1. Ginipai si aida agu aKristano naima zio bapatiza naamangaha kindi?

YA MO mo ni gu boro naima zio bapatiza? Kangia wo duhe, ho mo azi bapatiza ni, mo aima yugoho ku bangiri aboro dunduko nga mo na idapase kuti Yekova na mo nakpinyemu ka mangasunge fuko wa sa na gako riigbu. * Rengo ngaha nga, si naida gamo idapase kuti Yekova naanyaka kina kumbatayo. Na si naida mo naanyakasa gamo idapase kindi kuti gupai nga, Yekova namangasunge na gako riigbu areme.

2-3. Gini agene Yekova angbe kumbatayo fu gako riigbu areme ngbaha? Oni funga akpiapai.

² Areme, Yekova nangbe kumbatayo fu gako riigbu ngba gu gene nayugo gini ngbatunga boro nga ko, gupai ko aida ka mangaha, gbiati gako ruru arugute tipa apai. Ani wisigingo apai tipa asino Yekova biata nga gu ani abihe rogo gako riigbu.

³ Bambatapai nga, “Mbori akpara nga aboro te.” (Amo. 10:34) Nyemuse asa Yekova ko fu Wiriko ni “motumo tipa aboro dũ.” (1 Tim. 2:6; Yo. 3:16) Yekova namangasunge na gako aboro tipa i tungusi wene pangbanga fu agu aboro dunduko nika degatuyo, rogo gi gene re, ko kini undo badungu aboro tipa i gbia undo ti motumo tumorii. Uepai nga, Mbori nakpinyemu gupai nga apai naamanga ti genehe na rogo zereda. (1 Kor. 14:33, 40) Sidu tie, si naida airisiko naamangasunge fuko ngba gu gene du ni mbakadimbakadihe na rogo zereda yo. Biatapai nga, Yekova nga “Bayugupai.” (Yes. 30:20, 21) Si du nga ndu gupai gako riigbu amangasunge ti ni nyanyaki tipa ka yugopai fu kura aboro tipa Fugoko nga Ziazia Kekeapai, singia ba adunguratise yo watadu gene sunge tungusapai yo. Waigu agu awirina naadu rogo gu bambata dungurati nangia ga aKristano awiriki agu asino Yekova du biata re? Waigu ga Yekova aboro awirika agu asino re ti gi gaani regbo re?  Na waigu rengbe ziazia toro ka undo ro wa mo amangasunge wa sa na ga Yekova riigbu areme?

4. Rogo Amokedi 1:8, ginipai Yesu afu zinahe fu apefuoko tipa i mangihe, na gini undo si adu nga i nika gbiaha?

⁴ Rogo bambata sa kama agarã. Gu pangbanga Yesu atungusihe afu maabangirise fu ngbatunga aboro dunduko. (Rk. 4:43) Ko azinahe fu apefuoko tipa i naandu kindi kumbatayo na gu sunge ko atonaha, nga ga manga dezirepai daaku “digida sende yo.” (Oni gedi Amokedi 1:8.) Rengo ngaha nga, i aarengbanga ka manga gi sunge re mbiko gayo ome te. Si adu nga i nika ida na ziazia toro—nga gu “mounda” Yesu akidopaha fuyo.—Yo. 14:26; Zek. 4:6.

5-6. Gini agene ziazia toro aaundo apefuo Yesu ngbaha?

⁵ Apefuo Yesu agbia ziazia toro ti rago Pendekote rogo gu garã nangia 33 Fuo Batikayo Kristo. Mbiko gu undo gu ziazia toro re afuhe, i atona ka tungusapai nibasa na vuru guru regbo yo gbua, akutu aboro ki di wene pangbanga kugume. (Amo. 2:41; 4:4) Ho arungosiro atona ni, abawiriki aambunga tiyo gunde dibeyo te, ono i asana Yekova rogo kparakpee yo tipa undo. I akparikpee ki ya: Mo ‘idihe fu gamo amoyambu i ta peka ga pai apeka zukazuka gbe.’ I ahiki be ziazia toro na “i ki nipeke ga Mbori pai apeka zukazuka.”—Amo. 4:18-20, 29, 31.

