1, 2. (a) Rogo gini gene du du gi zegino re wa gu bamangi gbegberẽ apai i nasaringbanga ni sa kpio? (Oni bi gu sura duti tonatonaha.) (b) Aboro nika bipa gbarasa gi zegino re wai?

“KANGBA NANDU!” Aboro nape gi fugo re wa i akusa kere bamangi gbegberẽ apai bambukiso yo, na woro ngbadimo naapaa giiko wa i akiso ho. Tipagine ababanda bambukiso ape gi fugo re ti ni? Kpoto gi kumba re wenengai; kaza ho du tiko nayugoho nga ko ima mbeda ka kpi te. Ono tie, agi ababanda bambukiso re nandu na ko ka imoko. Wa vura duhe nga gi bamangi gbegberẽ apai re kindi ni ungako, si wa ka i ya ko ima kpi, bambiko i ima sarangbanga ko sa kpio. *

² Ka pepai ngba kura gene, gi zegino re wa kina gu kumba i nasaringbanga ko sa kpio re. I aima sarangbanga gi gbegberẽ zegino re, na i nika gbarasaha barambeda. Ziazia Kekeapai naya: “Zegino napaya apaya.” (1 Yo. 2:17) Digido gi zegino re duwa ka si da nirengo. Ono tie, kparakparapai kina dagba digido gi zegino re na gu zizi boro re. Ti regbo imo gu zizi boro re, aboro ima rengba ka yugo gayo gberãrago kuti gu sarangbanga re, ki ya runga ha te, watadu kini berẽ gupai nga i ima rengba ka mbu ni zanga imo ni. Ono  tipa gi zegino re, gu boro saringbanga ha ni ruru ni, na ni nga Bakere Bakindo nga ga zegino dunduko. (Pa Rug. 32:4) I ambunga pa gbarasaha te, na boro ho nika du na kapa tipa wai Yekova nasaringbanga ha a te. Fuo gbarasayo gi zegino re, aboro dunduko auru kpotosende na ngbangbaturũ yo nika ida kuti gupai nga gu sarangbanga re aruaru. Aboro nika gbia zereda ni bakerehe!

3. Ani nika fura tipa gini apai biama nga gu nika go ho ga Mbori Kindo nika ye ni?

³ Gi “zegino napaya apaya” re nakoda ginihe? Gu dungu apai aboro abihe areme nga si nga nyenye apai nga ga raka rogo gi zegino re nika go kusayo. Ya mo gbegberẽ pangbanga du nga gipai re? Wa gusa te! Si nga nyanyakipa papara gu “wene pangbanga nga ga ngbi.” (Mt. 24:14) Ani furanga tipa agu apai nika go ho ga Mbori Kindo nika ye ni. Ani nika fura tipa apai biama: gbegberẽ aboro, gbegberẽ ariigbu, iraira mangaapai, gbiati agu apai nasa raka ni gbegberẽhe. Rogo agi apai re dunduko ni basasa, ani nika wisigo (1) wai agi apai re afuda rani, (2) gupai Yekova nika mangaha tipaha, na (3) wai ko nika ye na wenepai kubaha.

4. Rogo gini agene gbegberẽ aboro afuda rani areme?

⁴ Wai du gbegberẽ aboro afuda rani areme? Fuo gu mokedi nangia Pauro pe gupai nga “gbegberẽ rago aye” ti gi gaani regbo re, ga Mbori toro adu kugiiko ko ke gupai berewe nga: “Gbegberẽ aboro agbérã ki susi na airanangahe a.” (2 Tim. 3:1-5, 13) Ya mo mo bingo agu afugo re si nidigisi tihe? Badungu rani kinaho naima mbu be aboro gbatapai, aboro sogote, gbiati kere amangi gbegberẽ apai. Aguyo kinaho namanga gbegberẽ apai gbaiga; agu akurayo ki ngia airanangahe nga aguyo namanga gayo ni okõokõ ho na kini mangi tiyo nga i nga ruru aboro. Ka si vura du vurũ nga gbegberẽ aboro ambusanga rani te, i kindi nafuda rani afuda. Ho ani aino pa gayo kere gbegberẽ mangaapai ni, ani nadu na rungo kpotorani yo. Ani na bakere gberãrago ho ani abi gbegberẽ aboro ni i nirungosi agude, sosono aboro gbiati agu aboro adunga boro tiyo ya. Gbegberẽ aboro nayugo gu toro adunga wa ga aboro ya, nga gu du wakina ga anya gbiati adaimona. (Yak. 3:15) Si ni pa ngbarago nga, Fugo Yekova naye na wene pangbanga kuba gu gbegberẽ pangbanga re.

