1. Gini pa ngbarago na pa irisa du ani na ni?

SI NI bakerepa ngbarago na nipa irisa kadu ni aDezire Yekova! Ani nga ga Yekova aboro, na ani nayugo gupai nga ani nga gako aDezire ni tungusa ani pai fu kura aboro na kini yugupai fuyo tipa ko. Ani nadu na ngbarago ho ani aundo gu boro ni du “na nyemu gbia nyenye unga” ni da ni idipase. (Amo. 13:48, NW) Ani nadu kina wai Yesu adu, ko “angi rogo Ziazia Toro” ho abawiriki agumba gu weneapai ni fuko namangi fuyo gene tungusapai yo.—Rk. 10:1, 17, 21.

2. Waigu rengbe ani ka yugo gupai nga gaani sunge tungusapai na nyanyakipaha furani?

² Sunge tungusapai na nyanyakipaha gbe furani. Gu mokedi nangia Pauro azungodi Timoteo nga: “Mo bérẽ pa tiro, na ga yugopai.” Pauro agbia kurapai kutini nga: “Bambiko manga mo wa gere mo abátasa tiro na agu yo nagia paha ngba ro.” (1 Tim. 4:16) Sidu, gaani sunge tungusapai nabatasa unga aboro. Ani naberãpa tirani mbiko ani nga avuru ga Mbori Kindo. Ani naida ka mangapai ti aregbo dunduko ngba gu gene naye na taarimo fu Yekova na ringbisihe kuti gu wene pangbanga ani atungusaha. (Frp. 1:27) Ani nayugo gupai nga, ani ‘naberãpa gaani yugopai’ ni mbakada ani tirani wenengai tipa sunge tungusapai na ni sana ani Yekova tipa gako maku mbata fu ani mangi dezirepai fu aboro.

3. Ya mo aboro dunduko rengbe kadu na nyemu gu pangbanga nga ga Kindo? Oni funga kpiapai.

³ Zavura ho ani amanga bakere asadatise ni ka tungusapai fu aboro, badungu aboro rogo gaani dagbarago ima rengba ka zanga du na nyemu gu wene pangbanga nga ga Kindo. Ani bingo gu kpiapai nga ga gu wirina nga Georg Lindal, nga gu ko natungusipai nisako rogo apapara gu rago ni bakiakia nga Iceland tona rogo gu garã nangia 1929 kuti 1947. Ko akparaka dungu akutu awaraga, ono boro ho sa nada ni Dezire Yekova te. Ko ake gupai nga: “Si aangera wa kura aboro aasoga gu pangbanga asoga nga ga Baibiri, ono badunguyo aadunga na nyemuhe te.” Agu amokedi nanyasi gu Sukuru nga ga Girada andu ka undo na gi sunge  re, ono i atungusipai a tipa dungu agarã zanga bi gu boro naadu na bakere nyemupai. Niyangaraha, fuo agarã ribua, kura aboro Iceland akpara gayo raka fu Yekova na ki zi bapatiza. *

4. Waigu rengbe ani kadu ka si du nga aboro aidanga ka dia wen pangbanga kugume te?

⁴ Ani nadu na gberãrago ho adunga aboro ni na nyemu ka wirika Ziazia Kekeapai ya. Ani ima rengba kadu wakina Pauro, nga gu ko naadu na “bakere ima gbiati rungo” mbiko dungu aYudo aaidanga ka ida kuti Yesu nga ko nangia gu Masiya i akido pako te. (Rom. 9:1-3, NW) Na ka si du nga mo nawisigo Ziazia Kekeapai na boro, mo namanga nyanyaki asadatise kadu ni wene bayugupai na mo namanga kparakpee ni bakerehe tipa gamo bawiriki Ziazia Kekeapai, ono ni amanganga pai kuti gupai ni awirikaha te na mo naida ka rugusa wirikapai na ni? Watadu na ka si du nga mo aawirikanga Ziazia Kekeapai na boro ni ki zi bapatiza te? Ya mo gipai re nayugo gupai nga gamo ingahe du na Yekova na ngbarago na gamo sunge tungusapai te? Rogo gi kekeapai re, ani nika karagapai kuti asanahe ue: (1) Ginipai nayugo gupai nga gaani sunge tungusapai na diabese ti ni? (2) Ginipai rengbe ani ka maabangirani tipaha ho ani atungusapai ni fu aboro?

