apai ni awirikaha. Kuba gupai nga kina ro naasakarogo averesi yo fu gamo bawiriki Ziazia Kekeapai ti aregbo dunduko, mo sana ni ni sakirogo agu akuraha yo foro. Mo undo ni ni bi wai Fugo Mbori narengbe ka undo ni nitini. Mo sana ni na agu asanahe nika undo ni ni fura tipa gupai ni aberãha tipa agu averesi ni agedaha. (Rk. 10:25-28) Ni kpiapai, mo sana ni nga: “Waigu gi veresi re naundo ro mo bi sino sa dagba asino Yekova yo?” “Waigu rengbe mo ka gbia undo ti gi rengo nga ga Ziazia Kekeapai re?” “Gini bipai du mo na ni tipa gipai mo nawirikihe re?” (Snz. 20:5) Anga gupai nyakipaha kisusi nga bakio wai bawiriki Ziazia Kekeapai naini apai te, ono bakio wai ni nakpinyemu agu apai ni nainihe na kini mangipai kutini.

6. Tipagine rengbehe kadu ti ni ni wenepai ani ndu na gu batungusipai du na inohe tipa ni du pati gaani wisigo Ziazia Kekeapai na boro?

⁶ Ho mo naandu ni kaa wirika Ziazia Kekeapai na boro, ya mo aregbo ho mo naandu na agu abatungusipai du na bakere inohe? Ka si du nga mo  naandu andu na yo, mo ima rengba ka sana yo tipa wai mo anungusa wisigo Ziazia Kekeapai na ki sana yo singia mo namangasunge wenengai na Ziazia Kekeapai tipa ka yugopai. Ka mo aida kadu ni wene bayugupai, si naida mo du na umbasitise. (Oni ringbisinga ha na Amokedi 18:24-26.) Tifuoho, mo sana gu batungusipai du na inohe re ka ino singia ni nabihe nga gu bawiriki Ziazia Kekeapai re nagiarogo agu apai yo ni awirikaha. Mo ima rengba a ka sana gu bangisa batungusipai re tipa ni wisigipai na gamo bawiriki Ziazia Kekeapai ka si du nga mo nika mera tipa poso sa watadu susi gure. Mangaha wo nika sa gupai nga ka gani wirikapai kpanga ya na si kini yugupa wai fu ni du gani wirikapai na nyanyakipaha. Ka mo naabingo ho nga “gamo” bawiriki Ziazia Kekeapai du nga ni na si aidanga kura boro berewe wirikipai na ni te ya. Gupai nyakipaha gbe nga gamo bawiriki Ziazia Kekeapai naamanga sonakumbatayo kindi rogo wirika rengo yo.

7. Ginipai nika undo bawiriki Ziazia Kekeapai tipa ni du na ngbarago tipa gupai ni awirikaha?

⁷ Si naida bawiriki Ziazia Kekeapai bi gupai nga mo ima kpinyemu gupai Ziazia Kekeapai ayugoho na mo ima du na idapase kutini. (1 Tesa. 1:5) Ka ni bihe wo, si ima rengba ka sa ni ni du na bakere ngbarago tipa gupai ni awirikaha. Ka si rẽarẽ, mo gumbapa wai fu ni Ziazia Kekeapai naundo ro nitiro rogo gamo raka yo. Manga mo ho wo rengbe ka sa ni ni bi gupai nga Ziazia Kekeapai na arugute rogoho nga gu naima rengba ka undo ni a.