5. (a) Gini momu duho kindi fu gbegberẽ aboro ni basasa? (b) Gini yangara pai nika du tipa gu gbegberẽ aboro aidanga ka saberã yo ya?

⁵ Ginipai Yekova nika mangaha? Yekova nafu momu fu gbegberẽ aboro awere i saberã yo. (Yes. 55:7) Wadu yo ni basasa dunduko, i ata gbianga gayo sarangbanga te. Gi zegino re du i naima sarangbanga ha. Ono ginipai nika manga agu aboro aidanga ka saberã yo ya, nga aguyo nika songoda gi sinoraka re dati tonatona bakere gberãngbi? Yekova ima kidohe nga ko nika dia gbegberẽ aboro bara sa kindi kusayo auru kpotosende dunduko. (Oni gedi Atambuahe 37:10.) Gbegberẽ aboro ima rengba ka berãha nga i nika bata abata be gu ngbatunga sapangbanga re. Badungu aboro nagbuka agbuka na agu apai i amangaha, na rogo gi zegino re, si nangera wa ka i ya i nabata abata be sarangbanga na sangbana gayo mangaapai. (Eyo. 21:7, 9) Ono wa vura duhe wo, Ziazia Kekeapai natingida rani na gupai nga: “[Bangiri Mbori] du ku ri ga boro apai, ko nabi pa gani nduge dunduko. Iyo rago ho te, nduunduu bitimo ho a te, yo amangi irairapai ka gbuka ku ho ni.” (Eyo. 34:21, 22) Ka boro gbunga be Yekova te. Iranangahe ho rengbe ka nanga ko te; nduunduu bitimo ho rengbe ka sa Mbori ka ko bingo apai ya te. Tifuo Aramegido, ani angera ku rogo gu ba gbegberẽ aboro adu rogoho, ka ani abingo yo ya. I ago kusayo nyeanye kindi!—Tam. 37:12-15.

6. Ada nika nye kuba gbegberẽ aboro, na tipagine du gipai re ti ni ni wene pangbanga?

 ⁶ Ada nika nye kuba gbegberẽ aboro? Yekova nakidohe nga: “Bayee aboro adía kumbo ringara, ki du na ngbarago tipa gu wenepia du kpaima.” Kumbatayo kina rogo gu bangisa atambuahe re, ani nageda gupai nga: “Ruru aboro adía kumbo ringara, ki nye anye kindi.” (Tam. 37:11, 29) Ada nga “bayee aboro” na “ruru aboro”? Bayee aboro nga agu aboro nadia agu ayugopai gbiati arugapai nga ga Yekova kugume ni umbasitise; ruru aboro nga agu aboro nakpinyemu manga gupai du ni ruruhe bangiri Yekova Mbori. Rogo zegino areme, gbegberẽ aboro ima nge kisusi ruru aboro. Ono rogo vovo zegino, bayee aboro na ruru aboro adunga ni umbayo watadu ni dungu yo te; kina yo sa nika ngia gu yangara aboro nikaa raka. Ni rengo, agu aboro re nika sa kpotosende ni paradizo!

