1-2. Ringbisihe kuti Matayo 5:11, waigu si aida ani naabi aˈasada?

YESU aima kido apefuoko nga i nika duadu na ndikidi ngbarago. Na ko aima gumba gupai a fu agu aboro nakpinyemu ko nga i nika gbiatiyo agbia na aˈasada. (Mt. 10:22, 23; Rk. 6:20-23) Ani na ngbarago kadu ni ga Kristo abawiriki. Ono waigu rengbe ani kadu ka si du nga agumerani naˈasada ka za rani ti iriso Yekova, airangbii narungosi rani, gaani abadiasunge watadu akuarani sukuru yo naasada ka sa rani ani mangi gupai du ni irairaha? Ho ani aberã ni kurii agi apai re, si ima rengba ka ba bakabangirise tirani.

² Dungu aboro ninaabingo rungosiro ni gupai rengbe yo kadu na ngbarago mbiko ho te. Ono tie, gere nga kina boro gupai nzunzu Fugo Mbori aya furani ani mangihe. Ni kpiapai, gu bawiriki nangia Yakoba ake gupai nga, kuba gupai nga ani du na bakere gberãrago, si naida ani bihe ni pa ngbarago ho ani andu ni rogo aasada. (Yak. 1:2, 12) Na Yesu agumba gupai nga si naida ani du na ngbarago zavura ho i arungosi rani ni. (Oni gedi Matayo 5:11.) Waigu rengbe ani ka banda gaani ngbarago aˈasada ki vura du vurũ? Ani rengbe ka wirika badungu apai ni wisigo ani bete apai rogo gu waraga yo Yakoba akehe fu agu aKristano naadu mbata. Ani nika tonaha ni wirika ani pai tipa agu akpakarapai agu aKristano re ahihe.

3. Ngbutuko fuo Yakoba da ni ga Yesu bawiriki, ginipai namangi?

³ Ngbutuko fuo wirina Yesu nangia Yakoba da ni bawiriki, i atona ka rungosi aKristano Yerusarema yo. (Amo. 1:14; 5:17, 18) Na ho i aimi gu bawiriki ni nangia Setefano, badungu aKristano azubo na ‘ki gbandaka agbandaka rogo ngbi Yuda na ngbi Somorona dunduko,’ ki da kina boro ku Kupurio yo na Andiokia yo. (Amo. 7:58–8:1; 11:19) Abawiriki aima gbiatiyo na badungu akpakarapai. Wa si avura  du wo, i aatungusa wene pangba kindi rogo agu aba i andu ku rogoho, na badungu aboro nada ni aKristano na dungu adungurati ki kuru rogo badungu aba. (1 Pet. 1:1) Ono fuo gure, i agbiatiyo na kere kpakarakpakara aregbo.

4. Gini kura aˈasada agu aKristano naadu mbata ahihe?

⁴ Agu aKristano naadu mbata aima gbiatiyo na badungu aˈasada. Ni kpiapai, bara rogo gu garã nangia 50 Fuo Batikayo Kristo, gu ga aRomo Bakindo nangia Kuradio afu rugapai nga aYudo dunduko guari vuru Roma. Sidu, agu aYudo dunduko nada ni aKristano ambu gayo akporo na ki ga ku rogo kura aba. (Amo. 18:1-3) Bara rogo gu garã nangia 61 Fuo Batikayo Kristo, gu mokedi nangia Pauro akepai nga, aboro asenge awirinako aKristano ku bangiri aboro, ki bafu yo ku bambukiso yo, na ki dĩ gayo ahe. (Eb. 10:32-34) A wa si adu tipa gu kura aboro, gu kura aKristano angia rungorungo aboro na kidu na akaza.—Rom. 15:26; Frp. 2:25-27.

5. Gini asanahe ani nika karagapai kuti ni?

⁵ Ho Yakoba ake gako waraga ni mbata fu gu garã nangia 62 Fuo Batikayo Kristo, ko aima inopai wenengai tipa agu aˈasada awirinako agbiatiyo na ni. Yekova arugu Yakoba ko kepai fu agu aKristano re tipa gu wene arugute narengbe ka undo yo tipa i banda gayo ngbarago i ki vura kaa gbiatiyo na aˈasada vurũ. Ani wisigingo ga Yakoba waraga na ki karagapai kuti agi asanahe re: Gini ngbarago du Yakoba akepai tipaha? Ginipai rengbe ka sa Kristano ni zanga gani ngbarago? Na wai du rengbe tatamana, idapase, gbiati wingbaduse ka undo rani ani banda gaani ngbarago ka ani vura gbiatirani na kina gini aˈasada vurũ?