5. Tipagine rengbe gu sunge ani amangaha fu Yekova dedede ka zanga kusa gu sangbanaha ti ni ani amaabangirani tipaha?

⁵ Ziazia Kekeapai nagumba gupai tipa gu boro namanga gupai Mbori akpinyemuhe nga: “Gu pai ni amanga, si adu na wenepia” watadu si adu na diabese. (Tam. 1:3) Ono tie, gere ayugongo gupai nga agu apai dunduko ani nikaa mangaha fu Yekova nika manga kina wai ani akpinyemuhe te. Ga aboro raka “hi ahi be fudifudipai” mbiko zangarengba—gu zangarengba nga gaani na ga kura aboro. (Eyo. 14:1) Na berewe a, agu aboro nasoga rani ima rengba ka rugusa rani ti tungusa ani pai gbaiga. (1 Kor. 16:9; 1 Tesa. 2:18) Ono tie, ginipai Yekova angera tipaha rogo gaani sunge tungusapai yo ka bihe singia si na diabese? Ani bingo agu abangua arengo nga ga Baibiri nga gu naundo na karagapai kuti gi sanahe re.

6. Gini apai Yekova angera tipaha nga gu nayugo gupai nga gaani sunge fuko na diabese?

⁶ Yekova nangera tipa gaani bakere asadatise gbiati hipai. Yekova na ngbarago na ani ho ani atungusapai ni kakaka mbiko ani ima kpinyemuko zavura ka aboro avuranga degatuyo furani ya. Pauro akepai nga: ‘Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.’ (Eb. 6:10) Yekova natingidapa gaani bakere asadatise atingida na pa gaani nyemuse, ka si vura du vurũ nga bawiriki Ziazia Kekeapai berani zi bapatiza te. Sidu, gupai Pauro agumbaha fu aKorindo re nga rengo tipa rani a, ko aya: ‘Gaoni sunge adu nga gbua rogo Gbia yo te,’ ka si vura du vurũ nga gaoni sunge akusanga gu sangbanaha oni amaabangironi tipaha te.—1 Kor. 15:58.

7. Ginipai rengbe ani ka wirikaha ti gupai gu mokedi nangia Pauro apehe tipa sunge tungusapai?

 ⁷ Gu mokedi nangia Pauro angia bawene mokedi, ko aakusa vovo adungurati rogo dungu agbata. Ono ho kura aboro aabisirapa Pauro ni na kini gumba gupai fuko nga wene bayugupai nga ko te, ko aafuranga tipa gu bange aboro ko aundo yo i da ni aKristano te. Kuba gure, Pauro ake gupai nga: ‘Mi susi yo; rogo manga asunge gai susi.’ (2 Kor. 11:23) Wakina Pauro, si naida ani tingidi gupai nga, bakere asadatise gbiati hipai nga agu apai Yekova abihe na nyanyakipaha gbe.

8. Ginipai si aida ani tingidihe tipa gaani sunge tungusapai?

⁸ Gaani sunge tungusapai nafu ngbarago fu Yekova. Yesu akedi abawiriki 70 i ndu ka tungusa gu pangbanga nga ga Kindo, na ti digido gayo tungusapai tipa Kindo, i ‘ayego na ngbarago.’ Ginipai i adu ti ni na bakere ngbarago? I aya: “Adaimona du ni zogozogo ra fu rani mbiko rimoro!” Ono tie, Yesu arugu gayo berãpai na ki gumba gupai fuyo nga: “Ka oni ngí nga mbiko gere nga atoro du ni zogozogo ra fu roni ya; ono oni ngí angi bambiko rimoroni du ni keke he ngbangbaturũ yo.” (Rk. 10:17-20) Yesu aima ino gupai nga anga i nikaa gbia kina gu bangisa wene asangbanapai re ti aregbo dunduko gene tungusapai yo te. Zavura ani ainongo bange agu aboro ga Yesu abawiriki atungusipai fuyo naye ki da ni aKristano te. Si aaida abawiriki rugutiyo na gupai nga ngbarago aayengo sa mbiko kina gupai nga aboro adegetuyo fuyo te. Si aaida gayo bakere ngbarago ye ti ino yo gupai nga Yekova na ngbarago na gayo nyanyaki sunge.