⁶ Ga Yesu abawiriki agbiatiyo na kura akpakarapai berewe. Ni kpiapai, Ziazia Kekeapai aangenga te. Awaraga aadunga ho naasaka rogo Ziazia Kekeapai yo wa gu du berani areme te. Na si aaida abawiriki tungusipai fu agu aboro naagumba dungu ngbatunga kura afugo kia. Wa agi akpakarapai re avura du vurũ, agu abawiriki naamangasunge kakaka re amangi gupai naangera wa gupai kaa manganga ya. Vuru agarã yo wa 30, i aima tungusa wene pangbanga ‘tii ngbangbaturũ no dũ.’—Koro. 1:6, 23.

7. Agarã susi 100 kusayo, waigu ga Yekova amoyambu aini gupai Mbori aaidaha beyo, na ginipai i amangihe?

⁷ Ti gi gaani regbo re. Yekova nandu kindi kumbatayo kaa nungusa gako riigbu na kini fu ome fu gako aboro. Ko nangbe kumbatayo gbe fu gako aboro vurube Ziazia Kekeapai nga gu gako toro aundo na pa kehe. Rogo Ziazia Kekeapai yo, ani nagedapai tipa gu sunge tungusapai Yesu amangihe na pa gu zinahe ko afuhe fu apefuoko tipa i naandu kindi kumbatayo na gu sunge ko atonaha. (Mt. 28:19, 20) Bakuru kusayo rogo Bamburu 1881, gaani magazini ape gupai nga: “Yekova aasianga rani tipa aboro naairisa rani watadu tipa ani du ni airakumuko te, ono ko asia rani tipa ani mangisunge na agu ahe dunduko du berani tipa ka tungusa wene pangbanga.” Gu wiri buku i akusihe rogo gu garã nangia 1919 rimoho angia To Whom the Work Is Entrusted aya: “Bakere sunge duho si aida ani mangihe, ono ga Gbia sunge du, na ko nika fu gu ome afu si aidaha tipa ani mangihe.” Nirengo, wakina agu aKristano naadu rogo bambata sa kama agarã, agi awirina re amangisunge kakaka ni ngarã, kidu na gu kido nga ziazia toro nika undo yo aundo tipa i tungusipai fu ngbatunga aboro dunduko. Ani na kina gu bangisa kido re a nga ziazia toro nika undo rani aundo areme.

8-9. Gini agene tungusapai ga Yekova riigbu namangisunge na ni tipa ka gbandaka wene pangbanga?

⁸ Ga Yekova riigbu ima mangasunge na gu wene aũsunge duho tipa ka gbandaka wene pangbanga. Agi aũsunge re nakoda awaraga, gu vidio nangia “Photo-Drama of Creation,” fonoo, agu atarambiri naadu na aũkiiso-fugo rogoyo, aradio tipa ka gbandaka wene pangbanga gbiati agu du awere nga akompiuta na Internet. Ga Mbori riigbu nasa apai ku rogo kura dungu afugo awere kisusi gu nidu mbata! Tipagine? I namangaha wo tipa ngbatunga aboro dunduko gi wene pangbanga kina rogo fugoyo yo. Yekova akparanga aboro te; ko agumba gupai kumbatayo nga i nika tungusa wene pangbanga “fu arikaaboro, na ngbatunga aboro, na ngbatunga afugoyo, na aboro.” (Yugo. 14:6, 7) Ko naida aboro dunduko du na rengba ka gia gu pangbanga nga ga Kindo.