8. Gini kurapai berewe rengbe mo ka mangaha tipa ka undo gamo bawiriki Ziazia Kekeapai?

⁸ Ho mo awirika Ziazia Kekeapai ni na boro, mo pepa agu akpiapai funi nga ga agu awirina naadu na akpakarapai tiyo wakina gani, ono i ki ima diabehe. Ho mo andu ni ka wirikapai na gamo bawiriki Ziazia Kekeapai, mo ima rengba ka ndu na gu batungusipai gani kpiapai narengbe ka fu undo fu gamo bawiriki Ziazia Kekeapai. Watadu mo ima rengba ka gbia wenewene apangbanga rogo gaani bangiriba nga ga Internet nga jw.org rogo gu kekeapai du riihe nga, “The Bible Changes Lives.” * Ngbatunga gu kekeapai re gbiati avidio nika undo gamo bawiriki Ziazia Kekeapai ni bi wai duhe ni patatamana ka mangapai kuti agu abangua arengo nga ga Baibiri.

9. Waigu rengbe mo ka ngarasa gamo bawiriki Ziazia Kekeapai tipa ni naapeka agu apai ni awirikaha fu gani aborokporo gbiati abakureani?

⁹ Ka si du nga gamo bawiriki Ziazia Kekeapai ni gu boro naima manga rogatise, ya mo gani badiarogatise nawirika Ziazia Kekeapai? Ka si du nga gani badiarogatise awirikanga Ziazia Kekeapai te, mo yambu ni tipa ni du pati gu wirikapai re.  Mo ngarasi gamo bawiriki Ziazia Kekeapai tipa ni naapeka agu apai ni awirikaha fu gani aborokporo gbiati abakureani. (Yo. 1:40-45) Ngba gini gene? Mo ima rengba ka sana ni nga: “Waigu rengbe mo ka sakarogo gipai re yo fu gamo aborokporo?” watadu “Gini veresi rengbe mo ka mangasunge na ni tipa ka yugo gupai fu bakureamo nga gipai re nga rengo?” Rogo gi gene re, mo nika raba gamo bawiriki Ziazia Kekeapai ni du ni bayugupai. Ho ni nika rẽ ni, ni ima rengba ka tona tungusapai na dungurati ni gu batungusipai ataziongo bapatiza ya. Mo ima rengba ka sana gamo bawiriki Ziazia Kekeapai singia ni ini pa kura boro nga guni naida ka wirika Ziazia Kekeapai. Ka si du nga ni ini pa ni, mo ndu fuoni nibasa na ki sana ni tipa ka wisigo Ziazia Kekeapai na ni. Mo yugu gu vidio funi nga, Wai Du I Naawirika Ziazia Kekeapai? *

10. A wa i nasakipai tipaha rogo 1 ATesaroniko 2:7, 8, waigu rengbe bayugu Ziazia Kekeapai ka wirika ga Pauro kpiapai?

¹⁰ Si naida abayugu Ziazia Kekeapai yugu gupai nga i naberãpa gayo abawiriki Ziazia Kekeapai aberã. Oni naabiyo ni agu aboro nika daada ni awirinaroni nga ga toro yo kumbatayo. (Oni gedi 1 ATesaroniko 2:7, 8.) Taatapai ngaha fuyo i mbu agu abakureayo nga ga zegino yo na ki mangi agu aˈariapai dunduko si aida i mangihe tipa ka iriso Yekova te. Si naida ani undo yo tipa i gbia ndikidi abakure rogo dungurati. Mo du ni bakure fu gamo bawiriki Ziazia Kekeapai ni dia mo regbo na ni angianga kinaho sa mo awirikapai ni na ni ya, ono ti kura aregbo a. Pa yamba mo ni na terefuni, ka kepai funi, watadu ka ndu ni guruhe ka bi ni ima rengba ka yugo gupai funi nga mo naberã pani aberã nzunzu.