9. Ringbisihe kuti AGaratio 6:7-9, ka ani aahipai kindi ti ngba gaani sunge tungusapai sangbanaha rengbe ka ngia gine?

⁹ Ka ani hipai ti ngba gaani sunge tungusapai, ani nika gbia nyenye unga. Ho ani amanga bakere asadatise ni wa rengbe omerani na ni, ani “narũ he fu Toro” nimbu ani ga Mbori ziazia toro si mangisunge rogo gaani raka yo. Ka ani aandu kindi kumbatayo zanga ‘omerani bati,’ Yekova kidohe nga ko nika fu nyenye unga furani, ka si vura du vurũ nga ani aundongo boro ni zi bapatiza te.—Oni gedi AGaratio 6:7-9.

10. Tipagine kura aboro adegatuyo ti ni ho ani atungusapai ni fuyo na ka aguyo adeganga tuyo ya?

¹⁰ Singia aboro nadia rengo kugume watadu i adianga ha te, gure naru gbe riipa gupai du ngbaduyo yo. Yesu asakipai tipa gi rengo re rogo gu gako sanza nga ga bamitunga, na mi gani tunga ku rogo ngbatunga asende ni bakiakia, ono kina gu tunga nati ku rogo wene sende si nakusi zuzuhe. (Rk. 8:5-8) Yesu ape gupai nga agu asende du ni bakiakia re, narukuba agu aboro namangapai ni bakiakia ngbaduyo yo kuti “ga Mbori pai.” (Rk. 8:11-15) Wakina bamitunga, ka ani sangapai si sono ngbadu agu aboro yo ani natungusipai fuyo te. Gaani sunge nga kaa ndu kindi kumbatayo kaa rũ gu wene tunga nga gu pangbanga nga ga Kindo. Pauro aya, ‘gu ni ka dia gani mosoro tigani rengbe na gani nyanyaki sunge,’ angianga ringbisihe kuti sangbana gani sunge ya.—1 Kor. 3:8.

11. Tipagine Yekova adu ti ni na ngbarago na ga Noa tungusapai wa si avura du vurũ nga aboro aadeganga tuyo fuko te? (Oni bi gu sura duti kpotoho.)

¹¹ Rogo gu pangbanga yo nga ga aboro, badungu ga Yekova aboro natungusipai fu agu aboro naaidanga ka degatuyo ya. Ni kpiapai, si nawiraha wa Noa angia “batungusi rurupai,” tipa agarã wa 40 watadu 50. (2 Pet. 2:5) Zanga kapa, ko aduadu na gu maabangirise nga kura aboro nika degatuyo adega fuko, ono Yekova aapenga gupai nga gipai re nika manga te. Kuba gure, ho Mbori agumba gupai ni fu Noa nga ko me kurungba, Ko aya fuko: “Oni ki rimi ku kurungba yo, oni na awiro, na diaro, na dere  awiro fuo ro.” (Bam. P. 6:18) Na ho Yekova agumbapa bakio gu kurungba ni fu Noa ko aaida ko mbakadihe, Noa aima rengba ka rugatiko na gupai nga, badungu aboro adeganga tuyo fuko te mbiko ba aarengbanga kadu ho kurungba yo ka rengbe na yo te. (Bam. P. 6:15) A wa ani nainihe, boro ho sa nadege tuni fu Noa te. (Bam. P. 7:7) Ya mo Yekova aberẽ gupai nga Noa aatungusanga pai wenengai te? Wagusa te! Bangiri Mbori, Noa angia gu batungusipai naadu na diabese bambiko ko amangi gupai Yekova asanako ko mangihe.—Bam. P. 6:22.