 ⁹ Na ginipai du tipa agu aboro adunga ani na rengba tipa ka tungusapai fuyo rogo gayo akporo ya, isoke mbiko i naraka rogo agu akporo ani arengbanga ka rimo ku rogoho ya mbiko gupai nga aboro nabandaha abanda watadu si ni kisikisihe? Tipa ka tungusapai fu dungu agi aboro re, Yekova aundo gako riigbu tipa i tona mangasunge na kura agene tungusapai gbaiga. Ni kpiapai, rogo 2001, Riigbu Bipasunge aidihe fu agu awirina du France yo tipa i tona mangasunge na aũtura awaraga gbiati gu kura agene gbaraga gaani awaraga. Fuo regbo kusa, kura awirina rogo gu kura arago atona ka tungusapai ngba gi gene re. Asangbana gi gene tungusapai re aima du ni wenehe. Rogo 2011, i atona vovo gene tungusapai Amerika yo rogo gu gbata nga New York City rogo gu kura paparaha sa du na badungu aboro rogoho. Vuru bambata garã yo, i akparaka abuku bangehe adu nga 102,129 gbiati amagazini nga 68,911. Na bange agu aboro naasanahe tipa ka wisigo Ziazia Kekeapai adu nga 4,701! Ani nabihe abi ziazia nga Yekova aamangasunge na gako ziazia toro tipa ka songoda gako sunge. Sidu, Riigbu Bipasunge aidihe fu awirina rogo zegino dunduko tipa i naamangasunge na aũtura awaraga gbiati gu kura agene gbaraga awaraga rogo zegino dunduko.

10. Ginipai rengbe ani ka mangaha tipa ka mbakada gaani gene tungusapai?

¹⁰ Gupai rengbe mo ka mangaha. Mo mangisunge wenengai na gu rabahe Yekova afuhe furani ti regbo gaani adunguratise nga ga aKristano. Mo naatungusapai dedede na gamo badona nga ga tungusapai. Agu awirina du rogo gamo badona nga ga tungusapai rengbe ka undo ro mo ini wai ka tungusapai wenengai na gayo wene kpiapai ima rengba ka ngarasa ro. Mo naandu kindi kumbatayo kaa tungusapai akpakarapai ki vura du vurũ. A wa gu gaani veresi du mburu gi kekeapai re riihe atingida rani na ni, ani namanga gupai Mbori akpinyemuhe angianga mbiko gaani ome nitirani ya, ono mbiko ani nagbia ome be ziazia toro. (Zek. 4:6) Ani ima rengba kadu na gu kido nga Mbori nika fu gu ome afu ani aidaha mbiko gupai nga ani namanga gako sunge.

11. Waigu gu riigbu bipasunge naadu rogo bambata sa kama agarã amangisunge kina sa tipa ka sa apai si mangi ti kina genehe dagba ga Mbori aboro?

¹¹ Rogo bambata sa kama agarã. Gu riigbu bipasunge naadu Yerusarema yo amangisunge kina sa tipa ka sa apai si naamanga dagba ga  Mbori aboro ti kina genehe na rogo zereda yo. (Amo. 2:42) Ni kpiapai, bara rogo gu garã nangia 49, badungu aKristano adu na aberãpai ni bakiakia tipa singia si naida aboro dunduko yeretiyo mbata i kini ru ka iriso Yekova. Sidu, vurube gu rugapai nga ga ziazia toro, gu riigbu bipasunge naadu Yerusarema yo afura tipa gipai re. Ka dungurati anye ni kparakakparaka yo mbiko gi kpakarapai re, ka i arengbenga ka tungusapai wenengai te. Wa si avura du nga amokedi gbiati abaakumba angia aYudo, i aambunga gupai nga agu asino nangia ga aYudo watadu agu aboro naatungusa paha nyanyaki du na ome kurii yo te. Kuba gure, i andu ku rogo Fugo Mbori yo na ki sana Mbori tipa gako ziazia toro tipa si undo yo i mangi ruru diaberã. (Amo. 15:1, 2, 5-20, 28) Sangbanaha angia gine? Yekova afu maku kurii gayo diaberã, zereda gbiati kodatise kidu, na sunge tungusapai kini ndu kina kumbatayo.—Amo. 15:30, 31; 16:4, 5.