11. Ginipai ani aida si mangi tipa gaani abawiriki Ziazia Kekeapai rogo dungurati, na tipagine?

¹¹ Fugo sanza gu duho ninaaya: “Agu aboro dunduko du rogo gbaria nafubee kuti pa sonosa gude.” Sidu, ani rengbe ka ya: “Dungurati naabaha nafubee kuti pa sa boro ni bawiriki.” Si du nga ndu gupai wene abayugu Ziazia Kekeapai ninaayugo gayo abawiriki Ziazia Kekeapai ti ni fu kura aboro rogo dungurati nga aguyo rengbe ka undo yo i mbedi gbe na Yekova. Agu abawiriki Ziazia Kekeapai re rengbe ka gbia ngbarago ti kodatise na ga Mbori aboro, nga aguyo rengbe ka songoda yo rogo toro yo na ki ngarasi yo. Ani naida gupai nga ai bawiriki Ziazia Kekeapai bihe nga ni nga papara dungurati na ki ngia papara gu gaani riikporo nga ga toro. Ani naida gupai nga ni mbedi na gu riigbu nga ga agu awirina nga aKristano nga aguyo du na nyemuse tiyo. Mangaha wo ni ka sa gupai nga si du taata funi ni mbu bakere kodatise na agu aboro aundongo ni ni kpinyemu Yekova ya. (Snz. 13:20) Ka agu aboro naadu ni abakureani mbata mbu ni, ni nika ino gupai aino nga ni ima rengba ka gbia ndikidi abakure rogo ga Yekova riigbu.—Mk. 10:29, 30; 1 Pet. 4:4.

12. Tipagine si aida ani naafura ti ni tipa kparatise gbiati zio bapatiza fu gaani bawiriki Ziazia Kekeapai?

¹² Si naida mo naafura dedede tipa wai duhe ni nyanyakipa pai fu boro ni kpara gani raka fu Yekova na ki zi bapatiza. Gu ndupai ani awirika Ziazia Kekeapai ti ni na boro nga ka undo ni ni da ni gu bawiriki naima zio bapatiza. Fuo bawiriki Ziazia Kekeapai wirikipai tipa bete adiwi na gbe tingbafuo ni tona ye tipa adunguratise, si naida ni rugutini na gupai nga ani naida ka undo ni ni da ni boro sa dagba aDezire Yekova yo.

13. Gini apai si aida bawiriki Ziazia Kekeapai mangihe tipa ka rẽ ka zio bapatiza?

¹³ Apai kinaho gu bawiriki Ziazia Kekeapai naida ka zio bapatiza narengbe ka mangaha! Bambatapai nga, si naida bawiriki Ziazia Kekeapai ye ka ino Yekova, ki kpinyemuko, na kidu na idapase kuti Ko. (Yo. 3:16; 17:3) Fuo gure, si naida ni da ni bakurea Yekova na ni bakurea awirina a rogo dungurati. (Eb. 10:24, 25; Yak. 4:8) Ni yangaraha tie, si naida ni mbu gbegberẽ mangaapai na ki saberã ni ti gani aingapai. (Amo. 3:19) Berewe a, si naida gani idapase fõngbaduniyo ni tungusi pa rengo fu kura aboro. (2 Kor. 4:13) Na fuo gure, ni ki kpara tiní fu Yekova na ki yugu gani kparatise ni zio ni bapatiza. (1 Pet. 3:21; 4:2) Na gu uru ni azio bapatiza re nga uru bakere ngbarago fu aboro dunduko! Ho bawiriki Ziazia Kekeapai amanga agu apai ni si aida ni mangihe tipa ka zio bapatiza, si naida mo naatambua ni kina boro ngbaduroyo na kini ngarasi ni tipa ni naamanga sonakumbatayo kindi.

14. Waigu rengbe bayugu Ziazia Kekeapai ka wisigo ga bawiriki Ziazia Kekeapai sonakumbatayo?

¹⁴ Si naida ani du na zerangbaduse ho ani aundo bawiriki Ziazia Kekeapai ni ni mangi sonakumbatayo ka kpara tiní fu Yekova na ki zi bapatiza. Ono si naida aida a ani ini singia ni na nyemu ka iriso Yekova Mbori. Ya mo bawiriki Ziazia Kekeapai nayugo gupai nga ni naˈasada ka irisa ga Yesu arugute? Watadu gupai ni aidaha gbua nga ka wirika gu weneapai du vuru Ziazia Kekeapai yo?

