1. Ginipai navundo ri dungu aboro yo?

DUNGU apambori du ho areme naya si nga ga aKristano na si nairiso Mbori ngba gu gene nasa ngbarago tiko. Si nga ndu gupai navundo ri badungu aboro yo. I nasanahe nga, “Ya mo ndikidi pambori ho gbua sa, watadu apambori dunduko nasa ngbarago ti Mbori?” Ya mo ani na gu kido nga wangia ani aDezire Yekova ani nayugo rengo na gu gene ani airiso Yekova ngbaha nga gu bangisa gene nasa ngbarago tiko? Ya mo ani rengbe nzunzu kadu na ngbatunga gu kido re? Ani wisigingo agopai.

2. Tipagine gu mokedi nangia Pauro adu ti ni na kido nga gupai ko aidi kuti ni angia rengo? (1 ATesaroniko 1:5)

² Gu mokedi nangia Pauro aima du na nyanyaki kido tipa rengo. (Oni gedi 1 ATesaroniko 1:5.) Ko aadunga na gi kido re mbiko si asako gbua ko du na ngbarago te. Kuba gure, Pauro anaawisigo Fugo Mbori sirisiri. Ko aima ida kuti gupai nga “Ziazia Kekeapai dunduko si aye be ga Mbori Toro.” (2 Tim. 3:16) Ginipai ko awirikihe? Rogo Ziazia Kekeapai yo, Pauro abi gu gopai ka boro atinga kango na ni ya nga, Yesu nangia gu Masiya i akido pako, nga gu gopai agu abangbembatayo rogo pambori nangia ga aYudo yo asia ka zanga maaberã yo fuani. I ape gupai nga i aayugo rengo fu aboro tipa Mbori ono i aamanga agu apai Mbori asogaha. (Tito 1:16) Pauro aadunga wa agu abarumbatayo re te. Ko adianga berã tipa ka ida kuti gupai ko akpinyemu ka ida kuti ni rogo Fugo Mbori yo na gu ko akpingo nyemu ka ida kuti ni ya te. Ko aima du regerege ka yugo “ga Mbori pai” fu aboro dunduko na kini mangipai kuti ni.—Amo. 20:27.

3. Ya mo si naida ani ini akaragapai kuti gaani asanahe dunduko tipa ka ino gupai nga ani na rengo berani? (Oni bi gu sanduki a nga, “ Ga Yekova Amangaapai na Aberãpai Ima—‘Súsa gu ka I Gedi He.’”)

³ Gu kura aboro nabihe nga si naida ndikidi pambori karagapai  kuti ai asanahe dunduko, zavura agu asanahe adunga karagapai kuti ni rogo Ziazia Kekeapai yo ya. Ya mo ka pai mangi wo? Oni wisigingo ga Pauro kpiapai. Ko angarasi akurako aidipase nga i “ásadi apai dunduko,” ono ko aya a, badungu apai adu kinaho ko aaruganga tiko na ni ya. (1 Tesa. 5:21) Ko akepai nga “ani ini bete apai,” ko agbia kurapai kuti ni nga, “ani nabi apai wa ngana.” (1 Kor. 13:9, 12) Pauro aaruganga tiko na apai dunduko te; kina gu bangisapai re du tipa rani. Ono Pauro aima rugatiko na bangua arengo tipa Yekova. Gu inohe ko adu na ni asako ko du na gu kido nga gupai ko aidi kuti ni angia kina rengo!

4. Waigu rengbe ani ka nyakasa gaani kido nga ani ima gbia rengo, na ginipai ani nika wisigoho tipa ndikidi aKristano?

⁴ Gene sa rengbe ani ka nyakasa gaani kido ngbaha kuti gupai nga ani ima gbia rengo nga, ni ringbisa ani gu kpiapai Yesu amoihe nga ga irisombori kuti gupai aDezire Yekova amangaha areme. Rogo gi kekeapai re, ani nika bi gupai nga ndikidi aKristano (1) naká ka iriso kpiahe, (2) nayugo irisa tipa rimo Yekova, (3) nakpinyemu rengo, na (4) nakpinyemu akurayo kakaka.

5. Ginipai ani awirikaha be Yesu tipa wai ka iriso Mbori ngba ruru gene, na wai rengbe ani ka mangapai kuti agu apai ko ayuguhe?