12. Waigu gu nebi nangia Yeremaya agbia ngbarago ti gako sunge tungusapai si ki vura du vurũ nga aboro aadeganga tuyo fuko te na aguyo kini sogoko?

¹² Wakina gure a, gu nebi nangia Yeremaya atungusipai tipa agarã naima susa 40 wa si avura du vurũ nga aboro aadeganga tuyo fuko te na i aasoga ko asoga. Ko adu na bakere gberãrago mbiko gu ‘gbarasarimo na ũumohe’ nangia ga asogoko si ki sa gupai nga ko berẽpa mbu gu sunge i afuhe fuko. (Yere. 20:8, 9) Ono Yeremaya aambunga gako sunge te! Ginipai naundo ko ko naandu kindi kumbatayo na kini gbia ngbarago ti gako sunge tungusapai? Ko amoiberã ko tipa nyanyakipa apai ue. Ni bambataha, si adu nga gu ga Mbori pangbanga Yeremaya aagumbaha fu aboro nika ‘fu maabangirise fuyo tipa gayo apai ku mbata yo.’ (Yere. 29:11) Ni uehe, Yekova aima sia Yeremaya ko fura tipa Ko na ki pe gako pangbanga fu aboro. (Yere. 15:16) Ani a nandu na pangbanga maabangirise fu aboro, na ani na rimo Yekova rirani ni gako aDezire. Ho ani amaaberã rani ni kurii gi nyanyakipa apai du ue re, ani ima rengba kadu na ngbarago ka si vura du vurũ nga aboro nadegatuyo watadu i adeganga tuyo furani te.

13. Ginipai ani awirikaha tigu ga Yesu sanza du ni kekehe rogo Marako 4:26-29?

¹³ Si nadia gbanga regbo adia tipa boro tona sonosa idapase. Yesu ayugu gi rengo re rogo gu gako sanza yo du tipa gu bamitunga nati ni rame. (Oni gedi Marako 4:26-29.) Fuo bamitunga mi gani tunga, si atona ka sona yeeye na pai ho ka ni amangihe tipa si sono niipo te. Mo ima rengba a ka dia gbanga regbo mbata fu mo bi gamo bawiriki Ziazia Kekeapai ni nimangipai kuti gupai ni awirikaha. A kina wai basopobino arengbanga ka sa gani ahe si sono niipo kuti wai ni aidaha ya, ani arengbanga a ka sa gu idapase nga ga gaani abawiriki Ziazia Kekeapai si sono niipo kuti wai ani aidaha te. Sidu, ka mo dunga na gberãrago watadu omero ki bati ka si du nga gayo sonakumbatayo nadia regbo adia kisusi wai ani aaberãha ya. Wakina sunge sopabino, sunge sa aboro ni abawiriki naida na zerangbaduse.—Yak. 5:7, 8.

14. Gini kpiapai nayugo gupai nga si ima rengba ka dia gbanga regbo aboro kini ru ka tona degatuyo furani?

¹⁴ Rogo kura arago, si nadia gbanga regbo adia boro kini ru ka zio bapatiza. Oni bingo gu kpiapai nga ga Gladys na Ruby Allen, nga awirina i akedi yo ni abazakigene rogo gu garã nangia 1959 ku rogo gu papara gbata du Kanada yo nga Quebec. * Mbiko gupai nga aboro aagunde gayo amurakporo agunde na gupai rengbe abarumbatayo rogo pambori ka mangaha watadu ka pehe ka i degetuyo fu aDezire Yekova, si asa gupai nga ka aboro naadeganga tuyo furani ya. Gladys aya: “Tipa agarã ue, ani anaatungusapai kporo na kporo tipa asa nga muambe rogo aˈuru yo, na boro ho naidi ka fura na ani te! Aboro aniye kuti gayo ngbadimo ki bi rani, na i ki karagatiyo kusayo. Ono ani aambunga tungusapai te.” Yeeye, aboro atona kpinyemu rani ni bakerehe na i ki tona degatuyo furani. Adungurati awere rogo gu gbata re biata.—Yes. 60:22.