12. Ginipai nayugo gupai nga ga Yekova riigbu ni mbakadimbakadihe na ni zezeredihe?

¹² Ti gi gaani regbo re. Ga Yekova riigbu ima undo ga Yekova aboro tipa i nye ni mbakadimbakadi yo na kidu na zereda dagbayo. Bakuru kusayo rogo gu garã nangia 1895, kekeapai akuru rogo gu magazini nangia Zion’s Watch Tower and Herald of Christ’s Presence rogo Ngbangba 15, nga gu riihe adu nga, “Decently and in Order” (Nzunzu na ni Tangaratangaraha), na mburu gu kekeapai re adu rii 1 AKorindo 14:40. Gu kekeapai re aya: “Amokedi aima keka dungu apai fu gu bambata dungurati nga ga aKristano tipa mangapai ni tangaratangaraha. Si ni nyanyakipa pai tipa ani naapekafuo ‘agu apai i akehe mbata kusayo tipa gaani wirikapai.’” (Rom. 15:4) Ga Yekova riigbu areme namangasunge nyanyaki tipa ka banda gu dungurati nga ga aKristano si du ni mbakadimbakadihe na zereda ki du rogoho kina wai si adu ti regbo agu aKristano naadu mbata. Ni kpiapai: Ka mo du pati Wisigo Ngbaõbambu Sinziri rogo kura dungurati singia rogo gamo ringara watadu rogo kura ringara, mo ima rengba ka rugatiro na wai i nika nungusa gu wisigopai re gbiati gu paparaha i nika wisigoho. Padu gipai re wa gere rengbe ka sa ro ka mo bakingo bangiro tipa gupai namanga ya! Kina ga Mbori ziazia toro sa rengbe ka sa gi ngbatunga kodatise re si du!—Zef. 3:9.

13. Gini asanahe Yakoba 3:17 asarani ani sana tirani na ni?

¹³ Gupai rengbe mo ka mangaha. Yekova naida  gako aboro “ka kuti gu du sa nga ga Toro, . . . ni gu ũkpamiatise nga zereda.” (Ef. 4:1-3) Sidu, mo sananga tiro nga: ‘Ya mo mi naamanga agu apai naye na kodatise gbiati zereda rogo dungurati? Ya mo mi naagiasangba agu aboro nangbe kumbatayo rogo apai yo? Ya mo aboro rengbe kadu na kido kuti re, gbe ka si du nga mi na asunge bere rogo dungurati? Ya mo mi ni gu boro ninaabanda regbo, kini fu undo, na kidu regerege tipa ka manga kura asunge?’ (Oni gedi Yakoba 3:17.) Ka mo bihe nga kura abangiriba kinaho si aida mo mangi aˈariapai rogoho, mo mangi kparakpee tipa ziazia toro. Kina wai mo ni kaa mbu ziazia toro si du na ome kurii gu gene mo amangaapai ngbaha, kinawo a awirina rogo dungurati nika kpinyemuro na kini bi ro na nyanyakipa ro.

14. Ringbisihe kuti AKorosaio 1:9, 10, waigu Yekova ayugupai fu gako aboro rogo bambata sa kama agarã?

¹⁴ Rogo bambata sa kama agarã. Yekova ima kpinyemu kaa yugopai fu gako aboro. (Tam. 32:8) Ko naida i ini ko, kini kpinyemuko, na ki raki nyeanye kindi ni agu awiriko ko naima kpinyemu yo. Agi apai re arengbanga ka manga zanga gu rabahe ko afuhe te. (Yo. 17:3) Yekova amangisunge na gu dungurati nga ga aKristano naadu rogo bambata sa kama agarã tipa si yugupai fu gako aboro. (Oni gedi AKorosaio 1:9, 10.) Ziazia toro nga gu “mounda” Yesu akidopaha aima undo abawiriki a. (Yo. 14:16) Si aundo abawiriki i girogo Fugo Mbori yo na ki tingidi gu badungu apai Yesu agumbaha na ki mangihe, nga gu i arengbe ka gedapai tipaha kusa rogo Akitabu Wene Pangbanga yo. Gi inohe re anyakasi gu idapase nga ga agu aKristano naadu mbata na gayo nyemuse tipa Mbori, Wiriko, gbiati akurayo.