6. Ringbisihe kuti Ruka 6:22, 23, tipagine rengbe Kristano kadu ti ni na ngbarago ho ni agbia tiní ni na aˈasada?

⁶ Aboro ima rengba ka berã gupai nga i rengbe kadu na ngbarago sa kina gu ka kpotoyo du  wenengai, i kidu na bakere marã na i kidu na agu aborokporo du na ngbarago. Ono ngbatunga gu ngbarago Yakoba akepai tipaha nga papara ga Mbori zuzu toro, na si arunga riipa agu apai namanga rani rogo raka yo te. (Gara. 5:22) Kristano rengbe kadu na ngbarago nzunzu ka ni ini gupai nga, ni nasa ngbarago ti Yekova na kini pekefuo ga Yesu kpiapai. (Oni gedi Ruka 6:22, 23; Koro. 1:10, 11) I rengbe ka ringbisa gaani ngbarago kuti mirãwe rogo ramba, mirãwe nadu ni bandabandaha be wege watadu mai tipa gupai nga si naaki aki kindi. Ani ima rengba a kaa ndu kindi kumbatayo kaa du na ngbarago ka kina gini apai vura kaa manga rogo gani raka yo vurũ. Ani azanganga gaani ngbarago ho ani nika du ni na kaza watadu ho marã nika du ni berani tooni te. Ani nika du na ngbarago zavura ho aboro nikaa sawia rani ni watadu ho agumerani watadu kura aboro nikaa soga rani ni. Gaani ngbarago rengbe kaa nyaka ti ai gu regbo aboro aida ka diaha kusayo. Agu aˈasada ani agbiatirani na ni mbiko gaani idapase nayugo gupai nzunzu nga ani nirengo nga ga Kristo abawiriki. (Mt. 10:22; 24:9; Yo. 15:20) Si du nga ndu gupai Yakoba akepai ti ni nga: “Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ.”—Yak. 1:2.

7-8. Wai du gaani idapase ada ni nyanyakihe ho ani agbiatirani ni na aˈasada?

⁷ Yakoba ape ndu gupai du aKristano ti ni na rengba ka hi kere aˈasada. Ko aya: “Asada gaoni idapase namanga zadapase.” (Yak. 1:3) I rengbe ka ringbisa aˈasada kuti tĩtĩ mara. Ho gu tĩtĩ mara re adu ni ni fofoihe na si kini zere, si nada ni nyanyakihe. Wakina gure a, ho ani ahi aˈasada ni, gaani idapase nanyaka. Si du nga ndu gupai Yakoba ake gupai ti ni nga: “Oni ídi fu zadapase [hipai] si mangi gaha ziazia sunge, ya oni du ziazia na baroni.” (Yak. 1:4) Ho ani abi gupai ni nga aˈasada nasa gaani idapase si du ni nyanyakihe, ani ima rengba ka hipai na ngbarago.

⁸ Rogo gu ga Yakoba waraga yo ko akehe, ko ayugu bete agu apai rengbe ka sarani ani zanga gaani ngbarago. Gini apai du nga agu apai re na wai du rengbe ani ka diabehe?

9. Tipagine ani aida na tatamana ti ni?

⁹ Ginipai rengbe ka sarani ani zanga gaani ngbarago?: Ho ani ainongo gupai ni si aida ani mangihe ya. Ho du ani ni na akpakarapai, ani nangera koyo du Yekova ni ko undo rani ani mangi wene asiapai nga gu nika sa ngbarago tiko, nika undo awirinarani, na nika undo rani ani banda gaani padu ni ruruse. (Yere. 10:23) Ani naida na tatamana tipa ka ino gupai si aida ani mangihe, na gupai si aida ani gumbaha fu agu aboro nasoga rani. Ani ima rengba kadu na gberãrago ka si du nga ani ainongo gupai si aida ani mangihe te na ani ima rengbe ka zanga gaani ngbarago ni ipo.

10. Tipa ka gbia tatamana, ginipai Yakoba 1:5 apehe furani ani mangihe?

¹⁰ Ginipai rengbe ani ka mangaha ka banda gaani  ngbarago?: Ani sana Yekova tipa tatamana. Tipa kaa hi gaani asada na ngbarago, ani du wa ka ani sana Yekova mbata rogo kparakpee yo ko fu gu tatamana furani ani aidaha tipa ka manga wene adiaberã. (Oni gedi Yakoba 1:5.) Ginipai si aida ani mangihe ka ani bihe nga Yekova akaraganga pai kuti gaani kparakpee ni ipo te? Yakoba ape gupai nga ani “ni sána” Mbori kindi. Ngbadu Yekova aimanga ho ani asana ko ni kindi tipa tatamana te. Gu Barani du ngbangbaturũ yo “ninafu” tatamana ni bakerehe ho ani amanga kparakpee ni fuko tipaha tipa ka hi gaani aˈasada. (Tam. 25:12, 13) Ko nabi agu akpakarapai abi du ani na ni, ko na gberãrago ho ani arungo ni, na ko regerege ka undo rani. Nirengo, gipai re nasarani ani du na bakere ngbarago! Ono waigu tie Yekova afu tatamana furani?