7. Wai du gbegberẽ ariigbu afuda rani areme?

⁷ Wai du gbegberẽ ariigbu afuda rani areme? Gu dungu gbegberẽ apai namanga areme rogo zegino ayengo mbiko gu mangaapai nga ga bangisa boro te, ono si naye mbiko gu mangaapai nga ga ariigbu. Ni kpiapai, oni berẽnga pa agu ariigbu nga ga pambori nga gu nayugo ziree tipa wai du Mbori, kini yugu gupai nga Ziazia Kekeapai nga gu buku ka i akidongo kutini ya, na kini yugu ziree tipa gupai du tipa kpotosende kumbatayo gbiati aboro na gu kura dungu apai. Watadu oni berẽnga pa agu azogarago nanyakasapa avura gbiati avura nga ga angbatunga, nga gu nambusa rungorungo aboro na agu aboro adunga boro tiyo ya, na kini mangi biriki kini ngba na kina kura aboro kisusi akurayo tipa kadu na diabese rogo raka yo. Na berewe, oni berẽnga pa agu ariigbu du na ngbaduse nga gu nabirikosi arago, kini gberesipa agu ahe du tii sende yo, na kini mangi biriki tipa kaa sa bete aboro i nigbia bakere kumuko rii ngongo amirioni aboro nga aguyo nasota asota na raka. Nirengo, gbegberẽ ariigbu du naye na gu dungu gbegberẽ apai namanga areme rogo zegino.

8. Ringbisihe kuti Ziazia Kekeapai, ginipai nika manga tipa agu ariigbu aboro abihe areme nga he ho ka dihe rogo gu baha te?

⁸ Ginipai Yekova nika mangaha? Bakere gberãngbi nika tona ho aboro birĩ-zogarago nika ariatiyo ni kurii gu debäri i ayamba ri nga Babera Du na Bakere Ome Ti Ni nga gu narukuba agu ariigbu dunduko nga ga ziree apambori. (Yugo. 17:1, 2, 16; 18:1-4) I nika gbarasa agu ariigbu nga ga ziree pambori re dunduko. Na ginipai nika manga tipa gu kura gbegberẽ ariigbu? Ziazia Kekeapai namangasunge na agangara gbiati akisanga tipa ka yugokpia agu ariigbu nga gu aboro abihe areme nga he ho nika diaha rogo gu baha te. (Oni gedi Yugoti 6:14.) Fugo Mbori nagumba gupai nga i nika gbarasa azogarago gbiati agu ariigbu dunduko nasongodaha areme. Bakere gberãngbi nika digo ho i nika gbarasa agu azogarago ni nga ga gi zegino re na agu aboro dunduko nangbe na ni kuti ga Mbori Kindo. (Yere. 25:31-33) Fuo gure, gbegberẽ ariigbu ho nika du berewe te!

9. Tipagine rengbe ani kadu na gu kido ti ni nga apai nikaa manga rogo vovo kpotosende kina ti genehe?

⁹ Ginihe nika dia ba gbegberẽ ariigbu? Ya mo riigbu ho nika du rogo zegino tingbafuo Aramegido? Ziazia Kekeapai nape gupai furani nga: “Mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.” (2 Pet. 3:13) Kuru angbangbaturũ na kuru kpotosende nga gu gbegberẽ azogarago du awere gbiati gu riko aboro du tii behe, si nika go ago kusayo. Ginihe nika dia baha? Gu fugo nga “vovo angbangbaturũ na vovo kpotosende,” rogoyo nga vovo zogarago nika du na vovo rika nga ga aboro nga aguyo gu  zogarago re nikaa zoga yo. Gu Kindo du Yesu Kristo ni gaha bakindo re nika yugo kpia gu sino nzunzu du ti Yekova Mbori, nga gu Mbori namanga apai kina ti genehe. (1 Kor. 14:33) Sidu, apai nikaa mangaha rogo “vovo kpotosende” kina ti genehe. Wene akumba nika du yo, nga aguyo nikaa ngerafuo apai. (Tam. 45:16) Kristo gbiati agu aboro ko nika zogarago na yo du bangeyo nga 144,000 nikaa ngbe fu agu akumba re kumbatayo. Oni berẽnga pa gu regbo bangisa wene zogarago nika dia ba gbegberẽ ariigbu dunduko!