⁵ Bambiko Yesu aima kpinyemu Yekova ni bakerehe gbe, ko aairiso kina Yekova sa, ho ko adu ni ngbangbaturũ yo na ho ko adu ni auru kpotosende. (Rk. 4:8) Ko ayugupai fu gako abawiriki a i irisi kina Yekova sa. Singia Yesu watadu gako ruru abawiriki, boro ho dagbayo yo namangisunge na akpiahe rogo irisombori yo te. Ka boro bingo Mbori te, sidu, boro ho rengbe ka manga ai he si ningere wa ko te! (Yes. 46:5) Ono ginipai tigaha du tipa manga  kpia agu aboro aboro aya tipa yo i nga asanto na kini kpari fuyo? Rogo namba ue ndiko dagba agu aNdiko naadu bawe, Yekova aya: ‘Ka mo mángi nga sese kpiahe ya, na kpia gu he du ngbangbaturũ ari yo, na gu du sende no ya, ka mo anúgadi nga fu he ya.’ (Gate 20:4, 5) Agu aboro naida ka sa ngbarago ti Mbori ima rugatiyo na gupai nga ko aidanga ani irisiko na akpiahe te.

6. Gini kpiapai nga ga irisombori aDezire Yekova apekafuo ho areme?

⁶ Agu aboro nawisigopai tipa kuru apangbanga nagumba gupai nga, ti regbo amokedi, aKristano anaairiso kina Mbori sa. Ni kpiapai, buku kuru apangbanga sa nagumba gupai nga, agu aKristano re “aima soga” gu berãpai nga ka mangasunge na akpiahe rogo aba irisombori. Areme, aDezire Yekova napeka kina fuo gu kpiapai agu aKristano nadu rogo bambata sa kama agarã amoihe re. Ani akparanga fu agu akpiahe nga ga “asanto” watadu amaraika te; na zavura ani akparanga fu Yesu a te. Na ani afunga iriso fu beere watadu ka manga ai gupai rengbe ka fu iriso fu ringara te. Ka si vura du nga kina ginipai boro aˈasada ka sarani ani mangihe vurũ, ani ima diaberã ka gia gu sangba Yesu nga: “Mo irisi Gbia nga gamo Mbori.”—Mt. 4:10.

7. Rogo gini agene du aDezire Yekova kia ti gu kura apambori?

⁷ Areme, badungu aboro nakpinyemu ka degatuyo fu agu abatungusi pambori aboro naima inoyo. I ima kpinyemu agi abatungusipai re gbe si ki da ti gupai nga i nambeda ambeda ka iriso yo. Badungu aboro nandu kurogo gayo akanisa kini ngbeke gayo abuku, na kini fu bakere marã fuyo watadu fu agu ariigbu i asongodaha. Aboro naida kuti agu apai dunduko agu abatungusi pambori re apehe. I na ngbarago ka bi agi abatungusipai re si kidu wakina wai ka i nidu na ngbarago ka bi Yesu! Ono agu aboro nairiso Mbori ngba ruru gene apekanga fuo aboro te. Wa vura duhe nga ani nayugo irisa ayugo fu agu aboro nangbembatayo rogo apai, ani ima dia gu ga Yesu yugupai kugume du ziazia nga: “Oni ki du ni awirina dunduko.” (Mt. 23:8-10) Ani airisongo aboro, singia i nga abangbembatayo rogo pambori watadu aboro-birĩ zogarago te. Na ani asongodanga gayo apai te. Kuba gure, ani nye ki zanga rimiso tirani ku rogo birĩ-zogarago yo na ki kpara tirani ti zegino. Sidu, rogo agi agene re dunduko, ani kia ti kura apambori nga gu naya si nga ga aKristano.—Yo. 18:36.

8. Waigu ani aino gupai nga Yekova naida ani taasirimoko na ki yuguhe fu aboro dunduko?

⁸ Ti kura regbo sa, Yesu akpari nga: “Buba, mo táasi rimoro.” Yekova nitiko akaragapai kuti gu kpee re ni bakere fugo ngbangbaturũ yo, ki kido he nga ko ataasa rimoko ataasa. (Yo. 12:28) Rogo ga Yesu sunge tungusapai naabaha, ko aima taasa rimo Bako. (Yo. 17:26) Si rẽarẽ tie nga, ndikidi aKristano nabihe nipa momu ka mangasunge na rimo Mbori na ka yugoho fu kura aboro.