11. Gini kurapai si aida ani mangihe berewe tipa ka gbia tatamana?

¹¹ Yekova nafu tatamana furani vurube Fugoko. (Snz. 2:6) Tipa ani gbia gu tatamana re, ani du wa ka ani wisigi Fugo Mbori gbiati agu awaraga du mburuhe rii Ziazia Kekeapai. Ono si naida ani mangi gu kura dungu apai amanga kisusi gu gbua nga ka gbia bakere inohe. Ani du wa ka ani mangipai rogo gaani raka yo kuti gupai Mbori apehe furani ani mangihe. Yakoba akepai nga: “Oni dú ni amangipai, ka oni dú nga ni agipai gbua, ni nanga tironi ya.” (Yak. 1:22) Ho ani amangapai ni kuti ga Mbori arugute, ani nadu ni aboro zereda, aboro rugatinapai, na ni aboro inapai. (Yak. 3:17) Agu asino re naundo rani ani hi ai asada zanga gupai nga ani zanga gaani ngbarago.

12. Tipagine duhe ti ni ni nyanyakipa pai ani ini Ziazia Kekeapai wenengai?

¹² Fugo Mbori wakina bitiroabi, si naundo rani ani bi gupai si aida ani mangihe na wai rengbe ani ka mangaha. (Yak. 1:23-25) Ni kpiapai, ho ani awisigo Fugo Mbori ni, ani ima rengba ka bihe nga si naida ani zatirani ti zinga. Na ga Yekova undo, ani ima rengba ka wirika wai ka nye ni zezeredi rani ho aboro watadu akpakarapai asa gupai  ni nga ani zingi. Ani namangapai wenengai kuti gu kpakarapai du ani rogoho mbikopa nye ani zezeredi. Ani nadu na rengba ka berã wenengai na ki mangi bawene adiaberã. (Yak. 3:13) Nairiwo wai duhe ni nyanyakipa pai tipa ani ini Ziazia Kekeapai wenengai!

13. Tipagine si aida ani wirikipai ti ni ti agu akpiapai agu aboro du payo rogo Ziazia Kekeapai amoihe?

¹³ Ti kura aregbo, ani ni naawirika gupai si aida ani nehe kinaho ani naima manga ingahe ni. Ono gure nga kpakarakpakara gene tipa ka wirikapai. Gu wene gene rengbe ani ka gbia tatamana ngbaha nga ka wirikapai ti agu aboro namangi wenepai na aguyo namangi irairaha. Si du nga ndu gupai Yakoba angarasa rani ti ni ani bi agu akpiapai agu aboro du payo rogo Ziazia Kekeapai yo amoihe, aboro wa Abarayama, Raba, Eyobo, gbiati Eriya. (Yak. 2:21-26; 5:10, 11, 17, 18) Gu ruru amoyambu nga ga Yekova yo re ahi aˈasada nga gu naima rengba ka dia gayo ngbarago kusayo. Agu akpiapai i amoihe nga ga hipai re nayugo gupai nga na ga Yekova undo, ani ima rengba ka hipai a.

14-15. Tipagine si aidanga ani mbu mangapai kuti gaani akapa ti ni ya?

¹⁴ Ginipai rengbe ka sarani ani zanga gaani ngbarago?: Ho du ani ni na akapa tipa gaani aida. Ti kura aregbo, si ima rengba kadu ni kpakarakpakaraha furani ani rugutirani na kurapai Ziazia Kekeapai apehe. Watadu si rengbe kadu nga Yekova akaraganga pai kuti gaani akparakpee kuti wai ani aaidaha te. Gipai re ima rengba ka sarani ani du na akapa. Ka ani aamanganga pai kuti gaani akapa ya, si ima rengba ka rungburasi gaani idapase na ki gbarasi gaani pagume na Yekova. (Yak. 1:7, 8) Na si ima rengba a ka sarani ani zanga gu maabangirise du ani na ni tipa kumbatayo.

¹⁵ Gu mokedi nangia Pauro aringbisi gu maabangirise du ani na ni tipa kumbatayo kuti ũzadahe. (Eb. 6:19) Ũzadahe nanyakasa bakurungba ti regbo bavugumo na kini saha ka si merenga ku dagba ambia yo ya. Ono ũzadahe rengbe kadu na undo ti ni kina gu ka agu azogbo i na vora kuti bakurungba aakata nga ya. Kina wai zaza narengbe ka rungburasi azogbo ũzadahe, kinawo a idapase narengbe ka rungbura ka ani aamanganga pai kuti gaani akapa ya. Ho gu boro du na akapa agbia ti ni ni na akpakarapai, ni ima rengba ka zanga gani idapase kuti gupai nga Yekova nika digiso gako akidohe adigiso. Ka ani zanga gaani idapase, ani ima zanga gaani maabangirise tipa kumbatayo. A wa Yakoba apehe, gu boro du na kapa “ni wiri gu ngiri baime, yuge nita danda ha nituka ha ku sa yo.” (Yak. 1:6) Gu boro du rogo ngbatungapai wa gure arengbanga ka gbia ngbarago te!

