ROGO zegino dunduko rogo gu garã nasusi, i amoi akutu akumba ni abaakumba na ni amoundo abaakumba dagba aDezire Yekova. Ka i ya mo dagba gu wene awirina re, zanga kapa, mo gu duadu na ngbarago tipa gamo vovo momu nga ga sunge.

Ono tie, a wa du sino aboro, mo ima rengba kadu na gunde tooni. Paranga bakumba sa nga Jason, aya, “Ho i amoi re ni ni bakumba, mi abi tire nga omere arẽnga na gu vovo sunge re te.” Ho aMoize na Yeremaya agbia vovo sunge ni be Yekova i abi tiyo nga omeyo arẽnga na ni te. (Gate 4:10; Yere. 1:6) Ka i ya kinawo du mo abi tiro, wai du rengbe mo kadu na diabese na kini mangi sona kumbatayo? Mo bingo gu kpiapai nga ga gu bawiriki ni Kristano nangia Timoteo.​—Amo. 16:​1-3.

Si nawira wa garã Timoteo aambeda kuti 20 watadu si asusi he tooni ho gu mokedi nangia Pauro ayambu ko ni ko du ni gako badia nunguro. Ni du Timoteo ni paranga, ti tonatonaha, ko aima rengba ka bihe nga ko arẽnga tipa sunge te na ko aima rengba ka du dindikodindiko ka manga gu vovo sunge i afuhe fuko re. (1 Tim. 4:​11, 12; 2 Tim. 1:​1, 2, 7) Wa si avura duwo, fuo bawe agarã kusa, Pauro ape gupai fu gu dungurati naadu Firipoi yo nga: “Rogo Gbia Yesu yo mi so gima keda Timoteo fu roni fuo rago ngbutuko, . . . Bambiko kura boro adu nga ho na berãpase wa ko . . . te.”​—Frp. 2:​19, 20.

Ginipai naundo Timoteo ko da ni gu ngbatunga bakumba nyakipa ni wa gure? Oni bingo apai ti baraha sita nga gu ani nika wirikaha ti gako kpiapai.

1. Ko anaaberãpa aboro aberã nzunzu. Pauro ape gupai fu agu awirina naadu Firipoi yo nga: “[Timoteo nika] banda pa roni sirisiri.” (Frp. 2:20) Nirengo, Timoteo anaaberãpa aboro aberã. Ko adu nzunzu na nyemu gupai nga i du wenengai rogo toro yo, na ko aima ida ka fu tiko tipa yo.

Ka oni dunga wa kina gu bakama tarambiri nga guni naberã kina pa da ti regbo gbe rogo gu ba atarambiri dunduko aru rogoho kisusi berãpa dia agu aboro nandu ti gene ya. William, nga guko naima du ni iriiri bakumba tipa agarã naima susa 20, afu rugute fu vovo abaakumba na amoundo abaakumba ki ya: “Oni kpi nyemu awirina. Oni gbe berã roni gbe fuo gayo azingo angianga fuo kina ruga apai rogo dungurati ya.”

2. Ko aperesipa agu apai nga ga toro mbatayo. Ho Pauro aayugo gu kparakparapai ni naadu dagba ga Timoteo kpiapai na ga gu kura aboro, ko aya: “I nagbata gayo pai dunduko, ga Yesu Kristo apai te.” (Frp. 2:21) Pauro aakepai Roma yo. Ko abi gupai nga agu awirina naadu yo anaamanga kina gayo apai gbe. I anaafunga tiyo tipa manga agu apai nga ga toro gbe te. Ono Timoteo aamanganga ha wo te! Ho amomu akuru ni ko gbandaka wene pangbanga, ko adu na gu berã nga ga Yesaya, nga gu ko naaya: “Mi du re! Mo kédi re!”​—Yes. 6:8.

Wai du rengbe oni ka manga gaoni apai na agu apai nga ga toro ki zanga rõa kina kubani sa? Bambatapai nga, oni peresipa agu apai du na nyanyakipaha mbatayo. Pauro azungodihe ki ya, “Oni rugutironi na pa agu apai du na nyanyakipaha gbe,” NW. (Frp. 1:10) Oni moi agu apai Mbori abihe na nyanyakipaha ni gupai nyakipaha gbe furoni. Ue pai nga, taata raka. Oni mbupa agu apai nga gu nadia gaoni regbo gbiati  omeroni. Pauro azungadi Timoteo nga: “Mo óro be ga paranga gbegberẽ nyemuahe, ki peke fuo rurupai, idapase, nyemuse na zereda.”​—2 Tim. 2:22.