9. Waigu agu aKristano naadu mbata ayuguhe nga i aayugo irisa ayugo tipa rimo Mbori?

⁹ Ngbutuko tifuo i sigira gu dungurati nangia ga aKristano, Yekova “andu koyo du aGendiria ni mbata, ka roga aboro dagba yo sa rimoko.” (Amo. 15:14) Agu aKristano re adu na ngbarago ka mangasunge na rimo Mbori na ka yugoho fu kura aboro. Amokedi gbiati abawiriki amangisunge na rimo Mbori ho i anaatungusapai ni na ho i aake agu abuku ni nga ga Ziazia Kekeapai. * Rogo gi gene re, i  ayugu gupai nga i nangia gu yangara aboro nayugu rimo Mbori fu aboro.—Amo. 2:14, 21.

10. Wai du ani aino gupai nga kina aDezire Yekova sa nga gu yangara aboro nayugo rimo Yekova fu aboro?

¹⁰ Ya mo aDezire Yekova nga agu aboro du tipa rimo Yekova? Oni bingo agu agopai duho. Areme, badungu abangbembatayo rogo apambori niima manga ai gupai ka i mangihe tipa ka õka gu rengo nga Mbori na kina rimoko ti ni. I ima kusaha kusayo rogo gayo sasa afugo nga ga Ziazia Kekeapai na rogo kura abangiriba, i aidanga ka mangasunge na rimo Mbori rogo gayo akanisa te. * Si tie ziazia nga, kina aDezire Yekova sa nga gu yangara aboro nayugo irisa tipa rimo Mbori. Ani nasa ndikidi rimo Mbori si du ni yuguyuguhe fu aboro ni bakerehe gbe kisusi ai gu kura ariigbu nga ga apambori! Rogo gi bangiriba re, ani naasada na omerani dũ ka raka ringbisihe kuti rimorani nga aDezire Yekova. (Yes. 43:10-12) Ani ima kusa gu Baibiri nga New World Translation of the Holy Scriptures bangehe naima susa 240 amirioni, nga gu namangasunge na rimo Yekova rogo agu aba kura abasafugo Ziazia Kekeapai adihe kusayo rogoho. Na ani nakusa agu awaraga du mburuhe rii Ziazia Kekeapai nga gu nayugo rimo Yekova rogo afugo niima susa 1,000!

11. Waigu agu aKristano nadu mbata ayugu gayo nyemuse tipa rengo?

¹¹ Yesu aima kpinyemu rengo, nga gu rengo  du tipa Mbori na Gako aringbisapai. Yesu araki ringbisihe kina kuti gu rengo re, na ko aima yugo gu rengo re fu kura aboro. (Yo. 18:37) Ndikidi apefuo Yesu aima kpinyemu rengo gbe a. (Yo. 4:23, 24) Zavura gu mokedi nangia Petero agumba gupai tipa gu pambori nangia ga aKristano nga si nga “gene rengo.” (2 Pet. 2:2) Mbiko gu bakere nyemuse agu aKristano naadu mbata adu na ni tipa rengo, i aká agu aberãpai nga ga apambori na agu asino mangapai nga ga atitase gbiati agu abipai naadunga na ngbanya dagbaha na rengo ya. (Koro. 2:8) Wakina gure areme, ndikidi aKristano namanga asadatise nyanyaki ka ‘ta rogo rengo’ yo ni maa yo mburu gayo aida dunduko gbiati gayo gene raka rii Fugo Yekova.—3 Yo. 3, 4.

12. Ginipai namanga ho agu aboro nangbe rogo apai yo aino gupai ni nga si naida i mangi ariapai rogo gaani giarogopai yo, na tipagine i amanga agi aariapai re ti ni?

¹² ADezire Yekova ayanga i ti aregbo dunduko ima rugatiyo wenengai na agu apai dunduko du rogo Ziazia Kekeapai yo te. Ti kura aregbo, i namanga aingahe amanga rogo gu gene i asaka rogo gu yugopai nga ga Ziazia Kekeapai ngbaha watadu wai i amanga mbakadapai tipa dungurati. Si aidanga ngbarani zere be gipai re te. Ziazia Kekeapai nayugoho ziazia nga ndikidi inohe nikaa kio kina kumbatayo wa regbo nikaa susa. (Koro. 1:9, 10) Yekova nayugo rengo yeeye, ani duwa ka ani du na nyemu ka sungudo ko na zerangbaduse bambiko imarago nga ga rengo nakĩ kina kumbatayo. (Snz. 4:18) Ho Riigbu Bipasunge aino gupai ni nga si naida ani mangi ariapai ngba gu gene ani agiarogo pai yo watadu kini mangipai ngbaha, i namanga ariapai nibasa. Badungu akanisa areme namanga ariapai rogo gayo ayugopai yo bambiko i naida ka sa ngbarago ti gayo aboro watadu i naida badungu aboro ini yo rogo zegino. Ono aDezire Yekova namanga aariapai bambiko ani naida ka mbeda na Mbori na kini irisiko kina ngba gu gene Yesu anaairiso ko ngbaha. (Yak. 4:4) Ho ani amanga aariapai ni, anga si mbiko agu abipai nga ga aboro du rogo zegino ariatihe te, ono si mbiko ani gi rogo Ziazia Kekeapai yo wenengai. Ani ima kpinyemu rengo!—1 Tesa. 2:3, 4.