15. Ginipai 1 AKorindo 3:6, 7 ayugoho furani tipa sunge sa aboro ni abawiriki?

¹⁵ Si naida dungu aboro aida tipa ka undo  boro ni da ni bawiriki. Aboro dunduko rogo dungurati rengbe ka fu bee kuti pa undo boro ni zi bapatiza. (Oni gedi 1 AKorindo 3:6, 7.) Ni kpiapai, wirina mbu trakte watadu magazini fu gu boro du na nyemupai. Ono gu wirina re kini bi gupai nga regbo be ni ka karaga tini ti gu regbo gu boro naadu na nyemupai re aaidaha te, ni kini sana kura wirina ni karaga tini fuo ni. Gu wirina karaga tini re kini du na rengba ka tona wirika Ziazia Kekeapai na gu boro re. Fuo gure, ni kini kaa yamba dungu awirina ni basasa i naandu na ni tipa gu wirikapai re, na agu awirina re dunduko ni basasa kini ngarasi gu bawiriki Ziazia Kekeapai re ngba agene ni bakiakia. Agu awirina dunduko gu bawiriki Ziazia Kekeapai re nika gbia yo nika undo ni ni wiriki badungu apai tipa Yekova. Rogo gi gene re, agu aboro dunduko namangisunge nyanyaki tipa ka undo gu bawiriki Ziazia Kekeapai re ima rengba kadu na ngbarago ho ni azio bapatiza ni.—Yo. 4:35-38.

16. Tipagine rengbe mo kadu ti ni na ngbarago tingba gamo sunge tungusapai ka si vura du vurũ nga mo na kaza kpotose watadu bakere ome tiro te?

¹⁶ Na ka si du nga mo arengbanga ka tungusapai na ka yugopai ni bakerehe te mbiko kaza kpotose watadu bakere ome tiro te? Mo ima rengba kadu na ngbarago mbiko gu fubee mo afuhe tipa gu sunge namanga rogo zegino dunduko. Oni bingo gu kpiapai nga ga Bakindo Davide ho ko na gako akumba abatasi gayo aborokporo ni gbiati gayo ahe be AMareko. Akumba ue kama adu na bakere mbugo ka gene adunga wa ka i sovura ya, sidu, i kini nye sayo ka banda ahe. Fuo dia yo be vura, Davide afu zinahe nga i kparaka agu ahe i agbiaha dagbayo kina sa. (1 Sam. 30:21-25) Gi pangbanga re nayugopai furani tipa gu gaani sunge nga ga sa aboro ni abawiriki. Mo ima rengba ka zanga mangapai ni bakerehe wa gu mo akpinyemuhe tingba sunge tungusapai na yugopai, ono ka mo mangi ai gupai du mo na rengba ka mangaha, mo ima rengba kadu na ngbarago ti ai gu regbo vovo boro aye ka ino Yekova na ki zi bapatiza.

17. Ginipai si aida ani fu tambuahe fu Yekova tipaha?

¹⁷ Ani nafu tambuahe fu Yekova tipa gu wene gene ko abi gaani sunge ngbaha fuko. Ko ima ino gupai nga ani arengbanga ka sa aboro ngbaome i degetuyo furani watadu ka tona irisoko te. Wa vura duhe wo, ko nabi wai abi ani amangasunge fuko nyanyaki na bakio wai ani nakpinyemuko na ko nika fu mosoro afu furani. Ko nayugo wai a furani rengbe ani kadu na ngbarago tipa ai gupai rengbe ani ka mangaha tingba sunge tungusapai. (Yo. 14:12) Ani ima rengba kadu na gu kido nga, Mbori nika duadu na ngbarago na ani ka si du nga omerani abatanga te!