TII ANDIKO, Yekova anaaida aida i naafu ambipo gbiati agbungu ni motumo fuko. I anaafura tipa agi aziree ue re ti aregbo dunduko kina sa rogo agu andiko yo naadu tipa fu motumo na i aima rengba ka mangasunge na gu kura i kuba guru. (Pa Mot. 1:14; 12:8; 14:30) Tipagine gipai re adu na undo ti ni? Ndupai sa adu nga, ambipo anaadunga ho ti aregbo dunduko ho si anaaida ra ni te. Tipagine ami anaadunga ho ti ni ya?

Ambipo nga agu aziree asungongo rogo ba ra sa ya, ami naaraka rogo ringara Yisaraere rogo agu adiwi du rago ni fofoihe. Vuru agarã yo dunduko rogo Tanvuo, ami nandu ku rogo agu aringara du ni fofoihe ku sudiyo, ami kini karaga tira ku Yisaraere yo rogo Marungu watadu Zerekpe. (Ga So. 2:11, 12; Yere. 8:7) Rogo gu ringara aYisaraere nadumbata, gipai re aayugo gupai nga si aima kpakara fu aYisaraere tipa i fu ambipo ni motumo ti agu aregbo rago anidu ni zezerehe.

Ono agbungu tigaami ninaatanga dedede te, sidu, ami Yisaraere yo ti aregbo dunduko vuru garã yo. Na kurapai berewe nga, agbungu nga agu aziree i azoga ra azoga kporo. (Oni ringbisinga ha na Yoane 2:14, 16.) Ringbisihe kuti gu buku nga Bible Plants and Animals, “agu agbaria dunduko gbiati agbata naadu Paresitina yo anidu adu na agu agbungu i azoga ra kporo. Ai borokporo naanidu na bambu agbungu watadu yaro ti vuro bambu tipa agu aziree re rengbe kaa raka rogoho.”​—Oni ringbisinga ha na Yesaya 60:8.

Yekova ayugu gupai nga ko na nyemuse na kidu na ruru berã niida ko gupai nga i naafu agu aziree ni motumo naanidu ho be aYisaraere vuru garã yo dunduko.