3. Ko aima manga ziazia sunge nyanyaki gbe. Pauro atingidi AFiripoio na gupai nga: “Oni arugu tironi na pa [Timoteo] ya, wa gude namanga pa bani, kina wo ko amangi pai, nigbandaka pa wene pangbanga na mi.” (Frp. 2:22) Iranyomoro nangia Timoteo te. Ko amangi nyanyaki sunge wasa na Pauro, na gipai re aima nyakasa gayo pa ngbanya dagbatiyo gbe.

Badungu asunge areme du rogo ga Yekova riigbu. Agu asunge re nafu ndikidi ngbarago na si rengbe ka saro mo mbedi na awirinamo. Sidu, mo moihe ni gamo sasa kaa ‘manga ga Gbia sunge zaaza.’​—1 Kor. 15:58.

4. Ko amangi agu apai ko awirikihe. Pauro akepai fu Timoteo nga: “Mo apeke gi yugopai, gi mangapai, gu pai mi napeka, idapase, gbanga hipai, nyemuse, zadapai.” (2 Tim. 3:10) Bambiko gupai nga Timoteo amangi gupai ko awirikihe, ko arẽ tipa tinda bakere tindiro.​—1 Kor. 4:17.

Ya mo bakureamo ho nga guni naima nyaka na du na bakere inohe nga guni rengbe ka undoro rogo toro yo? Ka ni adunga ya, si adu ni wenepai mo gbata guni sa. Tom, nga guko mangisunge abaakumba tipa dungu agarã, natingida gupai nga: “Kura bakumba sa na wene inohe adu na nyemu re na ki fu wene rabahe fere. Mi anaasana ko dedede tipa gako rugute na kini mangipai kutini. Gupai re asonosi gu kido mi adu na ni ni kina boro ipo.”

5. Ko anaaraba tiko araba kindi. Pauro azungodi Timoteo ki ya: “Mo rúgu tiro rogo sinombori yo.” (1 Tim. 4:7) Gu boro nga guni namanga oto abaangirã ima rengba kadu na boro ho nga guni naraba ni, ono si naida ni naaraba ti ni araba a. Pauro angarasi Timoteo nga: “Mo fu tiro fu gedapai, . . . na tungusapai na yugopai. . . . Mo berẽ pa agi apai re gbe; mo fú tiro sa ni kakaka dunduko; ga susa na apai ki du ni yuguyugu he fu aboro dũ.”​—1 Tim. 4:​13-15.

Zavura mo a, si naida mo naasonosa gamo abirĩ asonosa kindi. Ka mo kanda nga rogo toro yo ya na ka mo nyenga na kina mbaku inohe tipa agu apai nga ga dungurati ya. Berewe a, mo ne gu sino nga ga tangbaduse, isoke kaa berãha nga mo ima inopai ni kerehe na mo rengbe ka mangapai kuti ai kpakarapai zanga manga wetekapai. Wakina Timoteo a, “mo bérẽ pa tiro, na ga yugopai.”​—1 Tim. 4:16.

6. Ko aakido kuti ga Yekova toro. Ho Pauro aaberã ni kuriipa ga Timoteo sunge tungusapai, ko atingidiko na gupai nga: “Gu wene he i afu foro mo bánda ha rogo Ziazia Toro yo nanye rogo rani yo.” (2 Tim. 1:14) Tipa gupai nga Timoteo banda gako sunge tungusapai, si aaida ko kido kina kuti ga Mbori ziazia toro.

Donald nga guko naima mangasunge ni bakumba tipa dungu agarã aya: “Si naida abaakumba na amoundo abaakumba bi gayo pagume na Mbori na nyanyakipaha. Aguyo namangaha wo, i nika susa kumbatayo ‘na ngarã ku ri ngarã.’ Ka i kparikpee tipa ga Mbori toro na ki sonosi zuzuhe, i duadu ni pa maku fu awirinayo.”​—Tam. 84:7; 1 Pet. 4:11.

Si nipa ngarasaro gbe ka bi badungu vovo abaakumba na amoundo abaakumba wa mo were i nimangi sonakumbatayo rogo toro yo. Jason, i nipe pako ti tonatona gi kekeapai re aya: “Vuru agu aregbo yo dunduko mi namangisunge ni bakumba, mi ima wirika badungu apai na gimi kido ima sona. Mi nagbia ngbarago agbia awere nzunzu ti gimi sunge na mi nabihe nga si nga bawene momu!”

Ya mo mo anye kaa manga sonakumbatayo amanga kindi rogo toro yo? Mo moingo ho amanga ni gamo sasa ka wirikapai be Timoteo. Ka mo mangihe wo, mo duadu a ni pa maku fu ga Mbori aboro.