13. Gini nyanyakipa sino ndikidi aKristano ayuguhe, na wai aDezire Yekova ayugoho areme?

¹³ I aini agu aKristano nadu mbata ti gu dungu wene asino nadu ti yo, ono gu nyanyakipa sino i aini yo ti ni gbe angia nyemuse. Yesu aya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) ADezire Yekova rogo zegino dunduko na ndikidi nyemuse dagbayo gbiati kodatise. Ani kia ti gu kura apambori dunduko bambiko ani wa aborokporo sa wa vura duhe nga ani rogo agbata ni bakiakia na gaani sino mangapai ni bakiakia. Ani nabi gi gopai nga ga nyemuse re ba gaani adunguratise yo, bakere dunguratise, na kikindigi adunguratise. Gi gopai re nanyakasa gaani kido nga kina gaani gene irisombori sa Yekova naidi na ni.

14. Ringbisihe kuti AKorosaio 3:12-14, gini nyanyakipa gene duho rengbe ani ka yugo kakaka nyemuse ngbaha fu akuarani?

¹⁴ Ziazia Kekeapai nangarasa rani nga “oni du na bakere nyemuse dagba roni.” (1 Pet. 4:8) Gene sa ani ayugo ngbatunga gu nyemuse re ngbaha nga ka mbupai fu akuarani na kini hi gayo azangarengba. Ani nagbata amomu a tipa ka yugo weneringise na kini di aboro dunduko kugume rogo dungurati, zavura aguyo naima rengba ka imisa rani vurũ. (Oni gedi AKorosaio 3:12-14.) Ho ani ayugo  ngbatunga gu nyemuse re ni, ani nayugo gupai nga ani nga ndikidi aKristano.

15. Gini kura agene ani apekafuo gu kpiapai ngbaha nga ga irisombori agu aKristano nadu rogo bambata sa kama agarã amoihe?

¹⁵ Ani napekafuo gu kpiapai a nga ga irisombori ngba kura agene gu dungurati nga ga agu aKristano nadu rogo bambata sa kama agarã amoihe. Ni kpiapai, i nambakada rani a kina wai si adu tipa agu aKristano re. Ani na agu ababiapai ninaata ata, abaakumba, gbiati amoundo abaakumba kina wai si adu tipa yo a. (Frp. 1:1; Tito 1:5) Na wakina yo, ani nairisa ga Yekova andiko tipa kodaba na rogatise, gupai Mbori apehe tipa mangasunge na kure, na ani nabanda dungurati be agu aboro aidanga ka pekafuo ga Mbori andiko ya.—Amo. 15:28, 29; 1 Kor. 5:11-13; 6:9, 10; Eb. 13:4.

16. Ginipai ani awirikaha ti gu pangbanga du rogo AEfeso 4:4-6?

¹⁶ Yesu aya dungu aboro nika ya i nga gako abawiriki, ono anga i dunduko nika ngia ndikidi abawiriki te. (Mt. 7:21-23) Ziazia Kekeapai nagumba gupai furani a nga, rogo yangara arame, badungu aboro nikaa yugo kina “kpia sinombori” gbua. (2 Tim. 3:1, 5) Ono tie, Ziazia Kekeapai nape gupai furani ziazia nga, “idapase” watadu ndikidi pambori gbua kina sa Mbori naidi na ni.—Oni gedi AEfeso 4:4-6.

17. Ada areme napekafuo Yesu na kini yugu bangisa ndikidi idapase?

¹⁷ Ada namanga bangisa ndikidi pambori areme? Ani ima wisigo agopai. Ani ima bi gu kpiapai nga ga irisombori Yesu ayuguhe na agu aKristano nadu rogo bambata sa kama agarã ki mangihe. Karagapai ho gbua kina sa—nga aDezire Yekova du. Nairiwo gu momu du ani na ni nga kadu ni ga Yekova aboro na ka ino rengo tipa Yekova na tipa gako aringbisapai! Ani naandunga andu kindi kumbatayo kaa kakuti rengo na nyanyaki kido.