15. Gini apai rengbe ka yugo gupai fu bayugu Ziazia Kekeapai nga gani bawiriki Ziazia Kekeapai ima tona kaa rẽ tipa ka zio bapatiza?

¹⁵ Mo naawisigo gu sonakumbatayo nga ga gamo bawiriki Ziazia Kekeapai dedede. Ni kpiapai, ya mo ni napeka agu apai du berãni yo tipa Yekova? Ya mo ni namanga kparakpee fu Yekova? (Tam. 116:1, 2) Ya mo ni nagbia ngbarago ti geda Ziazia Kekeapai? (Tam. 119:97) Ya mo ni naandu tipa adunguratise dedede? (Tam. 22:22) Ya mo ni mangingo aˈariapai rogo gani gene raka yo? (Tam. 119:112) Ya mo ni tona fura tipa agu apai ni awirikaha fu gani aborokporo watadu abakureani?  (Tam. 9:1) Gu nyakipaha gbe nga, ya mo ni naida kada ni boro sa dagba aDezire Yekova yo? (Tam. 40:8) Ka si du nga bawiriki Ziazia Kekeapai amanganga sonakumbatayo rogo ai bangiriba sa dagba agi abangiriba re te, mo asadi rogo tatamana yo ka ino ndu gupai ni amanganga sonakumbatayo ti ni ya na fuo gure, mo ki saki gupai re na ni ziazia ngba wene gene. *

16. Gini regbo rengbe mo ka rugusa wirika Ziazia Kekeapai na boro?

¹⁶ Mo naasana tiro dedede singia si naida mo naandu kindi kumbatayo kaa wisigo Ziazia Kekeapai na boro. Mo sana tiro nga: ‘Ya mo gimi bawiriki Ziazia Kekeapai ni gu boro ninaambakadanga gani wirikipai ya? Ya mo ni ni gu boro adunga nyemu du pati adunguratise tiní ya? Ya mo gbegberẽ apai kinaho ni amangaha kindi? Ya mo ni kindi nga papara ziree pambori?’ Ka karagapai kuti agi asanahe re du nga ii, ndu kumbatayo kaa wirikapai kindi na ni wakina asada ka yugo wagia fu gu boro aidanga ka zirã be ime ya! Ka bawiriki Ziazia Kekeapai adunga na tambuahe tipa gupai ni awirikaha ya na ki zanga du na nyemu ka manga aˈariapai, ya mo ndupai ho tipa kaa wirikapai kindi na ni?

17. Ringbisihe kuti 1 Timoteo 4:16, gini apai si aida abayugu Ziazia Kekeapai dunduko mangihe?

¹⁷ Si ni nyanyakipa pai furani ani mangi gu sunge du berani nga ga sa aboro ni abawiriki, na si naida ani undo gaani abawiriki Ziazia Kekeapai i mangi sonakumbatayo ki zi bapatiza. Si du nga ndu gupai si aida ani mangisunge ti ni na Ziazia Kekeapai ka yugopai, na ki yugu gupai nga ani ima kpinyemu gupai ani ayugoho na ki ima ida kutini. Si naida ani ngarasi bawiriki Ziazia Kekeapai ni zi abakure rogo dungurati. Na si naida ani nyakasipa gu sasa funi nga ga kparatise fu Yekova gbiati zio bapatiza, na kini wisigi gani sonakumbatayo dedede. (Oni bi gu sanduki nga, “ Agu Apai si Aida Abayugu Ziazia Kekeapai Mangihe Tipa ka Undo Abawiriki Ziazia Kekeapai I Da ti Zio Bapatiza.”) Ani na ngbarago nga ani na rengba ka fubee kuti gi sunge batasa aboro re! Ani dinga berã adia ka manga agu apai dunduko rengbe ani ka mangaha tipa ka undo gaani abawiriki Ziazia Kekeapai i rẽ tipa ka zio bapatiza.