ROGO agarã dunduko, badungu wene akandoro ninaakaraga tiyo kurogo gu dungurati nga ga aKristano. Oni berẽnga pa wai aboro “angi ngbangbaturũ yo” ho boro akaraga tini ni ku rogo dungurati! (Rk. 15:7, 10) Ka si du nga i karaga ro ku rogo dungurati, mo ima rengba kadu na gu kido nga Yesu, amaraika, gbiati Yekova na bakere ngbarago nga mo nga papara dungurati. Ono tie, wa mo nikaa sonosa gamo pabakure na Yekova berewe, mo ima rengba ka gbiatiro na akpakarapai. Bete agu akpakarapai re nga gine, na ginipai rengbe ka undo ro?

Badungu awirina nidu na bakere gberãrago kindi zavura tifuo i karaga yo ku rogo dungurati. Isoke mo ima rugatiro na pa wai Bakindo Davide adu. Zavura tingbafuo i mbupai fuko ti gako aingapai, ko aya: “Gimi irairaapai nadusia re.” (Tam. 40:12; 65:3) Ho boro akaraga tini ni fuo Yekova, sangbakpotoni yo ima rengba kindi kaa mbusa ni watadu zee ima rengba kaa manga ni tipa dungu agarã. Isabelle, * i akusi ri kusayo rogo dungurati tipa agarã naima susa 20 aya, “Si aima du ni ba mbumbuhe fere mi idi kuti gupai nga Yekova rengbe ka mbupai fere.” Ka mo du rogo gberãrago, mo ima rengba ka rungbura berewe rogo toro yo. (Snz. 24:10) Mo asadi ka zanga mbu gupai re si mangi ro.

Agu akurayo nabakabangiriyo nga i ima rengba ka zanga manga agu apai dunduko si aidaha tipa i du na mbembedi pabakure berewe na Yekova. Fuo i karaga Antoine ku rogo dungurati, ri aya: “Mi abihe nga bangire aima go ti badungu agu apai mi awirikihe watadu mi amangihe ho mi adu ni ni Dezire Yekova mbata.” Bambiko gupai nga kura aboro nabi tiyo wa gere, i amanganga agu apai dunduko rengbe yo ka mangaha fu Yekova te.

Ni kpiapai, ka si du nga bavugumo gbarasi kua boro, ni ima rengba kadu rogo bakere gberãrago ho ni aberãpa gu bakere regbo gbiati sunge ni si nika idaha tipa ka mehe berewe. Wakina gure a, ka  si du nga gamo pabakure na Yekova agberẽ mbiko manga mo kere ingapai, mo ima rengba kaa bihe nga si nika ida na bakere sunge tipa ka mbakada gamo pabakure na Yekova. Ono undo kinaho.

Yekova nayamba rani nga: “Oni yé awere, ani móngo [mbakadipai] na oni.” (Yes. 1:18) Mo ima manga ome nyanyaki ka ‘mbakada apai.’ Yekova ima kpinyemu ro tipa manga mo ome wa gure. Mo berẽnga gipa re: Bambiko mo ima karaga tiro fuo Yekova, ko ima rengba ka mangasunge na mo ni kpiapai ka yugo gupai nga Bakitingbanga nga iraziree!—Snz. 27:11.

Ni karaga mo tiro fuo Yekova, mo ima mbeda na ko gbe, na ko kidohe nga ko nika mbeda ambeda na mo. (Yak. 4:8) Si ni wenepai ho aboro abi gupai ni nga mo ima karaga tiro berewe ku rogo dungurati. Ono si naida mo mangi kurapai amanga. Si naida mo naanyakasa gamo nyemuse kindi tipa Bamo gbiati Bakureamo nga Yekova. Waigu rengbe mo ka manga gipai re?

Mo asadi ka maa agu asasa rengbe mo kada ti ni. Si nawira gupai nga, mo natingida gu banguaapai kindi mo awirikihe tipa Yekova gbiati gako kidohe tipa Paradizo. Ono awere, si naida mo naamanga agu apai nga ga toro dedede, ni kpiapai, tungusapai dedede, nduge tipa adunguratise, gbiati dia regbo na awirinamo. Oni bingo agi asasa re.