16. Ginipai si aida ani mangihe ka ani du na akapa?

¹⁶ Ginipai rengbe ani ka mangaha ka banda gaani ngbarago?: Mo di agu akapa kusayo du mo na ni; mo ki nyakasi gamo idapase. Mo mangipai ni ipo. Ti regbo gu nebi nangia Eriya ga Yekova aboro adu na akapa tipa gayo aida. Eriya agumba gupai fuyo nga: “Rago adu waĩ oni nidu na berãpai ue? Ka ngia Yekova nga Mbori, oni peke ko; ka si ngia Bara, oni peke kina ko!” (1 Aba. 18:21) Areme a, si naida ani mangipai ni ipo. Si naida ani mangi wetekapai kadu na gu kido nitirani nga Yekova nga ndikidi Mbori, Ziazia Kekeapai nga Fugoko, na aDezire Yekova nga gako aboro. (1 Tesa. 5:21) Manga ani agi apai re dunduko nika dia gaani akapa kusayo na si ki nyakasi gaani idapase. Ka ani aida undo tipa ka diabe gaani akapa, ani ima rengba ka sana abaakumba. Si naida ani mangipai ni ipo tipa ka banda gaani ngbarago rogo iriso Yekova yo!

17. Ginipai rengbe ka manga ka ani zanga gaani wingbaduse?

¹⁷ Ginipai rengbe ka sarani ani zanga gaani ngbarago?: Ho du ani ni na gberãrago. Fugo Mbori naya: “Ka mo du na gberãrago ti uru gberãngbi, omero adu tooni gbua.” (Snz. 24:10, NW.) Gu pa-Ebere i nasaha nga, kadu “na gberãrago” rogo yo ima rengba kadu nga ka “zanga wingbaduse.” Ka mo zanga gamo wingbaduse, mo ima rengba ka zanga gamo ngbarago ni ipo.

18. Ka hipai nayugo ginipai?

 ¹⁸ Ginipai rengbe ani ka mangaha ka banda gaani ngbarago?: Mo kido kuti Yekova ko fu wingbaduse foro mo hipai. Si naida ani du na wingbaduse ka ani aaida ka hi aˈasada. (Yak. 5:11) Gu fugo Yakoba amangisunge na ni nga “naru nyanyaki” watadu nahipai, si nasa rani ani berẽpa gu boro naru nyanyaki rogo gu ba ru ni rogoho. Ani ima rengba ka berãpa banzengere nayugo wingbaduse ki ru rogo ba ni ki zanga ora ho vurani aye ni ka zubo ni.

19. Ginipai rengbe ani ka wirikaha ti gu kpiapai gu mokedi nangia Pauro amoihe?

¹⁹ Gu mokedi nangia Pauro amoi bawene kpiapai nga ga wingbaduse na hipai. Ti gu kura aregbo, ko anidu adu rurungbura. Ono ko aima du na rengba ka hipai bambiko ko akido kuti Yekova ko fu gu ome fuko ko aaidaha. (2 Kor. 12:8-10; Frp. 4:13) Ani ima rengba kadu na kina ngbatunga gu ome re gbiati wingbaduse, ka ani rugutirani ni umbasitise nga ani naida na ga Yekova undo.—Yak. 4:10.

20-21. Ginipai rengbe ani kadu na kido tipaha?

²⁰ Ani ima rengba kadu na gu kido nga, anga agu aˈasada ani agbiatirani na ni nga mbusa be Yekova te. Yakoba akido rani na gupai nga: “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” (Yak. 1:13) Ho ani aida ni kuti gupai re nga rengo du ngaha, ani naye ka da ni wene abakurea gu Barani du ngbangbaturũ yo nga boro nyemuse.—Yak. 4:8.

²¹ Yekova ‘na satise ti ko watadu kirima satise’ te. (Yak. 1:17) Ko aima songoda agu aKristano naadu rogo bambata sa kama agarã rogo agu aˈasada yo i aandu rogoho, na ko nika undo rani aundo wa du ani ni basasa dunduko areme a. Mo sana Yekova ko undo ro mo gbia tatamana, idapase, gbiati wingbaduse. Ko nika karagapai akaraga kuti gamo akparakpee. Na mo rengbe kadu na gu kido nga ko nika undo ro aundo mo banda gamo ngbarago ho mo ahi aˈasada ni!