10. Gini ngbatunga iraira mangaapai du rogo gu ba mo araka rogoho, na wai du si afuda ro na gamo aborokporo?

¹⁰ Wai du iraira mangaapai afuda rani areme? Ani naraka rogo gu zegino naima hi be iraira mangaapai. Wasiwasi mangaapai, biriki, gbiati gu kere mangaapai nga ga zuu ima kio rogo zegino. Avunguagude nasovura tipa ka banda tiyo gbiati awiriyo be gi ngbatunga iraira mangaapai re. Agu aboro namanga aũngbarago nasa dungu ngbatunga iraira mangaapai si ningere wa kina wenepai, nga gu ayugongo irisa tipa ga Yekova arugute nibipa rurupai na irairapai ya. (Yes. 5:20) Ndikidi aKristano namanga ome tipa ka banda tiyo ti agi apai re. I nasovura tipa ka bandapa gayo padu ni ruruse rogo gu zegino ayugongo irisa tipa ga Yekova arugute re ya.

11. Ginipai ani awirikaha ti ga Yekova sarangbanga kurii Sodomo na Amora?

¹¹ Ginipai Yekova nika mangaha tipa iraira mangaapai? Oni berẽnga pa gupai ko amangihe tipa gu iraira mangaapai naadu Sodomo yo na Amora yo. (Oni gedi 2 Petero 2:6-8.) Gu ruru kumba nangia Roto gbiati gako aborokporo aima du ni fudifudiyo be gu iraira mangaapai dunduko naamanga patiyo. Ho Yekova agbarasi gu rago re ni dunduko nabaha, anga kina iraira mangaapai sa ko aadigiso ho te. Ko ‘amaa kpiapai fu agu yo nakpi nyemu kadu ni azangasinombori.’ Kina wai Yekova adigisi iraira mangaapai dunduko ti gu regbo re, kinawo a ko nika digiso gu iraira mangaapai du areme ti gu regbo ko nika gbarasa gi zegino re.

12. Gini apai mo angera kumbatayo tipa mangaha ho gi zegino re nika go ni kusayo?

¹² Gini apai nika dia ba iraira mangaapai? Paradizo kpotosende nika hi be weneapai. Oni berẽnga pa gu bawene sunge nika ngia ga sa kpotosende ni paradizo watadu ga dudua abambu tipa tirani na tipa agu aboro ani akpinyemu yo. Oni berẽnga pa gu maabangirise nga ga dia agu amirioni aboro kugume nika zingabekpio na kini yugupai fuyo tipa ga Yekova agene gbiati pangbanga wai ko amangipai na aboro. (Yes. 65:21, 22; Amo. 24:15) Ani nikaa manga badungu apai nga gu nikaa sa ngbarago tirani na kini sambuo Yekova!

13. Gu samungu nangia ga Satana, Adamu gbiati Eva ye na gini gbegberẽ apai ku rogo zegino areme?

¹³ Wai du agu apai nasa raka ni gbegberẽhe afuda rani areme? Gbegberẽ aboro, gbegberẽ ariigbu, gbiati iraira mangaapai nasa raka si du ni gbegberẽhe auru kpotosende. Da dagbarani yo rengbe ka ya ni aagbianga ti ni na avura, rungo gbiati sogote nga ga ngbatunga te? Na kaza na kpio tigaha? Ani dunduko nambu be agi apai re. Si nga sangbana gu samungu kuti Yekova nga ga agu aboro biata nangia Satana, Adamu gbiati Eva. Boro ho ka zubo be gu gberãngo gayo samungu akusihe te.