15. Rogo gini agene mo nabi wai Yekova adigiso gu gako kidohe du rogo Yesaya 2:2, 3?

¹⁵ Ti gi gaani regbo re. Yekova agumba gupai kumbatayo nga “rogo yangara arame,” aboro dagba rikaaboro yo dunduko nika ye kurii gako “bagangara” yo, naida ka ya, aboro nika kodatiyo na ndikidi airisiko tipa ko rabayo i ini gako  agene. (Oni gedi Yesaya 2:2, 3.) Ani nabi gu sangbanebi re abi si nidigisitihe. Ani nabi gupai nga ndikidi irisombori ima du ni wenehe kisusi ziree airisombori dunduko. Na Yekova nayugo badungu apai fu gako aboro tipa Ziazia Kekeapai! (Yes. 25:6) Ko namangasunge na “kangara moyambu” tipa kaa yugopai furani, nga gu naye rogo agene ni bakiakia. Ni kpiapai, ani na rengba ka geda awaraga, ka gia agumbapai na ka bi avidio ngba arikoho. (Mt. 24:45) Ani nasanahe kina wai bakurea Eyobo nangia Eriu asanahe ki ya: “Da du nga ni bayugupai wa [Mbori]?”—Eyo. 36:22.

16. Ginipai rengbe mo ka mangaha tipa ka gbia undo ti gu rugaapai Yekova afuhe?

¹⁶ Gupai rengbe mo ka mangaha. Ga Mbori ziazia toro nika undo ro mo mangipai kuti gupai mo agedaha na kini wisigihe rogo Fugo Mbori yo. Mo mangi kparakpee wakina gu bake papara atambuahe amangihe ki ya: “Ako Yekova, mo yúgu ga gene fere, mi nita kina rogo ga rengo; mo kpámia kpotore yo si gunde ti rimoro.” (Tam. 86:11) Sidu, mo naandu kindi kumbatayo kaa geda Ziazia Kekeapai na kini wisigihe gbiati agu awaraga ga Yekova riigbu akusaha. Si aidanga gamo sasa du gbua nga ka gbia kina inohe te. Si naida mo sa rengo si rimi ku ngbaduroyo na kini mangipai rogo gamo raka yo kuti gupai mo awirikaha. Ga Yekova ziazia toro ima rengba ka undo ro mo mangi gupai re. Si naida gupai a nga mo naangarasa awirinamo. (Eb. 10:24, 25) Tipagine? Bambiko i nga gamo aborokporo nga ga toro yo. Mo mangi kparakpee tipa ga Mbori ziazia toro tipa si undo ro mo naafu wene akaragapai ti regbo agu adunguratise nga ga aKristano na mo naambakada apaparaha na kini mangihe wenengai. Rogo gi gene re, mo nayugo gupai fu aYekova na Wiriko nga mo ima kpinyemu gayo nyanyakipa “akandoro.”—Yo. 21:15-17.

17. Gini agene rengbe mo ka yugo gupai ngbaha nga mo nasongoda ga Yekova riigbu niruru ro?

¹⁷ Barambeda, gu yangara riigbu nika nye auru kpotosende nika ngia kina gu ga Mbori toro angbe kumbatayo fuhe. Sidu, mo naamanga sunge wa sa na ga Yekova riigbu. Mo yugu gupai nga mo nakpi nyemu aboro dunduko wakina gu Mbori nakpinyemu yo ni tungusa mo wene pangbanga fu agu aboro dunduko mo agbiayo. Mo wiriki wai Yekova aida apai nimangi ni tangaratangaraha na rogo zereda yo ni sonosa mo kodatise rogo dungurati. Na mo degeturo fu gamo bakere Bayugupai ni gbia mo undo ti agu apai dunduko nga ga toro ko afuhe. Sidu, wa ga Satana zegino aye kuti digidoho, mo adunga na gunde te. Kuba gure, mo nika du na ngarã na ki ru dagba agu aboro namangasunge fu Yekova ni ruruyo na gako riigbu.