Mo naafura na Yekova dedede. Bamo ima rugatiko na gupai nga ka mo du kindi na gberãrago tipa gu ingahe mo amangihe, si ima rengba ka saha foro ni mbumbuhe mo kpari fuko. (Rom. 8:26) Ono wa vura duhe wo, mo “kpatagara kuti kpe kindi.” (Rom. 12:12) Andrej aya: “Sangbakpotoreyo aambusa re ni kerehe na mi kidu rogo bakere zee. Tingbafuo ai agu akparakpee dunduko mi anaamangaha, mi anaadu wenengai. Mi anaagbia bakere zereda nga ga berãse yo.” Ka mo ainongo gupai rengbe mo ka manga kparakpee tipaha ya, mo berẽpa agu akparakpee Bakindo Davide amangihe ho ko asaberã ko ni nga gu du ni kekehe rogo Atambuahe 51 na 65.

Mo naawisigo Ziazia Kekeapai dedede. Gipai re nika undo ro mo du na nyanyaki idapase na si nika sa gamo nyemuse tipa Yekova si sono. (Tam. 19:7-11) Felipe aya, “Pa zanga mi manga agu apai nga ga toro dedede nangia gu ndupai nasa re mi rungbura na ki ba gberãrago ti Yekova. Mi aaidanga ka manga gu bangisa ingahe re berewe te, sidu, mi adiberã kaa manga wisigopai nisase dedede.” Mo ima rengba ka manga gu bangisapai re. Ka mo aida undo tipa ka sia apai nga gu rengbe mo ka manga wisigopai nisase tipaha, mo ima rengba ka sana bakureamo nga gu ni naima nyaka rogo toro yo tipa undo.

Mo sonosi gamo pabakure na awirinamo berewe. Gu kura aboro nakaraga tiyo ku rogo dungurati nabakabangiriyo nga kura aboro nika du na iraira bipai tipa yo. Larissa aya: “Mi adu rogo bakere zee. Mi abihe nga mi aima imisa awirinami na ki ba gberãrago tiyo. Mi aima berã gupai re tipa gbanga regbo.” Mo du na kido nga abaakumba gbiati kura nyanyaki awirina rogo toro yo na nyemu ka undo ro wa mo nikaa sonosa gamo padu wenengai rogo toro yo berewe. (Oni bi gu sanduki nga, “ Gini Apai Rengbe Abaakumba ka Mangaha?”) I na ngbarago nga mo ima karaga tiro, na i naida mo du na ngbarago a!—Snz. 17:17.

Ginipai rengbe ka mbedisa ro gbe na dungurati? Mo naandu tipa adunguratise dunduko na awirinamo na kini kuru na yo dedede gene tungusapai yo. Wai du gipai re nika undo? Felix aya: “Dungurati adu na nyemu mi karaga tire. Mi aabi tire nga pare ima nyaka. I dunduko aundo re mi bi tire berewe nga mi nga papara dungurati, na Yekova ima mbupai fere, na mi ima rengba kaa ndu kumbatayo kaa iriso Yekova.”—Oni bi gu sanduki nga, “ Gini Apai Rengbe Mo ka Mangaha?”

Satana nikaa ye na akpakarapai kindi kutiro tipa ka asada ka rungburasi ro wa mo nikaa sonosa gamo pabakure berewe na Yekova. (Rk. 4:13) Mo du nga regerege ni nyakasa mo gamo pabakure na Yekova awere.

Yekova kidohe nibipa gako akandoro nga: “Mi agbáta ingiingi ra, mi ki yega na gu ngbuongbuo ra, mi ki vodi gu gbarĩgbarĩ ra, mi ki nyakasi gu rurungbura ra.” (Yeze. 34:16) Yekova ima undo badungu kura aboro i mbakadi gayo pagume na ko. Mo du na gu kido nga ko naida ka undo ro mo naasonosa nyanyaki pagume kindi na ko.