14. Ginipai Yekova nika mangaha tipa agu apai nasa raka ni gbegberẽhe? Oni funga kpiapai.

¹⁴ Ginipai Yekova nika mangaha tipa agu apai nasa raka ni gbegberẽhe? Oni berẽnga pa vura. Yekova kidohe nga ko nika nyasariipa avura nyeanye kindi. (Oni gedi  Atambuahe 46:8, 9.) Na ginipai nika manga tipa akaza? Ko nika nyasariipa ha kusayo. (Yes. 33:24) Na kpio? Yekova nika digisoho nyeanye kindi! (Yes. 25:8) Ko nika nyasariipa arungo. (Tam. 72:12-16) Ko nika manga kina gu bangisapai re tipa gu kura gbegberẽ apai dunduko nasa raka si du ni kpakarakpakara ha areme. Ko nika do gu gbegberẽ “yuge” nga ga gi zegino re kusayo, sidu, gu gbegberẽ toro nga ga Satana gbiati gako adaimona nika go kusayo nyeanye kindi.—Ef. 2:2.

15. Gini apai nika go kusayo nyeanye kindi tingbafuo Aramegido?

¹⁵ Oni berẽnga pa zegino zanga vura, kaza watadu kpio! Oni berẽnga pa zegino zanga asekere, zanga abakurungba nga ga vura watadu atiyara vura! Abundu te, na aba tingidapa agu aboro nakpiki ti ngba vura a te. Abambungua te, amunganga te, agu aboro nangera fuo aborokaza te, basunge-igo-marã tipa ngerafuo wasa-kpotose te, aba igo kangba te, akporo kpee, watadu ba amurö a te! Na wa gbegberẽ mangaapai nika go ago kusayo, ndupai adunga ho berewe tipa ababanda rago, gu rẽkerẽke ahe naapaa tipa ka yugo pa amangi gbegberẽpai, aborisi, na isoke arifungura a te! Oni berẽnga gupai nga pai ho nikaa fuda berã rani watadu kpotorani yo te.

16, 17. (a) Gini zereda berãseyo agu aboro nika bata ti regbo Aramegido nika du na ni? Oni funga kpiapai. (b) Gini apai si aida ani mangihe tipa ka nye ho gi kuru zegino re nika go ni kusayo?

¹⁶ Raka nika du wai ho agu apai nasa raka ni gbegberẽhe nika go ni kusayo? Si taata ka maa kpiaha ku berãrani yo te. Ani ima raka rogo gi kuru zegino re tipa bagbanga regbo, na mbiko gipai re, ani ima rengba ka zanga inopa wai du ani ni fudifudi rani be gu gbegberẽ apai namanga rogo zegino. Wakina gure a, agu aboro naima raka tipa gbanga regbo mbembedi na gu ba dungu agatara aru rogoho, si ima rengba ka ye kada nga i agianga woroho berewe te, na agu aboro naima raka mbembedi na ba gugudo tipa gbanga regbo, si ima rengba ka ye kada nga i agianga fuõho berewe te. Wowo, nairiwo gu zereda berãse yo aboro nika du na ni ka i di gi gbegberẽ apai re dunduko kusayo!

¹⁷ Ginipai nika dia ba agu apai nafuda berãrani areme? Atambuahe 37:11 nakaragapai ki ya: ‘Aboro nika du na ngbarago tipa gu wenepia du kpaima.’ Ya mo agi afugo re aziongo ngbaduro yo te? Gure nga gupai Yekova aidaha tipa ro. Si naida gupai nirengo nga mo mangi agu apai dunduko rengbe mo ka mangaha tipa ka nye mbembedi na Yekova Mbori gbiati gako riigbu ti gi kere yangara areme re! Mo naabi ga maabangirise na nyanyakipaha, mo niberẽ kuriihe, na ki saha ni ndikidipai beraro yo na kpotoro yo, na kini yugupa ha fu kura aboro! (1 Tim. 4:15, 16; 1 Pet. 3:15) Ka mo aamangaha wo, i agbarasanga ro ho i nika gbarasa gi gbegberẽ zegino re ni te. Kuba gure, mo nika nye ni nunga ro na ngbarago nyeanye kindi!